Sida kuru-aob ge sida xa kaise a gā-ai. ǀNamǀnamsa ǁgûseb ge sida kaise ra tsâba. ǁÎb ǂâibasen tama ge is ge sida ǁÎb huib ose aitsama nî mâbasensa. (Jeremiab 10:23) ǁNās ǀkha da ge ǂkhari ǀgôaron ǁgûn di huiba ǂhâba hâ, khami sida hoada Elob di huiba ǂhâ hâ. (Jesajab 48:17, 18) Elobmîs tsoatsoadi ge ra daoǁgau da tsî ǀkhaeb ase i Eloba xu.​—Khomai re 2 Timoteub 3:16.

Jehovab di ǂhanugu tsî tsoatsoadi ge ra ǁkhāǁkhā da mati da ǂoaǂamsa ûiǀgauba ūhâ ǁkhā ǀgausa nēsi. Hānîǁaeb di mādawa-ams ǀamo ûib tisa da a hōǁkhā ǀgausa ra ǁgau da. Elob ge sida kuru amaga i ge a ǂhanu sida gangans ǀkha ǁîb di ǀnamǀnamsa daoǁgausa ūǃoasa.​—Khomai re Psalmti 19:8, 12; ǂHaiǂhais 4:11.

Vidioba kō re Eloba hoa ǀgorede ra ǃeream?

Elobmîs tsoatsoadi ge ǃgaoǃgaob di amaba. Mîmâdi ge nau ǀkhāb ai, hâ a mâsib ai ra māhe. (Deuteronomium 22:8) Sida ge sida ǂkhûsa nî sîsenū tsoatsoade ǁnâuǃā tsî hâ ǃnâ da hâ mâsib ǃnâ sîsenūsa. (ǂKhoa-mîdi 2:10-12) Aiǁgause, Elobmîs ge ra ǁkhāǁkhā ûib Eloba xu ǀkhaeb ase īsa. ǁNā amab ge ra huida sîseni tawa, oms tawas tsî ǃnari ta ga ra o. I da hoaba ǁkhōǁkhōsa mâsiga dībexusa sida ûib tamas ka io nau khoen ûiba a ū ǁkhā na.​—Khomai re Ap. ǃNaeǃkhaidi 17:28.

Jesub ge kaise ǂhâǂhâsa ǀgam tsoatsoa ra xa gere ǃhoa. ǂGuros ge tae-i ǃaroman khoena ûi hâsa ra ǁgau. Eloba ǂan, ǀnambi tsî da ǂgomǂgomsase nî ǀgoreǀîbisa. Nē ǂguro tsoatsoasa da ge ū tsî mî da ra mîǁguigu hoagu ǃnâ nî ǂâiǃgâ. (ǂKhoa-mîdi 3:6) ǁNān nē tsoatsoade  ǂgaob ǀkha ra ūn ge Elob ǀhōsa kai ǁkhā, ama ǂkhîba hō, tsî ǀamo ûib tsîna a hōǁkhā.​—Khomai re Mateub 22:36-38.

ǀGamǁî Elobmîs tsoatsoas ge huida ǁkhā ǂkhîxa sâsa sîsenǁaesa nau khoen ǀkhā ūhâsa. (1 Korinteǁîn 13:4-7) ǁNāsa sida ûib ǃnâ sîsenūs ge ǂhâba hâ sida nî Eloba ǁgaesa ǁÎb khoena ra hâ ū ǀgaub ai da nî sida tsîna ǁîna hâ ūsa.​—Khomai re Mateub 7:12; 22:39, 40.

Elobmîs tsoatsoadi ge omaride ra ǁkhāǁkhā mati di ǀnamixa nî ǀguiǃnâxa kaihesa. (Koloseǁîn 3:12-14) Elob di Mîs ge omaride ra sâu ǁkhāǁkhās tsî nau daoǁgau ra tsoatsoadi ǃnâ-ū. ǃGameb nî hoaǁae hâhâsa.​—Khomai re Genesis 2:24.

Elobmîs ǃnâ hâ ǁkhāǁkhāde da ga sao o, o da ge sida mariǁhōgu tsî khoexaǃnâsib tsîna a sâu ǁkhā. Aiǁgause, sîsen mā-aon ge Elobmîs tsoatsoadi ǃoa-ai ra ûi, ǃgarise ra sîsen tsî ǂhauǃnâ khoena a ǀnamsa. (ǂKhoa-mîdi 10:4, 26; Hebreǁîn 13:18) Elobmîs ge ra ǁkhāǁkhā da mati da ū da hâ ǂhâǂhâsa xūn ǀkha ǂkhî ǁkhāsa tsî Elob di ǀhōsasisa ǃgôa ǁkhāsa ǃhūbaib di xūn ǃgâ ai.​—Khomai re Mateub 6:24, 25, 33; 1 Timoteub 6:8-10.

Elobmîs tsoatsoade sîsenūs ge sida ǂurusiba hui ǁkhā. (ǂKhoa-mîdi 14:30; 22:24, 25) Aiǁgause, Eloba da ga ǁnâuǀnam o ǀhoromâs ǃkhâikhomsa ǃgâs ǃnâ-ū o da ge nî huihe ǀaegu tsî tsūkēǃgâgu tsî ǁnās xa ra ǃaromahe xūna xu. (ǂKhoa-mîdi 23:20) Jehovab ge ra mā-am āsa xawe ǃgâus ose. (Psalmti 104:15; 1 Korinteǁîn 6:10) Elosi tsoatsoadi ge ra huida sida ra dī tsū xūn ǀguina xus ǀguis ose xawe sida tsū ǂâi ǀgauga xus tsîna. (Psalmti 119:97-100) Xawe, ama Xristeǁîn ge hōdawas ǃaroma ǀgui Elob di ǀgauga ǁnâuǀnam tama. ǁÎn ge ǁnāsa ra dī Jehovaban ǃgôasiba ūba hâ amaga.​—Khomai re Mateub 5:14-16.