တာဗော်တောင်ပေါ်မှာ စုဝေးရောက်ရှိနေတဲ့ စစ်သည်တွေကို ဒေဗောရတွေ့လိုက်တဲ့အခါ စိတ်လှုပ်ရှားသွားပြီး တက်ကြွလာပါတယ်။ မနက်ခင်းအချိန်မှာ စစ်သည်တွေရဲ့ ရဲစွမ်းသတ္တိ​နဲ့ သူတို့ရဲ့ခေါင်းဆောင် ဗာရက်ရဲ့ယုံကြည်ခြင်းကို ဒေဗောရ မှန်းဆကြည့်နေတယ်။ လူအင်အား ၁၀,၀၀၀ ပဲရှိပေမဲ့ သူတို့မှာ ယုံကြည်ခြင်းနဲ့သတ္တိ ဘယ်လောက်ရှိသလဲဆိုတာ ဒီနေ့ မျက်ဝါးထင်ထင် တွေ့ရပါတော့မယ်။ ရက်စက်ကြမ်းတမ်းတဲ့ရန်သူတပ်နဲ့ ရင်ဆိုင်ရတော့မယ်။ သူတို့မှာ လူအင်အားနည်းတဲ့အပြင် လက်နက်အင်အားလည်း မရှိဘူး။ ဘာပဲဖြစ်ဖြစ် ဒေဗောရရဲ့အားပေးမှုကြောင့် ဒီနေရာကို သူတို့ စုရုံးရောက်ရှိနေပါပြီ။

မျက်စိတဆုံးလှမ်းမြင်နေရတဲ့ မြင်ကွင်းကို ဗာရက်နဲ့အတူ ဒေဗောရကြည့်နေရင်း လေပြေလေညင်းတိုက်လိုက်တိုင်း သူ့ရဲ့ဝတ်ရုံရှည် တဖျပ်ဖျပ်လှုပ်ခါသွားတာကို မြင်ယောင်ကြည့်လိုက်ပါ။ တာဗော်တောင်ဟာ အုပ်ဆောင်းပုံနဲ့တူပြီး တောင်ထိပ်ပေါ်ကနေ ပေ ၁,၃၀၀ အောက်မှာရှိတဲ့ အက်စ်ဒြေလွန်လွင်ပြင်ကြီးကို မြင်တွေ့နိုင်ပါတယ်။ အဲဒီလွင်ပြင်ကြီးက အနောက်တောင်ဘက်ထိ ကျယ်ပြန့်ပါတယ်။ ကိရှုန်မြစ်က မြက်ခင်းပြင်ကြီးကို ကွေ့ပတ်စီးဆင်းရင်း ကရမေလတောင်ဘေးက မြေထဲပင်လယ်ထဲကို စီးဝင်သွားပါတယ်။ အဲဒီမနက်မှာ ကိရှုန်မြစ်ကြမ်းပြင်ကြီးဟာ ခြောက်သွေ့နေတာ ဖြစ်နိုင်တယ်။ ဒါပေမဲ့ တစ်စုံတစ်ရာကြောင့် ကြီးမားကျယ်ပြန့်တဲ့လွင်ပြင်မှာ လင်းကနဲလက်ကနဲ အရောင်တွေထွက်လာတယ်။ သိသရရဲ့စစ်တပ်ကြီး နီးသည်ထက်နီးလာချိန်မှာ ပိုလို့တောင် လင်းလက်လာတယ်။ သိသရစစ်တပ်မှာ အလွန်အရေးပါတဲ့ စစ်မြင်းရထားအစင်းပေါင်း ၉၀၀ လောက်ကနေ အရောင်တွေ ဖြာထွက်လာတာဖြစ်တယ်။ စစ်မြင်းရထားတွေရဲ့ ဘီးဝင်ရိုးတွေမှာ သံဓားကောက်တွေကို တပ်ထားတာဖြစ်နိုင်တယ်။ အစ္စရေးလူတွေကို ကျူပင်ခုတ်ကျူငုတ်မကျန် အစတုံးဖျက်ဆီးလိုက်ဖို့ သိသရ အားခဲထားတယ်။

