Jehová itlajtoltemakauaj amo mokalakiaj ipan política pampa ya nopa momachtijtokej ipan Biblia. Tojuantij amo tikinchiualtiaj tlanauatianij ma kichiuakaj se tlenijki, amo tijtlapejpeniaj ajkia tekichiuas, amo tiauij kampa kintlapejpeniaj tekichiuanij yon amo tijnekij tijpatlasej tlen inijuantij kichiuaj. Ipan Biblia timomachtijtokej kenke amo kinamiki timokalakisej ipan política. Ma tikitakaj se keski:

•   Moneki tijchiuasej kej Jesús. Ya amo kema kinejki ma kitekitlalikaj (Juan 6:​15). Jesús kiijtok itokilijkauaj nojkia monekiyaya amo elisej “iaxkauaj ni Tlaltipaktli”; yeka amo kinamiki timokalakisej ipan política (Juan 17:14, 16; 18:36; Marcos 12:13-​17).

•   Tojuantij moneki tijpaleuisej toTeotsij iTlanauatijkayo, yeka Jesús kiijtok: “Uan tlakamej tlakamauitij ni kuali tlamachtili tlen kejatsa eltos kema toTeko Tlanauatia. Uan kiuikasej hasta kampa ueli techaj ipan nochi tlaltinij ipan ni Tlaltipaktli” (Mateo 24:14). ToTeotsij technauatijtok ma titeiljuikaj nechka peuas tekichiuas ni Tlanauatijkayotl, yeka ipan yon se altepetl timokalakiaj ipan política yon kampa tiitstokej (2 Corintios 5:​20; Efesios 6:​20).

•   Pampa amo timokalakiaj ipan política, ueli tikinnojnotsaj nochi maseualmej tlen toTeotsij iTlanauatijkayo. Ika tlen tikijtouaj uan tijchiuaj, tijnextiaj timotemachiaj san toTeotsij iTlanauatijkayo uelis kipatlas nochi tlen amo kuali (Salmo 56:11).

•   Tlaj timokalakiskiaj ipan política, ayokmo kuali timouikaskiaj ininuaya toikniuaj katli itstokej ipan sekinok altepemej (Colosenses 3:​14; 1 Pedro 2:​17). Kema katli itstokej ipan se religión mokalakiaj ipan política, ayokmo kuali mouikaj ininuaya sekinok maske sanse ininreligión (1 Corintios 1:​10).

 Tikintlepanitaj tlanauatianij. Maske amo timokalakiaj ipan política, nojkia tikintlepanitaj katli tlanauatiaj. Kiampa tijchiuaj kej kiijtoua Romanos 13:1: “Xikinneltokakaj tekiuejmej tlen gobierno”. Tijchiuaj tlen technauatiaj, tikixtlauaj impuestos uan nojkia tijtlepanitaj tlen kichiuaj pampa kinekij kuali ma itstokaj maseualmej. Amo kema tijnekij tijtsakuilisej tlen tlanauatianij kinekij kichiuasej, tojuantij tijneltokaj tlen Biblia techtlajtolmaka uan ‘tijtlajtlaniaj toTeko ipampa tlanauatianij uan nochi tlen kiuikaj tekiuejkayotl’, uan tlauel timomaijtouaj kema tijmatij inijuantij moneki kiijtosej tlaj nojua techkauasej ma titlajtolmoyauakaj o ayokmo (1 Timoteo 2:​1, 2).

 Nojkia tijtlepanitaj tlen maseualmej moiljuiaj, pampa inijuantij kimatij tlaj mokalakisej ipan política o amo. Yeka amo tikintsakuiliaj katli yauij kampa kintlapejpeniaj tekichiuanij yon amo tikiljuiaj se akajya amo kichiua.

 ¿Mokalakiyayaj nopa achtoui Cristo itokilijkauaj ipan política? Amo. Nopa apóstoles uan sekinok Cristo itokilijkauaj amo kema mokalakijkej ipan política. Ipan se amochtli kiijkuilojkej: “Maske kimajtoyaj monekiyaya kintlepanitasej tekichiuanij, nojkia kimatiyayaj amo monekiyaya mokalakisej ipan política” (Beyond Good Intentions—A Biblical View of Politics [Más que buenas intenciones. La visión bíblica de la política]). Nojkia se tlakatl tlen motokaxtik Orígenes, katli itstoya ipan siglo II uan III, kiijkuilok: “Cristo itokilijkauaj amo kinekij ma kintekitlalikaj kej tekichiuanij”.

 ¿Kinamiki majmauisej tekichiuanij pampa amo timokalakiaj ipan política? Amo. Tekichiuanij amo kinamiki majmauisej pampa tojuantij kuali timonejnemiltiaj. Nopa Academia Nacional de Ciencias de Ucrania kiijkuilok ipan xiuitl 2002: “Uelis ipan ni tonali miakej kualanij pampa Jehová itlajtoltemakauaj amo mokalakiaj ipan política. Yeka nopa nazis uan comunistas kintlatsakuiltijkej”. Nojkia kiijtok maske kintlatsakuiltijkej, Jehová itlajtoltemakauaj “nochipa tlatlepanitayayaj” uan “nochipa tekitiyayaj”, yeka “nopa tekichiuanij amo kema kinmakaskej”. Teipa nojkia kiijtok tlen Jehová itlajtoltemakauaj kineltokaj uan kichiuaj ipan ni tonali, “amo kichiuaj pampa kinekij kitsakuilisej tlen tlanauatiaj tekichiuanij yon pampa kinekij ma mokualanikaj ipan nopa altepetl”.