KATLI MOSENKAJTOKEJ
3. Ximotlepanitakaj
¿TLAKE KIIJTOSNEKI?
Tlaj katli kipiaj ininsiua o ininueue motlepanitaj, uajka mopaleuisej maske amo kinekiskiaj kichiuasej sanse tlamantli. Nopa amochtli Diez claves para transformar tu matrimonio kiijtoua: “Katli motlepanitaj amo kiijtouaj amo kema kipatlasej tlen moiljuiaj. Kema kipiaj se kuesoli, kuali kitlakakiliaj tlen kiijtoua ininsiua o ininueue uan kitlapejpeniaj tlen omej uelis kinpaleuis”.
TLEN BIBLIA TETLAJTOLMAKA: “Se tlen teiknelia [...] axitskuinti [o amo san moiljuia tlen ya kipaleuis]” (1 Corintios 13:4, 5).
“Na nimoiljuia nijtlepanitas nosiua kiijtosneki nijchiuas kampeka nikiknelis uan amo nijyolkokos o nijchiuas ayokmo kuali ma tiitstokaj” (Micah).
¿KENKE TLAUEL MONEKI?
Kema katli mosiuajtijtokej o monamiktijtokej amo motlepanitaj, peuaj motlaijiljuiaj uan moyolkokouaj ika tlen kiijtouaj. Ixtlamatinij kiijtouaj katli kiampa kichiuaj teipa mokauaj o moamaixpolouaj.
“Tlaj tijyolkokos, tijtlaijiljuis o tijpinajtis mosiua, moiljuis amo tleno ipati uan ayokmo motemachis ipan ta” (Brian).
¿TLAKE UELISKIA TIJCHIUAS?
XIMOILJUI
Ximoiljui tlake tikijtok kema tikamanaltik iuaya mosiua o moueue uan tlake tlamantli tlen kuali o tlen amo kuali tijchijki ipan ni semana. Teipa xijnankili ni tlajtlanili:
¿Keskipa tijyolkokok uan keskipa tikiljuik se yejyektsi tlamantli?
¿Kenijkatsa tijnextik tijtlepanita?
TLEN UELIS INMOTLATSINTOKISEJ
¿Tlake tlamantli tlen tikijtouaj o tlen tijchiuaj kinextia timotlepanitaj?
¿Tlake tlamantli tlen tikijtouaj o tlen tijchiuaj kinextia amo timotlepanitaj?
XIJCHIUA NI
Xikijkuilo eyi tlamantli tlen ika tijnekiskia mosiua o moueue ma mitstlepanita. Teipa xijmaka tlen tikijkuilok uan ya nojkia ma mitsmaka tlen ya kiijkuilok.
Xikijkuilo tlake kuajkuali tlamantli kinextia mosiua o moueue uan xikiljui tlauel tikiknelia pampa kiampa kichiua.
“Na nijtlepanita noueue uan yeka ika tlen nijchiua nijnextia nijpatiita uan nijneki ma yolpaki. Tlaj tijneki tijnextis tijtlepanita se akajya, amo nochipa moneki tijchiuas uejueyi tlamantli, kemantika uelis tijnextis ika tlamantli tlen amo uejueyi” (Megan).
Moueue o mosiua moneki kiitas tijtlepanita, uan amo san ta timoiljuis kiampa tijchiua.
TLEN BIBLIA TETLAJTOLMAKA: “Moneki xikintlasojtlakaj uan xikinchiuilikaj sekinok tlen kuali. Sejse inmojuantij ximoiknonekikaj uan xitekamauikaj ika yamanik. Xijpiakaj inmoyolo ika nochimej” (Colosenses 3:12).
