¿Mitspaktiskia más kuali timomachtis? Tlen nikaj kiijtoua mitspaleuis kiampa xijchiua:

• Xijtlapejpeni kampa más kuali timomachtis. Uelis tijtlapejpenis kampa amo tlauel tlatepejtok uan kampa amo tsintlayoua. Xijtekiui se mesa o kalteno xijtemo kampa uelis kuali timomachtis.

• Xijtemo kampa uelis tiitstos moselti. Jesús yauiyaya momaijtoua “ika ijnalok, kema nojua tlatlayouatoya” uan “kampa tlatsitsikatok” (Mar. 1:35). Tlaj amo uelis tiitstos moselti, xikiniljui mochampoyouaj o katli itstokej mouaya kema timomachtis uan xikiniljui amo ma mitsnojnotsakaj.

• Ximosentlali. Tlaj tijtekiuia mocelular o motablet kema timomachtis, xijchiua amo ma tsilini. Uan tlaj tikilnamiki se tlamantli tlen moneki tijchiuas, xikijkuilo uan teipa xijchiua. Tlaj amo ueli timosentlalia ipan tlen timomachtijtok, uelis tinejnemis se kentsi uan teipa sampa ximomachti.