Se keskij maseualmej motlajtlaniaj tlaj kipatlatokej tlen eltok ipan Biblia. Tlajtolpanextijketl Isaías kiijtok “iTlajtol toTeko Dios mokaua para nochipa” (Isaías 40:8). ¿Kenijkatsa uelis tijmatisej tlaj amo tleno mopatlatok tlen eltok ipan Biblia?

ToTeotsij ueli kichiua amo aka ma kitsontlamilti iTlajtol uan amo aka ma kipatla pampa ya kipia miak chikaualistli. Uejkajkia, maseualmej katli kiixkopinayayaj tlen ijkuilijtok ipan Biblia, kipouayayaj keski letras eltoya kampa kiixkopinkej pampa amo kinekiyayaj kipiuilisej, kipatlasej yon kikixtilisej se tlamantli. Kemantika kena mokuapolouayayaj pampa amo eliyayaj xitlauakej, maske kena mokuapolouayayaj amo kipatlakej nopa achtoui amatlajkuiloli tlen kiijkuilojkej.

ToTeotsij iTlajtol kiixkopinkej ipan miak amatlajkuiloli. Tlaj tlen ijkuilijtok ipan se amatlajkuiloli mopatla, uelis kiitasej sekinok uan kiampa kiitasej tlaj mokuapolojkej katli kiixkopinkej (tlaj tijneki tijmatis sekinok tlamantli uelis tikitas ipan jw.org nopa tlamachtili tlen itoka “¿Se ha cambiado o manipulado la Biblia?”).

Ma timoiljuikaj ipan nopa Amatlajkuiloli tlen kipantijkej ipan mar Muerto, ipan xiuitl 1947. Nopa amatlajkuiloli kipantijkej beduinos (árabes katli nemij ipan uaktok tlali) nechka mar Muerto ipan se tlakakauako. Tlen kipantijkej kipia se keski amochtli tlen toTeotsij iTlajtol uan ya panotok dos mil xiuitl kiijkuilojkej. Ixtlamatinij kiitakej tlaj Biblia tlen nama eltok eli sanse ika tlen ijkuilijtok ipan nopa amatlajkuiloli. Uan, ¿tlake kiitakej?

Nopa ixtlamatinij kiitakej Biblia tlen nama tijpiaj eli sanse ika nopa amatlajkuiloli tlen uejkajkia kiijkuilojkej. * Uajka, uelis timotemachisej Biblia tlen nama tijpiaj nelia eli toTeotsij iTlajtol pampa kuali kiitstokej ika tlen uejkajkia kiijkuilojkej. ToTeotsij kichijtok amo ma mopatla tlen ijkuilijtok ipan iTlajtol maske panotok miak xiuitl.

Uelis timotemachisej tlen tijpouaj ipan toTeotsij iTlajtol eli nelia melauak. Nama ma tikitakaj tlake techmachtiaj tlajtolpanextianij tlen toTeotsij.