¿Ajkia inijuantij yauij iluikak?
Tlen Biblia kiijtoua
ToTeotsij kintlapejpenijtok se keskij itekipanojkauaj katli amo kema kitlauelkajkej ma yakaj iluikak uan kema mikij kinyolkui uan kiseliaj nopa tlateochiualistli (1 Pedro 1:3, 4). Maske toTeotsij kintlapejpenijtok, nojua moneki kuali tlaneltokatosej uan kuali monejnemiltisej pampa tlaj amo kiampa kichiuasej, amo kiselisej nopa tlateochiualistli (Efesios 5:5; Filipenses 3:12-14).
¿Tlake kichiuasej iluikak?
Katli yasej iluikak, tlanauatisej uan elisej sacerdotes iuaya Jesús Mil Xiuitl (Apocalipsis 5:9, 10; 20:6). Inijuantij elisej nopa yankuik tlanauatijkayotl tlen eltok iluikak (Biblia kitokaxtia “yankuik iluikaktli”). Uan kinnauatisej nochi maseualmej (o nopa “yankuik Tlaltipaktli”). Ni tlanauatianij kichiuasej ma onka xitlaualistli uan maseualmej itstosej kej toTeotsij mosentlalijtoya achtouia (Isaías 65:17; 2 Pedro 3:13).
¿Keskij yasej iluikak?
Biblia kiijtoua 144 mil maseualmej kinyolkuisej uan yasej iluikak (Apocalipsis 7:4). Ipan se temiktli, Juan kiitak nopa “pilborregojtsi [Jesucristo katli ya moyolkuitoya] moketsayaya ipan tepetl Sión uan iuaya moketsayayaj 144 mil maseualmej” (Apocalipsis 14:1-3; Juan 1:29; 1 Pedro 1:19). Nopa tepetl Sión kiixnextia nopa ueyi tlanauatijkayotl tlen toTeotsij kimakatok Jesús uan nopa 144 mil maseualmej katli tlanauatisej iuaya ne iluikak (Salmo 2:6; Hebreos 12:22).
Katli Jehová “kintlapejpenijtok uan kinnotstok” tlanauatisej iuaya Cristo ipan iTlanauatijkayo nojkia kiniljuiaj “axmiakej” (Apocalipsis 17:14; Lucas 12:32). Ni kinextia amo miakej katli kintlapejpenijtokej yasej iluikak pampa Cristo itokilijkauaj tlauel miakej (Juan 10:16).
Tlen sekinok kineltokaj kema moiljuiaj miakej yasej iluikak
Tlen sekinok kineltokaj: Nochi katli kichiuaj tlen kuali yauij iluikak.
Tlen melauak: ToTeotsij kiijtojtok miakej maseualmej katli kichiuaj tlen kuali itstosej ipan Tlaltipaktli (Salmo 37:11, 29, 34).
Jesús kiijtok: “Axaka yajtok iluikak” (Juan 3:13). Ika ni tlajtoli, kinextik maseualmej katli kuali monejnemiltijkej kej Abraham, Moisés, Job uan David amo yajkej iluikak (Hechos 2:29, 34). Inijuantij motemachiyayaj kinyolkuisej uan itstosej ipan Tlaltipaktli (Job 14:13-15).
Katli moyolkuij uan yauij iluikak, kiniljuiaj “katli achtoui moyolkuisej” (Apocalipsis 20:6). Ni kinextia moyolkuisej sekinok uan ni mochiuas ipan Tlaltipaktli.
Biblia kiijtoua kema toTeotsij iTlanauatijkayo tekichiuas, “ayok kema aka mikis” (Apocalipsis 21:3, 4). Uan ni mochiuas ipan Tlaltipaktli, pampa ipan iluikak amo kema onkatok mikilistli.
Tlen sekinok kineltokaj: Sejse maseuali kitlapejpenia tlaj yas iluikak o itstos ipan Tlaltipaktli.
