ကျမ်းစာမှာ ယေရှုကို “ဘုရားသခင်ရဲ့ သား” လို့ ခေါ်ထားတယ်။ (ယောဟန် ၁:၄၉) “ဘုရားသခင်ရဲ့ သား” ဆိုတဲ့ အသုံးအနှုန်းက ဘုရားသခင်ဟာ ယေရှု အပါအဝင် သက်ရှိအားလုံးရဲ့ ပင်ရင်း ဖန်ဆင်းရှင် ဖြစ်တယ်ဆိုတာ ဖော်ပြတယ်။ (ဆာလံ ၃၆:၉။ ဗျာဒိတ် ၄:၁၁) လူသားတွေ သားသမီး ရသလို ဘုရားသခင်လည်း သားသမီး ရတယ်လို့ ကျမ်းစာ မသွန်သင်ဘူး။

 ကောင်းကင်တမန်တွေကိုလည်း “ဘုရားသခင်ရဲ့ သားတွေ” လို့ ကျမ်းစာ ဆိုတယ်။ (ယောဘ ၁:၆) ပထမဆုံးလူသား အာဒံကို “ဘုရားသခင်ရဲ့ သား” လို့ ကျမ်းစာ ဖော်ပြတယ်။ (လုကာ ၃:၃၈) ဒါပေမဲ့ ယေရှုဟာ ဘုရားသခင် ဦးဆုံး ဖန်ဆင်းသူ၊ ဘုရားကိုယ်တိုင် တိုက်ရိုက်ဖန်ဆင်းတဲ့ တစ်ဦးတည်းသောသူ ဖြစ်တဲ့အတွက် ဘုရားသခင်ရဲ့ သားဦးလို့ ကျမ်းစာ ဆိုတယ်။

•  ယေရှုဟာ မြေကြီးပေါ် မမွေးဖွားလာခင် ကောင်းကင်မှာ အသက်ရှင်ခဲ့သလား

•  မြေကြီးပေါ်မလာခင် ယေရှု ဘာလုပ်ခဲ့သလဲ

 အသက်ရှင်ခဲ့ပါတယ်။ ယေရှုဟာ မြေကြီးပေါ်မှာ လူသားတစ်ဦးအဖြစ် မမွေးဖွားခင်က ကောင်းကင်မှာ ဝိညာဉ်သတ္တဝါတစ်ပါး ဖြစ်ခဲ့တယ်။ “ကောင်းကင်ကနေ ကျွန်တော် ဆင်းလာတာ” လို့ ယေရှုကိုယ်တိုင် ပြောခဲ့တယ်။—ယောဟန် ၆:၃၈။ ၈:၂၃။

 တခြားဘယ်အရာကိုမှ မဖန်ဆင်းခင် ယေရှုကို ဘုရားသခင် ဖန်ဆင်းခဲ့တယ်။ ယေရှုနဲ့ပတ်သက်ပြီး ကျမ်းစာ ဒီလိုဆိုတယ်–

•   “သူဟာ ... ဖန်ဆင်းရာအားလုံးမှာ သားဦးပဲ။”—ကောလောသဲ ၁:၁၅။

•   သူဟာ “ဘုရားသခင့် ဖန်ဆင်းခြင်းရဲ့ အစ” ဖြစ်တယ်။—ဗျာဒိတ် ၃:၁၄။

 “ရှေးအချိန်ကတည်းက၊ ဟိုးအရင်ကတည်းက တည်ရှိခဲ့သူ” ဆိုတဲ့ ကြိုဟောချက်ကို ယေရှု ပြည့်စုံစေခဲ့တယ်။—မိက္ခာ ၅:၂။ မဿဲ ၂:၄-၆။

