ယေရှုရဲ့ ရုပ်အသွင်အပြင်က ဘယ်လိုမျိုးလဲ
သမ္မာကျမ်းစာ ဖြေဆိုရာ
သမ္မာကျမ်းစာမှာ ယေရှုရဲ့ရုပ်သွင်ပြင်ကို ဖော်ပြမထားတဲ့အတွက် ဘယ်သူမှ အတိအကျ မသိပါဘူး။ ဒါက ယေရှုရဲ့ရုပ်သွင်ပြင်က အရေးမကြီးဘူးဆိုတာ သိစေတယ်။ ဒါပေမဲ့ ကျမ်းချက်တချို့ကို သုံးသပ်ပြီး ယေရှုရဲ့ရုပ်ရည်ကို ပုံဖော်နိုင်တယ်။
ရုပ်ရည်- ယေရှုဟာ ဂျူးလူမျိုးဖြစ်တဲ့အတွက် အရှေ့အလယ်ပိုင်း ရုပ်ရည်မျိုး ရှိမှာသေချာတယ်။ (ဟေဗြဲ ၇:၁၄) သူဟာ တခြားသူတွေထက် တမူထူးတဲ့ပုံစံမျိုး ရှိပုံမရဘူး။ တစ်ခါကဆိုရင် ဘယ်သူမှ သတိမထားမိဘဲ ဂါလိလဲနယ်ကနေ ဂျေရုဆလင်မြို့အထိ ခရီးသွားခဲ့တယ်။ (ယောဟန် ၇:၁၀၊ ၁၁) သူ့ရဲ့ တပည့်တွေနဲ့တောင် ရုပ်ရည်သိပ်ကွာခြားပုံ မရဘူး။ ဒါကြောင့်လည်း ယေရှုကိုဖမ်းနိုင်ဖို့ လက်နက်ကိုင်ထားတဲ့ လူအုပ်ကို ယုဒရှကာရုတ်က ခွဲခြားပြပေးခဲ့ရတယ်။—မဿဲ ၂၆:၄၇-၄၉။
ဆံပင်- ယေရှုဟာ ဆံပင်ရှည်ရှည်နဲ့ မဖြစ်နိုင်ပါဘူး၊ ဘာကြောင့်လဲဆိုတော့ ‘ယောက်ျား ဆံပင်ရှည်ထားတာဟာ ရှက်စရာကောင်းတယ်၊ သဘာဝမဟုတ်ဘူး’ လို့ ကျမ်းစာမှာ ပြောထားလို့ပဲ။—၁ ကောရိန္သု ၁၁:၁၄။
မုတ်ဆိတ်- ယေရှု မုတ်ဆိတ်ထားပါတယ်။ ဂျူးပညတ်တရားမှာ ‘မုတ်ဆိတ်မွေးကို မရိတ်နဲ့’ လို့ဆိုထားတယ်။ (ဝတ်ပြုရာ ၁၉:၂၇။ ဂလာတိ ၄:၄) ယေရှုခံရမယ့် ဒုက္ခတွေနဲ့ပတ်သက်တဲ့ ပရောဖက်ပြုချက်ထဲမှာလည်း သူ့ရဲ့မုတ်ဆိတ်အကြောင်း ပါတယ်။—ဟေရှာယ ၅၀:၆။
ကိုယ်ခန္ဓာ- ယေရှုဟာ ကြံ့ခိုင်သန်မာသူ ဖြစ်ကြောင်း ထင်ရှားတယ်။ သူ အမှုဆောင်ချိန်မှာ မိုင်အတော်များများ ခရီးသွားခဲ့တယ်။ (မဿဲ ၉:၃၅) ဂျူးတွေရဲ့ ဗိမာန်တော်ကို သန့်ရှင်းအောင် နှစ်ကြိမ် လုပ်ဆောင်ခဲ့တယ်။ ငွေလဲလှယ်သူတွေရဲ့ စားပွဲတွေကို မှောက်လှန်ပစ်တယ်။ တစ်ကြိမ်မှာ သိုး၊ နွားတိရစ္ဆာန်တွေကို နှင်တံနဲ့ မောင်းထုတ်ခဲ့တယ်။ (လုကာ ၁၉:၄၅၊ ၄၆။ ယောဟန် ၂:၁၄၊ ၁၅) “ခရစ်ဝင်ကျမ်းအားလုံးအရ (ယေရှုဟာ) ကြံ့ခိုင်သန်မာတဲ့ ကိုယ်ခန္ဓာပိုင်ဆိုင်သူဖြစ်တယ်ဆိုတာ ဖော်ပြတယ်” လို့ စွယ်စုံကျမ်းတစ်ခုက ဆိုတယ်။—McClintock and Strong’s Cyclopedia အတွဲ ၄၊ စာမျက်နှာ ၈၈၄။
