Miakej maseualmej katli mijki se tlen ininchampoyouaj amo san kinekij ma kinnankilikaj ni tlajtlanili, nojkia kinekij ma kinyolchikauakaj. Uan sekinok kiijtouaj ipan Holocausto tlauel kintlaijiyouiltijkej uan kinmiktijkej maseualmej, yeka motlajtlaniaj kenke toTeotsij kikajki ma pano.

Tlen amo melauak: Tlaj tijtlajtlanis kenke toTeotsij kikajki ma pano nopa Holocausto tlauel titlajtlakolchiuas.

 Tlen melauak: Miakej maseualmej katli kuali tlaneltokaj motlajtlaniaj kenke toTeotsij kikaua ma pano tlen amo kuali. Se neskayotl, tlajtolpanextijketl Habacuc kitlajtlanik toTeotsij: “¿Para tlen tijchiua ma nikita tlajtlakoli uan tlen axxitlauak mojmostla?” (Habacuc 1:3). Ya amo kiajuak Habacuc kema kitlajtlanik nopa, uan kichijki ma moijkuilo ipan Biblia tlen kiijtok pampa kinekiyaya ma techpaleui.

 Tlen amo melauak: ToTeotsij amo kiyolkokoua kema kiita titlaijiyouiaj.

 Tlen melauak: ToTeotsij tlauel kikualankaita kema mochiua tlen amo kuali uan kema titlaijiyouiaj (Proverbios 6:16-19). Biblia kiijtoua kema itstoya Noé, toTeotsij “nelia kiyolkokok” kema kiitak ipan nochi Tlaltipaktli kichiuayayaj tlen amo kuali (Génesis 6:5, 6). Yeka, uelis timotemachisej toTeotsij nojkia tlauel kiyolkokok kema mochijki nopa Holocausto (Malaquías 3:6).

 Tlen amo melauak: ToTeotsij kintlatsakuiltik judíos ika nopa Holocausto.

 Tlen melauak: Ipan achtoui siglo, toTeotsij kikajki romaeuanij ma kitsontlamiltikaj Jerusalén (Mateo 23:37–24:2). Uan teipa, toTeotsij ayokmo kema kintlatsakuiltik maseualmej. Ya nochi kinita sanse maske “israelitajmej, o axisraelitajmej” (Romanos 10:12).

 Tlen amo melauak: Tlaj nelnelia itstok toTeotsij Katli kipia nochi chikaualistli uan teiknelia amo kikajtoskia ma pano nopa Holocausto.

 Tlen melauak: Maske toTeotsij amo kichiua ma titlaijiyouikaj, kemantika kikaua ma pano se keski tlamantli (Santiago 1:13; 5:11).

 ToTeotsij kikajtok ma pano tlen amo kuali pampa kineki kinextis amo melauak tlen Satanás kiijtok uejkajkia. Biblia kiijtoua Diablo kinauatia ni Tlaltipaktli uan amo toTeotsij (Lucas 4:1, 2, 6; Juan 12:31). Ni ome tlamantli tlen kiijtoua Biblia techpaleuis ma tijkuamachilikaj kenke toTeotsij kikajki ma pano nopa Holocausto.

1.   ToTeotsij kikaua ma tijtlapejpenikaj tlen tijnekij tijchiuasej. Maske toTeotsij kiniljuik Adán uan Eva tlake kinekiyaya ma kichiuakaj, amo kinchiualtik ma kineltokakaj. Inijuantij ininselti kinejkej kitlapejpenisej tlake kuali uan tlake amo kuali. Tlaijiyouijkej pampa amo kuali tlen kitlapejpenijkej (Génesis 2:17; 3:6; Romanos 5:12). Uan maseualmej nojkia kiampa kichijtokej, yeka tlauel tlaijiyouijtokej. Ipan nopa amochtli Statement of Principles of Conservative Judaism (Declaración de principios del judaísmo conservador) kiijtoua: “Ipan nochi Tlaltipaktli tlaijiyouiaj miakej maseualmej pampa amo kuali kitlapejpeniaj tlen kichiuasej”. Maske kiampa panotok, toTeotsij nojua kinkaua maseualmej ininselti ma kitlapejpenikaj tlen kichiuasej.

2.   ToTeotsij uelis kisenkauas tlen panok ipan Holocausto uan kiampa kineki kichiuas. Ya kiijtoua kinyolkuis maseualmej katli ya mijkej uan nojkia katli kinmiktijkej ipan Holocausto. Uan katli itstoyaj ipan Holocausto uan amo mijkej, toTeotsij kichiuas ayokmo ma kiilnamikikaj kema tlauel kintlaijiyouiltijkej (Isaías 65:17; Hechos 24:15). ToTeotsij tlauel kiniknelia maseualmej, yeka kiaxitis nochi tlen kitenkajtok (Juan 3:16).

 Miakej maseualmej katli tlauel kintlaijiyouiltijkej kema mochijki nopa Holocausto nama kuali itstokej uan kuali tlaneltokaj. ¿Tlake kinpaleuik? Kikuamachilijkej kenke toTeotsij kikaua ma pano tlen amo kuali uan kiyekojkej nechka kitlamiltis tlaijiyouilistli.