Jesucristo kiniljuik itokilijkauaj: “Xijkauakaj ma kauani inmotlauil iniixtla tlakamej uan kiitasej tlen kuali inkichiuaj uan kiueyichiuasej inmoTata tlen itstok ipan iluikak” (Mateo 5:16). Yeka Jehová itlajtoltemakauaj kitekiuiaj Internet, uan ipan jw.org/nch tikitas tlake kineltokaj uan tlake kichiuaj. ¿Tlake nesi nopaya?

Monankilia ika Biblia katli miakej kinekiskiaj kimatisej. Ipan Internet tijpantis se keski tlajtlanili tlen tlauel ipati katli miakej kinekiskiaj ma kinnankilikaj. Nopa pilamatsi ¿Asis se tonali kema ayokmo titlaijiyouisej? uan pilamatsi ¿Uelis moyolkuisej katli miktokej?, uelis tijpouas ipan Internet ipan kipano 600 tlajtoli. Nojkia tikitas Traducción del Nuevo Mundo ipan kipano 130 tlajtoli uan amatlajkuiloli tlen ika uelis timomachtis Biblia; kej nopa amochtli ¿Tlake nelnelia tlamachtia Biblia? Uan Tlen Tematiltia uan ¡Despertad! katli yajyankuik. Nochi ni uelis tijpouas o tijtlakakilis ipan Internet, uelis tijkixtis ika MP3, PDF o EPUB. Uelis tijkixtis se keski iamayo ipan motlajtol uan tikinnextilis katli nojkia kinekij kimatisej tlen kichiuas toTeotsij iTlanauatijkayo. Nojkia onka tlamachtili ika video ipan miak tlajtoli tlen uelis kiitasej katli amo tlakakij. Uelis tijkixtis grabación tlen tlapoualistli katli uala ipan Biblia, tlanextilili tlen mokixtijtok ipan Biblia uan yejyektsitsij uikatl katli ueliskia tijkakis kema amo tleno tijchiua.

Nesi tlake nelnelia kichiuaj Jehová itlajtoltemakauaj. Ipan Internet tikitas tlake namanok tijchijtokej uan videos tlen amo uejkaua kampa nesi titlajtolmoyauaj ipan nochi Tlaltipaktli, tlake kinpanotok Jehová itlajtoltemakauaj ipan ni tonali uan kenijki titepaleuiaj. Nopaya tikitas kema mochiuas uejueyi tlanechikolistli uan tijmatis kanke tikintlajkuiljuilis ipan kali Betel tlen onka.

Pampa tijtekiuiaj Internet tijchiuaj kejuak ma kauani katli melauak tlamachtia Biblia. Ni miakej kinpaleuijtok ipan tlauel uejuejka altepemej, kej katli itstokej kampa itoka Antártida. Tijtlajtlaniaj toTeotsij Jehová “ma momoyaua nimantsi itlajtol” ipan nochi Tlaltipaktli, uan kej nopa ma kiixmatikaj Jehová (2 Tesalonicenses 3:1).

• ¿Kenijkatsa ipan Internet kampa jw.org/nch kinpaleuia miakej ma kimatikaj katli melauak tlamachtia Biblia?

• ¿Tlake mitspaktiskia tikitas ipan Internet kampa Jehová itlajtoltemakauaj tlamachtiaj?