Nopa ueyi tlanechikolistli tlen eyi tonali tlen 2020 amo elki sanse kej sekinok tlen ipa tijchijtokej, pampa nama nochi nopa tlamachtili motlalik ipan Internet uan kiampa uelki kiitaj kampa ueli. Maske kiampa kichijkej toikniuaj tlen Malaui uan tlen Mozambique inijuantij uelkej kiitaj nopa ueyi tlanechikolistli maske amo kipiaj Internet. ¿Kenijkatsa kichijkej?

 Katli kinyakanaj tlen kichiuaj sekinok comités uan Katli kiitaj kenijki techmachtisej tlen Katli kinyakanaj Jehová itlajtoltemakauaj, kiijtojkej nopa ueyi tlanechikolistli tlen eyi tonali ueliskia kipanoltisej ipan radio uan televisión ipan Malaui uan Mozambique maske amo kiampa mochiua ipan sekinok altepemej. ¿Kenke kiampa monejki kichiuasej? Pampa ipan Malaui tlauel patiyo Internet, yeka san se keskij kipiaj. William Chumbi, Se tlen Katli kiyakanaj Betel ipan Malaui kiijtoua: “Toikniuaj san ueliskiaj kiitasej o kikakisej nopa tlamachtili ipan radio o ipan televisión”. Luka Sibeko, seyok tlen Katli kiyakanaj Betel tlen nopa altepetl kiijtoua: “Tlaj nopa tlamachtili amo kipanoltijtoskiaj ipan radio o televisión, san se keskij toikniuaj ueltoskiaj kiitasej nopa ueyi tlanechikolistli”. Ipan Mozambique nojkia kiampa pano, miakej toikniuaj amo uelij mokouiaj se teléfono uan nojkia tlauel patiyo Internet.

 Ika nopa ueyi kokolistli COVID-19, ipan sekinok radios ya kipanoltiyayaj tlanechikoli tlen timomachtiaj ipan semana. a Toikniuaj kiniljuijkej tlaj ueliskiaj nojkia kipanoltisej nopa ueyi tlanechikolistli tlen eyi tonali.

 Toikniuaj ipan Malaui kiixnamijkej se tlaouijkayotl. Ipan nopa altepetl ipan radio uan televisión san kinkauiliyayaj ma kipanoltikaj se tlamachtili san se hora pampa moiljuiyayaj tlaj tlauel miak tlamachtili kipanoltisej, maseualmej kuesiuisej uan teipa ayokmo kinekisej kikakisej nopa radio o televisión. Toikniuaj kinixtomilijkej nochi nopa tlamachtili tlauel kinpaleuia katli kitlakakilisej. Kiniljuijkej maske momoyajtoya nopa ueyi kokolistli, maseualmej ueliskia kikakisej nopa kuali tlamachtili tlen Biblia tlamachtia. Uan nojkia tlauel kinpaleuiskia kuali ma mouikakaj uan ma yolpakikaj ininuaya ininchampoyouaj. Tlen kiijtojkej toikniuaj, kinpaleuik pampa kinkajkej ma kipanoltikaj nopa ueyi tlanechikolistli tlen eyi tonali.

 Ipan Malaui kipanoltijkej nopa ueyi tlanechikolistli tlen eyi tonali ipan radio uan televisión. Tlen kipanoltiaj kikakij tlauel miakej maseualmej ipan nochi nopa altepemej. Ipan Mozambique, kipanoltijkej ni tlamachtili ipan 85 radios uan san se kipanoltijkej ipan televisión.

 Kema kipanoltijkej ipan televisión nopa ueyi tlanechikolistli tlen eyi tonali, kitekiuijkej se 28,227 dólares b uan kitekiuijkej nechka 20,000 dólares kema kipanoltijkej ipan radio tlen ome altepemej. Nopa radios amo sanse tlainankej, sekij 15 uan sekij 2,777 dólares.

 Toikniuaj kuali kiitakej kenijkatsa kitekiuisej tomij. Se neskayotl, ipan Malaui kiitakej kenijkatsa kichiuaskiaj amo miak tlaxtlauasej. Yeka, kintemouilijkej se 30 %, uan kiampa amo motekiuik se 1,711 dólares. Uan ipan se keski radios tlen Mozambique nojkia amo tlauel patiyo tlainankej pampa toikniuaj nelia tlaxtlajkej tlen mokajtoyaj temakasej uan nojkia pampa nima tlaxtlauaj.

 Toikniuaj tlauel kitlaskamatij pampa uelkej kiitaj uan kikakij nopa ueyi tlanechikolistli tlen eyi tonali. Patrick, se ueuejtlakatl katli eua Malaui kiijtok: “Tlauel tikintlaskamatiliaj toikniuaj Katli kinyakanaj Jehová itlajtoltemakauaj pampa maske amo kema kiampa mochijtoya, techpaleuijkej ma tikitakaj nopa ueyi tlanechikolistli maske momoyajtok ni ueyi kokolistli”. Seyok toikni katli eua Malaui, uan itoka Isaac kiijtok: “Amo tijpiaj televisión o seyok tlamantli kampa ueliskia tikitasej nopa ueyi tlanechikolistli. Yeka, tlauel tijtlaskamatij pampa uelki tijkajki ipan radio. Tikitakej kej se nemaktli tlen Jehová itlanechikol techmakak. Nochi nochampoyouaj tlauel kinpaleuik nopa tlamachtili. Tikitstokej kenijkatsa Jehová tlauel kipatiita itlanechikol”.

 Ipan Mozambique, se katli namanok pejtok tlajtolmoyaua kiitak nopa ueyi tlanechikolistli tlen 2020. Ya amo kema yajtoya ipan se ueyi tlanechikolistli. Ya, kiijtok: “Kema ipan televisión nikitak nopa ueyi tlanechikolistli, nikitak san Jehová Katli kipia nochi chikaualistli pampa uelki tikitaj nopa tlamachtili maske momoyajtok COVID-19. Nojkia, nikitak kenijkatsa toikniuaj tlauel moikneliaj uan nama nimotemachia niitstok ipan religión tlen melauak”.

 Se ueuejtlakatl katli itoka Wyson, kiijtok: “Nijneki nijtlaskamatilis nopa ‘tlalnamijkatlatekipanojketl’ pampa nochipa kiita kenijkatsa techpaleuis maske onka ni ueyi kokolistli. Ipan nochi altepemej san tojuantij tielij tlauel titeikneltsitsij. Maske kiampa tiitstokej, pampa nopa ueyi tlanechikolistli kipanoltijkej ipan radio uan televisión uelki tijkakij uan tlauel techpaleuik”.

 Katli kinyakanaj tlen kichiuaj sekinok comités uan Katli kiitaj kenijki techmachtisej tlen Katli kinyakanaj Jehová itlajtoltemakauaj, sampa kiijtojkej se keskij altepemej kipanoltiskiaj ipan radio uan televisión nopa ueyi tlanechikolistli tlen 2021. ¿Kenijkatsa moixtlajki? Pampa toikniuaj temakaj tomij tlen motekiuia ipan toTeotsij itlanechikol uan kichiuaj ipan donate.isa4310.com. Tlauel tiinmechtlaskamatiliaj pampa intemakaj tlen inkipiaj ika nochi inmoyolo.