ဗာရက်နဲ့ သူ့ရဲ့စစ်သည်တွေက ဒေဗောရ ဘာပြောမလဲ၊ ဘာအချက်ပြမလဲဆိုတာကို စောင့်မျှော်နေကြပါတယ်။ စစ်မြေပြင်မှာ အမျိုးသမီးဆိုလို့ ဒေဗောရတစ်ယောက်တည်းပဲလား။ ဒီလိုအချိန်မှာ တာဝန်ကြီးတစ်ရပ်ကို ထမ်းဆောင်ရတော့မယ်ဆိုတော့ သူ ဘယ်လိုနေမလဲ။ ဒီနေရာမှာ ဘာလုပ်ရမလဲဆိုတာကို သူ စဉ်းစားနေမလား။ မစဉ်းစားပါဘူး။ ဒေဗောရရဲ့ဘုရားသခင် ယေဟောဝါက စစ်ဆင်နွှဲရမယ်၊ ဒီစစ်ဆင်ရေးမှာ အမျိုးသမီးတစ်ဦးကိုသုံးပြီး အနိုင်ယူပေးမယ်လို့ ပြောပြထားပါတယ်။ (တရားသူကြီး ၄:၉) ဒေဗောရနဲ့ ရဲစွမ်းသတ္တိရှိတဲ့ အဲဒီစစ်သည်တွေဆီကနေ ယုံကြည်ခြင်းနဲ့ပတ်သက်ပြီး ဘာသိရှိနိုင်သလဲ။

သမ္မာကျမ်းစာမှာ ဒေဗောရအကြောင်း ဦးဆုံးဖော်ပြတဲ့အခါ “ပရောဖက်မ” လို့ခေါ်ထားတယ်။ ဒေဗောရတစ်ဦးတည်းကိုပဲ ပရောဖက်မလို့ခေါ်ထားတာ မဟုတ်ပါဘူး။ * သူ့မှာ တာဝန်နောက်တစ်ခု ရှိပါသေးတယ်။ အစ္စရေးလူတွေကြားမှာ ဖြစ်ပေါ်လာတဲ့ပြဿနာတွေကိုလည်း ယေဟောဝါဘုရားရဲ့ အကူအညီနဲ့ဖြေရှင်းပေးရတယ်။—တရားသူကြီး ၄:၄၊ ၅။

ဒေဗောရက ဗေသလမြို့နဲ့ ရာမမြို့ကြားမှာရှိတဲ့ ဧဖရိမ်တောင်တန်းဒေသမှာ နေထိုင်ပါတယ်။ စွန်ပလွံပင်အောက်မှာထိုင်ပြီး အစ္စရေးလူတွေကို ဘုရားသခင်ရဲ့လမ်းညွှန်ချက်တွေ ပြောပြတယ်။ ဒီတာဝန်က ဒေဗောရအတွက် ခက်ခဲတာမှန်ပေမဲ့ ကြောက်လန့်ပြီး ခေါင်းရှောင်သွားတာမျိုး မလုပ်ပါဘူး။ တကယ်တော့ သူ့ရဲ့ အကူအညီ အများကြီး လိုအပ်နေတယ်။ နောက်ပိုင်းမှာ ဘုရားသခင်ရဲ့လမ်းညွှန်ချက်နဲ့ ဒေဗောရ ရေးစပ်သီကုံးခဲ့တဲ့ သီချင်းမှာ သစ္စာမဲ့တဲ့အစ္စရေးလူတွေနဲ့ပတ်သက်ပြီး ဒီလိုဖော်ပြခဲ့တယ်– “[သူတို့သည်] ဘုရားသစ်များကို ရွေးယူကြ၏။ ထိုအခါ မြို့တံခါးများတွင် တိုက်ခိုက်ခံရကြ၏။” (တရားသူကြီး ၅:၈၊ သမ္မာ) အစ္စရေးလူတွေက ယေဟောဝါဘုရားကိုကျောခိုင်းပြီး တခြားဘုရားတွေကို ကိုးကွယ်ကြလို့ သူတို့ကို ရန်သူလက်ထဲ ကိုယ်တော် ဝကွက်အပ်လိုက်တယ်။ ဒါကြောင့် ခါနာန်ဘုရင်ယာဘိန်က သူတို့ကို ဖိနှိပ်အုပ်ချုပ်ဖို့ ဩဇာအာဏာကြီးမားတဲ့ စစ်ဗိုလ်ချုပ်သိသရကို အသုံးပြုခဲ့တယ်။

