Uelis se akajya kichiuas ni tlajtlanili tlaj amo kuali kipouas ni tlapoualistli. Ipan nopa textos kamanalti tlen omej tlakamej katli motokaxtiyayaj Mefi Boset, yeka tlaj kuali tikitaj tlen panok uelis tikitasej tlake techmachtia.

Saúl katli tlanauatiyaya Israel kinpixtoya chikomej itelpokauaj uan omej iichpokauaj. Jonatán elki iachtouikone. Teipa Saúl iuaya iompakasiua Rizpá, kipixkej se ininkone katli kitokaxtijkej Mefi Boset. Uan Jonatán nojkia kipixki se ikone katli kitokaxtik Mefi Boset. Kej tikitaj, ikone Saúl uan iixui sanse motokaxtiyayaj.

¿Kenke David temaktilik se keskij maseualmej ma kinmiktikaj? Pampa Saúl pejki kinkualankaita gabaóneuanij katli itstoyaj ininuaya israeleuanij uan kinejki kintsontlamiltis, yeka kinmiktik se keskij. Tlauel amo kuali tlen kichijki pampa kema Josué itstoya, katli tlayakanayayaj ipan Israel kichijtoyaj se tlajtolsenkauali ininuaya gabaóneuanij (Jos. 9:3-27).

Kema Saúl tlanauatiyaya, nopa tlajtolsenkauali nojua kinpaleuiyaya gabaóneuanij, uan ya amo kitlepanitak uan kinejki kintsontlamiltis. Teipa, Saúl uan ichampoyouaj, kinmiktijkej gabaóneuanij (2 Sam. 21:1). Kema David pejki tlanauatia, katli amo kinmiktijkej kipouilijkej tlen panok. Yeka, kintlatsintokik tlake ueliskia kichiuas ika tlen Saúl kinchiuilik uan kiampa Jehová nojua kiteochiuaskia. Inijuantij amo tlajtlankej tomij, kiijtojkej ma kinmiktikaj chikomej ikoneuaj Saúl, katli mosentlalijtoya kintsontlamiltis (Núm. 35:30, 31). David kichijki tlen tlajtlankej (2 Sam. 21:2-6).

Maske ipan nopa tonali Saúl uan Jonatán ya kinmiktijtoyaj, Mefi Boset, Jonatán ikone, nojua itstoya. Ya amo ueliyaya nejnemi pampa kema nojua eliyaya okichpil moikxikokok, yeka amo tlapaleuik kema iueyitata Saúl kinmiktik gabaóneuanij. David kichijtoya se tlajtolsenkauali ika Jonatán pampa tlauel kuali mouampojchijtoyaj, uan nopa kinpaleuiskia ichampoyouaj, kej Mefi Boset (1 Sam. 18:1; 20:42). Nopa tlapoualistli kiijtoua tlen David: “Tlanauatijketl David axkinmakak Mefi Boset, ikone nopa mijkatsi Jonatán uan iixui nopa mijkatsi Saúl, pampa ika mokajtoya Jonatán iixpa toTeko” (2 Sam. 21:7).

Maske kiampa panok, David kichijki tlen kintenkauilik gabaóneuanij. Kinmakak omej ikoneuaj Saúl, se eliyaya Mefi Boset, uan makuiltij iixuiuaj (2 Sam. 21:8, 9). Kiampa David kitlamiltik nopa tlajtlakoli tlen Saúl kichijki.

Ipan ni tlapoualistli tijyekouaj se tlamantli. Tlaj nopa omej ikoneuaj Saúl uan makuiltij iixuiuaj amo tlajtlakolchijtoskiaj, Jehová amo kinkajtoskia ma kinmiktikaj, pampa nopa Tlanauatili kiijtouayaya amo kinamikiyaya kinmiktisej konemej kema inintatauaj tlajtlakolchiuayayaj. Nojkia, Tlanauatili kiijtouayaya: “Xijmiktikaj sejse ipampa itlaixpanol tlen yajaya iselti kichijtok” (Deut. 24:16). Ni kinextia nopa chikomej ichampoyouaj Saúl kinamikiyaya kinmiktisej, pampa tlapaleuijkej kema kintsontlamiltijkej gabaóneuanij. Yeka, monejki kintlatsakuiltisej.

¿Tlake tijyekouaj ipan ni tlapoualistli? Amo aka uelis kiijtos o moiljuis kichijki tlen amo kuali san pampa kineltokak tlen kinauatijkej ma kichiua. Sejse maseuali moneki kiixnamikis tlen kichijtok. Tlauel ipati tijchiuasej tlen kiijtoua ni texto: “Xijtlapejpeni se kuali ojtli para ipan tinemis. Kena, xijtokili se ojtli xitlauak uan nochi eltos kuali para ta. Amo ximoiyokatlali tlen nopa ojtli tlen xitlauak, niyon para monejmatko, niyon ika moarravesko” (Prov. 4:24-27; Efes. 5:15).