Tlen melauak: Eli toTeotsij katli kintlapejpenia ajkia kinmakas nopa “tlatlankayotl” o ajkia inijuantij yasej iluikak (Filipenses 3:14). Uajka, amo kintlapejpenia san pampa inijuantij kinekij yasej (Mateo 20:20-23).
Tlen sekinok kineltokaj: Katli motemachiaj itstosej nochipa ipan Tlaltipaktli, toTeotsij kiitak amo kinamiki yasej iluikak.
Tlen melauak: Katli itstosej nochipa ipan Tlaltipaktli toTeotsij kiniljuia “notlakauaj” uan “tlateochiualmej” (Isaías 65:21-23). Inijuantij kiaxitisej tlen toTeotsij mosentlalijtoya kichiuas: maseualmej katli amo tlajtlakolejkej itstosej nochipa ipan se xochimili ipan Tlaltipaktli (Génesis 1:28; Salmo 115:16; Isaías 45:18).
Tlen sekinok kineltokaj: Nopa número 144 mil tlen kiijtoua Apocalipsis san kiixnextia se tlamantli.
Tlen melauak: Ipan Apocalipsis eltok números tlen san kiixnextia se tlamantli uan se keski amo. Se neskayotl eli nopa “matlaktli uan omej itlayolmelajkauaj nopa pilborregojtsi” (Apocalipsis 21:14). Ma tikitakaj sekinok tlamantli tlen kinextia nopa número 144 mil amo san kiixnextia se tlamantli.
Apocalipsis 7:4 kiijtoua “keskij tlakamej kintlalilijkej nopa sello [katli kintlapejpenijkej yasej iluikak], ciento cuarenta y cuatro mil”, uan teipa kinextia ni número amo eli sanse ika nopa “onpano miakej tlakamej tlen axaka ueli kinpoua”. Ni “miakej tlakamej” nojkia momakixtiaj (Apocalipsis 7:9, 10). Tlaj nopa número 144 mil san kiixnextiskia se tlamantli uan eliskiaj nojua tlauel miakej maseualmej, uajka amo tijmatiskiaj ajkia inijuantij elij nopa miakej maseualmej uan ajkia inijuantij yasej iluikak. a
Biblia nojkia kiijtoua toTeotsij kinkojki nopa 144 mil “ma elikaj keja nopa tlen achtoui” iaxkauaj (Apocalipsis 14:4). Nopa tlajtoli “tlen achtoui” kinextia kema se tlamantli eli miak uan san kitlapejpeniaj se kentsi. Yeka, kinamiki kiampa kiniljuisej katli kintlapejpenijtokej yasej iluikak, pampa iuaya Jesús kinnauatisej nopa tlauel miakej maseualmej katli itstosej ipan Tlaltipaktli (Apocalipsis 5:10).
a Nopa tlamachtijketl Robert Thomas, kiijkuilok ni tlamantli tlen nopa número 144 mil tlen kiijtoua Apocalipsis 7:4: “Amo eli se número tlen san kiixnextia se tlamantli, kej Apocalipsis 7:9 kampa amo kiijtoua keskij maseualmej nelnelia elij. Tlaj timoiljuiskiaj san kiixnextia se tlamantli, uajka amo ueliskia tikijtosej eltok se número ipan ni amochtli tlen kinextia keski nelnelia imiaka se tlamantli” (Revelation 1-7: An Exegetical Commentary [Comentario exegético de Apocalipsis 1-7], iamayo 474).
Tlen nojkia mitspaktis tikitas
TLAMACHTILI TLEN TLAUEL IPATI
¿Tlake nopa toTeotsij iTlanauatijkayo?
Kema Jesús itstoya ipan Tlaltipaktli, nelia tlauel tlamachtik tlen ToTeotsij iTlanauatijkayo. Uejkajtok miak xiuitl maseualmej momaijtojtokej pampa kinekij ma asi nopa Tlanauatijkayotl.
TLEN BIBLIA TLAMACHTIA
Xikita kenijkatsa titlamachtiaj
Xijtlajtlani ma mitsmachtikaj ika Biblia uan kiampa tijyekojtias miak tlamantli.