 သိသရဆိုတဲ့နာမည်ကို အစ္စရေးလူတွေကြားလိုက်တာနဲ့ ကြောက်ဒူးတုန်သွားကြပါလား။ ကလေးတွေကို မီးရှို့ပူဇော်ပြီး ဝတ်ပြုရာဗိမာန်မှာ ပြည်တန်ဆာလုပ်ငန်းတွေရှိတဲ့အထိ ခါနာန်ပြည်ရဲ့ ဘာသာရေးနဲ့ ဓလေ့ထုံးစံတွေက ကြမ်းတမ်းရိုင်းစိုင်းကြတယ်။ ခါနာန်စစ်ဗိုလ်ချုပ်သိသရနဲ့ သူရဲ့စစ်တပ်က တိုင်းပြည်ကို ဖိနှိပ်အုပ်ချုပ်တော့ ဘယ်လိုအခြေအနေမျိုး ရောက်သွားသလဲ။ ပြည်တွင်း ခရီးသွားလာဖို့တောင် ကြောက်နေပြီး ရွာတွေမှာလည်း ဘယ်သူမှ မနေရဲကြတော့ဘူးလို့ ဒေဗောရ ရေးစပ်ထားတဲ့သီချင်းမှာ ဖော်ပြထားတယ်။ (တရားသူကြီး ၅:၆၊ ၇) လူတွေက တံတိုင်းတွေမရှိတဲ့ရွာတွေမှာ စိုက်ပျိုးမွေးမြူရမှာကို ကြောက်လွန်းလို့ တောတောင်ထဲဝင်ပုန်းနေကြတာ၊ သူတို့ကို လုယက်တိုက်ခိုက်မှာ၊ သားသမီးတွေကို အတင်းဆွဲခေါ်သွားမှာ၊ ဇနီးသည်တွေကို သားမယားပြုကျင့်မှာ စိုးရိမ်လွန်းလို့ ခရီးမထွက်ရဲတာကို မြင်ယောင်ကြည့်လိုက်ပါ။ *

ခေါင်းမာတဲ့အစ္စရေးလူတွေဟာ အနှစ် ၂၀ လောက် အလူးအလဲဖိနှိပ်ခံရပြီးမှ သူတို့ရဲ့စိတ်နှလုံးပြောင်းလဲချင်စိတ်ရှိလာမှန်း ယေဟောဝါဘုရား သိသွားပြီ။ ဒါကြောင့် “ငါဒေဗောရသည် ဣသရေလ [အစ္စရေး] လူမျိုး၏ မိခင်သဖွယ်” ပေါ်ထွန်းလာတယ်လို့ ဒေဗောရနဲ့ဗာရက်တို့ရဲ့သီချင်းမှာ မှတ်တမ်းတင်ထားတယ်။ လပိဒုတ်ဆိုတဲ့ လူတစ်ဦးရဲ့ဇနီးဒေဗောရက တကယ်ပဲ မိခင်ဖြစ်မဖြစ်ဆိုတာ မသိရပေမဲ့ ကျမ်းစာမှာတော့ သူ့ကို မိခင်အဖြစ် တင်စားထားတာ ဖြစ်ပါတယ်။ တကယ်တော့ အစ္စရေးလူမျိုးကို မိခင်သဖွယ် ကာကွယ်ပေးဖို့ ဒေဗောရကို ယေဟောဝါဘုရား တာဝန်အပ်နှင်းခဲ့တာဖြစ်တယ်။ ခွန်အားဗလကြီးတဲ့ သစ္စာရှိတရားသူကြီး ဗာရက်ကိုခေါ်ပြီး သိသရနဲ့စစ်တိုက်ရမယ့်အကြောင်း ဒေဗောရကို ကိုယ်တော် ပြောခိုင်းတယ်။—တရားသူကြီး ၄:၃၊ ၆၊ ၇; ၅:၇။

တာဗော်တောင်ကို ချီတက်ကြလို့ ဒေဗောရကနေတစ်ဆင့် ယေဟောဝါဘုရား အမိန့်ပေးနေပြီ။ အဲဒီအခါ အစ္စရေးအနွယ်နှစ်နွယ်ကနေ အမျိုးသား ၁၀,၀၀၀ ကို ဗာရက် စုဆောင်းလိုက်တယ်။ စစ်ဗိုလ်ချုပ်သိသရနဲ့ သူ့ရဲ့စစ်မြင်းရထားအစင်း ၉၀၀ ကိုချေမှုန်းနိုင်မယ်ဆိုတဲ့ ယေဟောဝါဘုရားရဲ့ကတိကိုပါ ဒေဗောရ အသိပေးလိုက်တော့ ပြောမပြတတ်လောက်အောင် ဗာရက် အံ့သြမှင်တက်သွားပါလေရော။ အကြောင်းက အစ္စရေးလူတွေမှာ ဘာစစ်တပ်၊ ဘာလက်နက်မှ မရှိလို့ပါ။ ဒါပေမဲ့ ဗာရက်က တာဗော်တောင်ကို ဒေဗောရလိုက်ခဲ့မှသာ စစ်သွားတိုက်မယ်လို့ ပြောခဲ့တယ်။—တရားသူကြီး ၄:၆-၈; ၅:၆-၈။

