ToTeotsij kiiljuik tlajtolpanextijketl Abraham: “Nikinteochiuas nochi tlakamej ipan nochi tlaltinij ipan Tlaltipaktli ika moixui” (Génesis 22:18). ToTeotsij kinteochiuaskia nochi maseualmej ika se Abraham iixui, ¿ajkia eliskia?

Nechka dos mil xiuitl, toTeotsij kimakak Jesús chikaualistli uan kiampa uelki kichiua uejueyi tlamantli. Ika tlen kichijki, kinextik toTeotsij kitekiuiskia Jesús uan kiampa kiaxitiskia nochi tlen kitenkauilijtoya Abraham, pampa ya eliyaya se iteipaixui (Gálatas 3:14).

Nopa uejueyi tlamantli tlen Jesús kichijki, kinpaleuik maseualmej ma kiitakaj ya eliyaya nopa tlajtolpanextijketl tlen ika toTeotsij kinteochiuaskia maseualmej. Ma tikitakaj tlake kuajkuali tlamantli kinextik Jesús kema kichijki nopa uejueyi tlamantli.

Teikneliyaya uan kinchikajki katli mokokouayayaj.

Se tonali, se tlakatl katli tlakayopalaniyaya kiiljuik Jesús: “Intla tijneki, uelis tinechchikauas”. Uan Jesús kiitskik uan kiiljuik: “Kena, nijneki”. Uan ipan nopa tlalochtli nopa tlakatl mochikajki (Marcos 1:40-42).

Temakak tlen kipixtoya uan kintlamakak katli mayanayayaj.

Jesús amo kinekiyaya maseualmej ma mayantokaj. Yeka, amo san sempatsi kimiakilik pantsi uan michimej uan kiampa kintlamakak miakej maseualmej (Mateo 14:17-21; 15:32-38). Nochi ixuikej uan nojua mokajki miak tlakualistli.

Tetlasojtlayaya uan kinyolkuik katli miktoyaj.

Kema Jesús kiitak miktoya iyojtsi ikone se siuatl katli ya miktoya iueue, kitlasojtlak pampa amo kipiaskia ajkia kimokuitlauiskia teipa, yeka kiyolkuik ikone (Lucas 7:12-15).