ToTeotsij kintekiuijtok iluikaeuanij uan tlajtolpanextianij pampa kineki kinkamanaljuis maseualmej, uan kiampa kichijtok ipan miak xiuitl. Nojkia, kinejki ma moijkuilo itlajtol uan tlen mosentlalijtok kichiuas. Maske toTeotsij kiijtoua teipa tiyolpakisej, uelis timotlajtlania: “¿Kanke uelis tijpantisej tlen kitenkajtok?”.

Tlen toTeotsij techtenkauilijtok eltok ipan Biblia (2 Timoteo 3:16). ¿Kenijkatsa toTeotsij kintekiuik itlajtolpanextijkauaj pampa kinejki ma kiijkuilokaj tlen moiljuia? ToTeotsij kitlalik itlalnamikilis ipan inintsonteko nopa tlakamej pampa kinekiyaya ma kiijkuilokaj tlen ya moiljuia (2 Pedro 1:21). Ma timoiljuikaj ipan ni tlamantli: tlaj se tekojtli kiiljuia itekipanojka ma kiijkuilo se amatl, amo timoiljuisej tlen ijkuilijtok ipan nopa amatl eli itlalnamikilis nopa tlatekipanojketl. Nojkia kiampa pano ika toTeotsij iTlajtol, pampa maske tlakamej kiijkuilojkej, toTeotsij kiniljuijtiajki tlen kinekiyaya ma kiijkuilokaj.

ToTeotsij iTlajtol eli tlauel ipati, yeka toTeotsij kineki nochi maseualmej ma kipouakaj uan ma kikuamachilikaj tlen nopaya ijkuilijtok. Ipan ni tonali maseualmej katli euaj ipan “nochi tlaltinij, uan ipan nochi xinachtli tlakamej, uan hasta tlakamej tlen kamatij nochi tlajtoli, uan tlakamej tlen kipiaj sejse tlamantli inintlalnamikilis uan inincostumbres” uelij kikakij toTeotsij iTlajtol (Apocalipsis 14:6). ToTeotsij kichijtok ma motlajtolkuepa nochi o san se keski amochtli tlen iTlajtol ipan kipano tres mil tlajtoli, amo onka seyok amochtli tlen motlajtolkueptok ipan miak tlajtoli.