ဒေဗောရကို လိုက်လာခိုင်းတာက ဗာရက်မှာ ယုံကြည်ခြင်းမရှိလို့ဆိုပြီး လူတချို့ ယူဆကြတယ်။ အဲဒီလိုယူဆလိုက်ရင်တော့ မှားသွားပါလိမ့်မယ်။ ဗာရက်က ဘုရားသခင်ဆီကနေ ဘာစစ်လက်နက်မှ မတောင်းဆိုခဲ့ပါဘူး။ ယေဟောဝါဘုရားရဲ့ ကိုယ်စားလှယ်တစ်ယောက် မိမိတို့နဲ့အတူ စစ်မြေပြင်မှာရှိနေတာက ဘယ်လောက်တောင် ခွန်အားရှိလိုက်မလဲဆိုတာ ယုံကြည်ခြင်းခိုင်မာသူ ဗာရက် သိမြင်ခဲ့တယ်။ (ဟေဗြဲ ၁၁:၃၂၊ ၃၃) ယေဟောဝါဘုရားကလည်း သူ့ရဲ့တောင်းဆိုမှုကို လိုလိုလားလား လက်ခံလိုက်တယ်။ ဒါကြောင့် ဒေဗောရကို ဗာရက်နဲ့အတူ လိုက်သွားခိုင်းတယ်။ ဒါပေမဲ့ စစ်ပွဲကိုအပြီးသတ်အနိုင်ယူမယ့်သူက အမျိုးသားတစ်ဦးမဟုတ်ဘူးဆိုတာ၊ ရက်စက်ကြမ်းတမ်းတဲ့ သိသရကို ကွပ်မျက်မယ့်သူက အမျိုးသမီးဖြစ်မယ်ဆိုတာ ဒေဗောရကို ကိုယ်တော် ကြိုပြောခဲ့တယ်။—တရားသူကြီး ၄:၉။

ဒီနေ့ခေတ်မှာ အမျိုးသမီးတွေဟာ မတရားအနိုင်ကျင့်၊ အကြမ်းဖက်၊ စော်ကားပြုမူတာတွေ ခံနေရတယ်။ ယေဟောဝါဘုရားက အနှိမ်ခံဘဝရောက်နေတဲ့ အမျိုးသမီးတွေကို ဂုဏ်တင်ပေးချင်တယ်။ ဒါပေမဲ့ အမျိုးသားအမျိုးသမီးတွေကို  မျက်နှာမလိုက်ဘဲ တန်းတူရည်တူ တန်ဖိုးထားတယ်။ (ရောမ ၂:၁၁; ဂလာတိ ၃:၂၈) ကိုယ်တော်က အမျိုးသမီးတွေကို အခွင့်အရေးပေးကြောင်း၊ ယုံကြည်ကိုးစားပြီး အထူးအလေးပေးကြောင်း ဒေဗောရရဲ့အဖြစ်ကနေ သိရှိရပါတယ်။ ဒါကြောင့် အမျိုးသားတွေသာ ဘုန်းကံမြင့်တယ်ဆိုတဲ့ ဒီနေ့ခေတ် လောကရဲ့ယူဆချက်ကို ကျွန်ုပ်တို့လက်မခံမိဖို့ အရေးကြီးပါတယ်။

ဒါနဲ့ ဗာရက်က စစ်တပ်ကို ဖွဲ့စည်းလိုက်ပါပြီ။ ထိတ်လန့်စရာကောင်းတဲ့ သိသရရဲ့စစ်တပ်ကိုတိုက်ခိုက်ရဲတဲ့ အမျိုးသား ၁၀,၀၀၀ ကိုစုဆောင်းတယ်။ သူတို့နဲ့အတူ တာဗော်တောင်ကို ဗာရက် တက်သွားတဲ့အခါ သတ္တိရှိအောင် လှုံ့ဆော်ပေးနိုင်တဲ့သူပါလာတဲ့အတွက် ဝမ်းသာပီတိဖြစ်ခဲ့မယ်မဟုတ်လား။ ကျမ်းစာမှာ ဒီလိုဖတ်ရတယ်– “ဒေဗောရသည်လည်း သူနှင့်အတူ လိုက်လေသည်။” (တရားသူကြီး ၄:၁၀၊ ခမ) ယေဟောဝါဘုရားအပေါ် ယုံကြည်မှုအပြည့်နဲ့ အသက်အန္တရာယ်ကိုမမှုဘဲ ရဲဝံ့စွန့်စားစွာ တာဗော်တောင်ကိုလိုက်လာခဲ့တဲ့ အာဂအမျိုးသမီးကို စစ်သည်တွေမြင်ရတဲ့အခါ ဘယ်လောက်တောင် အားရှိလိုက်မလဲ။

