ညင်သာစွာ အဆုံးစီရင်ပေးခြင်းနဲ့ပတ်သက်ပြီး ကျမ်းစာ ဘာပြောသလဲ။
ကျမ်းစာအဖြေ
ညင်သာစွာ အဆုံးစီရင်ပေးခြင်းအကြောင်း ကျမ်းစာမှာ သတ်သတ်မှတ်မှတ် မဖော်ပြထားပါဘူး။ a ဒါပေမဲ့ အသက်ရှင်ခြင်းနဲ့ သေခြင်းအကြောင်း ဖော်ပြထားပုံက မျှတတဲ့အမြင် ရှိစေတယ်။ အဆုံးစီရင်တာက လက်ခံစရာ မဟုတ်သလို သေခါနီးလူရဲ့ အသက်ကို ဆွဲဆန့်တာလည်း မဖြစ်သင့်ဘူး။
ကျွန်တော်တို့ရဲ့ ဖန်ဆင်းရှင် ဘုရားသခင်ဟာ “အသက်ရဲ့ ပင်ရင်း” ဖြစ်တယ်လို့ ကျမ်းစာ ဖော်ပြတယ်။ (ဆာလံ ၃၆:၉။ တမန်တော် ၁၇:၂၈) ဘုရားရဲ့အမြင်မှာ အသက်ဟာ အလွန်အဖိုးတန်တဲ့အတွက် သူတစ်ပါးအသက်ကိုဖြစ်စေ၊ ကိုယ့်အသက်ကိုဖြစ်စေ အဆုံးစီရင်တာကို ဘုရား တားမြစ်တယ်။ (ထွက်မြောက်ရာ ၂၀:၁၃။ ၁ ယောဟန် ၃:၁၅) ကိုယ်တိုင်နဲ့ သူတစ်ပါးအသက်ကို ကာကွယ်နိုင်တဲ့နည်းတွေကိုလည်း ကျမ်းစာမှာ ဖော်ပြထားတယ်။ (တရားဟောရာ ၂၂:၈) ဒါကြောင့် ဘုရားသခင်က အသက်ဆုလက်ဆောင်ကို တန်ဖိုးထားစေချင်မှန်း သိသာတယ်။
ရောဂါကျွမ်းနေရင်ကော
သေလုမြောပါး လူနာတစ်ယောက်ကို အဆုံးစီရင်ပေးမှာကိုတောင် ကျမ်းစာက ခွင့်မပြုဘူး။ အစ္စရေးဘုရင် ရှောလုရဲ့အဖြစ်ကိုကြည့်ရင် သိနိုင်တယ်။ တိုက်ပွဲမှာ အကြီးအကျယ် ဒဏ်ရာရသွားတဲ့အခါ အဆုံးစီရင်ပေးဖို့ လက်နက်ကိုင်ကို ပြောတယ်။ (၁ ရှမွေလ ၃၁:၃၊ ၄) လက်နက်ကိုင်က ခိုင်းတဲ့အတိုင်း မလုပ်ပေးဘူး။ ဒါပေမဲ့ နောက်ပိုင်းမှာ လူတစ်ယောက်က ရှောလုရဲ့ဆန္ဒကို ဖြည့်ဆည်းပေးခဲ့တယ်လို့ လိမ်ပြောခဲ့တယ်။ အသက်နဲ့ပတ်သက်ပြီး ဘုရားရဲ့အမြင်မျိုးရှိသူ ဒါဝိဒ်က အဲဒီလူကို လူသတ်မှုနဲ့ အပြစ်ပေးခဲ့တယ်။—၂ ရှမွေလ ၁:၆-၁၆။
မဖြစ်ဖြစ်တဲ့နည်းနဲ့ အသက်ကို ဆွဲထားရမှာလား
နောက်ဆုံးအချိန်ရောက်လို့ သေတော့မယ့်သူရဲ့ အသက်ကို ဆွဲဆန့်ထားဖို့ ကျမ်းစာ မပြောဘူး။ မျှတတဲ့အမြင်ကို ဖော်ပြပေးတယ်။ သေခြင်းဆိုတာ အပြစ်ကြောင့် ဖြစ်ပေါ်လာတဲ့အရာ၊ လူတွေရဲ့ မဟာရန်သူ ဖြစ်တယ်။ (ရောမ ၅:၁၂။ ၁ ကောရိန္သု ၁၅:၂၆) အသက်ကို ဆွဲထားဖို့ မလိုသလို သေခြင်းကို ကြောက်ရွံ့နေစရာလည်း မလိုဘူး၊ သေဆုံးသွားသူတွေကို အသက်ပြန်ရှင်စေမယ်လို့ ဘုရား ကတိပြုထားလို့ပဲ။ (ယောဟန် ၆:၃၉၊ ၄၀) အသက်ကို တန်ဖိုးထားသူဟာ ရနိုင်တဲ့ အကောင်းဆုံးဆေးကုသမှုကို ခံယူပါလိမ့်မယ်။ ဒါက သေဆုံးခါနီးလူရဲ့ အသက်ကို ဆွဲထားတဲ့ ဆေးကုသမှုမျိုး ရွေးချယ်ဖို့ လိုအပ်တယ်ဆိုတဲ့ အဓိပ္ပာယ်တော့ မဟုတ်ပါဘူး။
ကိုယ့်ကိုယ်ကိုယ် သတ်သေခြင်းဟာ ခွင့်မလွှတ်နိုင်တဲ့အပြစ်လား
