Nopa ompa carta tlen kititlanilijkej Timoteo 4:1-22
4 Iixpa Dios* uan Cristo Jesús, katli kintlajtolsenkauas katli yoltokej uan katli miktokej kema monextis uan kema itstos ipan iTlanauatijkayo, nimitsnauatia ni tlamantli:
2 xijmoyaua itlajtol Dios; nochipa xikachtouitlali kema kuali tiitstok uan kema onka tlaouijkayotl; xitetlakaualti, xikinxitlaua katli mokuapolouaj uan xitlauak xiteconsejomaka, xijchiua nochi ni ika moyolo* uan kej se katli kuali tlamachtia.
3 Pampa asis tonali kema inijuantij amo kinekisej kitlakakilisej nopa tlamachtili tlen tepaleuia, kena, inijuantij kitokilisej san tlen kinektokej uan kintemosej tlamachtianij katli kiniljuisej san tlen kinekisej kikakisej.
4 Ayokmo kikakisej tlen melauak uan san kitlakakilisej nopa tlatenpoualistli* tlen amo melauak.
5 Pero ta nojua xijnextijto kuali titlalnamiki ipan nochi tlamantli, xikijiyoui tlaouijkayotl, xijchiua moteki para tijmoyauas nopa kuali tlamachtili uan senkistok xijtekipano Dios.
6 Pampa ya nimotemaktilik kej nopa vino tlen kitoyauaj ipan nopa ofrenda* tlen temakaj uan ya monechkauijtok nopa hora para nechmakixtisej.*
7 Kejuak chikauak nitlateuijtok kej se kuali soldado, kejuak nimotlalojtok hasta kampa moneki nitlamis, nochipa nitlaneltokatok.
8 Desde nama toTeko, nopa juez katli kichiua tlen xitlauak, nechajokuilijtok* se corona tlen kinmaka katli kichiuaj tlen xitlauak. Ya nechmakas nopa corona kej notlaxtlauil ipan nopa tonali, pero amo san na, nojkia kinmakas katli kichixtokej ika nochi ininyolo ma monexti.
9 Xijchiua kampeka nima tiualas tinechitaki.
10 Pampa Demas nechtlauelkajki uan yajki altepetl Tesalónica pampa kipatiitak tlen onka ipan ni tonali;* Crescente yajki tlali Galacia, uan Tito yajki tlali Dalmacia.
11 San itstok Lucas nouaya. Xijualika Marcos mouaya, pampa tlauel nechpaleuia ipan Dios iteki.
12 Tíquico nijtitlanki Éfeso.
13 Kema tiualas xijualika nopa capa tlen nijkajki altepetl Troas ipan ichaj Carpo uan nopa amamimili, pero más nijnekiskia xijualika nopa tlajkuiloli tlen ijkuilijtok ipan kuetlaxtli.
14 Alejandro, katli tekiti ika cobre tlauel nechchiuilijtok tlen amo kuali. Jehová* kimakas tlen kinamiki.
15 Ta nojkia ximomokuitlaui tlen ya, pampa tlauel kiijixnamijki ika nochi ichikaualis nopa tlamachtili tlen tijmoyauayayaj.
16 Kema achtoui nimotenpaleuik* ininixpa tekichiuanij amo aka itstoya nouaya, nochi nechtlauelkajkej. Amo nijnekiskia Dios ma kintlajtlani cuentas ika nopa tlamantli.
17 Pero toTeko kena itstoya nouaya uan nechyolchikajki, para nechtekiuis uan kiampa senkistok ma momoyaua nopa tlamachtili uan ma kikakikaj ipan nochi altepemej, uan nechmakixtik para amo ma nechkua nopa león.
18 ToTeko nechmanauis tlen nochi tlamantli tlen amo kuali uan nechmakixtis para nechuikas ipan iTlanauatijkayo tlen eltok iluikak. Yaya kinamiki ma kiuejkapantlalikaj para nochipa uan amo kema ma tlami. Amén.*
19 Xikintlajpalo Prisca uan Áquila uan nojkia katli itstokej ichaj Onesíforo.
20 Erasto mokajki ipan altepetl Corinto, uan Trófimo nijkajtejki mokokoua* ipan Mileto.
21 Xijchiua kampeka para tiasiki kema ayamo peua tlaseseya.*
Mitsontlajpaloua Eubulo uan nojkia Pudente, Lino, Claudia uan nochi toikniuaj.
22 ToTeko ma kiteochiua nopa kuali tlalnamikilistli tlen tijnextia. Yaya ma kinexti ueyi iyolo ika inmojuantij.*
Tlen ijkuilijtok tlatsintla
^ Kanajya kiijtouaj “toTeotsij”.
^ O “ika paciencia”.
^ O “cuentos”.
^ Kanajya kiijtouaj “tlakajkaualistli”.
^ O “nechmanauisej”.
^ Kanajya kiijtouaj “nechnayantilijtok”.
^ Kanajya kiijtouaj “nimomanauik”.
^ O “Kiampa ma eli”.
^ Kanajya kiijtouaj “kokoya”.
^ Kanajya kiijtouaj “seseua”.
^ O “ma inmechmaka tlateochiualistli tlen amo kinamiki tijselisej”.