မျက်နှာအသွင်အပြင်- ယေရှုဟာ နူးညံ့သိမ်မွေ့ပြီး သနားကြင်နာတတ်သူ ဖြစ်တဲ့အတွက် ဒီအရည်အသွေးတွေ သူ့မျက်နှာမှာထင်ဟပ်နေမှာ သေချာတယ်။ (မဿဲ ၁၁:၂၈၊ ၂၉) လူတိုင်းက နှစ်သိမ့်မှုနဲ့ အကူအညီရဖို့ သူ့ဆီ သွားကြတယ်။ (လုကာ ၅:၁၂၊ ၁၃။ ၇:၃၇၊ ၃၈) ကလေးတွေတောင် သူ့အနားမှာ နေချင်ကြတယ်။—မဿဲ ၁၉:၁၃-၁၅။ မာကု ၉:၃၅-၃၇။
ယေရှုရဲ့ ရုပ်အသွင်အပြင်နဲ့ပတ်သက်တဲ့ ယူဆချက်အမှားများ
အမှား- ယေရှုဟာ အာဖရိကနွယ်ဖွားဆိုပြီး တချို့က ပြောကြတယ်၊ ဘာကြောင့်လဲဆိုတော့ ဗျာဒိတ်ကျမ်းမှာ သူ့ရဲ့ဆံပင်ကို သိုးမွေး၊ သူ့ရဲ့ခြေထောက်ကို “ပြောင်လက်တောက်ပနေတဲ့ ကြေးနီ” နဲ့ နှိုင်းထားလို့ ဖြစ်တယ်။—ဗျာဒိတ် ၁:၁၄၊ ၁၅။
အမှန်- ဗျာဒိတ်ကျမ်းကို “အမှတ်သင်္ကေတတွေ” နဲ့ ပုံဖော်ထားတာဖြစ်တယ်။ (ဗျာဒိတ် ၁:၁) ယေရှုရဲ့ဆံပင်နဲ့ ခြေထောက်ကို ဖော်ပြထားပုံက ရှင်ပြန်ထမြောက်ပြီးနောက် သူ့မှာရှိတဲ့ အရည်အသွေးတွေကို ပုံဆောင်ဖော်ပြတာဖြစ်တယ်၊ မြေကြီးပေါ်မှာရှိတုန်းက သူ့ရဲ့ ရုပ်ရည်ကို ပြောနေတာမဟုတ်ဘူး။ ဗျာဒိတ် ၁:၁၄ မှာ ယေရှုရဲ့ “ဆံပင်က သိုးမွေးလို၊ နှင်းလို ဖြူဖွေးနေတယ်” လို့ပြောတာက စာသားအတိုင်း အဓိပ္ပာယ်ယူဖို့ မဟုတ်ဘူး။ အဖြူရောင်ဆံပင်က ယေရှုမှာ အသက်ကြီးသူရဲ့ ဉာဏ်ပညာရှိတယ်ဆိုတာ ခိုင်းနှိုင်းထားတာဖြစ်တယ်။—ဗျာဒိတ် ၃:၁၄။
ယေရှုရဲ့ခြေထောက်က “မီးဖိုထဲက ပြောင်လက်တောက်ပနေတဲ့ ကြေးနီနဲ့ တူတယ်။” (ဗျာဒိတ် ၁:၁၅) သူ့ရဲ့မျက်နှာကလည်း “မွန်းတည့်နေလို တောက်ပနေတယ်” လို့ ပြောထားတယ်။ (ဗျာဒိတ် ၁:၁၆) ဒီမှာဖော်ပြထားတဲ့ အသားအရောင်မျိုး ဘယ်လူမျိုးမှာမှ မရှိပါဘူး။ ဒါက ရှင်ပြန်ထမြောက်ပြီးဖြစ်တဲ့ ယေရှုဟာ “မချဉ်းကပ်နိုင်တဲ့ အလင်းထဲမှာ စံမြန်းနေတယ်” ဆိုတာကို တင်စားဖော်ပြတာဖြစ်တယ်။—၁ တိမောသေ ၆:၁၆။
အမှား- ယေရှုဟာ ပျော့ညံ့ပြီး အားနွဲ့သူဖြစ်တယ်။
အမှန်- ယေရှုဟာ ယောက်ျားပီသတဲ့သူ ဖြစ်တယ်။ ဥပမာ၊ သူ့ကိုဖမ်းဖို့လာတဲ့ လက်နက်ကိုင်လူအုပ်ရှေ့မှာ သူ့ကိုယ်သူ ရဲရဲဝံ့ဝံ့ ထုတ်ဖော်ပြောခဲ့တယ်။ (ယောဟန် ၁၈:၄-၈) နောက်ပြီး သူဟာ လက်သမားအလုပ် လုပ်ခဲ့တဲ့အတွက် ခွန်အားဗလရှိသူဖြစ်မှာ သေချာတယ်။—မာကု ၆:၃။
