Nimoskaltik ipan se pilaltepetsi tlen Montreal kampa amo onkayaya tomij. Nikinpixtoya chikueyi noikniuaj uan na nieliyaya teipaejketl. Kema nijpixtoya chikuasej metstli, notata mijki uan nonana monejki iselti techmokuitlauis.

Kema nieliyaya nipilsiltsi, pejki nijtekiuia drogas, nimauiltiyaya ika tomij uan nimosisiniyaya. Nimouikayaya ininuaya katli san tlemach tlachiuayayaj. Kema nijpixtoya 10 xiuitl pejki nikinpaleuia auilnenkasiuamej uan katli tetlanejtiyayaj tomij. Tlauel nechpaktiyaya nikinkajkayauas uan nikintlachtekilis maseualmej. Amo ueliyaya nijkaua ni tlamantli.

Kema nikaxitik 14 xiuitl, kuali nijmatiyaya kenijkatsa nitekajkayauas. Se neskayotl, nijkouayaya miak relojes, pulseras uan anillos tlen nesiyaya kej oro, uan ipani nikijkuilouayaya 14 quilates. Uan teipa nijnamakayaya ojtipa uan kampa kiketsayayaj inincarro katli tlakouayayaj ipan uejueyi tiendas. ¡Tlauel kuali nitlanamakayaya! Se tonali, nijtlanki 10,000 dólares tlen motekiuia Canadá.

Kema nijpixtoya 15 xiuitl, nechkixtijkej kampa nechtsaktoyaj, yeka ayokmo nijpixki kampa nimokauas. Nikochiyaya ojtipa, ipan parques uan ipan ininchaj nouampoyouaj.

Maske policías miakpa nechitskijkej pampa kinekiyayaj kimatisej kanke nijkuiyaya tlen nijnamakayaya, amo kema nechtsajkej pampa amo nikichtektoya. Kena nitlaxtlajki miak tomij pampa nitlakajkayauayaya, patiyo nijnamakayaya tlen amo eliyaya ipati uan nojkia pampa amo nijpixtoya se amatl kampa kiijtouayaya ueliskia nitlanamakas. Amo nimajmauiyaya uan axtleno nijmakasiyaya, yeka nikintekipanouayaya katli tetlanejtiyayaj tomij kej se tlainanketl. Nopa tekitl eliyaya mauilili uan kemantika nijuikayaya nopistola. Nojkia, pejki nitekiti ininuaya katli kichiuayayaj tlen tlauel amo kuali.

Nijkajki tlen Biblia tlamachtia kema nijpixtoya 17 xiuitl. Notlaixtokil pejki momachtia ininuaya Jehová itlajtoltemakauaj. Teipa nijkajtejki pampa amo nechpaktik tlen Biblia tlamachtia uan niajki iuaya seyok siuatl katli ipa iuaya ninemiyaya.

Uan nopa ichpokatl katli iuaya niajki nojkia pejki momachtia Biblia ininuaya Jehová itlajtoltemakauaj. Tlauel nechpaktik pampa kipatlak inemilis, nojua tlauel teiknelik uan kipixki iyolo nouaya. Se tonali nechtlanejkej ma nia tlanechikoli uan kena niajki. Nopaya tlauel kuali nechselijkej uan amo eliyayaj kej sekinok maseualmej. Tlauel kuali nijyolmatki. Kema nieliyaya niokichpil, nochampoyouaj amo tlauel nechiknelijkej yon kintekipachok tlen nechpanoyaya. Jehová itlajtoltemakauaj nechnextilijkej tlauel nechikneliaj uan kema nechiljuijkej tlaj nijnekiyaya nimomachtis Biblia ininuaya, nimantsi nikiniljuik kena nimomachtiskia.

Tlen nechmachtijkej nechmanauik. Ininuaya omej tlachtekinij timoiljuijtoyaj tikichtekisej 50,000 dólares uan kiampa ueliskia nitlaxtlauas kampa nitlauikayaya. ¡Tlauel kuali pampa amo niajki ininuaya! Nopa omej kena kichijkej tlen timoiljuijtoyaj, yeka se kimiktijkej uan nopa seyok kitsajkej.

Tlen nimomachtiyaya ipan Biblia, kichijki ma nikita monekiyaya nijpatlas miak tlamantli ipan nonemilis. Se neskayotl, ipan 1 Corintios 6:​10 kiijtoua: “Yon tlachtekinij, yon katli kiixtokaj tlen amo ininaxka, yon katli moiuintiaj, yon katli tetlaijiljuiaj uan katli tekajkayauaj amo uelis kiselisej toTeotsij iTlanauatijkayo”. Kema nijpojki nopa texto, pejki nimochokilia. Monekiyaya nijpatlas nonemilis (Romanos 12:⁠2). Tlauel nimosisiniyaya, san niteistlakauiyaya uan tlauel amo kuali kej niitstoya.

Maske kiampa niitstoya, nikitak Jehová teiknelia uan tetlapojpoljuia (Isaías 1:18). Yeka nimomaijtok ika nochi noyolo uan nikiljuik ma nechpaleui nijkauas tlen nimomajtoya nijchiua uan kiampa ueliskia nijpatlas nonemilis. Ika itlapaleuil Jehová ayokmo nijchijki tlen amo kuali. Teipa nijchijki tlen tlauel ipati: pampa nimoamasenkajki iuaya notlaixtokil.

Kema nijpixtoya 24 xiuitl, ya nikinpixtoya eyij nokoneuaj. Monekiyaya nijpantis se tekitl tlen ika nikinpanoltiskia nochampoyouaj. Amo kuali nimomachtijtoya yon nitekititoya. Sampa nikiljuik Jehová ma nechpaleui uan nijtemoto tekitl. Kema nechtlatsintokiyayaj kampa ueliskia nechtekimakasej, nikiniljuiyaya ya nijpatlatoya nonemilis uan ayokmo nijnekiyaya nitlachtekis. Maske kemantika nikiniljuiyaya nimomachtiyaya Biblia pampa nijnekiyaya kuali nimonejnemiltis, amo aka nechtekimakayaya. Kema se tlakatl nechtlajtlaniyaya se keski tlamantli uan ya nijpouilijtoya tlen nechpanok, nechiljuik: “Maske amo nijmati kenke, nikita moneki nimitstekimakas”. Ipan nopa tonali, nikitak Jehová nechnankilik notlamaijtol. Teipa, nosiua uan na timochijkej Jehová itlajtoltemakauaj.

Nijmati nojua niyoltok pampa nijchiua tlen Biblia kiijtoua uan nimonejnemiltia kej Jesús. Tlauel niyolpaki pampa nikinpixtok nochampoyouaj. Nama ayokmo nechyolkokoua notlalnamikilis pampa nimotemachia Jehová ya nechtlapojpoljuik.

Kipia 14 xiuitl nijchijtok se tekitl tlen tlauel ipati: nikinpaleuia sekinok maseualmej ma kikuamachilikaj tlen Biblia kiijtoua. Namanok, nosiua nojkia pejki tlatekipanoua nouaya. Nojkia, ipan ni 30 xiuitl tlen panotok, nikinpaleuijtok 22 maseualmej katli ininuaya nitekiti ma mochiuakaj Jehová itlajtoltemakauaj. Maske nojua nia ipan uejueyi tiendas, nama ayokmo nikinkajkayaua maseualmej kej achtouia nijchiuayaya. Nama nijchiua kampeka nikinpaleuis sekinok ma motemachikaj nechka ayokmo itstosej tlachtekinij (Salmo 37:​10, 11).