ရုပ်တု၊ ရုပ်ပုံတွေကို မကိုးကွယ်သင့်ပါဘူး။ အစ္စရေးလူမျိုးတွေကို ဘုရားသခင်ပေးတဲ့ ပညတ်နဲ့ပတ်သက်ပြီး စာအုပ်တစ်အုပ်မှာ ဒီလိုဖော်ပြထားတယ်- “ကျမ်းဆိုင်ရာအထောက်အထားတွေအရ စစ်မှန်တဲ့ ဘုရားကို ဝတ်ပြုကိုးကွယ်သူတွေဟာ ရုပ်တု၊ ရုပ်ပုံတွေကို အသုံးမပြုကြဘူး။” (the New Catholic Encyclopedia) အောက်ပါကျမ်းချက်တွေကို သုံးသပ်ကြည့်ပါ။

•   “အထက်မိုးကောင်းကင်၌လည်းကောင်း၊ အောက်အရပ်မြေကြီးပေါ်၌လည်းကောင်း၊ မြေကြီးအောက်ရေထဲ၌လည်းကောင်း ရှိသောအရာနှင့် ပုံသဏ္ဌာန်တူအောင်၊ ရုပ်တုဆင်းတုကို ကိုယ်အဖို့မလုပ်နှင့်။ ဦးမချဝတ်မပြုနှင့်။ အကြောင်းမူကား၊ သင်၏ဘုရားသခင် ငါထာဝရဘုရားသည် သင်၌အပြစ်ရှိသည်ဟုယုံလွယ် [“အကြွင်းမဲ့ဆည်းကပ်မှုကို တောင်းဆို၊” ကဘ] သောဘုရား” ဖြစ်၏။ (ထွက်မြောက်ရာ ၂၀:၄၊ ၅) ဘုရားသခင်က “အကြွင်းမဲ့ဆည်းကပ်မှုကို တောင်းဆိုတဲ့ဘုရား” ဖြစ်တဲ့အတွက် ရုပ်ပုံတွေ၊ ရုပ်တုတွေ၊ အမှတ်သင်္ကေတတွေကို ဝတ်ပြုကိုးကွယ်တာ ကိုယ်တော်မနှစ်သက်ဘူး။

•   “ငါ့အသရေ [“ငါရထိုက်တဲ့ချီးမွမ်းခြင်း၊” ကဘ] ကို ရုပ်တုဆင်းတုတို့အားလည်းကောင်း ငါမပေး။” (ဟေရှာယ ၄၂:၈) ဘုရားသခင်က ရုပ်တု၊ ရုပ်ပုံတွေကတစ်ဆင့် ကိုးကွယ်တာကို လက်မခံပါဘူး။ အစ္စရေးလူမျိုးတချို့က ရွှေနွားရုပ်သုံးပြီး ဝတ်ပြုကိုးကွယ်ဖို့ကြိုးစားတဲ့အခါ ဘုရားသခင်က “ငါ့ကိုစွန့်ပယ်ကြပြီ” လို့ ပြောခဲ့တယ်။—ထွက်မြောက်ရာ ၃၂:၇-၉၊ ခမ။

•   “ငါတို့သည် ဘုရားသခင်၏အနွယ်တော် ဖြစ်ကြသည့်အတိုင်း ဘုရားသခင်သည် လူတို့ကြံဖန်ထုလုပ်သော ရွှေရုပ်တု၊ ငွေရုပ်တု၊ ကျောက်ရုပ်တုတို့နှင့် တူတော်မူသည်ဟု ငါတို့မထင်မမှတ်သင့်။” (တမန်တော် ၁၇:၂၉) အယူမှားဝတ်ပြုကိုးကွယ်မှုမှာတော့ “လူတို့ကြံဖန်ထုလုပ်သော” ရုပ်တုတွေကို အသုံးပြုကြတယ်။ ခရစ်ယာန်တွေကတော့ ကျမ်းစာမှာ ပြောထားတဲ့အတိုင်း “အမြင်အားဖြင့် မဟုတ်ဘဲ ယုံကြည်ခြင်းအားဖြင့် လျှောက်လှမ်းနေ” ဖို့အရေးကြီးတယ်။—၂ ကောရိန္သု ၅:၇။

•   “ရုပ်တုဆင်းတုကို ကြဉ်ရှောင်ကြလော့။” (၁ ယောဟန် ၅:၂၁) ဝတ်ပြုကိုးကွယ်မှုမှာ ရုပ်ပုံရုပ်တုတွေသုံးတာကို ဘုရားလက်မခံဘူးဆိုတာ ရှေးအစ္စရေးလူမျိုးနဲ့ ခရစ်ယာန်တွေကို ပေးခဲ့တဲ့ပညတ်တွေမှာ အစဉ်တစိုက်နဲ့ ရှင်းရှင်းလင်းလင်း ဖော်ပြထားပါတယ်။