အစ္စရေးလူတွေ စစ်တပ်ဖွဲ့စည်းနေတာကို သိသရ သိလိုက်တာနဲ့တစ်ပြိုင်နက် လက်ဦးမှုရဖို့ အချိန်မဆွဲဘဲ စစ်တိုက်ဖို့ပြင်ဆင်ပါတော့တယ်။ ခါနာန်ဘုရင်အတော်များများကလည်း တန်ခိုးအာဏာအကြီးဆုံးဖြစ်နိုင်ဖွယ်ရှိတဲ့ ဘုရင်ယာဘိန်ရဲ့စစ်တပ်နဲ့ လာပူးပေါင်းကြတယ်။ အဲဒီနောက် သိသရရဲ့စစ်မြင်းရထားအစင်း ၉၀၀ စလုံး လွင်ပြင်ကြီးဆီဦးတည်ပြီး ဒုန်းစိုင်းမောင်းနှင်သွားတာကြောင့် မြေတစ်ပြင်လုံး သွက်သွက်ခါသွားတယ်။ ဘာမဟုတ်တဲ့အစ္စရေးစစ်တပ်ကို ခဏလေးနဲ့ အနိုင်ပိုင်းပစ်မယ်လို့ ခါနာန်လူတွေ ယူမှတ်နေကြတယ်။—တရားသူကြီး ၄:၁၂၊ ၁၃; ၅:၁၉။

ရန်သူတွေ တဖြည်းဖြည်းနီးသည်ထက်နီးလာပြီဆိုတော့ ဗာရက်နဲ့ဒေဗောရတို့ ဘာလုပ်ကြမလဲ။ စစ်မြင်းရထားတွေက မြေပြန့်မှာပဲ တိုက်ခိုက်နိုင်တဲ့အတွက် ဗာရက်နဲ့သူ့လူတွေသာ တာဗော်တောင်စောင်းမှာ ဆက်ရှိနေမယ်ဆိုရင် ချီတက်လာနေတဲ့ခါနာန်စစ်တပ်ကို အပေါ်စီးကနေ အသာလေးတိုက်ခိုက်နိုင်မှာသေချာတယ်။ ဗာရက်ကတော့ ယေဟောဝါဘုရားညွှန်ကြားတဲ့အတိုင်း စစ်တိုက်သွားမှာမို့ ဒေဗောရ ဘာပြောမလဲဆိုတာ စောင့်နေတယ်။ နောက်ဆုံးမှာ စစ်တိုက်ဖို့အချိန်ရောက်လာပါပြီ။ ဒါကြောင့် ဒေဗောရက “ ထလော့။ ယနေ့ကား ထာဝရဘုရားသည် သိသရကို သင့်လက်၌ အပ်တော်မူသောနေ့ ဖြစ်၏။ ထာဝရဘုရားသည် သင့်ရှေ့ကြွတော်မူပြီ မဟုတ်လော” လို့ပြောတဲ့အခါ “ဗာရက်သည် လူတစ်သောင်းနှင့်တကွ တာဗော်တောင်ပေါ်က ဆင်းလေ၏။”—တရားသူကြီး ၄:၁၄။ *

အစ္စရေးစစ်တပ်က ကြောက်စရာကောင်းတဲ့ စစ်မြင်းရထားတွေဆီဦးတည်ပြီး တောင်ပေါ်ကနေ လွင်ပြင်ကြီးဆီ ပြေးဆင်းသွားကြတယ်။ ဒေဗောရ ကတိပေးထားတဲ့အတိုင်း သူတို့ရှေ့ကနေ ယေဟောဝါဘုရား သွားသလား။ မကြာခင် သိရပါတော့မယ်။ “မြေငလျင်လှုပ်၍ ကောင်းကင်မှမိုးရွာ” လာတယ်လို့ ကျမ်းစာမှာဖော်ပြထားတယ်။ အဲဒီအခါ သိသရအားထားရတဲ့ စစ်တပ်ကလည်း ကစဉ့်ကလျားဖြစ်ကုန်ပြီ။ သဲကြီးမဲကြီးမိုးရွာချလိုက်တော့ လွင်ပြင်ကြီးတစ်ခုလုံး ရေပြည့်လျှံသွားပါလား။ သံဘီးကြီးတပ်ထားတဲ့ စစ်မြင်းရထားတွေလည်း ရှေ့ဆက်မသွားနိုင်တဲ့အတွက် ဘာမှအသုံးမဝင်တော့ပါလား။ ရွှံ့နွံထဲမှာနစ်သွားတဲ့ စစ်မြင်းရထားတွေဟာ ဘယ်လိုမှ ရုန်းထွက်လို့မရတော့ဘူး။—တရားသူကြီး ၄:၁၄၊ ၁၅; ၅:၄၊ ခမ။

