Ipan toreligión katli tlayakanaj amo kintlaxtlauiaj. Kej kichijkej achtoui Cristo itokilijkauaj, nama kintlaliaj ma tlayakanakaj katli uelij ‘kinmokuitlauisej’ toTeotsij itekipanojkauaj (Hechos 20:28). Ni ueuejtlakamej tlauel kuali mouikaj ika toTeotsij uan kinyakanaj toikniuaj kej Biblia kiniljuia: “Xikinmokuitlauikaj ika pakilistli uan ika kuali inmoyolo, [...] amo ximoiljuikaj para toTeko inmechfuerzajuiskia, [...] amo xijchiuakaj pampa inkinekij inkitlanisej tomij. Xijchiuakaj pampa tlauel inkinekij inkitekipanosej toTeko” (1 Pedro 5:1-3). ¿Kenijkatsa techpaleuiaj ueuejtlakamej?

Techmokuitlauiaj uan techpaleuiaj. Ueuejtlakamej techyakanaj uan techpaleuiaj amo ma tijkauakaj Jehová. Inijuantij kimatij toTeotsij kinmakatok ni tekitl tlen tlauel ipati, yeka techpaleuiaj kuali ma tiitstokaj, ma tiyolpaktokaj, uan amo technauatiaj ma tijchiuakaj san tlen inijuantij kinekij (2 Corintios 1:24). Kej se akajya tlauel kuali kinmokuitlauia itlapialjuaj, ueuejtlakamej kichiuaj kampeka kinixmatisej nochi toikniuaj tlen itstokej ipan tlanechikoli (Proverbios 27:23).

Techmachtiaj ma tijchiuakaj tlen toTeotsij kineki. Sejse chikueyi ueuejtlakamej tlamachtiaj ipan tlanechikoli. Ni techpaleuia kuali ma titlaneltokakaj (Hechos 15:32). Ni tlakamej katli tlatekipanouaj ika nochi ininyolo nojkia kitlachiliaj kanke moneki titlajtolmoyauasej, kisaj touaya uan technextiliaj kenijkatsa tijchiuasej.

Techyolchikauaj. Pampa ueuejtlakamej kinekij kuali ma timouikakaj iuaya Jehová, techpaxalouaj tochaj uan monojnotsaj touaya ipan kali kampa timosentiliaj. Nojkia techpaleuiaj uan techyolchikauaj ika toTeotsij iTlajtol (Santiago 5:14, 15).

Miakej ueuejtlakamej amo san tlatekipanouaj ipan tlanechikoli, nojkia tekitij uan kinmokuitlauiaj ininchampoyouaj. Yeka moneki tlauel tikintlepanitasej pampa inijuantij tlauel tekitij (1 Tesalonicenses 5:12, 13).

• ¿Kenijkatsa techpaleuiaj ueuejtlakamej ipan tlanechikoli?

• ¿Kenijkatsa kinextiaj ueuejtlakamej kinekij techpaleuisej?