¿Tikita kenijkatsa nesi ipan ni pilamochtsi tlauel kuali moyoyontiaj Jehová itlajtoltemakauaj kema monechikouaj? ¿Kenke tijnekij kuali tinesisej uan kuali timoyoyontisej?

Pampa tijtlepanitaj toTeotsij. ToTeotsij amo san kitlachilia kenijkatsa tinesij (1 Samuel 16:7). Kema timonechikouaj kampa tijueyichiuaj, nelnelia tijnekij tijnextisej tijtlepanitaj ya uan toikniuaj. Tlaj monekiskia tiasej kampa se tlanauatijketl, tlauel kuali timoyoyontiskiaj pampa tijmatij ya tekichiua. Uajka kej tinesij uan kej timoyoyontiaj kema tiauij ipan tlanechikoli tijnextiaj tlauel tijtlepanitaj toTeotsij Jehová, pampa ya ‘Tlanauatijketl tlen nochi tlaltinij’, uan nojkia tijnextiaj tijtlepanitaj kampa titlaueyichiuaj (Jeremías 10:7).

Pampa tijnextiaj timoyakanaj ika toTeotsij iTlajtol. Biblia kintlajtolmaka Cristo itokilijkauaj ma ‘moyoyontikaj uan ma moyektlalikaj kej kinamiki’ (1 Timoteo 2:9, 10). Timoyoyontisej ‘kej kinamiki’ kiijtosneki amo timokentisej yoyomitl tlen tlauel patiyo, tlauel kototsi o tlauel kechkoyauak. Nojkia kiijtosneki amo san kej ueli ma timoyoyontikaj yon ma timoueyimatikaj ika tlen timokentiaj. Ni nojkia techpaleuia ma tijtlapejpenikaj kuajkualtsitsij yoyomitl tlen techpaktis. Tlaj kuali timoyoyontisej uan kuali tinesisej, sekinok ‘kiitasej nochi tlen kuali tlen toTeotsij itlatekipanojkauaj kichiuaj’, uan nopa kichiuas nojkia ma kiueyichiuakaj toTeotsij (Tito 2:10; 1 Pedro 2:12). Yeka, tlaj kuali timoyoyontisej kema tiasej ipan tlanechikoli, kichiuas kuali ma kinitakaj Jehová itekipanojkauaj.

Tlaj tijnekij kuali tinesisej, amo moneki timokentisej yoyomitl tlen tlauel patiyo. Yeka amo xijkaua ma mitstekipacho ni tlaj tijneki tias touaya ipan tlanechikoli.

• ¿Kenke tlauel moneki kuali ma timoyoyontikaj kema tiauij tlanechikoli kampa tijueyichiuaj toTeotsij?

• ¿Tlake textos tlen uala ipan Biblia techpaleuia kema moneki tikitasej kenijkatsa timoyoyontisej?