¿Kenke tlauel yolpaktokej katli nesij nikaj? Nesi yajtoyaj ipan se ueyi tlanechikolistli. Kej kinnauatijkej toTeotsij itekipanojkauaj katli uejkajkia itstoyaj ma mosentilikaj expa sejse xiuitl, tojuantij nojkia tlauel tiyolpakij kema mochiua uejueyi tlanechikolistli (Deuteronomio 16:16). Sejse xiuitl mochiua eyi uejueyi tlanechikolistli: ome ueyi tlanechikolistli tlen se tonali uan se ueyi tlanechikolistli tlen eyi tonali. ¿Kenijkatsa techpaleuia kema timonechikouaj?

Kichiua kuali ma timouikakaj ininuaya toikniuaj. Nopa israeleuanij tlauel yolpakiyayaj kema kiueyichiuayayaj Jehová “tlamiakapa”. Tojuantij nojkia tlauel tiyolpakij kema timonechikouaj uan tijueyichiuaj toTeotsij ika toikniuaj (Salmo 26:12; 111:1). Kema mochiua uejueyi tlanechikolistli tikinixmatij sekinok Jehová itlajtoltemakauaj tlen itstokej ipan sekinok tlanechikoli uan ipan sekinok altepemej. Tlajkotona titlakuaj sansejko kampa timosentiliaj, ni kichiua kuali ma timoixmatikaj (Hechos 2:42). Nopaya tikitaj kenijkatsa nochi ‘toikniuaj moikneliaj’ ipan nochi Tlaltipaktli (1 Pedro 2:17).

Techpaleuia tlauel kuali ma titlaneltokakaj. Kema nopa israeleuanij kinmachtiyayaj “[kikuamachilijkej] itlajtol toTeko” uan ni kinpaleuik (Nehemías 8:8, 12). Tojuantij nojkia tlauel tijpatiitaj tlen techmachtiaj ipan uejueyi tlanechikolistli. Ipan sejse tlamachtili kiixtomaj se tlamantli tlen uala ipan Biblia. Uan ika kuajkualtsitsij tlamachtili uan tlanextilili techmachtiaj kenijkatsa tijchiuasej tlen toTeotsij kineki. Kema tikintlakakiliaj toikniuaj katli tlaijiyouijtokej pampa kitokiliaj Cristo ipan ni ouij tonali, tlauel techyolchikaua. Ipan uejueyi tlanechikolistli tlen eyi tonali kipanoltiaj se tlanextilili, nopaya moyoyontiaj kej uejkajkia uan kej nopa tikitaj tlen Biblia kiijtoua panok, uan ika ni techmachtiaj miak tlamantli tlen techpaleuia. Ipan uejueyi tlanechikolistli moatsonpoliuiltiaj katli kinextiaj motemaktilijtokej ika toTeotsij.

• ¿Kenke tlauel tipakij kema timonechikouaj ipan uejueyi tlanechikolistli?

• ¿Kenijkatsa mitspaleuis tlaj tias ipan se ueyi tlanechikolistli?