ဗာရက်နဲ့သူ့ရဲ့စစ်သည်တွေဟာ လေကြီးမိုးကြီးထဲမှာ ဘာမှမဖြစ်ကြပါလား။ ဒါ ဘယ်သူ့ကြောင့်လဲဆိုတာ သူတို့ကောင်းကောင်းသိလိုက်ပါပြီ။ ဒါနဲ့ သိသရရဲ့ ခါနာန်စစ်သားတွေဆီ ပြေးသွားပြီး ဘုရားသခင်ရဲ့အခွင့်နဲ့ တပ်တစ်တပ်လုံးကို အပြတ်ရှင်းပစ်လိုက်တယ်။ အဲဒီအချိန်မှာ ကိရှုန်မြစ်ကနေ လှိုင်းလုံးကြီးတွေ တလိပ်လိပ်တက်လာပြီး ခါနာန်လူသေကောင်တွေကို မြေထဲပင်လယ်ထဲ ဆွဲချသွားပါလေရော။—တရားသူကြီး ၄:၁၆; ၅:၂၁။

ဒီနေ့ခေတ်မှာ ယေဟောဝါဘုရားက မိမိကိုကိုးကွယ်တဲ့သူတွေကို ပကတိစစ်ပွဲတွေမှာ မပါဝင်ခိုင်းပေမဲ့ ဘုရားရေးရာပုံဆောင်တိုက်ပွဲကို ဆင်နွှဲဖို့တော့ တောင်းဆိုထားပါတယ်။ (မဿဲ ၂၆:၅၂; ၂ ကောရိန္သု ၁၀:၄) ဘုရားသခင့်စကားကို နားထောင်မယ်ဆိုရင် အဲဒီစစ်ပွဲမှာ အနိုင်ရရှိပါလိမ့်မယ်။ ဒီနေ့ ယေဟောဝါဘုရားကို ဝတ်ပြုကိုးကွယ်တဲ့သူတွေဟာ ရက်စက်ကြမ်းတမ်းတဲ့ တိုက်ခိုက်မှုတွေကြုံနိုင်တဲ့အတွက် အခုကတည်းက သတ္တိမွေးထားဖို့လိုပါတယ်။ ဒါပေမဲ့ ယေဟောဝါဘုရားက မပြောင်းလဲပါဘူး။ ဒေဗောရ၊ ဗာရက်နဲ့ ရှေးခေတ်အစ္စရေးစစ်သည်တွေကို ကိုယ်တော် ကာကွယ်ပေးခဲ့သလို အခုချိန်မှာ မိမိကိုအားကိုးတဲ့သူတွေကိုလည်း ကာကွယ်ပေးနေတုန်းပါပဲ။

ရန်သူခါနာန်တွေထဲက အဆိုးဆုံးတစ်ယောက် ထွက်ပြေးသွားပြီ။ အဲဒီလူက အစ္စရေးတွေကို ရက်ရက်စက်စက်ဖိနှိပ်ခဲ့တဲ့ သိသရပါပဲ။ ရွှံ့နွံထဲမှာ သူရဲ့ဘက်တော်သားတွေကိုပစ်ထားခဲ့ပြီး စစ်မြေပြင်ကနေ ခြေကျင်ထွက်ပြေးသွားတယ်။ ရွှံ့နွံတွေကိုရှောင်ပြီး သူ့ကို ကူညီပေးနိုင်မယ်လို့ထင်ထားတဲ့ အနီးစပ်ဆုံးမိတ်ဆွေဆီ အစ္စရေးစစ်သားတွေရဲ့ကြားထဲကနေ ထွက်ပြေးသွားပါလေရော။ အစ္စရေးစစ်သားတွေ သူ့ကိုတွေ့မှာစိုးလို့ စစ်မြေပြင်နဲ့မိုင်ချီဝေးတဲ့ ဟေဗာရဲ့တဲဆီ ခြေဖဝါးနဲ့တင်ပါးတစ်ထပ်တည်းကျအောင် ထွက်ပြေးသွားလိုက်တာ တန်းနေတာပဲ။ ဟေဗာဟာ တောင်ဘက်မှာ ရေကြည်ရာမြက်နုရာ လှည့်လည်နေထိုင်တတ်တဲ့ ကေနိတ်အမျိုးအနွယ်ဝင်ဖြစ်ပေမဲ့ သူ့မျိုးနွယ်နဲ့ အတူမနေဘဲ သီးသန့်နေတယ်။ ကေနိတ်မျိုးနွယ်က ဘုရင်ယာဘိန်နဲ့မိတ်ဖွဲ့ထားကြတယ်။—တရားသူကြီး ၄:၁၁၊ ၁၇။

