ကာအိနရဲ့ ဇနီးက ဘယ်သူလဲ
သမ္မာကျမ်းစာဖြေဆိုရာ
ပထမဦးဆုံး လူသားမောင်နှံရဲ့ သားဦးဖြစ်တဲ့ ကာအိနဟာ သူ့ညီမတစ်ယောက် ဒါမှမဟုတ် ဆွေမျိုးထဲက တစ်ယောက်ယောက်ကို လက်ထပ်ခဲ့တာ ဖြစ်နိုင်တယ်။ ဒီအချက်က သမ္မာကျမ်းစာမှာ ဖော်ပြထားတဲ့ ကာအိနနဲ့ သူ့မိသားစုအကြောင်းကို အခြေခံထားတာပါ။
ကာအိနနဲ့ သူ့မိသားစုအကြောင်း
လူသားအားလုံးဟာ အာဒံနဲ့ ဧဝကနေ ဆင်းသက်လာတာဖြစ်တယ်။ “ဘုရားသခင်က လူတစ်ဦးတည်းကနေ လူအမျိုးမျိုးကို ဖန်ဆင်းပြီး မြေတစ်ပြင်လုံးမှာ နေထိုင်စေတယ်။” (တမန်တော် ၁၇:၂၆) အာဒံရဲ့ ဇနီးဖြစ်တဲ့ ဧဝဟာ “အသက်ရှင်သူ အားလုံးရဲ့ မိခင်” ဖြစ်တယ်။ (ကမ္ဘာဦး ၃:၂၀) ဒါကြောင့် ကာအိနဟာ အာဒံနဲ့ ဧဝရဲ့ သားမြေးတွေထဲက တစ်ယောက်ယောက်ကို လက်ထပ်ခဲ့တာဖြစ်ရမယ်။
ကာအိနနဲ့ အာဗေလဟာ ဧဝမွေးတဲ့ ကလေးတွေထဲက ဦးဆုံး သားတွေဖြစ်တယ်။ (ကမ္ဘာဦး ၄:၁၊ ၂) ကာအိနဟာ သူ့ညီကိုသတ်ပြီး နှင်ထုတ်ခံရတဲ့အခါ “တွေ့တဲ့သူတိုင်း ကျွန်တော့်ကို သတ်တော့မှာ” ဆိုပြီး ပြောခဲ့တယ်။ (ကမ္ဘာဦး ၄:၁၄) ဘယ်သူ့ကို ကာအိန ကြောက်နေတာလဲ။ ကျမ်းစာမှာ အာဒံဟာ “တခြား သားသမီးတွေကိုလည်း ရသေးတယ်” လို့ ဆိုထားတယ်။ (ကမ္ဘာဦး ၅:၄) ဒါကြောင့် အာဒံနဲ့ ဧဝရဲ့ သားမြေးတွေထဲက တခြားသူတွေကို ကာအိန ကြောက်တာဖြစ်မယ်။
လူ့သမိုင်းအစမှာ ဆွေမျိုးနီးစပ်သူတွေ လက်ထပ်တာက မဆန်းပါဘူး။ ဥပမာ၊ ဘုရားကို သစ္စာရှိတဲ့ အာဗြဟံဟာ အဖေတူ အမေကွဲညီမကို လက်ထပ်ခဲ့တယ်။ (ကမ္ဘာဦး ၂၀:၁၂) အဲဒီလို ဆွေမျိုးနီးစပ်သူနဲ့ လက်ထပ်တာကို ဦးဆုံးတားမြစ်တာက မောရှေပညတ်မှာဖြစ်ပြီး ကာအိနအချိန်နောက်ပိုင်း နှစ်ပေါင်းများစွာကြာပြီးမှ တားမြစ်တာဖြစ်တယ်။ (ဝတ်ပြုရာ ၁၈:၉၊ ၁၂၊ ၁၃) အဲဒီအချိန်က ဆွေမျိုးနီးစပ်သူချင်း ပေါင်းသင်းလို့ ရတဲ့ကလေးက အခုခေတ်လို သွေးသားနီးစပ်သူချင်း ပေါင်းသင်းပြီး ရတဲ့ကလေးလို မွေးရာပါ ချွတ်ယွင်းတာမျိုး မရှိသေးဘူး။
