Kema se akajya moijitskia kampa amo kinamiki, kisokiuia itlalnamikilis, kichiua san tlen ya kipaktia uan ayokmo kuali tlaneltoka. Nojkia, kinita sekinok kejuak se tlenijki tlen ika uelis moyolpakiltis uan kichiuas tlen ueli tlamantli ininuaya. Ayokmo moteka iuaya se akajya pampa nelia kiiknelia, kichiua san pampa kineki moyolpakiltis. Maske moijitskia kampa amo kinamiki, amo uejkaua yolpaki, pampa san kiyololinis ma kineki momekatis o kichiuas tlen tlauel amo kuali (Colosenses 3:5).

Apóstol Pablo kiijtok: “Noikniuaj [...], ma timoiyokatlalikaj tlen nochi tlamantli tlen kiijtlakos totlakayo o toyolo iixpa toTeko. Ma tijchiuakaj kampeka [...] tijchijtinemisej tlen senkistok tlatsejtseloltik iixpa toTeko pampa tijmakasij uan tijtlepanitaj” (2 Corintios 7:1). Maske miakej tlauel kiouijmatij kichiuasej tlen kiijtoua ni texto, moneki kichiuasej kampeka, pampa Jehová “mokualtlalijtok para [te]tlapojpoljuis” uan tepaleuis (Salmo 86:5; Lucas 11:9-13). Maske sampa kichiuaskiaj tlen amo kinamiki, tlaj kinyolkokos inintlalnamikilis uan mosentlalisej ayokmo kichiuasej nopa, toTeotsij  kipatiitas, pampa Biblia kiijtoua “tlen toTeko kiijtoua [ya nopa] ipati más [uan amo] tlen toyolo techiljuia” (1 Juan 3:20). Jehová kiita tlen tijyolmatij, yeka amo kitlachilia totlajtlakoljuaj. Uan pampa kuali kimati tlen techpano, ya kipaktia kema kiita tijtlajtlaniaj ma techtlapojpoljui. Yeka, nochipa ma timomaijtokaj uan ma tikiljuikaj ma techpaleui kej se pilokichpiltsi kitlajtlania itata ma kipaleui. Jehová uelis kichiuas ayokmo ma sokiyojto totlalnamikilis (Salmo 51:1-12, 17; Isaías 1:18). Moneki timomaijtosej uan timosentlalisej ayokmo tijchiuasej tlen tijchiuayayaj, yeka ayokmo kinamiki tikitasej pornografía, yon timouampojchiuasej ininuaya katli amo kuali monejnemiltiaj. *

Tlaj se akajya amo ueli kikaua moijitskia, uajka moneki kiiljuis itata o inana, katli nojkia kitekipanouaj toTeotsij. Nojkia uelis kiiljuis se toikni o se tosiuaikni katli nelia uelis kipaleuis (Proverbios 1:8, 9; 1 Tesalonicenses 5:14; Tito 2:3-5). *