TA, ¿NOJKIA TIMOTLAJTLANIJTOK NI KEMA PANOTOK SE TLAMANTLI TLEN AMO KUALI? ¿MITSPANOTOK SE TLAMANTLI TLEN AMO KUALI TLEN KICHIJTOK NOJKIA XIMOILJUI TLAJ TOTEOTSIJ KITEKIPACHOUA TLEN MITSPANO?

Ichampoyouaj Sheila, katli itstok Estados Unidos, nochipa kinpaktik itstosej ipan se religión. Ya kiijtoua: “Maske pejki nitlaneltoka ipan toTeotsij kema nojua nieliyaya nisiuapil pampa nijmajtoya yaya techchijchijtok, amo kema nijyolmatki tlaj kuali nimouikayaya iuaya. Uan maske nijmajtoya nechitayaya uan amo nechkualankaitayaya, nimoiljuiyaya amo kema nechtlakakiliyaya yon amo kitekipachouayaya tlen nechpanoyaya”. ¿Kenke kiampa moiljuiyaya? Ya kiijtoua: “Nochampoyouaj kinpanok miak tlamantli tlen amo kuali, uan nesiyaya toTeotsij amo techpaleuiyaya yon se kentsi”.

Sanse kej Sheila, maske tijmati itstok toTeotsij katli kipia miak chikaualistli, uelis nojkia timoiljuia tlaj nelia kitekipachoua tlen mitspano. Job, se tlakatl katli motemachiyaya ipan ichikaualis uan itlalnamikilis Jehová, nojkia kiampa moiljuik (Job 2:3; 9:4). Teipa kema Job kipanotiajki miak tlamantli tlen tlauel amo kuali uan moiljuik ayokmo kema kuali itstoskia, kitlatsintokilik toTeotsij: “¿Para tlen timouejkatlalia tlen na? ¿Para tlen tinechita keja nieliskia nimokualankaitaka?” (Job 13:24).

¿Tlake kiijtoua Biblia? ¿ToTeotsij kichiua ma titlaijiyouikaj? ¿Kitekipachoua tlen kinpano nochi maseualmej uan sejse tlen tojuantij? ¿Uelis tijmatisej tlaj nelia techixmati, techkuamachilia uan techpaleuia kema tijpiaj kuesoli?

Ipan nopa sekinok tlamachtili tikitasej kenijkatsa tlen toTeotsij kichijchijtok uan tlen Biblia kiijtoua kinextia ya kena kitekipachoua tlen techpano (Romanos 1:20). Tlaj kuali tikixmatis toTeotsij, katli mitschijchijki, mitspaleuis ximotemachi ya nelia tlauel mitsiknelia (1 Juan 2:3; 1 Pedro 5:7).