“ဘုရားသခင်က လူ့လောကကို အလွန် ချစ်တယ်။ ဒါကြောင့် မိမိရဲ့ သားကို ယုံကြည်သက်ဝင်သူတိုင်း ဖျက်ဆီးမခံရဘဲ ထာဝရအသက် ရနိုင်ဖို့ အဲဒီတစ်ဦးတည်းသော သားကိုတောင် ပေးအပ်ခဲ့တယ်။”—ယောဟန် ၃:၁၆၊ ကမ္ဘာသစ်ဘာသာပြန်ကျမ်း။

  “ဘုရားသခင်၏ သားတော်ကို ယုံကြည်သောသူအပေါင်းတို့သည် ပျက်စီးခြင်းသို့ မရောက်၊ ထာဝရအသက်ကို ရစေခြင်းငှာ၊ ဘုရားသခင်သည် မိမိ၌တစ်ပါးတည်းသော သားတော်ကို စွန့်တော်မူသည်တိုင်အောင် လောကီသားတို့ကို ချစ်တော်မူ၏။”—ယောဟန် ၃:၁၆၊ ယုဒသန်ကျမ်း။

 ကျွန်တော်တို့ကို ဘုရားသခင် ချစ်တယ်။ ထာဝရအသက် ရစေချင်တယ်။ ဒါကြောင့် သားတော် ယေရှုခရစ်ကို ကမ္ဘာမြေဆီ စေလွှတ်ခဲ့တယ်။ ယေရှုက ကမ္ဘာပေါ်မှာ အရေးကြီးတဲ့အရာများစွာ လုပ်ဆောင်ခဲ့တယ်။ တစ်ခုကတော့ မိမိနောက်လိုက်တွေကို အဖဘုရားသခင်အကြောင်း သွန်သင်ပေးခြင်းပါ။ (၁ ပေတရု ၁:၃) နောက်တစ်ခုက လူတွေအတွက် အသက်ပေးခဲ့တာ ဖြစ်တယ်။ ထာဝရအသက် ရနိုင်ဖို့ ယေရှုကို ယုံကြည်သက်ဝင်ကြရမယ်။

 “တစ်ပါးတည်းသော သားတော်ကို စွန့်” တယ်ဆိုတဲ့ အသုံးအနှုန်းက ဘုရားရဲ့ နက်ရှိုင်းတဲ့မေတ္တာကို ပေါ်လွင်စေတယ်။” a ယေရှုဟာ ဘုရားသခင်ရဲ့ ထူးခြားတဲ့ သားပါ။ ဘယ်လို ထူးခြားသလဲ။ ယေရှုတစ်ပါးတည်းကို ယေဟောဝါ တိုက်ရိုက် ဖန်ဆင်းခဲ့တယ်။ (ကောလောသဲ ၁:၁၇) သူဟာ “ဖန်ဆင်းရာအားလုံးမှာ သားဦး” ဖြစ်တယ်။ (ကောလောသဲ ၁:၁၅) ကောင်းကင်တမန်တွေ အပါအဝင် တခြားဖန်ဆင်းရာအားလုံးကို ယေရှုကတစ်ဆင့်၊ ယေရှုအားဖြင့် ဖန်ဆင်းခဲ့တယ်။ ဒါတောင် ယေဟောဝါ b ဘုရားသခင်က အချစ်ဆုံး သားတော် ယေရှုကို “သူတစ်ပါး အစေကို ခံပြီး လူအများအတွက် ရွေးဖိုးအဖြစ် အသက်ကို ပေးဖို့” စေလွှတ်ခဲ့တယ်။ (မဿဲ ၂၀:၂၈) ယေရှု ဝေဒနာခံစားပြီး သေဆုံးသွားတယ်။ ဒါကြောင့် ကျွန်တော်တို့ဟာ ပထမဆုံးလူသား အာဒံဆီကနေ အမွေရခဲ့တဲ့ အပြစ်နဲ့ သေခြင်းရဲ့ ကျွန်ဘဝကနေ လွတ်မြောက်လာတယ်။​—ရောမ ၅:၈၊ ၁၂။

 ယေရှုကို ယုံကြည်သက်ဝင်တယ်ဆိုတာ ယေရှုကို ယုံကြည်ရုံ၊ ကျွန်တော်တို့အတွက် ယေရှု လုပ်ဆောင်ပေးခဲ့တာကို သိထားရုံလောက်ပဲ မဟုတ်ဘူး။ ယေရှုကို နာခံခြင်း၊ ယေရှုခြေရာကို လိုက်လျှောက်ခြင်းအားဖြင့် လက်တွေ့ပြရမယ်။ (မဿဲ ၇:၂၄-၂၇။ ၁ ပေတရု ၂:၂၁) “ဘုရားရဲ့သားကို ယုံကြည်သက်ဝင်သူဟာ ထာဝရအသက် ရလိမ့်မယ်။ သူ့စကားကို နားမထောင်တဲ့သူကတော့ အသက်ရမှာ မဟုတ်ဘူး။”—ယောဟန် ၃:၃၆။

 နိကောဒင်လို့ ခေါ်တဲ့ ဂျူးဘာသာရေးခေါင်းဆောင်နဲ့ ပြောဆိုချိန်မှာ ယေရှု အဲဒီလို ပြောခဲ့တာပါ။ (ယောဟန် ၃:၁၊ ၂) အဲဒီစကားပြောခန်းမှာ ယေရှုက ဘုရားသခင့်နိုင်ငံတော်အကြောင်း c အသေးစိတ်အချက်တွေ၊ “တစ်ဖန်မွေးဖွားခြင်း” အကြောင်းတွေ ပြောပြခဲ့တယ်။ (ယောဟန် ၃:၃) မိမိ ဘယ်လို သေဆုံးရမယ်ဆိုတာကိုပါ ကြိုပြောတယ်။ “လူသားလည်း မြှောက်ထားခံရလိမ့်မယ်။ ဒါမှ လူသားကို ယုံကြည်သူအားလုံး ထာဝရအသက် ရနိုင်ကြမယ်။” (ယောဟန် ၃:၁၄၊ ၁၅) အသက်ရှင်ရေးအတွက် ဒီအခွင့်အလမ်း ပွင့်သွားတာဟာ ဘုရားသခင်ရဲ့ ကြီးမားတဲ့ မေတ္တာကြောင့်ဆိုပြီး ယေရှု အလေးပေးပြောခဲ့တယ်။ အသက်ရနိုင်ဖို့ ယုံကြည်ကြောင်း တင်ပြရမယ်။ ဘုရားသခင် နှစ်သက်တာတွေ လုပ်ရမယ်။—ယောဟန် ၃:၁၇-၂၁။