INDONESIAB di ǂkhari eilandi Sangir Bersars ǃnâ ǁgoeb tawa di ge ǃnona ǃgâsade ra hâ. Kurina ǃkharu hâse di ge ǀguiba huribi gere sîsen. ǁÎdi ge ǃamkuse a ǂansa ǁnā eilands ai aoǁnâ sîsenni tsî khoena Elobmîsa ǁnâuǃā kais ǀkha. Xawe ǁnā ǃnās ai di ge ǀkhara xū-e gere dī.

Hurib ǁgammi ǃnâ ra ǃgûǂgâse di ge ǃgom ǀuina ūkhâi tsî gere tani ǂûi. ǀNî ǀuidi ge sokerbals kōse ge kai i. Saorase di ge tarade stuldi ai ǂnû tsî ǁnā ǀuide hamers ǀkha, anis ǃupudi xa ǂkhariro ǃâdi ǃnâ gere ǂnauǃā. ǁNās khaoǃgâ di ge nē ǀuide xapas ǃnâ ǂgā tsî hâ di gere ǃkhaiba ǃoa ge tani. Tsî di ge ǀuide kai ǁgarugu ǃnâ gere ǂga ī-i lori gu ai ǃnaohe tsî dao kurus ǃaroma sîsenūhe.

ǁÎdi ǀguis ge Hulda ti ge ǀon hâ i. ǁÎs mâsib ge ǃnāsa ǁaeba gere mā-amsi nau ǃgâsa ra, hîna ge nē sîsen-e gere dī ra xa. Matare-es gere marisas ge ǁîs omaris di ǂhâsigu ǃaroma gere sîsenū. Xawe nē ǃnāsas ge ǀnî marisa sâu tsî ǀnîhâ xū-i ǃaroma gere sîsenū ǂgao. ǁÎs ge tabletsa gere ǂhâba is JW Librari appsa sîsenū ǁkhā. Huldas ge ge ǂan i nē apps ūhâ vidion tsî ǀnîhâ xūn nî huisisa, nauna aoǁnâbas, Elobmîsa ǁkhāǁkhāsen tsî ǁnâuǃās ǀkha.

Huldas ge ǀgui tsî ǃkhare ǁkhâba ǀgam īrkha mâ ǁgoas hoasa gere sîsen is lorib ǃgâbǀkhāba ǀoaǀoa. ǀAms ais ge ǂâusa marisa ǀhaoǀhao tsî tabletsa ge ǁama.

“Sorosise ta ge kaise tsau tsî gere tsû ǀuina ǂnaus xa,” Huldas ge ra mî, “ǃKhaese ta ge ge ǀuru nē tsûgu xa, nē ǀasa tablets ge ti aoǁnâ sîsenni ǀkha ge huite tsî Xristeǁî ǀhaodi ǃaroma aiǂhomisensa ge supusupu.” ǀAro tsîs ge ra mî, nē tablets ge ge huisi is ǀhoahâb ǀkha ǀhaode hâǃnâ ǁkhā tsî ǁîs aoǁnâ sîsenni ǀkha aiǃgû koronas ǁaeb ǃnâ. ǃGâiaǂgao da ge ra Huldas ǀkha, ǁîs mimâisas ge sīǃnâ o.