ǃAOǃAODI: ǂGui ǂgīǂgōsi tsî ǂgomdi ǂgaeǂgui-aon ge gere dītsâ. Elobmîs haisi-amsa ǀam kaisa. ǁÎn ge hoaǁae ǁîn ǀgaiba gere sîsenū. Elobmîsa ūhâhes tsî kuruhes tamas ka io, ǂnûiǃkhunihesa ǀam kaisa. ǃGaoǃgâ re ǀgam aiǁgau ra:

• ǁAupexa 167ǁî kuri Jesub ǃnaes aiǃâ.: ǂGaeǂgui-aob Antiochus Epiphanesi ge gere ôa am, Grikeǁîn di ǂgomsa Jodeǁîn ai ǁgariǁnāsa. Tsî ge mîǁgui hoa Hebre xoadi nî dīkākāhesa. ǁÎb khoegu ge “ǂhanub xoa aihe hâ ǂkhanisa gu gere hō o. O gere ǀhauǃā tsî gere ǂhūpiǂui. Tsî ǁnān hîna ge ǀgaib tsî ǁkhaeǂgoahesa gere ôan ge gere ǃgamhe.” Tib ge ǃkharu ge ǁaeb xoa-aob Heinrich Graetza ge mî.

• ǁAegub kurin ǃnâ gu ge ǂgaeǂgui-aogu Katolik ǂgoms diga ge ǁaixa. ǂGomdi ǁkhāǁkhā-aogu ge khoena Elobmîsa xū ǁkhāǁkhā o. Tsî ǁîgu ǃhaoǃnâsi xūna ge ǁkhāǁkhā tama io. ǁÎgu ge ge mîǁgui, ǀnî hâ Elobmîs ǂkhanidi Psalmdi hîna Latins gowab ǃnâ hâ tamadeds ga ūhâ o. Ots kerkheba xu ǁnā bē hâsa. ǀGui ǂgaeǂgui-aob kherkheb dib ge ge mîmâi. “ǁGariǁgarisase ǁnā khoen hîna ǀnî xoade ūhâna ôaǂuisa. . . . Tsî hoaǁae ǁîn di omde ôaǃnâsa. ǁÎgu ge mâǃkhai i hoa i hîna gu gere ǂâi i sâuǃnâhe hâde gere ôaǃnâ. . . . Mâ om-i hoa i hîna gu nē khoena hō ǃnâ i ge, gere dīkākāhe.”

Elobmîs khākhoen ga nēsa dīhō hâ o. ǁÎs haisi-amsa dīkākāsa, os ge Elobmîsa ga kā hâ.

MATIS GE ELOBMÎSA MÂǃKHARU: Gao-aob Antiochusi ge ǁîb ǂâisa Israelǁîn ai ge ǂnûi hâ i. Xawen ge Jodeǁîna ǂgui khoena nau ǃhūgu ǃnâ ge ǀhaoǀhao. ǂAnsa ūhâ khoen ge Jesub hās khaoǃgâ 60 persent, Jodeǁîn hîna Israeli ǃauga ge hâ ina ge ǃgôakhâi. Jodeǁîn ge ǁîn di sinagogegu ǃnâ xoade ge sâu hâ i. ǁKhā xoadi hîna hānîǁaeb surib tsî Xristeǁîn xa nî sîsenūhena ǃkhōǂgā hâse.​—ǃNaeǃkhaidi 15:21.

ǁAegub kurin ǃnân ge Elobmîsa a ǀnam khoena. ǁKhoaǂgaose ǃgôaǃgonhen ra hîna ge aiǃgû xoade ǂnûiǃkhunisa. Tik masindi nî hās aisi, i ge Elobmîsa ǂkhari ǃâgu 33 gowagu digu ǃnâ ge hōhe ǁkhā i. ǁNapaxus ge Elobmîsa ǂnûiǃkhunihe tsî ǃhūbaib ǂhâbase ge māǂuihe.

ǀAMǂOAS: Elobmîsa ra ǂnûiǃkhuni khoen ge gaogu tsî ǂgomdi ǂgaeǂgui-aogu xa mâǃoahe tsî gere ǃaoǃaohe. Xawes ge Elobmîsa ǃhūbaib ǂhâbase ge māǂuihe. Tsî hoa ǂkhanin hîna ǂnûiǃkhunihe hân xa a ǂoaǂamsa. ǁÎs ge ǂhanugu, gowagu, ǃhūgu tsî ǂgui khoen ûiga ge dawa.