TLAMACHTILI 36
Amo kema ma titlakajkayauakaj
Nochi tijnekij tikinpiasej touampoyouaj katli amo tlakajkayauaj, uan Jehová nojkia kiampa kineki ma elikaj iuampoyouaj. Maske kiampa tijnekij tijchiuasej, uelis ouij tijmatij pampa ipan ni tonali miakej maseualmej tlauel tlakajkayauaj. ¿Kenijkatsa techpaleuis tlaj amo kema titlakajkayauasej?
1. ¿Kenke tlauel moneki amo titlakajkayauasej?
Kema amo titlakajkayauaj tijnextiaj tikikneliaj uan tijtlepanitaj Jehová. Xikilnamiki: Jehová kimati nochi tlen timoiljuiaj uan tlen tijchiuaj (Hebreos 4:13). Jehová tlauel yolpaki kema kiita amo tijnekij titlakajkayauasej. Biblia kiijtoua: “ToTeko kikualankaita nopa tlakatl tlen uijkoltik iojui, pero kiniknelia tlen itstokej xitlauakej iixpa” (Proverbios 3:32).
2. ¿Kema uelis tijnextisej amo titlakajkayauaj?
Jehová kineki nochipa ma timokamanaljuikaj “se ika seyok ika tlajtoli tlen melauak” (Zacarías 8:16, 17). ¿Tlake kiijtosneki nopa? Kiijtosneki amo tikinkajkayauaj touikaljuaj, katli ininuaya titekitij, toikniuaj yon tekichiuanij. Katli amo tlakajkayauaj, amo tlachtekij yon kinkajkayauaj sekinok pampa kinekij kipiasej se tlamantli (xijpoua Proverbios 24:28 uan Efesios 4:28). Nojkia kiixtlauaj tlen tlanauatianij tlajtlanij (Romanos 13:5-7). Ipan ni uan ipan sekinok tlamantli, tijnekij nochipa tinemisej “xitlauak” (Hebreos 13:18).
3. ¿Kenijkatsa techpaleuia kema amo titlakajkayauaj?
Kema amo titlakajkayauaj, sekinok motemachiaj ipan tojuantij. Uan nojkia titlapaleuiaj kuali ma tiitstokaj ipan tlanechikoli pampa toikniuaj motemachiaj ipan tojuantij uan timoitaj kej tiiknimej. Nojkia techpaleuia kuali ma tijyolmatikaj. Tlaj amo titlakajkayauasej, sekinok “kiitasej nochi tlen kuali” tlen tijchiuaj, uan uelis nojkia kinekisej kitekipanosej Jehová (Tito 2:10).
KUALI XIMOMACHTI
Ma tikitakaj kenijkatsa techpaleuia kuali ma timouikakaj iuaya Jehová kema amo titlakajkayauaj, uan ipan tlake tlamantli uelis tijnextisej amo titlakajkayauaj.
4. Jehová kuali kinita katli amo tlakajkayauaj
Xijpouakaj Salmo 44:21 uan Malaquías 3:16 uan xijnankilikaj ni tlajtlanili:
-
¿Timoiljuia nelnelia amo aka kimatis tlaj tiistlakatisej? ¿Kenke kiampa timoiljuia?
-
¿Kenijkatsa timoiljuia kiyolmatis Jehová tlaj amo tiistlakatisej maske ouij tijmatisej?
Kema konemej amo istlakatij, inintatauaj yolpakij. Uan kema tojuantij amo tiistlakatij, Jehová nojkia yolpaki.
5. Nochipa ma tikijtokaj tlen melauak
Maske miakej maseualmej moiljuiaj amo kinpaleuis tlaj kiijtosej tlen melauak, onka se keski tlamantli tlen techpaleuis ma tikitakaj kenke moneki amo titlakajkayauasej. Xikita se keski tlamantli. Xikitakaj nopa VIDEO.
Xijpouakaj Hebreos 13:18 uan xikitakaj kenijkatsa uelis tijnextisej amo titlakajkayauaj...
-
...ika tochampoyouaj.
-
...kampa titekitij o ipan escuela.
-
...ipan sekinok tlamantli.
6. Tlauel techpaleuia kema amo titlakajkayauaj
Maske uelis tijpiasej se keski kuesoli kema amo titlakajkayauaj, kema panos tonali tikitasej tlauel techpaleuik pampa amo titlakajkayajkej. Xijpouakaj Salmo 34:12-16 uan xijnankilikaj ni tlajtlanili:
-
¿Kenijkatsa techpaleuis kuali ma tiitstokaj kema amo titlakajkayauaj?
-
A. Kema se tlakatl uan isiua amo tlakajkayauaj, kinpaleuia kuali ma itstokaj.
-
E. Tlaj se akajya amo tlakajkayaua kampa tekiti, katli kitekimakak motemachia ipan ya.
-
I. Kema maseualmej amo tlakajkayauaj, tekichiuanij kuali kinitaj.
TLEN SEKINOK KIIJTOUAJ: “Tlaj amo tikinyolkokoua sekinok, amo kenijki tlaj san kemantika tiistlakatis”.
-
¿Timoiljuia Jehová kikualankaita nochi istlakatili? ¿Kenke kiampa timoiljuia?
TLEN TIMOMACHTIJKEJ
Jehová kineki iuampoyouaj amo ma tlakajkayauakaj ika tlen kiijtouaj uan ika tlen kichiuaj.
¿Tlake tijyekok?
-
¿Ipan tlake tlamantli moneki tijnextisej amo titlakajkayauaj?
-
¿Kenke amo kinamiki timoiljuisej amo aka kimatis tlaj titlakajkayauasej?
-
¿Ta kenke timoiljuia moneki amo kema titlakajkayauas?
NOJKIA XIKITA NI
¿Kenijkatsa tetajmej uelis kinnextilisej ininkoneuaj amo ma istlakatikaj?
¿Tlake tlateochiualistli kiselisej katli kichiuaj tlen kiijtouaj?
Xijchiua tlen tikijtok uan tijselis miak tlateochiualistli (9:09)
Xikita tlaj kinamiki titlaxtlauasej tlen tlanauatianij tlajtlanij maske kemantika amo kuali kitekiuiaj nopa tomij.
“¿Kinamiki titlaxtlauas tlen tlanauatianij tlajtlanij?” (Tlen Tematiltia, septiembre 1, 2011)
¿Tlake kipaleuik se tlakatl ayokmo ma tlakajkayaua uan kuali ma monejnemilti?
“Nikitak Jehová teiknelia uan tetlapojpoljuia” (Tlen Tematiltia, tlamachtili)
Tlen nojkia mitspaktis tikitas
TLEN KINEKIJ KIMATISEJ
¿Kenijkatsa Jehová itlajtoltemakauaj tlamachtiaj ika Biblia?
Kema Jehová itlajtoltemakauaj mitsmachtisej ika Biblia amo mitsinamasej uan uelis tijtekiuis Biblia tlen ta tijnekis. Nojkia uelis tikintlaneuis sekinok kej mochampoyouaj o mouampoyouaj.
