Hechos (Tlen apóstoles kichijkej) 16:1-40
-
Pablo kitlapejpenia Timoteo (1-5)
-
Ipan se tlanextilili kej se temiktli kiita se tlakatl tlen Macedonia (6-10)
-
Lidia peua tlaneltoka ipan Filipos (11-15)
-
Kintsakuaj Pablo uan Silas (16-24)
-
Nopa tetsajketl uan ichampoyouaj moatsonpoliuiltiaj (25-34)
-
Pablo kiniljuia tekichiuanij ma kitlajtlanikaj ma kintlapojpoljui (35-40)
16 Uajka asito Derbe uan teipa Listra. Nopaya itstoya se Jesús itokilijka katli motokaxtiyaya Timoteo. Inana eliyaya se judía katli tlaneltokayaya, pero itata eliyaya griego.
2 Uan toikniuaj tlen Listra uan Iconio kuali kamanaltiyayaj tlen Timoteo.
3 Pablo kinejki Timoteo ma yaui iuaya, yeka kiuikak uan kichiuilik circuncisión* pampa nochi judíos katli itstoyaj ipan nopa altepemej kimatiyayaj itata eliyaya griego.
4 Kema panotiauiyayaj ipan sejse altepetl, kiniljuijtiauiyayaj toikniuaj tlen kitlapejpenijtoyaj apóstoles uan ueuejtlakamej tlen Jerusalén, para ma kichiuakaj tlen kiijtojtoyaj.
5 Yeka, ipan sejse tlanechikoli toikniuaj nojua kuali tlaneltokatiajkej uan mojmostla momiakilijtiauiyayaj.
6 Nojkia panokej Frigia uan tlali Galacia, pampa ichikaualis Dios* amo kinkauilik ma tlajtolmoyauakaj ipan tlali Asia.
7 Uan kema asitoj Misia, kinejkej panosej Bitinia, pero Jesús, ika ichikaualis Dios amo kinkauilik.
8 Yeka panokej Misia uan temokej Troas.
9 Ika tlayoua, Pablo kiitak se tlanextilili kej se temiktli, kiitak se tlakatl katli eua Macedonia ijkatoya iixmelak uan kitlajtlaniyaya ika nochi iyolo: “Xiuala Macedonia uan xitechpaleuiki”.
10 Kema ya kiitstoya nopa tlanextilili, tijnejkej tiasej Macedonia, pampa tikitakej Dios* nopaya kinekiyaya ma tiakaj tijmoyauatij nopa kuali tlamachtili.
11 Uajka ipan Troas titlejkokej ipan se barco uan tiajkej Samotracia. Ika ualmostla* tikistejkej uan tiajkej Neápolis,
12 uan teipa tiajkej Filipos, se altepetl tlen eliyaya iaxka Roma.* Filipos eliyaya nopa altepetl tlen más ueyi ipan tlali Macedonia. Timokajkej nopaya se keski tonali.
13 Se sábado tikiskej tlen nopa altepetl uan tiajkej kampa se ueyatl pampa timoiljuiyayaj nopaya mosentiliyayaj para momaijtosej.* Uajka timoseuijkej uan pejkej tikamanaltij ininuaya siuamej katli nopaya mosentilijtoyaj.
14 Se siuatl katli kiueyichiuayaya Dios uan motokaxtiyaya Lidia tlakaktoya, ya euayaya altepetl Tiatira uan kinamakayaya yoyomitl moradojtik. Uan Jehová* kitlapouilik iyolo para kuali ma kitlakakili tlen Pablo kiijtouayaya uan ma kineltoka.
15 Teipa kema Lidia uan katli itstoyaj ichaj moatsonpoliuiltijkej, ya techiljuik: “Tlaj inmojuantij inmoiljuiaj nelia nijneltoka Jehová,* uajka ximokauatij nochaj”. Uan pampa miakpa techiljuik, timokauatoj ichaj.
16 Se tonali, kema tiauiyayaj kampa momaijtouayayaj, tijpantijkej se ichpokatl katli san tlapik tlatekipanouayaya uan kipixtoya se amo kuali ajakatl,* tlen kichiuayaya ma kiijto tlen panos teipa. Ya kitlaniyaya miak tomij para itekojuaj.
17 Nopa ichpokatl pejki techtokilia tojuantij uan Pablo, uan chikauak kiijtouayaya: “Ni tlakamej kitekipanouaj Dios katli Más Ueyi uan inmechmatiltiaj kenijkatsa inmomakixtisej”.*
18 Ni ichpokatl miak tonali kiampa kichijki. Teipa, Pablo kikuesiuilik,* moikankuepki* uan kiiljuik nopa amo kuali ajakatl: “Nimitsnauatia ipan Jesucristo itoka xikisa ipan nopa ichpokatl”. Ipan nopa tlalochtli,* kiski nopa amo kuali ajakatl.
19 Pero kema itekojuaj kiitakej nopa ichpokatl ayokmo kichiuaskia ma kitlanikaj tomij, kiitskijkej Pablo uan Silas uan kinuauatatskej hasta tiankis* ininixpa tekichiuanij.
20 Kema kinaxititoj kampa tekichiuanij, kiijtojkej: “Ni tlakamej kichiuaj ma onka kualantli ipan toaltepe. Inijuantij elij judíos
21 uan tlamachtiaj tlen tojuantij amo kinamiki tijchiuasej, pampa tielij romanos”.
