Tlen kiijkuilok Lucas 19:1-48
19 Uajka Jesús kalajki Jericó uan kiixkotontiajki nopa altepetl.
2 Nopaya itstoya se tlakatl katli motokaxtiyaya Zaqueo. Eliyaya se inintlayakanka katli tlainamaj impuestos, uan tlatominpiayaya.
3 Ni tlakatl kinekiyaya kiitas ajkia eliyaya Jesús. Pero amo ueliyaya kiita pampa itstoyaj miakej maseualmej uan ya amo uejkapantik eliyaya.
4 Uajka tlayakanki uan tlejkoto ipan se kuauitl tlen kiiljuiaj sicómoro para kiitas Jesús, pampa nechka panoskia nopaya.
5 Kema asito nopona, Jesús ajkotlachixki uan kiiljuik: “Zaqueo, xitemo nimantsi, pampa nama nimokauas mochaj”.
6 Ya nimantsi temok uan kiselik ipan ichaj ika pakilistli.
7 Kema kiitakej nopa, nochi pejkej kitlaijiljuiaj: “Mokauato ichaj se katli tlajtlakolchiua”.
8 Pero Zaqueo moketski uan kiiljuik toTeko: “Xikita noTeko, nikinmakas katli amo tleno kipiaj tlajko tlen nijpixtok, uan tlen nikinichtekilik sekinok nikinkuepilis naui ueltas más”.
9 Uajka Jesús kiiljuik: “Ni tonali, Dios* kinmakixtik ni tlakatl uan ichampoyouaj,* pampa nojkia eli ikone Abrahán.
10 Pampa katli eli iKone se Maseuali* ualajki kintemoko uan kinmakixtiko* katli mokuapolojtoyaj”.
11 Kema inijuantij kikakiyayaj nopa tlamantli, kiniljuik seyok neskayotl, pampa itstoya nechka Jerusalén uan pampa inijuantij kineltokayayaj iTlanauatijkayo Dios nimantsi monextiskia.
12 Uajka kiijtok: “Se tlakatl katli eliyaya ikone se tlanauatijketl yajki ipan seyok altepetl tlen uejka mokauayaya para kiselis tekiuejkayotl kej tlanauatijketl uan teipa mokuepaskia.
13 Kinnotski matlaktli itlatekipanojkauaj, kinmakak miak platatomij* uan kiniljuik: ‘Xijtekiuijtokaj hasta kema niualas’.
14 Pero katli euayayaj ipan ialtepe kikualankaitayayaj, uan kintitlankej se keskij tlakamej ma kiijtotij: ‘Amo tijnekij ni tlakatl ma eli totlanauatijka’.
15 ”Kema tlakuepilik pampa ya kiselijtoya tekiuejkayotl, kinsentilik nopa tlatekipanouanij katli kinmakatoya tomij para kiitas keski kitlantoyaj.
16 Achtoui monechkauik se uan kiiljuik: ‘Noteko, moplatatomij* nijtlanilik matlaktli ueltas más’.
17 Nopa tlanauatijketl kinankilik: ‘¡Kuali tlen tijchijki, tieli se kuali tlatekipanojketl! Tijnextik titemachtli ipan se tlamantli tlen amo ueyi, yeka titlayakanas ipan matlaktli altepemej’.
18 Teipa ualajki seyok uan kiiljuik: ‘Noteko, moplatatomij nijtlanilik makuili ueltas más’.
19 Ya nojkia kiiljuik: ‘Ta titlayakanas ipan makuili altepemej’.
20 Pero ualajki seyok uan kiiljuik: ‘Noteko, nikaj eltok moplatatomij tlen nijtlatijtoya* ipan se payo.
21 Na nimitsmakasiyaya pampa tlauel tiyoltetik; tijkixtia tomij tlen amo tijkajtok ipan banco uan tijpixka tlen amo tijtoktok’.
22 Nopa tlanauatijketl kinankilik: ‘Amo kuali tlatekipanojketl, ika tlen tikijtojtok nimitstlajtolsenkaua. ¿Tijmatiyaya niyoltetik uan nijkixtia tomij tlen amo nijkajtok ipan banco uan nijpixka tlen amo nijtojki?
23 Uajka, ¿kenke amo tijuikak notomij ipan banco? Kiampa kema niualaskia, nijselijtoskia ika itlanka’.
24 ”Uan kiniljuik katli nopaya itstoyaj: ‘Xijkixtilikaj nopa platatomij uan xijmakakaj katli kitlanki matlaktli uelta’.
25 Pero inijuantij kiiljuijkej: ‘¡Toteko, ya kipixtok matlaktli!’.
26 Ya kinnankilik: ‘Niinmechiljuia, nochi katli kipiaj, nojua más kinmakasej, pero katli amo tleno kipia, kikixtilisej hasta tlen kipixtok.
