Tlen kiijkuilok Lucas 21:1-38
21 Uajka, kema Jesús moixtlananki kinitak katli tlatominpiayayaj kitemayayaj tomij ipan pilcajontsitsij tlen eltoya ipan teokali.
2 Uan kiitak se toaui katli ya miktoya iueue kitenki ome piltomintsitsij* tlen amo tlauel ipati,
3 uan kiijtok: “Temachtli niinmechiljuia, ni toaui katli amo tleno kipia, kitenki más que nochi ne sekinok.
4 Pampa nochi inijuantij temakaj san tlen mokaua; pero ya, maske amo tleno kipia, kitenki nochi tlen kipixtoya tlen ika mopanoltiskia”.
5 Teipa, kema se keskij kamanaltiyayaj kenijkatsa nopa teokali kuali kiyejyekchijtoyaj ika tetl tlen yejyektsitsij uan ika tlamantli tlen kimaktilijtoyaj Dios,*
6 kiijtok: “Asis tonali kema amo mokauas yon se tetl tekpichijtok tlen nama inkiitaj. Nochi kiuelonisej”.*
7 Uajka kitlatsintokijkej: “Tlamachtijketl, ¿kema nelnelia panos nopa, uan tlake kinextis nechka panos nochi nopa tlamantli?”.
8 Kinnankilik: “Ximomokuitlauikaj. Amo xijkauakaj ma inmechkajkayauakaj,* pampa ualasej miakej katli kitekiuisej notoka uan kiijtosej: ‘Na niCristo’, o ‘Nopa tonali tlen kiixtlalijtokej ya monechkauijtok’. Amo xikintokilikaj.
9 Nojkia, kema inkikakisej onka guerras uan kualantli, amo ximomajmatikaj. Pampa achtoui moneki panos ni tlamantli, pero itlamia tonali* amo nima ualas”.
10 Uajka kiniljuik: “Se pilaltepetsi moteuis ika seyok pilaltepetsi, uan se ueyi altepetl* ika seyok ueyi altepetl.
11 Chikauak mojmolinis* tlali, uan ejeliuis* onkas mayantli uan uejueyi kokolistli. Uan nesis tlamantli tlen temajmati uan uejueyi tlaneskayotl* tlen iluikak.
12 ”Pero kema ayamo panos nochi ni tlamantli, inmechitskisej uan inmechtlaijiyouiltisej. Inmechtemaktilisej kampa tlaueyichiuaj judíos uan inmechtsakuasej. Uan pampa inelij notokilijkauaj, inmechuikasej ininixpa tlanauatianij uan gobernadores.
13 Nopa inmechpaleuis xikijtokaj tlen inkineltokaj.
14 Yeka, ximosentlalikaj amo inmoiljuijtosej kenijkatsa inmomanauisej,
15 pampa na niinmechiljuis tlake inkiijtosej uan niinmechmakas tlalnamikilistli; kiampa maske nochi inmokualankaitakauaj mosentikapaleuisej, amo tleno uelis kiijtosej yon uelisej inmechnankilisej.
16 Nojkia, hasta inmotatauaj, inmoikniuaj, inmouikaljuaj* uan inmouampoyouaj* inmechtemaktilisej. Uan se keskij tlen inmojuantij inmechmiktisej.
17 Uan nochi maseualmej inmechkualankaitasej pampa inelij notokilijkauaj.
18 Pero maske inmechpanos nochi ni, amo uetsis yon se inmotsonkal.
19 Tlaj inkiijiyouisej, inmomanauisej.
20 ”Uan kema inkiitasej miakej soldados kiyaualojtokej Jerusalén, xijmatikaj nechka kitsontlamiltisej.
21 Uajka katli itstokej ipan Judea, ma cholokaj ipan tepemej; katli itstosej ipan Jerusalén ma kisakaj, uan katli itstosej milaj, amo ma tlakuepilikaj ipan nopa altepetl.
22 Pampa ipan nopa tonali monextis ikualankayo Dios para ma mochiua nochi tlen ijkuilijtok.
23 ¡Teikneltikej nopa siuamej katli tlanemiltisej* o tlachichitisej ipan nopa tonali! Pampa onkas se ueyi tlaijiyouilistli ipan ni tlali uan Dios kinnextilis ikualankayo katli nopaya itstokej.