22 Uan maseualmej kinekiyayaj kinteuisej. Uajka nopa tekichiuanij kintsayanilijkej ininyoyo uan teipa tlanauatijkej ma kinmakilikaj ika kuauitl.
23 Kema ya tlauel kinmakilijtoyaj, kintsajkej uan kiiljuijkej se tetsajketl kuali ma kintlachili para amo ma cholokaj.
24 Kema kiampa kinauatijkej nopa tetsajketl, ya kinkalakik kampa amo ueliskiaj kisasej ipan nopa tlatsaktli uan kinkalakilik ininikxi tlatlajko ome uapali tlen kikoyonijtoyaj.*
25 Ika tlajkoyoual, Pablo uan Silas momaijtouayayaj uan kiueyichiuayayaj Dios ika uikatl, uan sekinok katli nopaya tsaktoyaj kinkakiyayaj.
26 Sanima* pejki chikauak mojmolinia tlali uan hasta itsinpeualtil nopa tlatsaktli nojkia mojmolinik. Uan nimantsi motlapok nochi puertas uan tojtonki nochi cadenas tlen ika kinilpitoyaj.
27 Kema nopa tetsajketl isak* uan kiitak nochi puertas tlen nopa tlatsaktli tlapojtoya, kikixtik iespada* uan nechka momiktiskia pampa moiljuiyaya cholojtoyaj katli kintsaktoyaj.
28 Pero Pablo chikauak kiijtok: “¡Amo ximomikti! ¡Nochi nikaj tiitstokej!”.
29 Uajka nopa tetsajketl tlajtlanki tlen ika ueliskia motlauilis, motlalok kampa itstoyaj Pablo uan Silas, motlankuaketski ininikxitla uan tlauel uiuipikayaya.
30 Teipa kinkixtik uan kiniljuik: “Totiojuaj, ¿tlake moneki nijchiuas para nimomakixtis?”.
31 Inijuantij kinankilijkej: “Xijneltoka toTeko Jesús, kiampa ta uan katli itstokej mochaj momakixtisej”.
32 Uajka kinpouilijkej itlajtol Jehová,* ya uan katli itstoyaj ichaj.
33 Ipan nopa youali, nopa tetsajketl kinuikak uan kinpajpakilik kampa kokojtoyaj. Nimantsi ya uan katli itstoyaj ichaj moatsonpoliuiltijkej.
34 Ya kinpanoltik ichaj uan kintlamakak. Uan ya tlauel yolpajki ininuaya nochi katli itstoyaj ichaj pampa nama kineltokayayaj Dios.
35 Kema tlaneski, nopa tekichiuanij kintitlankej katli tlamokuitlauiyayaj ipan nopa altepetl ma kiiljuitij nopa tetsajketl: “Xikinkaua ma yakaj nopa tlakamej”.
36 Nopa tetsajketl kimatiltik Pablo. Uan kiiljuik: “Nopa tekichiuanij kinualtitlankej se keskij tlakamej para ma niinmechkixti. Uajka ya uelis inkisasej, uan kuali xiakaj”.
37 Pero Pablo kiniljuik: “Techmakilijkej ininixpa miakej uan amo techkajkej ma timotenpaleuikaj* maske tielij romanos, uan techtsajkej. ¿Uan nama ichtakatsi techiljuiaj ma tiakaj? ¡Amo! Inijuantij ma ualakaj techkixtikij”.
38 Nopa tlamokuitlauianij kiniljuitoj tekichiuanij tlen Pablo kiijtojtoya. Kema kimatkej nopa tlakamej eliyayaj romanos, majmajkej.
39 Yeka yajkej kiniljuitoj ma kintlapojpoljuikaj, uan kema ya kinkixtijtoyaj kiniljuijkej ma kisakaj tlen nopa altepetl.
40 Pero kema Pablo uan Silas kiskej kampa tsaktoyaj, yajkej ichaj Lidia, kampa kinitakej toikniuaj uan kinyolchikajkej. Teipa kistejkej.
Tlen ijkuilijtok tlatsintla
^ Xikita circuncisión.
^ O “espíritu santo”.
^ Kanajya kiijtouaj “toTeotsij”.
^ Kanajya kiijtouaj “Mostlaijki”, “Kema tonilik”.
^ Eliyaya se altepetl tlen amo eltoya Italia, pero katli itstoyaj nopaya kipixtoyaj sanse tlanauatili uan kinpaleuiyayaj sanse kej katli itstoyaj Italia.
^ Kanajya kiijtouaj “motlatlajtisej”.
^ O “demonio”.
^ O “inmomanauisej”.
^ Kanajya kiijtouaj “kikuesijkaitak”.
^ O “ikantlachixki”.
^ Kanajya kiijtouaj “tlatoktsi”.
^ Kanajya kiijtouaj “plaza”.
^ O “ipan cepo”. Ni kitekiuiyayaj para kitlaijiyouiltisej uan kitlatsakuiltisej se akajya. Eliyaya ome kuauitl tlen koyontoya kampa kikalakiliyayaj uan kiikxikuapachouayayaj katli kitlatsakuiltiyayaj. Kemantika nojkia kikalakiliyayaj imax uan ikechkuayo.
^ Kanajya kiijtouaj “san moljuit”.
^ Kanajya kiijtouaj “ijitak”, “tlachixki”.
^ Se espada eli kej se machete tlen onkak tlatentili.
^ Kanajya kiijtouaj “ma timomanauikaj”.