 သိသရဟာ ဟေဗာရဲ့တဲဆီ မောကြီးပန်းကြီး ရောက်လာချိန်မှာ ဟေဗာမရှိပေမဲ့ သူ့ရဲ့ဇနီး ယေလတော့ ရှိနေပါတယ်။ ယေလက ဘုရင်ယာဘိန်နဲ့ သူ့ခင်ပွန်းမိတ်ဖွဲ့ထားတာကို ဂုဏ်ယူနေမှာပဲလို့ သိသရ ကျိန်းသေပေါက် တွက်ထားပုံရတယ်။ ဒီအမျိုးသမီးက သူ့ခင်ပွန်းနဲ့ ပြုမူစဉ်းစားပုံချင်းတူမယ်လို့ တစ်ထစ်ချယူမှတ်ထားပုံရတယ်။ ယေလအကြောင်း သိသရ မသိလိုက်လို့ မှန်းချက်နဲ့နှမ်းထွက်မကိုက်တော့ဘူး။ တိုင်းပြည်မှာ မတရားဖိနှိပ်အုပ်ချုပ်နေတဲ့ ခါနာန်လူမျိုးအကြောင်းကို ယေလသိထားတဲ့အတွက် အခုချိန်မှာ တစ်ခုခုကို ပြတ်ပြတ်သားသားလုပ်ရမယ်ဆိုတာ သူ သဘောပေါက်လာတယ်။ ကြမ်းတမ်းရက်စက်တဲ့ ဒီပုဂ္ဂိုလ်ကို ကူညီပေးရမှာလား၊ ဒါမှမဟုတ် ယေဟောဝါဘုရားဘက်ရပ်တည်ပြီး သူ့ကို သတ်ပစ်ရမလား။ ယေလ ဘာလုပ်ရမလဲ။ အမျိုးသမီးတစ်ဦးအနေနဲ့ ဩဇာအာဏာကြီးမားပြီး စစ်ရည်ဝနေတဲ့ဗိုလ်ချုပ်ကို အနိုင်ယူနိုင်ပါ့မလား။

ယေလဟာ တွေဝေမနေဘဲ မြန်မြန်ဆန်ဆန် လုပ်ဆောင်ပါတော့တယ်။ ဒါနဲ့ သိသရအနားယူဖို့ နေရာပေးလိုက်တယ်။ သိသရကလည်း တစ်ယောက်ယောက်လာမေးရင် သူမရှိဘူးလို့ ပြောခိုင်းတယ်။ သိသရ လှဲအိပ်လိုက်တဲ့အခါ ယေလ စောင်ခြုံပေးလိုက်ပြီး ရေတောင်းသောက်တဲ့အခါ မလိုင်ပါတဲ့နို့ကိုတိုက်လိုက်တယ်။ ပြီးတဲ့နောက် သိသရ အိပ်မောကျသွားပါလေရော။ တဲဆောက်ရာမှာ အမျိုးသမီးတွေ ကျွမ်းကျွမ်းကျင်ကျင် အသုံးပြုတတ်တဲ့ တဲငုတ်ချွန်နဲ့တူကို ယေလယူပြီး သိသရရဲ့ခေါင်းရင်းနားကို ခြေသံမကြားအောင် ဖွဖွလေးသွားလိုက်တယ်။ ယေဟောဝါဘုရားရဲ့ဘက်တော်သားအနေနဲ့ ထိတ်လန့်စရာကောင်းတဲ့အလုပ်တစ်ခုကို ယေလလုပ်တော့မှာပါလား။ တွေဝေနေမယ်၊ မဝံ့မရဲဖြစ်နေမယ်ဆိုရင်တော့ ဒုက္ခရောက်သွားနိုင်တယ်။ ဘုရားသခင့်လူမျိုးအကြောင်း၊ သူတို့ကို ဆယ်စုနှစ်ချီပြီး တိရစ္ဆာန်အလား မတရားနှိပ်စက်ခဲ့တဲ့ ဒီလူအကြောင်း ယေလ စဉ်းစားနေမလား။ ဒါမှမဟုတ် ယေဟောဝါဘုရားရဲ့ ဘက်တော်သားဖြစ်ရတဲ့အခွင့်ထူးကို စဉ်းစားနေမလား။ ကျမ်းစာမှတ်တမ်းမှာ ဘာမှမဖော်ပြထားပါဘူး။ ကျွန်ုပ်တို့သိရတဲ့အချက်ကတော့ ယေလက တွေဝေမနေဘဲ လုပ်စရာရှိတာကို မြန်မြန်လုပ်လိုက်တဲ့အတွက် သိသရ သေသွားတာပဲ ဖြစ်တယ်။—တရားသူကြီး ၄:၁၈-၂၁; ၅:၂၄-၂၇။

