TLAJ mijki se akajya katli tlauel tikiknelia, uelis nojkia timokuesok, tijmatki moselti timokajki uan amo tleno uelki tijchijki, uan uelis nojkia tikualanki, timotlajtlakoltik uan timajmajki. Uelis timoiljuik san tlapik nojua tiitstos.

Amo kenijki tlaj miak tonali timokuesos uan tichokas, nopa amo kiijtosneki ta amo tleno tikijiyouia. Kema timokuesoua, tijnextia tlauel tikikneliyaya katli mijki. Uan, ¿uelis se tonali ayokmo tlauel timoyolkokojtosej?

Maske timoiljuia nochipa timoyolkokojtos uan timokuesojtos, tlaj tijchiuas tlen namantsi tikitasej uelis mitspaleuis.

AMO XIMOIJIYOUI KEMA TIJNEKIS TICHOKAS

Maske amo nochi sanse mokuesouaj yon uejkauaj sanse tonali, tlauel techpaleuis tlaj tichokasej. Vanessa, katli tikijtojkej achtoui, kiijtoua: “Nochipa san nimochokiliyaya. Nijmatiyaya monekiyaya nijkixtis tlen nijyolmatiyaya”. Sofía, katli sanima miktiuetski se isiuaikni, kiijtoua: “Tlauel amo kuali nijmati kema notlalnamikilis uan tlen nijyolmati nechyolkokoua. Kejuak sampa nijtojtoxoma kampa nimokokojtoya. Maske tlauel nechkokoua, moneki nijchiuas uan kiampa uelis kejuak motskis o pachiuis kampa nimokokojtok”.

XIKIJTO TLEN TIMOILJUIA UAN TLEN TIJYOLMATI

Maske amo kenijki tlaj kemantika tijnekis tiitstos moselti, amo kinamiki moselti tikijiyouis nopa kuesoli,  pampa nelia tlauel ouij. Jared, katli kipia 17 xiuitl uan mijki itata, kiijtoua: “Maske amo ijki tlen nikijtouayaya, nechpaleuiyaya nikiniljuis sekinok tlen na nijyolmatiyaya”. Janice, katli tikijtojkej ipan achtoui tlamachtili, nojkia kiijtoua: “Tlauel nimoyolchikauayaya kema nikamanaltiyaya iuaya se akajya. Nijyolmatki amo noselti niitstoya uan nijmatiyaya kikuamachiliyayaj tlen nechpanoyaya”.

XIJKAUA MA MITSPALEUIKAJ

Se tepajtijketl kiijtoua: “Katli kikauaj ininchampoyouaj uan ininuampoyouaj ma kinpaleuikaj kiixnamikisej nopa tlaouijkayotl, teipa ayokmo tlauel ouij kimatij kema mokuesouaj”. Xikiniljui mouampoyouaj tlake uelis kichiuasej uan kiampa mitspaleuisej. Maske kinekij mitspaleuisej, uelis amo kimatij kenijkatsa kichiuasej (Proverbios 17:17).

NOJUA XIJNECHKAUI TOTEOTSIJ

Tina kiijtoua: “Kema nopa kokolistli cáncer kimiktijtiuetski noueue, polijki nopa maseuali katli ipan tlauel nimotemachiyaya uan pejki nikiljuia toTeotsij nochi tlen nijyolmatiyaya. Kema niisayaya, nimantsi nikiljuiyaya ma nechpaleui nikijiyouis nochi tlen nechpanoskia ipan nopa tonali. ToTeotsij nechpaleuik ika miak tlamantli...”. Tarsha, katli kipixtoya 22 xiuitl kema mijki inana, kiijtoua: “Tlauel nimoyolchikauayaya kema mojmostla nijpouayaya Biblia. Nechpaleuiyaya ma nimoiljui san ipan tlamantli tlen kuali”.

XIMOILJUI IPAN NOPA TONALI KEMA MOYOLKUIS KATLI TIKIKNELIA

Tina kiijtoua: “Achtoui amo nimoyolchikauayaya maske nimoiljuiyaya noueue moyolkuiskia. Na nijnekiyaya ma itsto nouaya uan nokoneuaj kitemouayayaj inintata. Uan ipan ni tonali, kema ya panotok naui xiuitl, nelia nimotemachia se tonali moyolkuis. Nopa nechpaleuia ma nikijiyoui nochi. Tlauel niyolpaki uan nimoyolseuia kema nimoiljuia ipan nopa tonali kema sampa timoitasej”.

Uelis panotia tonali uan ta nojua timokuesoua uan amo timoyolchikaua. Tlaj kiampa mitspano, tlauel mitsyolchikauas tlen Vanessa kiijtoua: “Maske uelis timoiljuis amo kema timoyolchikauas, nochipa onkas tonali kema kuali tijyolmatis”.

Xikilnamiki: maske uelis amo aka kichiuas kuali xijyolmati kej nopa maseuali katli mijki, kena uelis tiitstos ika pakilistli. ToTeotsij mitspaleuis nojua xiyolpaki tiitstos ininuaya mouampoyouaj uan mitspaleuis xikita amo san tlapik tiitstok. ToTeotsij nechka kinyolkuis katli miktokej. Ya kineki sampa tikinnajnauas katli tikiniknelia. ¡Kiampa ayokmo kema timoyolkokojtos!