27 Nojkia xikinualikakaj nokualankaitakauaj katli amo kinekiyayaj ma nieli inintlanauatijka uan xikinmiktikaj noixpa’”.
28 Kema tlanki kiijtoua nochi ni tlamantli, kisentokilik ixtlejko para Jerusalén.
29 Uan kema monechkauik ipan pilaltepetsitsij Betfagué uan Betania, ipan tepetl tlen Olivos, kintitlanki omej itokilijkauaj
30 uan kiniljuik: “Xiakaj ipan ne pilaltepetsi tlen nopaya inkiitaj. Kema inasitij inkipantisej ilpitok se pilburrojtsi katli amo aka ipan tlejkotok. Xijtojtomakaj uan xijualikakaj.
31 Uan tlaj se akajya inmechtlatsintokis ‘¿Kenke inkitojtomaj?’, xijnankilikaj ‘ToTeko kitekiuis’”.
32 Uajka itokilijkauaj katli kintitlantoya yajkej uan kipantitoj kej kiniljuijtoya.
33 Pero kema kitojtomayayaj nopa pilburrojtsi, katli ininaxka kintlatsintokijkej: “¿Kenke inkitojtomaj nopa pilburrojtsi?”.
34 Inijuantij kinnankilijkej: “ToTeko kitekiuis”.
35 Uajka kiuikilijkej Jesús, kipejpechtijkej ika nopa yoyomitl tlen ika moajkoluijkomayayaj* uan kichijkej Jesús ma moseui iixko.*
36 Kema yauiyaya ipan ojtli, inijuantij kisouayayaj tlalchi ininyoyo tlen ika moajkoluijkomayayaj.
37 Kema monechkauik ipan nopa ojtli tlen ixtemo ipan tepetl tlen Olivos, nochi itokilijkauaj tlauel yolpajkej uan pejkej chikauak kiueyichiuaj Dios pampa kiitstoyaj miak milagros tlen kichijtoya.
38 Kiijtouayayaj: “¡Tlateochiuali katli uala kej tlanauatijketl ipan itoka Jehová!* ¡Ma onka tlaseuilistli ipan iluikaktli! ¡Tijueyichiuaj Dios katli itstok ipan iluikak tlen más uejkapa!”.
39 Pero se keskij fariseos* katli itstoyaj ininuaya nopa miakej maseualmej kiiljuijkej: “Tlamachtijketl, xikinajua motokilijkauaj”.
40 Ya kinnankilik: “Niinmechiljuia, tlaj inijuantij amo tleno kiijtoskiaj, nochi tetl kuatsajtsiskiaj”.
41 Kema asito nechka nopa altepetl uan kiitak, kichokilik
42 uan kiijtok: “Tlaj ta, kena, tlaj ta tijkuamachilijtoskia ipan ni tonali tlake kichiuaskia xijpia tlaseuilistli... Pero nama ayokmo uelis tikitas.
43 Pampa asis tonali kema mokualankaitakauaj mitsyaualtsakuasej ika kuauitl tlen kiyakaxixintokej; mitsyaualosej uan ejeliuis* mitsojtsakuasej.
44 Ta uan katli nopaya itstokej inmechtlauisosej* tlalchi, uan amo kikauasej ipan ta yon se tetl tekpichijtok, pampa Dios ualajki mitstlajtolsenkauako pero ta amo tikitak”.
45 Uajka kalajki ipan teokali uan pejki kinkixtia nochi katli tlanamakayayaj.
46 Kiniljuiyaya: “Ijkuilijtok ‘Nochaj kitokaxtisej kali kampa momaijtouaj’,* pero inmojuantij inkichijtokej kej se kali kampa motlatiaj tlachtekinij”.
47 Ya mojmostla tlamachtiyaya ipan teokali. Pero nopa sacerdotes katli kipiayayaj tlanauatili, escribas* uan maseualmej katli más pankisayayaj ipan nopa altepetl kitemoliyayaj kenijkatsa kimiktisej.
48 Pero amo kipantiyayaj kenijkatsa kichiuasej, pampa nochi maseualmej itstoyaj inechka pampa kinekiyayaj kuali kitlakakilisej.
Tlen ijkuilijtok tlatsintla
^ Kanajya kiijtouaj “toTeotsij”.
^ O “ifamilia”.
^ Xikita katli eli iKone se Maseuali.
^ O “kinmanauiko”.
^ Ika griego “minas”. Se mina eliyaya tomij tlen kitlaniyaya se akajya ipan eyi metstli.
^ Ika griego “momina”.
^ Kanajya kiijtouaj “nikiyantoya”.
^ Xikita tlen ika moajkoluijkomayayaj.
^ O “ipani”.
^ Kanajya kiijtouaj “kampa ueli”.
^ O “inmechkuamajkauasej”.
^ Kanajya kiijtouaj “motlatlajtiaj”.