မကြာခင်မှာ ရန်သူသိသရကိုရှာဖို့ ဗာရက်ရောက်လာတယ်။ အဲဒီအခါ နားထင်မှာတဲငုတ်ချွန်စိုက်ဝင်ပြီး သေနေတဲ့အလောင်းကို ယေလပြလိုက်တော့ ဒေဗောရကြိုဟောချက် အမှန်တကယ်ပဲဖြစ်လာမှန်း ဗာရက် သိသွားတယ်။ အမျိုးသမီးတစ်ဦးက ခွန်အားကြီးမားတဲ့ စစ်ဗိုလ်ချုပ်သိသရကို သတ်လိုက်ပြီလေ။ ဒီနေ့ခေတ်ဝေဖန်ရေးသမားတွေက ယေလကို ရက်စက်အကြမ်းတမ်းဆုံး အမျိုးသမီးလို့ခေါ်ကြပေမဲ့ ဗာရက်နဲ့ ဒေဗောရကတော့ မွန်မြတ်တဲ့အမျိုးသမီးလို့ သတ်မှတ်ခဲ့ပါတယ်။ ဒါကြောင့် သူတို့ရေးစပ်ထားတဲ့ သီချင်းထဲမှာ ယေလကို ချီးမွမ်းအခံထိုက်ဆုံးအမျိုးသမီးလို့ ဖော်ပြထားပါတယ်။ (တရားသူကြီး ၄:၂၂; ၅:၂၄) ဒေဗောရက ဘယ်လောက်တောင် သဘောထားမြင့်မြတ်သလဲဆိုရင် ယေလကို အဲဒီလိုချီးမွမ်းတဲ့အခါ မငြူစူခဲ့ပါဘူး။ အဲဒီအစား ယေဟောဝါဘုရားရဲ့စကားတော် အမှန်တကယ် ဖြစ်လာတယ်ဆိုတာကိုပဲ အာရုံစိုက်ခဲ့တယ်။

သိသရသေသွားပြီဆိုတော့ ဘုရင်ယာဘိန်လည်း အစ္စရေးလူတွေကို မဖိနှိပ်နိုင်တော့ဘူး။ ခါနာန်လူတွေရဲ့ မတရားဖိနှိပ်မှုတွေ ဇာတ်သိမ်းသွားတဲ့အတွက် နှောင်အနှစ် ၄၀ အထိ အေးချမ်းသာယာသွားပါတယ်။ (တရားသူကြီး ၄:၂၄; ၅:၃၁) ဒေဗောရ၊ ဗာရက်နဲ့ ယေလတို့က ယေဟောဝါဘုရားကို ယုံကြည်ကိုးစားခဲ့လို့ ကောင်းချီးခံစားရတယ်မဟုတ်လား။ ကျွန်ုပ်တို့လည်း ဒေဗောရရဲ့ယုံကြည်ခြင်းကိုတုပ၊ ယေဟောဝါဘုရားဘက်မှာ သတ္တိရှိရှိရပ်တည်ပြီး တခြားသူတွေကိုလည်း သတ္တိရှိဖို့အားပေးမယ်ဆိုရင် ပုံဆောင်တိုက်ပွဲမှာအနိုင်ရပြီး ထာဝစဉ်အေးချမ်းစွာနေထိုင်ခွင့် ရရှိပါလိမ့်မယ်။