Se organización británica katli itoka Considerate Constructors Scheme a (Plan de Constructores Considerados) kiijtok kuali tlen kichiuaj Jehová itlajtoltemakauaj pampa kinmachtijkej siuamej kenijkatsa kitekiuisej uejueyi máquinas kema kichijchijkej se yankuik sucursal nechka Chelmsford, Essex. Ni organización kiijtok tlen kichijkej Jehová itlajtoltemakauaj tlauel pankisayaya, pampa inijuantij kipeualtijkej kinmachtiaj siuamej kenijkatsa tekitisej kema kichijchiuaj se kali uan kiijtok kichijtoyaj “se yankuik tlamantli”. ¿Kenke kiijtok tlauel pankisayayaj?

Ipan Gran Bretaña, se 13% tlen tekitij kampa kichijchiuaj se kali elij siuamej. Se empresa británica kiijtoua amo miakej siuamej moiljuijtokej tekitisej kampa kichijchiuaj se kali. Uan kema pejki nopa tekitl ipan Chelmsford, se 40% eliyayaj siuamej tlen nopaya tekitiyayaj uan kipano 60% kitekiuiyayaj uejueyi máquinas.

¿Kenke ni siuamej katli elij Jehová itlajtoltemakauaj kuali kichiuaj ininteki? Pampa kuali kinmachtiaj uan kinpaleuiaj kenijkatsa kichiuasej ininteki. Ni ome tlamantli moijtoua ipan nopa reglamento tlen nopa organización Considerate Constructors Scheme (Plan de Constructores Considerados). Ni reglamento kiniljuia nopa compañías constructoras ma kinextikaj kinpatiitaj katli nopaya tekitij, uan kichiuaj kema “kampa tekitij kintlepanitaj, amo kinchikoitaj, kinyolchikauaj uan kinpaleuiaj”, nojkia kema “kinmachtiaj kenijkatsa kichiuasej ininteki”.

Se tosiuaikni katli itoka Jade kimachtijkej kenijkatsa kitekiuis nopa excavadoras uan volteos kema tekitiyayaj ipan Chelmsford. Ya kiijtoua: “¡Amo ueliyaya nijneltoka! Amo kema nimoiljuik tlaj niueliskia nijchiuas se tlamantli kej ni. Maske kemantika nopa tekitl eli ouij, nochipa nechmachtiaj, kiampa nijyekoua sekinok tlamantli”. Lucy katli nojkia kitekiuia se ueyi máquina kiijtoua: “Kema pejki nitekiti nikaj, nimoiljuiyaya amo tleno ueliskia nijchiuas. Kema niasiko, nimantsi nechmachtijkej. Nitekititok ininuaya miakej toikniuaj, yeka nijyekojtok miak tlamantli”.

Tosiuaikniuaj katli nopaya tekitij, amo san kitekiuiaj máquinas. Eric, se tlen kinyakana katli tekitij, kiijtoua: “Tosiuaikniuaj kuali kimokuitlauiaj nopa máquinas uan amo kej toikniuaj tlakamej. Inijuantij nima teyolmelauaj kema kimatij se máquina axkuali tekiti”.

Carl, katli kinyakana katli tekitij ika uejueyi máquinas, kiijtoua: “Nimosentlachilia kema nikita kenijkatsa tosiuaikniuaj kuali momachtijtokej kenijkatsa kitekiuisej nopa uejueyi máquinas. Kemantika, achtoui nikintlapejpeniskia tosiuaikniuaj ma kichiuakaj se tekitl uan amo tlakamej maske tekititokej miak xiuitl”.

Katli tekitij nopaya tlauel kuali momachiliaj kema kiitaj katli kiyakana sejse tekitl kinpaleuiaj. Therese, katli kimati kenijkatsa kitekiuis uejueyi máquinas, kimati tlauel ipati kiselis se ueyi tekitl uan nojkia kimati kema tekitis moneki momokuitlauis kiampa amo mokokos. Ya kiijtoua: “Kema nijmati nechpaleuia katli nechyakana, nojua nijchiua kampeka kuali nijchiuas noteki uan amo kej kema noselti nitekiti, pampa nijmati ya motemachia kuali nijchiuas noteki. Kema nikita sekinok kipatiitaj uan kitlepanitaj tlen nijchiua nechpaleuia ma nojua kuali nijchijtos noteki”.

Abigail, katli nojkia tekiti ika nopa excavadoras uan volteos, kipatiita miak kema kipaleuiaj uan kiyolchikauaj pampa kuali kichiua iteki. Ya kiijtoua: “Nopa tlakamej katli tekitij nopaya amo nechchikoitaj. Nochipa mosentlalijtokej nechpaleuisej uan amo mokalakiaj ipan noteki, inijuantij kikauaj ma noselti nijchiua”.

Nopa siuamej katli tlapaleuiaj ipan Chelmsford, amo san tekitij ika uejueyi máquinas, nojkia kinmachtijtokej kichiuasej tekitl kej topografía, gestión del territorio, kinkualchijchiuaj máquinas katli sojsoliui uan kitlaliaj andamios. Robert, katli ininuaya tekititok tosiuaikniuaj, kiijtoua “kimatij kenijkatsa mosentlalisej kichiuasej ininteki, nima kichiuaj uan nojkia kichiuaj kuali ma mokaua”. Tom, katli kichiua tekitl tlen topografía, kiijtoua: “Tosiuaikniuaj katli nouaya tekitij, kuali kichiuaj nopa tekitl uan kinekij kuali ma mokaua”.

Yeka, Fergus katli kiyakana se tekitl, kiijtoua ika pakilistli: “Onka miak tekitl tlen uelis kichiuasej tosiuaikniuaj kema mochijchiua se kali kampa mosentiliaj Jehová itlajtoltemakauaj”.