Nopa ompa carta tlen kintitlanilijkej Cristo itokilijkauaj tlen Corinto 9:1-15
9 Pero amo moneki ma niinmechtlajkuiljuili para inkichiuasej ni tekitl tlen ika inkinpaleuisej katli Dios* kiniyokatlalijtok,*
2 pampa nijmati para inkinekij intemakasej tlen inkipiaj ika nochi inmoyolo uan nikinpouilia toikniuaj katli euaj Macedonia kuali tlamantli tlen inmojuantij, pampa nikiniljuia ya kipia se xiuitl katli itstokej ipan tlali Acaya kisentilijtokej tlen ika tlapaleuisej. Uan amo san nopa, inmojuantij inkichiuaj ika pakilistli, nopa kinyololinijtok miakej tlen inijuantij nojkia kiampa ma kichiuakaj.
3 Pero nikintitlani toikniuaj para nelia xijsentilijtokaj tlen ika intlapaleuisej, kej nikijtok inkichiuaskiaj, uan kiampa amo san tlapik kema tikijtouaj inkinekij intemakasej tlen inkipiaj ika nochi inmoyolo.
4 Pampa tlaj katli euaj Macedonia yaskiaj nouaya uan inmojuantij ayamo inkisentilijtosej tlen ika intlapaleuisej, tojuantij tlauel timopinaualtiskiaj, pero más inmojuantij, pampa timotemachijkej ipan tlen inkichiuaskiaj.
5 Yeka nimoiljuik más kuali ma nikinyololini toikniuaj para ma yakaj achtoui kampa initstokej uan ma inmechpaleuikaj inkisentilisej tlen inkiijtojtoyaj intemakasej. Kiampa inkisentilijtosej pampa intemakasej ika nochi inmoyolo uan amo pampa inmechchiualtisej xitemakakaj.
6 Xikilnamikikaj: katli kentsi tlatojtokas, kentsi pixkas uan katli tlatojtokas miak, pixkas miak.
7 Sejse ma temaka tlen kitlapejpenijtok ipan iyolo, uan amo ma kiyolkoko yon ma temaka pampa kichiualtiaj, pampa Dios kiiknelia katli temaka ika pakilistli.
8 Nojkia, Dios hasta uelis kinextis ueyi iyolo ika inmojuantij* para amo kema ma inmechpolo yon tleno, uan nojkia para tlauel inkipiasej nochi tlen moneki uan kiampa uelis inkichiuasej tlen kuali.
9 (Sanse kej ijkuilijtok: “Ya temajmakatok miak tlamantli tlen kipia; kinmakatok katli amo tleno kipiaj. Nopa kuali tlamantli tlen kichiua nochipa kiilnamikisej”.
10 Dios kimaka miak xinachtli katli tlatoka uan techmaka pantsi para ma titlakuakaj, uajka nojkia inmechmakas uan kimiakilis nopa xinachtli para xitlatojtokakaj uan nojkia kichiuas xijpixkakaj miak tlamantli tlen kuali tlen inkichiuasej).
11 Ya tlauel inmechteochijtok para uelis intemakasej ika nochi inmoyolo miak tlamantli tlen inkipiaj, kiampa maseualmej kitlaskamatilisej Dios kema tojuantij titemakasej nopa regalo tlen inmojuantij inkititlanij.
12 Pampa ni tekitl tlen mochiua para titlapaleuisej, amo san kinpaleuia ma kipiakaj tlen kinpoloua katli Dios kiniyokatlalijtok, nojkia kichiua miakej maseualmej ma kitlaskamatilikaj Dios miak uelta pampa tikinpaleuiaj.
13 Kiampa inijuantij kiueyichiuasej pampa ni tekitl tlen ika tikinpaleuiaj kinextia para inmojuantij inkineltokaj nopa kuali tlamachtili tlen Cristo, tlen inmojuantij intematiltijkej ininixpa miakej, uan nojkia kinextia intemakaj ika nochi inmoyolo para inkinpaleuisej toikniuaj katli Dios kiniyokatlalijtok uan nojkia sekinok.
14 Uan kema inijuantij momaijtosej* por inmojuantij, kiijtosej para inmechikneliaj pampa Dios kinextijtok ueyi iyolo ika inmojuantij.*
15 Tijtlaskamatiliaj Dios pampa techmakatok se ueyi regalo tlen hasta amo tijmatij kenijkatsa tikixtomasej.
Tlen ijkuilijtok tlatsintla
^ Kanajya kiijtouaj “toTeotsij”.
^ O “tlatsejtseloltikej”, nikaj uan nochi kampa nesi ipan ni capítulo.
^ O “inmechmakas tlateochiualistli tlen amo kinamiki tijselisej”.
^ Kanajya kiijtouaj “motlatlajtisej”.
^ O “inmechmakatok tlateochiualistli tlen amo kinamiki tijselisej”.
