IPAN SE KESKI XIUITL TLEN PANOTOK, MIAKEJ MOMACHTIJTOKEJ TLAKE KIYOLMATIJ MASEUALMEJ KEMA MIKI SE AKAJYA KATLI TLAUEL KIIKNELIAJ. Kej ya tikitakej, miak tlamantli tlen ixtlamatinij kiijtouaj ma kichiuakaj katli mokuesojtokej eli sanse ika tlen Biblia kiijtoua. Ni kinextia Biblia nojua tlauel tepaleuia ipan ni tonali. Amo san techiljuia kenijkatsa kuali tiitstosej, nojkia kinyolchikaua katli mokuesouaj kema miki se akajya katli tlauel kiikneliaj uan nopa amo uelis kipantisej sejkanok.

• Uelis timotemachis katli mikij amo tlaijiyouiaj.

  Ipan Eclesiastés 9:5, Biblia kiijtoua “tlen miktokej ayok tleno kimatij”. Inijuantij ayokmo tleno moiljuiaj (Salmo 146:4). Yeka, Biblia kiijtoua katli miktokej kejuak kochtokej (Juan 11:11).

• Tlauel mitsyolchikauas tlaj timotemachis toTeotsij mitsiknelia.

  Biblia kiijtoua: “ToTeko [Jehová *] kinmokuitlauia tlen kichiuaj tlen xitlauak iixtla, uan kinkaki kema momaijtouaj” (1 Pedro 3:12). Kema timomaijtouaj pampa tijnekij tikiljuisej toTeotsij tlen tijyolmatij, amo san techpaleuia kuali ma tijyolmatikaj o ma timoiljuikaj tlake tijchiuasej. Nojkia techpaleuia kuali ma timouikakaj iuaya, uan ya uelis techyolchikauas ika itonal.

• Timotemachis teipa kuali tiitstos.

  Biblia miakpa kiijtoua moyolkuisej katli miktokej. Nojkia, kej ni kiijtoua tiitstosej teipa: “ToTeko kinuachilis nochi ininixayo. Uan ayok kema aki mikis, niyon mokuesos, niyon chokas, niyon mokokos” (Apocalipsis 21:3, 4). ¡Ximoiljui kema kiampa tiitstosej!

Miakej maseualmej katli motemachiaj ipan Jehová, tlen Biblia kiijtoua eli toTeotsij, kinpaleuia amo tlauel ma mokuesokaj kema miki katli tlauel kiikneliaj pampa motemachiaj teipa moyolkuis. Ann, katli mijki iueue kema panotoya 65 xiuitl ika mosenkajtoyaj, kiijtoua: “Biblia nechpaleuijtok ma nimotemachi kema miki katli tlauel tikikneliaj amo tlaijiyouijtok, uan toTeotsij kinyolkuis nochi katli kinilnamiktok. Nochipa nimoiljuia ipan ni tlamantli kema nikilnamiki noueue, uan nopa nechpaleuia ma nikijiyouia tlen nechpanok”.

Tina, katli tikijtojkej achtoui, kiijtoua: “Nikitstok kenijkatsa toTeotsij tlauel nechpaleuijtiualajtok kema mijki Timo. Nojkia, nikitstok kenijkatsa Jehová tlauel nechyolchikaua kema nimokuesoua. Uan pampa nimotemachia nelnelia moyolkuisej katli miktokej, nechpaleuia amo tlauel ma nimokuesojto pampa nijmati sampa nikitas Timo”.

Miakej nojkia kiyolmatij kej Tina pampa motemachiaj ipan tlen Biblia kiijtoua. Tlaj ta timoiljuia amo nelnelia panos tlen Biblia kiijtoua, tlauel mitspaleuis tlaj tikitas kenke uelis timotemachis nelia mochiuas tlen nopaya kiijtoua uan kenijkatsa uelis mitspaleuis ipan monemilis. Nojkia tikitas san Biblia nelia tlauel tepaleuia kema miki se akajya katli tlauel tikikneliaj.

Ipan jw.org tikitas videos kampa kiijtoua tlake kinpano katli miktokej.

 ¿TLAKE KINPANO KATLI MIKIJ?

¿TIJNEKISKIA TIJMATIS KUALI TLAMACHTILI?