ဘုရားသခင်ဟာ သားသမီးတွေ မွေးဖွားဖို့ ပကတိဇနီး ရှိစရာမလိုပါဘူး။ ဘာကြောင့်လဲဆိုတော့ သက်ရှိအားလုံးကို ဘုရားသခင် ဖန်ဆင်းခဲ့လို့ပါပဲ။ လူသားတွေဟာ ဘုရားသခင်ရဲ့ အရည်အသွေးတွေကို တုပနိုင်တဲ့အစွမ်းနဲ့ ဖန်ဆင်းခံခဲ့ရတယ်။ ဒါကြောင့် ဘုရားသခင် ဖန်ဆင်းခဲ့တဲ့ ပထမဆုံးလူသား အာဒံကို “ဘုရားသခင်၏သား” လို့ခေါ်ဆိုခဲ့တယ်။ အဲဒီလိုပါပဲ၊ ယေရှုကိုလည်း “ဘုရားသခင်၏သားတော်” လို့ခေါ်ဆိုပါတယ်။ ဘာကြောင့်လဲဆိုတော့ ခမည်းတော်မှာရှိတဲ့ အရည်အသွေးတွေနဲ့ ဖန်ဆင်းခံထားရလို့ပါပဲ။—လုကာ ၃:၃၈; ယောဟန် ၁:၁၄၊ ၄၉ တို့ကိုဖတ်ပါ။

အာဒံမတိုင်ခင် ယေရှုကို ဘုရားသခင် ဖန်ဆင်းခဲ့တယ်။ ဘုရားသခင်ဟာ ယေရှုကို ဖန်ဆင်းပြီးတဲ့နောက် ယေရှုအားဖြင့် ကောင်းကင်တမန်အပါအဝင် အရာခပ်သိမ်းကို ဖန်ဆင်းခဲ့တယ်။ ဒါကြောင့် ယေရှုကို ဘုရားသခင် “ဖန်ဆင်းရာအပေါင်းတို့တွင် သားဦး” ဖြစ်တယ်လို့ ကျမ်းစာမှာ ဖော်ပြထားရခြင်းဖြစ်တယ်။—ကောလောသဲ ၁:၁၅၊ ၁၆ ကိုဖတ်ပါ။

ဘက်သလီဟင်မြို့မှာ ယေရှု မမွေးဖွားခင် ကောင်းကင်တမန်အဖြစ် ကောင်းကင်မှာ နေထိုင်ခဲ့ပါတယ်။ အချိန်တန်တဲ့အခါ လူသားတစ်ယောက်အဖြစ် မွေးဖွားလာဖို့ ယေရှုရဲ့အသက်ကို ကောင်းကင်ကနေ မာရိရဲ့ဝမ်းထဲကို ဘုရားသခင် ပြောင်းရွှေ့ပေးခဲ့တယ်။—လုကာ ၁:၃၀-၃၂; ယောဟန် ၆:၃၈; ၈:၂၃ တို့ကိုဖတ်ပါ။

ယေရှုကို ဘုရားသခင် ဘာကြောင့် လူသားတစ်ဦးအဖြစ် မြေကြီးပေါ်မှာ မွေးဖွားစေခဲ့တာလဲ။ အရေးကြီးတဲ့ ဘယ်အပိုင်းကို ယေရှု ပြည့်စုံစေခဲ့သလဲ။ အဲဒီမေးခွန်းတွေရဲ့ အဖြေကို ကျမ်းစာမှာ တွေ့နိုင်ပါတယ်။ အဲဒီအဖြေတွေကြောင့် သင့်အတွက် ဘုရားသခင်နဲ့ယေရှု လုပ်ဆောင်ပေးခဲ့ရာတွေကို သိနားလည်ပြီး ကျေးဇူးတင်လေးမြတ်စိတ် တဖွားဖွား ဖြစ်ပေါ်လာပါလိမ့်မယ်။