အာဒံ၊ ဧဝနဲ့ သူ့မိသားစုကို တကယ်သမိုင်းဝင် ပုဂ္ဂိုလ်တွေအဖြစ် သမ္မာကျမ်းစာမှာ တိတိကျကျ ဖော်ပြထားတယ်။ အာဒံရဲ့ ဆွေစဉ်မျိုးဆက် အသေးစိတ်ကို မောရှေရေးတဲ့ ကမ္ဘာဦးကျမ်းမှာပဲ မဟုတ်ဘဲ သမိုင်းအကြောင်းရေးသူ ဧဇရနဲ့ လုကာတို့ရဲ့ ရေးသားချက်မှာလဲ တွေ့ရတယ်။ (ကမ္ဘာဦး ၅:၃-၅။ ၁ ရာဇဝင်ချုပ် ၁:၁-၄။ လုကာ ၃:၃၈) ကျမ်းစာရေးသူတွေက ကာအိနရဲ့ အဖြစ်အပျက်ကို သမိုင်းဆိုင်ရာ အဖြစ်အပျက်တစ်ခုအနေနဲ့ ရေးသားခဲ့ကြတာဖြစ်တယ်။—ဟေဗြဲ ၁၁:၄။ ၁ ယောဟန် ၃:၁၂။ ယုဒ ၁၁။
ကြိုက်လို ကြိုက်ငြား အကြောင်းအရာများ
ကျမ်းစာမေးခွန်းများရဲ့ အဖြေ
သမ္မာကျမ်းစာကို နားလည်နိုင်ဖို့ ဘာလုပ်ရမလဲ
သမ္မာကျမ်းစာ သတင်းစကားကို သင် နားလည်နိုင်ပါတယ်။
ကျမ်းစာမေးခွန်းများရဲ့ အဖြေ
ကျမ်းစာမှာ ရှေ့နောက်မညီညွတ်တဲ့ အကြောင်းအရာတွေ ရှိသလား
ရှေ့နောက်ညီညွတ်ပုံမရတဲ့ ကျမ်းချက်တချို့နဲ့ အဲဒီအဓိပ္ပာယ်တွေကို နားလည်သွားစေနိုင်တဲ့ အကြံပြုချက်တချို့ကို လေ့လာကြည့်ပါ။
အရေးကြီးတဲ့ သွန်သင်ချက်များ
ကမ္ဘာကို ဘုရားသခင် ဘာကြောင့် ဖန်ဆင်းခဲ့တာလဲ
ကျွန်တော်တို့ရဲ့ ကမ္ဘာကြီးပေါ်မှာ အလှအပတွေ အပြည့်ရှိတယ်။ ကမ္ဘာနဲ့ နေ အကွာအဝေးဟာ အနေတော်၊ ဝန်ရိုးပေါ်မှာ တိမ်းစောင်းနေတာကလည်း အနေတော်ဖြစ်ရုံသာမက ကမ္ဘာ လည်ပတ်နှုန်းကိုလည်း အနေတော်ဖြစ်အောင် ဘုရား လုပ်ထားတယ်။ ဘုရားသခင်က ကမ္ဘာမြေကို ဘာကြောင့် အဲဒီလောက် ကြိုးစားပမ်းစား ဖန်ဆင်းရတာလဲ။
ကျွန်တော်တို့အကြောင်း
လည်ပတ်ဖို့ တောင်းဆိုပါ
ကျမ်းစာထဲက သိချင်တဲ့ မေးခွန်းတစ်ခုကို ဆွေးနွေးပါ၊ ဒါမှမဟုတ် ယေဟောဝါသက်သေတွေအကြောင်း လေ့လာပါ။