 ကောင်းကင်မှာ ကြီးမြတ်တဲ့ အခွင့်အာဏာ ရရှိထားတယ်။ အဲဒီအခွင့်အာဏာကို ဆုတောင်းချက်ထဲမှာ ယေရှု ဒီလိုဖော်ပြခဲ့တယ်– “အဖ၊ ဒီလောက မတည်ရှိခင် အဖရဲ့ ဘေးနားမှာ ကျွန်တော် ခံစားခဲ့ရတဲ့ ဘုန်းအသရေမျိုးကို ... ပြန်ခံစားခွင့် ပေးပါ။”—ယောဟန် ၁၇:၅။

 အရာခပ်သိမ်းကို ဘုရား ဖန်ဆင်းချိန်မှာ ယေရှု ကူညီပေးခဲ့တယ်။ ယေရှုဟာ “ကျွမ်းကျင်လုပ်သားအဖြစ်” ဘုရားနဲ့အတူ တွဲလုပ်ခဲ့တယ်။ (ပညာအလိမ္မာ ၈:၃၀) ယေရှုနဲ့ပတ်သက်ပြီး ကျမ်းစာ ဒီလိုဆိုတယ်– “ဘုရားသခင်က သူ့ကို သုံးပြီး ကောင်းကင်နဲ့ ကမ္ဘာမြေပေါ်မှာ ရှိရှိသမျှ ... ကို ဖန်ဆင်းခဲ့တယ်။”—ကောလောသဲ ၁:၁၆။

 ဘုရားသခင်က ယေရှုကို သုံးပြီး အရာခပ်သိမ်းကို ဖန်ဆင်းခဲ့တယ်။ စကြဝဠာ အပါအဝင် ဝိညာဉ်သတ္တဝါအားလုံးကို ဖန်ဆင်းတယ်။ (ဗျာဒိတ် ၅:၁၁) အခြေအနေတချို့မှာ ဘုရားနဲ့ ယေရှု ပူးပေါင်းလုပ်ဆောင်မှုဟာ ဗိသုကာပညာရှင်နဲ့ ဆောက်လုပ်သူ ပူးပေါင်းလုပ်ဆောင်မှုနဲ့ တူတယ်။ ဗိသုကာပညာရှင်က ဒီဇိုင်းဆွဲတယ်။ ဆောက်လုပ်သူက ဒီဇိုင်းကို အဆောက်အအုံဖြစ်အောင် တည်ဆောက်တယ်။

 နှုတ်ကပတ်တော်အဖြစ် အမှုဆောင်ခဲ့တယ်။ ယေရှုရဲ့ လူသားမတိုင်မီ အသက်တာအကြောင်း ကျမ်းစာ ဖော်ပြတဲ့အခါ ယေရှုကို “နှုတ်ကပတ်တော်” လို့ ခေါ်ထားတယ်။ (ယောဟန် ၁:၁) တခြားဝိညာဉ်သတ္တဝါတွေကို အချက်အလက်တွေ၊ ညွှန်ကြားချက်တွေ ပေးဖို့ သားတော်ကို ဘုရား အသုံးပြုခဲ့တယ်ဆိုတာ ထင်ရှားတယ်။

 ကမ္ဘာပေါ်ရှိ လူသားတွေအတွက် ဘုရားသခင့် ပြောရေးဆိုခွင့်ရှိသူအဖြစ်လည်း ယေရှု အမှုဆောင်ခဲ့ပုံရတယ်။ ဧဒင်ဥယျာဉ်မှာ အာဒံနဲ့ ဧဝကို နှုတ်ကပတ်တော် ယေရှုကတစ်ဆင့် ဘုရားသခင် ညွှန်ကြားပေးခဲ့ပုံရတယ်။ (ကမ္ဘာဦး ၂:၁၆၊ ၁၇) ရှေးအစ္စရေးလူမျိုးကို တောကန္တာရမှာ ဦးဆောင်ခေါ်သွားတဲ့ ကောင်းကင်တမန်ဟာ ယေရှု ဖြစ်ပုံရတယ်။ အဲဒီကောင်းကင်တမန်ရဲ့ စကားကို နာခံဖို့ အစ္စရေးတွေကို မှာကြားခဲ့တယ်။—ထွက်မြောက်ရာ ၂၃:၂၀-၂၃။ a