24 Uan kinmiktisej ika espada* uan kinuikasej ilpitokej ipan nochi altepemej; uan katli amo elij judíos mokejketsasej ipan Jerusalén hasta kema moaxitis nopa tonali tlen kiixtlalijtokej para tlanauatisej katli amo elij judíos.
25 ”Nojkia, onkas tlaneskayotl* ipan Tonati, metstli uan sitlalimej, uan ipan Tlaltipaktli nochi altepemej momajmatisej uan amo kimatisej tlake kichiuasej, pampa mar chikauak kakistitos* uan chikauak mokojkoxonijtos.
26 Maseualmej tlapolosej pampa tlauel majmauisej uan tlauel motekipachosej ika tlen panos ipan Tlaltipaktli, pampa nochi tlamantli tlen eltok iluikak kitsejtselosej.
27 Uajka kiitasej katli eli iKone se Maseuali* ualajtiuala ipan se mixtli ika tlanauatili uan iueyitilis.
28 Pero kema peuas mochiuas ni tlamantli, ximoketsakaj uan ximotsontlananakaj pampa nechka inmechmakixtisej”.*
29 Uajka kiniljuik se neskayotl: “Kuali xijtlachilikaj nopa higokuauitl uan nochi sekinok kuauitl.
30 Kema xiuiyokisa,* inmojuantij inkiitaj uan inkimatij nechka tlatotonias.*
31 Nojkia inmojuantij, kema inkiitasej pano ni tlamantli, xijmatikaj iTlanauatijkayo Dios monechkauijtok.
32 Temachtli niinmechiljuia, ni maseualmej amo ixpoliuisej hasta kema panos nochi ni tlamantli.
33 Iluikaktli uan Tlaltipaktli ixpoliuisej, pero notlajtol* amo kema ixpoliuis.
34 ”Pero ximotlachilikaj para amo kema inkitetsopasej inmoyolo pampa insentlakuajtosej uan insentlaitosej, uan pampa inmechtekipachos tlen inmechpoloua, uan nimantsi* inmechichtakauiki nopa tonali
35 kej se tlamasiltili.* Pampa nopa tonali kinasis nochi katli itstokej ipan nochi Tlaltipaktli.
36 Yeka, kuali xitlachixtokaj uan nochipa ximomaijtokaj* para uelis inmomanauisej tlen nochi ni tlamantli tlen moneki panos uan uelis inijkatosej iixpa katli eli iKone se Maseuali”.*
37 Ika tonaya Jesús tlamachtiyaya ipan teokali uan ika tlayoua yauiyaya mokaua ipan tepetl tlen Olivos.
38 Uan ijnaltsi* nochi maseualmej yauiyayaj kampa teokali para kitlakakilisej.
Tlen ijkuilijtok tlatsintla
^ Ika griego “ome leptones”. Tlen kitlaniyaya se akajya kema tekitiyaya 10 minutos.
^ Kanajya kiijtouaj “toTeotsij”.
^ O “kixoleuasej”.
^ O “ma inmechkuapolokaj”.
^ O “kampa tekichiua se tlanauatijketl”.
^ Kanajya kiijtouaj “mouisos”.
^ Kanajya kiijtouaj “kampa ueli”.
^ O “señales”.
^ Kanajya kiijtouaj “inmoteixmatkauaj”.
^ O “inmoamigos”.
^ Kanajya kiijtouaj “konekuitosej”.
^ Se espada eli kej se machete tlen onkak tlatentili.
^ O “señales”.
^ Kanajya kiijtouaj “ajkauakatos”.
^ Xikita katli eli iKone se Maseuali.
^ O “inmechmanauisej”.
^ O “chamani”.
^ Ipan Israel ni eli kema moskaltia uan xochiyoua kuauitl uan tlen kitoktokej.
^ Kanajya kiijtouaj “nokamanal”.
^ Kanajya kiijtouaj “san moljuit”.
^ Kanajya kiijtouaj “tlaketstli”.
^ Kanajya kiijtouaj “ximotlatlajtikaj”.
^ Xikita katli eli iKone se Maseuali.
^ Kanajya kiijtouaj “youaltsinko”.