ကိုယ့်ကိုယ်ကိုယ် သတ်သေခြင်းဟာ ခွင့်မလွှတ်နိုင်တဲ့အပြစ်ဖြစ်တယ်လို့ ကျမ်းစာ မပြောဘူး။ ကိုယ့်ကိုယ်ကိုယ် သတ်သေခြင်းဟာ ကြီးလေးတဲ့အပြစ် မှန်ပေမဲ့ b သေကြောင်းကြံတာက စိတ်ရောဂါ ဖြစ်နေလို့လား၊ စိတ်ဖိစီးမှု များနေလို့လား၊ မျိုးရိုးကြောင့်လား စတာတွေကိုတော့ ဘုရားသခင်ပဲ ကောင်းကောင်းသိပါတယ်။ (ဆာလံ ၁၀၃:၁၃၊ ၁၄) ဘုရားက စိတ်ဒုက္ခရောက်နေသူတွေကို ကျမ်းစာကတစ်ဆင့် နှစ်သိမ့်ပေးတယ်။ “ဖြောင့်မတ်သူရော မဖြောင့်မတ်သူတွေပါ ရှင်ပြန်ထမြောက်လာ” မယ်လို့လည်း ဆိုထားတယ်။ (တမန်တော် ၂၄:၁၅) ကိုယ့်ကိုယ်ကိုယ် သတ်သေခြင်းလိုမျိုး ကြီးလေးတဲ့အပြစ် ကျူးလွန်ခဲ့သူတွေ အသက်ပြန်ရှင်လာဖို့ မျှော်လင့်ချက် ရှိမှန်း ဒီအချက်ကနေ သိနိုင်တယ်။
a ညင်သာစွာ အဆုံးစီရင်ပေးခြင်း (ယူသနေစီးယား) ဆိုတာ “ရောဂါကျွမ်းနေတဲ့သူ၊ ဆိုးဆိုးဝါးဝါး ဒဏ်ရာရထားသူ ဝေဒနာ ဆက်မခံစားရစေဖို့ ဆေးထိုး အဆုံးစီရင်ပေးခြင်း” ဖြစ်တယ်။ အဲဒီလိုလူနာ အသက်ထွက်အောင် ဆရာဝန်က ကူညီပေးရတဲ့အတွက် ဆရာဝန်အကူအညီနဲ့ ကိုယ့်ကိုယ်ကိုယ် အဆုံးစီရင်ခြင်း (PAS) လို့ ခေါ်တယ်။
b ကျမ်းစာမှာပါတဲ့ ကိုယ့်ကိုယ်ကိုယ် သတ်သေခဲ့သူတွေဟာ ဘုရားအလိုတော်အတိုင်း ကျင့်ကြံပြုမူသူတွေ မဟုတ်ဘူး။—၂ ရှမွေလ ၁၇:၂၃။ ၁ ဘုရင်များ ၁၆:၁၈။ မဿဲ ၂၇:၃-၅။
ကြိုက်လို ကြိုက်ငြား အကြောင်းအရာများ
ကင်းမျှော်စင်
ချစ်ရသူတစ်ဦး ရောဂါကျွမ်းနေတဲ့အခါ
ရောဂါကျွမ်းနေသူတစ်ဦးကို မိသားစုဝင်တွေ ဘယ်လို နှစ်သိမ့်ပေးနိုင်သလဲ။ ပြုစုစောင့်ရှောက်သူတွေဟာ လူနာကို ပြုစုနေရင်း ကိုယ့်စိတ်ခံစားချက်တွေကို ဘယ်လို ရင်ဆိုင်ဖြေရှင်းနိုင်မလဲ
ထပ်ဆင့် အကြောင်းအရာများ
ရုတ်တရက် ကျန်းမာရေး ထိခိုက်သွားရင် ဘယ်လိုလုပ်ရပါ့မလဲ
မမျှော်လင့်ဘဲ ကျန်းမာရေးအခြေအနေ ဆိုးဝါးလာတဲ့အခါ ကျမ်းစာမှာပါတဲ့ ဘယ်အကြံပြုချက်တွေက အကူအညီ ဖြစ်စေသလဲ။
ကျမ်းပိုဒ် ရှင်းပြချက်များ
ဖိလိပ္ပိ ၄:၆၊ ၇—‘အဘယ်အမှုကိုမျှ စိုးရိမ်ခြင်း မရှိနှင့်’
ဘုရားကို ဝတ်ပြုကိုးကွယ်သူတွေကို စိုးရိမ်ပူပန်မှုတွေ သက်သာပြီး စိတ်ငြိမ်သက်မှု ရှိအောင် ဘယ်ဆုတောင်းချက်တွေက ကူညီပေးသလဲ။
အရေးကြီးတဲ့ သွန်သင်ချက်များ
ဆင်းရဲဒုက္ခတွေကို ဘုရားသခင် ဘာကြောင့် ဖြစ်ခွင့် ပြုထားသလဲ
စိတ်ကျေနပ်စေမယ့်၊ နှစ်သိမ့်မှု ဖြစ်စေမယ့်အဖြေ ကျမ်းစာမှာ ဖော်ပြထားပါတယ်။
ကျမ်းစာမေးခွန်းများရဲ့ အဖြေ
သေချင်တယ်—ကိုယ့်ကိုယ်ကိုယ် သတ်သေချင်စိတ် ပေါ်လာတဲ့အခါ ကျမ်းစာက ကူညီပေးနိုင်သလား
ကိုယ့်ကိုယ်ကိုယ် သတ်သေချင်နေသူအတွက် ဘယ်လက်တွေ့ကျ ကျမ်းစာအကြံပြုချက် ရှိသလဲ။
ကျွန်တော်တို့အကြောင်း
လည်ပတ်ဖို့ တောင်းဆိုပါ
ကျမ်းစာထဲက သိချင်တဲ့ မေးခွန်းတစ်ခုကို ဆွေးနွေးပါ၊ ဒါမှမဟုတ် ယေဟောဝါသက်သေတွေအကြောင်း လေ့လာပါ။