TETAJMEJ
7. Xikinmachti ma moyakanakaj ika kuajkuali tlamantli
¿TLAKE KIIJTOSNEKI?
Nopa kuajkuali tlamantli eli tlen kipaleuia se akajya kuali ma monejnemilti. Tlaj ta tijchiua kampeka amo titlakajkayauas, uelis nojkia tikinmachtia mokoneuaj amo ma tlakajkayauakaj.
Se akajya katli moyakana ika kuajkuali tlamantli, tlauel tekiti, amo techikoita uan moiljuia ipan sekinok, uan katli nojua telpokamej nima uelij kichiuaj ni tlamantli.
TLEN BIBLIA TETLAJTOLMAKA: “Xijnextili mokone kema noja pilsiltsi para ma yaui ipan nopa ojtli tlen toTeko kisenkajtok para ya. Uan kema yajaya ueuejtias noja nopano monejnemiltis” (Proverbios 22:6).
¿KENKE TLAUEL MONEKI?
Ipan ni tonali, tlauel moneki ma timoyakanakaj ika kuajkuali tlamantli. “Ipan celular o tableta tokoneuaj uelis kiitasej tlamantli tlen amo kuali. Ueliskia moseuijtosej tonakastla uan kitlachilijtosej tlen amo kinamiki” (Karyn).
TLEN BIBLIA TETLAJTOLMAKA: “Tlakamej tlen ya moskaltijtokej [...] uelij kimachiliaj itlajtol toTeko tlen más ouij. Ni tlakamej kitekiuijtokej inintlalnamikilis para kiixmatisej tlen kuali uan tlen axkuali para kichiuasej” (Hebreos 5:14).
Tlauel moneki ma titlatlepanitakaj. Moneki “titetlaskamatisej” uan “titetlajpalosej”. Uan nojkia moneki tijnextisej techtekipachoua tlen kinpano sekinok pampa ipan ni tonali maseualmej ayokmo kiampa kichiuaj, inijuantij san kitlachiliaj inincelular o inintableta.
TLEN BIBLIA TETLAJTOLMAKA: “Xikinchiuilikaj sekinok keja inkinekij sekinok ma inmechchiuilikaj” (Lucas 6:31).
¿TLAKE UELISKIA TIJCHIUAS?
Xikijto ika tlake kuajkuali tlamantli timoyakana. Ixtlamatinij kiijtouaj telpokamej amo motekaj iuaya se akajya kema ayamo mosiuajtiaj o monamiktiaj tlaj inintatauaj achtoui kiniljuiaj kenke amo kinamiki kiampa kichiuasej.
XIJCHIUA NI: Kema tikitas o tijkakis se tlamantli tlen namanok panotok, xikiljui mokone ika tlake kuajkuali tlamantli timoyakana. Tlaj tijkakis se akajya kimiktijkej pampa kikualankaitayayaj, ueliskia tikiljuis: “Tlauel amo kuali tlen panok, ¿kenke timoiljuia maseualmej kiampa kichiuaj?”.
“Tokoneuaj ouij kimatisej kitlapejpenisej tlake kichiuasej tlaj amo kimatij tlake tlamantli kuali uan tlake amo kuali” (Brandon).
Xikinmachti ma tlatlepanitakaj. Konemej nojkia uelis kintekipachos tlen kinpano sekinok, kiyekosej “tetlaskamatisej” uan “tetlajpalosej”. Se amochtli kiijtoua: “Konemej kinekisej kinpaleuisej ininchampoyouaj, katli ininuaya momachtiaj uan maseualmej katli itstokej ipan ininaltepe tlaj kinitasej nojkia tlauel ininpati” (Parenting Without Borders).
XIJCHIUA NI: Xikiniljui mokoneuaj ma mitspaleuikaj ipan se keski tlamantli, kiampa kiitasej kenke tlauel ipati kinpaleuisej sekinok.
“Tlaj mokoneuaj tlapaleuisej kalijtik, amo kiouijmatisej kema ayokmo itstosej inmouaya pampa ya kimajtosej tlake moneki kichiuasej” (Tara).