ဒါဆိုရင် သူ့ရဲ့သစ်တိုင်ကို ထမ်းပေးဖို့ ဘာကြောင့် အကူအညီ လိုရတာလဲ။ နောက်ပြီး သူနဲ့အတူ သစ်တိုင်တင်ခံရသူတွေ မသေခင် ဘာကြောင့် အရင်သေရတာလဲ။ (လုကာ ၂၃:၂၆။ ယောဟန် ၁၉:၃၁-၃၃) ယေရှုကို သစ်တိုင်မတင်ခင်ကတည်းက သူဟာ သိပ်အားနည်းနေပြီ။ စိတ်ပိုင်းဆိုင်ရာ ဖိစီးမှုခံနေရတဲ့အပြင် တစ်ညလုံးလည်း မအိပ်ရဘူး။ (လုကာ ၂၂:၄၂-၄၄) အဲဒီညမှာ ဂျူးတွေရဲ့ နှိပ်စက်တာကို ခံရပြီး မနက်ပိုင်းမှာလည်း ရောမတွေရဲ့ နှိပ်စက်တာကို ခံခဲ့ရတယ်။ (မဿဲ ၂၆:၆၇၊ ၆၈။ ယောဟန် ၁၉:၁-၃) အဲဒါတွေကြောင့် သူမြန်မြန်သေဆုံးသွားတာ ဖြစ်နိုင်တယ်။
အမှား- ယေရှုဟာ မှိုင်တွေပြီး အမြဲဝမ်းနည်းနေတဲ့သူပဲ။
အမှန်- ယေရှုဟာ ကောင်းကင်ဖခင်ဖြစ်တဲ့ “ပျော်ရွှင်တဲ့ ဘုရားသခင်” ယေဟောဝါရဲ့ အရည်အသွေးကို အပြည့်အဝ တင်ပြသူ ဖြစ်တယ်။ (၁ တိမောသေ ၁:၁၁။ ယောဟန် ၁၄:၉) ပျော်ရွှင်မှုရနိုင်ပုံအကြောင်း တခြားသူတွေကိုတောင် သင်ပေးခဲ့တယ်။ (မဿဲ ၅:၃-၉။ လုကာ ၁၁:၂၈) ဒီအချက်တွေအရ ယေရှုရဲ့ မျက်နှာဟာ ပျော်ရွှင်တဲ့ပုံ ဖြစ်နေမှာ သေချာတယ်။
ကြိုက်လို ကြိုက်ငြား အကြောင်းအရာများ
ကျမ်းစာမေးခွန်းများရဲ့ အဖြေ
သမ္မာကျမ်းစာမှာပါတဲ့ ယေရှုရဲ့ဘဝမှတ်တမ်းက တိကျရဲ့လား။
ခရစ်ဝင်ကျမ်းမှတ်တမ်းတွေနဲ့ပတ်သက်တဲ့ အချက်အလက်တွေနဲ့ ရှေးအကျဆုံးလို့သိထားတဲ့ လက်ရေးစာမူအကြောင်း ကြည့်ပါ။
ကျမ်းစာမေးခွန်းများရဲ့ အဖြေ
ယေရှုနဲ့ပတ်သက်တဲ့ ကျမ်းမှတ်တမ်းတွေကို ဘယ်အချိန်မှာ ရေးသားခဲ့သလဲ။
ယေရှုသေဆုံးချိန်နဲ့ ခရစ်ဝင်ကျမ်းတွေရေးသားချိန်က ဘယ်လောက်ကွာသလဲ။
အရေးကြီးတဲ့ သွန်သင်ချက်များ
ကျမ်းစာက မှန်ကန်သလား
ကျမ်းစာရဲ့ အာဘော်ရှင်က ဘုရားသခင်ဆိုရင် တခြားဘယ်စာအုပ်နဲ့မှမတူဘဲ ထူးခြားနေရမယ်။
ကျွန်တော်တို့အကြောင်း
လည်ပတ်ဖို့ တောင်းဆိုပါ
ကျမ်းစာထဲက သိချင်တဲ့ မေးခွန်းတစ်ခုကို ဆွေးနွေးပါ၊ ဒါမှမဟုတ် ယေဟောဝါသက်သေတွေအကြောင်း လေ့လာပါ။