¿Nochipa tikinneltoka motatauaj?... Kemantika uelis tijmati ouij tijchiuas tlen mitsiljuiaj. Uajka, ¿tlake uelis mitspaleuis nochipa tikinneltokas motatauaj? Tlaj tijchiuas kej Jesús. ¿Timoiljuia Jesús nochipa kineltokak Jehová uan itatauaj?... Ma tikitakaj tlen kichijki Jesús.

Kema Jesús ayamo ualayaya ipan Tlaltipaktli, itstoya ne iluikak iuaya iTata Jehová. Uan kema tlakatiko ipan Tlaltipaktli, nojkia kipixki itata uan inana, katli motokaxtiyayaj José uan María. ¿Mitspaktiskia tijmatis kenijkatsa tlakatiko ipan Tlaltipaktli?...

Jehová kipanoltik Jesús inemilis ipan María itlakayo, kiampa ueliskia tlakatis uan itstoskia ipan Tlaltipaktli. Jesús moskaltik ipan María itlakayo kej moskaltiaj nochi pilkonetsitsij, uan kema panok chiknaui mestli, Jesús tlakatki. Kiampa María uan José elkej Jesús itatauaj ipan Tlaltipaktli.

Kema Jesús kipixtoya 12 xiuitl, kinextik tlauel kiikneliyaya iTata Jehová. ¿Kenijkatsa kinextik? Se tonali, Jesús uan ichampoyouaj kiueyichiuatoj Jehová ipan altepetl Jerusalén, uan kema José uan María mokuepayayaj ininchaj, kiitakej Jesús amo yauiyaya ininuaya. ¿Kanke timoiljuia itstoya?...

José uan María sampa yajtiuetskej Jerusalén uan kitemotoj Jesús. Kampa ueli kitemojtinemiyayaj uan amo kipantiyayaj, yeka tlauel motekipachojtoyaj. Teipa, kema panok eyi tonali kipantitoj ipan teokali. ¿Kenke timoiljuia itstoya nopaya?... Pampa nopaya kimachtiskiaj tlen Jehová. Jesús tlauel kiikneliyaya iTata Jehová uan kinekiyaya kichiuas tlen kipaktia. Yeka Jesús nochipa kineltokak Jehová maske maseualmej kichiuilijkej tlen amo kuali. ¿Timoiljuia Jesús nojkia kineltokak José uan María?... Kena, Biblia kiijtoua kena kinneltokak.

¿Tlake techmachtia tlen kichijki Jesús?... Tlen kichijki techmachtia se tlamantli tlen tlauel ipati: maske kemantika ouij, moneki tikinneltokasej totatauaj. Yeka, ¿tikinneltokas motatauaj?...