Nopa carta tlen kintitlanilijkej Cristo itokilijkauaj tlen Éfeso 5:1-33
5 Uajka, xijchiuakaj kej Dios* pampa inelij ikoneuaj katli inmechiknelia
2 uan nojua xiteiknelijtokaj sanse kej Cristo nojkia techiknelik* uan motemaktilik por tojuantij,* kej se ofrenda* tlen Dios kiijnekui tlauel ajuiyak.
3 Yon kentsi xikijtokaj tlen auilnemilistli,* tlamantli tlen sokiyo o kema kiixtokaj tlen seyok iaxka, pampa katli Dios kiniyokatlalijtok* amo kinamiki kiampa kichiuasej.
4 Nojkia, amo xijchiuakaj tlamantli tlen tepinajti yon xiuiuikamatikaj yon xiauilkamatikaj ika tlamantli tlen sokiyo, nochi tlamantli tlen amo kinamiki. Más kuali ximotlaskamatikaj.
5 Pampa inmojuantij inkimatij uan kuali inkikuamachiliaj para yon se katli auilnemi,* yon se katli kichiua tlamantli tlen sokiyo, yon se katli kiixtoka tlen sekinok ininaxka (tlen eliskia kejuak kinueyichiuaj dioses uan tlaixkopinkayomej) amo uelis kiselis iTlanauatijkayo Dios tlen Cristo kinauatia.
6 Amo aka ma inmechkajkayaua ika tlajtoli tlen amo tepaleuia, pampa nopa tlamantli kichiua Dios ma kinexti ikualankayo ika maseualmej katli amo tlaneltokaj.
7 Yeka amo xijchiuakaj tlen inijuantij kichiuaj;
8 pampa achtouia initstoyaj ipan tsintlayouilotl, pero nama initstokej ipan tlauili pampa initstokej iuaya toTeko. Nojua ximonejnemiltikaj kej ikoneuaj tlauili,
9 pampa katli itstokej ipan tlauili kinextiaj kuali ininyolo, kichiuaj tlen xitlauak uan kiijtouaj tlen melauak.
10 Nojua xikitakaj tlake kipaktia toTeko
11 uan ayokmo xijchiuakaj tlamantli tlen amo kipia ipati tlen mochiua ipan tsintlayouilotl, más kuali xijpannextikaj kenijkatsa nelnelia elij.*
12 Pampa hasta tipinauaj tikijtosej nopa tlamantli tlen kichiuaj ichtakatsi.
13 Nama nopa tlauili tlauia ipan nopa tlamantli tlen amo kuali, uan kiampa nochi tlen amo kuali mopannextia.
14 Yeka moijtoua: “Xiisa,* ta katli tikochi, uan ximotlanana tlen kampa mijkatsitsij, uan Cristo tlauis ipan ta”.
15 Yeka tlauel ximomokuitlauikaj para amo inmonejnemiltisej kej inuiuitikej, más kuali ximonejnemiltikaj kej tlalnamikinij,
16 uan amo san ximotonalpolokaj,* pampa ipan ni tonali tlauel mochiua tlen amo kuali.
17 Yeka ayokmo ximouiuichiuakaj, uan xijkuamachilikaj tlake kineki Jehová.*
18 Nojkia, amo ximoiuintikaj* pampa nopa kichiuas san tlemach xijchiuakaj; más kuali xikitakaj kenijkatsa nojua inkiselijtosej ichikaualis Dios.
19 Ximonojnotsakaj se ika seyok* ika salmos, ika uikatl tlen ika titlaueyichiuaj uan teouikatl,* uan xijuikatikaj Jehová* kejuak intlatsotsonaskiaj ipan inmoyolo,
20 nochipa xijtlaskamatilikaj nochi toDios uan toTata ipan itoka toTeko Jesucristo.
21 Xijkauakaj sekinok ma inmechyakanakaj pampa tlauel inkitlepanitaj Cristo.
22 Siuamej ma kikauakaj ininueue ma kinyakana sanse kej kikauiliaj toTeko ma kinyakana,
23 pampa se tlakatl kiyakana* isiua, sanse kej Cristo nojkia kiyakana tlanechikoli, tlen eli kejuak itlakayo tlen yaya kimakixtik.
24 Kena, sanse kej tlanechikoli kikaua Cristo ma kiyakana, nojkia siuamej ma kikauakaj ininueue ma kinyakanakaj ipan nochi tlamantli.
25 Tlakamej, nojua xikiniknelijtokaj inmosiua, sanse kej Cristo nojkia kiiknelik tlanechikoli uan motemaktilik para kimakixtis,
26 uan kiampa kichiua ma eli tlatsejtseloltik uan kitlapajpakchiua ika itlajtol Dios, kejuak kialtiskia ika atl,
27 para kichiuas nopa tlanechikoli ma nesi tlauel yejyektsi kema kinextiti iixpa, uan amo ma elto sokiyo yon kuijkuilichtik, yon ma kipia se tlen nopa tlamantli. Moneki eltos tlatsejtseloltik uan amo ma kipia yon se tlamantli tlen amo kuali.
28 Nojkia, tlakamej moneki kiiknelisej ininsiua kej inijuantij moikneliaj. Nopa tlakatl katli kiiknelia isiua, nojkia moiknelia,
29 pampa amo aka kikualankaita itlakayo, ya kitlamaka uan kimokuitlauia ika tlaiknelili, sanse kej Cristo kichiua ika tlanechikoli,
30 pampa sejse tlen tojuantij tielij se parte tlen itlakayo.
31 “Yeka, se tlakatl kikauas itata uan inana, itstos* iuaya isiua uan omej elisej san se inintlakayo”.*
32 Ni tlamantli tlen Dios ayamo tematiltia* eli tlauel ueyi. Nama nikamanalti tlen Cristo uan tlanechikoli.
33 Pero sejse tlen inmojuantij moneki kiiknelis isiua, sanse kej ya moiknelia. Uan nojkia, se siuatl moneki tlauel kitlepanitas iueue.
Tlen ijkuilijtok tlatsintla
^ Kanajya kiijtouaj “toTeotsij”.
^ O uelis “inmechiknelik”.
^ O uelis “inmojuantij”.
^ Kanajya kiijtouaj “tlakajkaualistli”.
^ Ika griego pornéia. Xikita auilnemilistli.
^ O “tlatsejtseloltikej”.
^ Xikita auilnemilistli.
^ O “xijxitlauakaj”.
^ Kanajya kiijtouaj “Xiijita”.
^ O “kuali xijtekiuikaj tonali”.
^ Ika griego “amo ximoiuintikaj ika vino”.
^ O uelis “inmoselti”.
^ O “uikatl tlen Dios”.
^ Ika griego “eli itsonteko”.
^ O “mosansejkotilis”.
^ O “san se maseuali”.
^ Xikita tlen Dios ayamo tematiltia.
