ကျမ်းစာသည် ဘဝအသက်တာများကို ပြောင်းလဲစေ

ရာစတာဖေရီယန် * တစ်ဦးသည် သူ၏ကျစ်ဆံမြီးရှည်များကို အဘယ်ကြောင့် ညှပ်ပစ်လိုက်သနည်း။ လူဖြူများအား မုန်းတီးသောစိတ်ကို သူ အဘယ်ကြောင့် ဖျောက်ဖျက်ပစ်ခဲ့သနည်း။ မူးယစ်ဆေးရောင်းဝယ်သူများအတွက် ငွေလိုက်သိမ်းပေးသော အကြမ်းဖက်လူငယ်တစ်ဦးသည် သူ၏ဘဝပုံစံကို အဘယ်ကြောင့် ပြောင်းလဲလိုက်သနည်း။ သူတို့ပြောပြသောစကားများကို သုံးသပ်ကြည့်ပါ။

“မလိုမုန်းထားတဲ့စိတ်ကိုတောင် ကျွန်တော် ဖျောက်ဖျက်နိုင်ခဲ့တယ်။”—ဟာဖာနီ ဒါမာ

အသက်- ၃၄

နိုင်ငံ- ဇမ်ဘီယာ

ဘ၀နောက်ခံ- ရာစတာဖေရီယန်

အတိတ်- ဇမ်ဘီယာနိုင်ငံက ဒုက္ခသည်စခန်းမှာ ကျွန်တော့်ကို မွေးတယ်။ အမေက စစ်အတွင်းမှာ နမီးဘီးယားနိုင်ငံကို ထွက်ပြေးသွားပြီး အနောက်တောင်အာဖရိကလူ့အဖွဲ့အစည်း (အက်စ်ဒဗလျူအေပီအို) ထဲဝင်လိုက်တယ်။ အဲဒီတုန်းက နမီးဘီးယားနိုင်ငံကို အုပ်ချုပ်တဲ့ တောင်အာဖရိကအစိုးရကို အဲဒီအဖွဲ့က တိုက်ခိုက်နေတဲ့အချိန်ပေါ့။

အသက် ၁၅ နှစ်အထိ ဒုက္ခသည်စခန်း အတော်များများမှာ ကျွန်တော်နေခဲ့ရတယ်။ အက်စ်ဒဗလျူအေပီအို အဖွဲ့မှာရှိတဲ့ ကျွန်တော်တို့လူငယ်တွေက လွတ်မြောက်ရေးလှုပ်ရှားမှုတွေကို ဦးဆောင်ဖို့၊ နိုင်ငံရေးအယူဝါဒတွေကို တရားသေဆုပ်ကိုင်ဖို့၊ လူဖြူတွေကို မုန်းတီးဖို့ သင်ပေးခံရတယ်။

ကျွန်တော့်အသက် ၁၁ နှစ်မှာ စခန်းက ချာ့ခ်ျအသင်းသားဝင်တစ်ယောက် ဖြစ်ချင်တယ်လို့ ဓမ္မဆရာကို ကျွန်တော်ပြောပြတယ်။ အဲဒီချာ့ခ်ျက ရိုမန်ကက်သလစ်၊ လူသာရဲန်၊ အင်္ဂလီကန်နဲ့ တခြားအဖွဲ့တွေ စုပေါင်းထားတာ။ ဒါပေမဲ့ ကျွန်တော့်ကို သူ ခွင့်မပြုဘူး။ အဲဒီအချိန်ကစပြီး ကျွန်တော် ဘုရားမဲ့ဝါဒီတစ်ယောက်ဖြစ်လာတယ်။ အသက် ၁၅ နှစ်ရောက်တဲ့အခါမှာ ရက်ဂေးတေးဂီတကို မြတ်နိုးတာရယ်၊ အာဖရိကန်လူမည်းတွေအပေါ် မတရားပြုမူတာတွေကို တွန်းလှန်ချင်တဲ့ ဆန္ဒရယ်ကြောင့် ရာစတာဖေရီယန်လှုပ်ရှားမှုထဲ ကျွန်တော်ဝင်လိုက်တယ်။ ကျွန်တော်က ကျစ်ဆံမြီး အချောင်းချောင်းကျနေတဲ့ ဆံပင်ပုံစံထားတယ်။ ဆေးခြောက်ရှူတယ်။ သက်သတ်လွတ်စားတယ်။ လူမည်းတွေ လွတ်လပ်ရေးရဖို့ ထောက်ခံအားပေးတယ်။ ဒါပေမဲ့ ကျွန်တော့်ရဲ့ အကျင့်ပျက်ဘဝပုံစံကတော့ ဒီအတိုင်းပဲ။ အကြမ်းဖက်ရုပ်ရှင်တွေကြည့်တယ်။ အဆဲလည်း မပြတ်ဘူး။

ကျမ်းစာက ကျွန်တော့်ဘဝကို ပြောင်းလဲစေခဲ့ပုံ- ၁၉၉၅ ခုနှစ်၊ ကျွန်တော့်အသက် ၂၀ လောက်မှာ ကျွန်တော် တကယ်လုပ်ချင်တဲ့အရာတွေကို လေးလေးနက်နက် စပြီးစဉ်းစားလာတော့တယ်။ ဒါနဲ့ ရနိုင်သမျှ ရာစတာဖေရီယန်စာအုပ်အားလုံးကို ဖတ်ခဲ့တယ်။ စာအုပ်တချို့က သမ္မာကျမ်းစာကို ကိုးကားပေမဲ့ ရှင်းပြချက်တွေကို ကျွန်တော် နားမလည်ဘူး။ ဒါကြောင့် ကိုယ့်ဘာသာကိုယ် ကျမ်းစာဖတ်မယ်လို့ ဆုံးဖြတ်လိုက်တယ်။

နောက်ပိုင်းမှာ ရာစတာဖေရီယန်သူငယ်ချင်းတစ်ယောက်က ယေဟောဝါသက်သေတွေ ထုတ်ဝေတဲ့ ကျမ်းစာလေ့လာမှု လက်ကမ်းစာအုပ်တစ်အုပ် ကျွန်တော့်ကို ပေးတယ်။ သမ္မာကျမ်းစာကို အဲဒီစာအုပ်နဲ့ ကိုယ့်ဘာသာကိုယ် လေ့လာခဲ့တယ်။ နောက်ပိုင်းမှပဲ ယေဟောဝါသက်သေတွေနဲ့ ကျွန်တော်တွေ့ပြီး သူတို့နဲ့ ကျမ်းစာစလေ့လာခဲ့တယ်။

 ဆေးလိပ်ဖြတ်ဖို့နဲ့ အရက်အလွန်အကျွံမသောက်ဖို့ ကျွန်တော် မနည်းကြိုးစားခဲ့ရတယ်။ (၂ ကောရိန္သု ၇:၁) ကျွန်တော့်ရဲ့ ရုပ်သွင်ကို သန့်ရှင်းအောင်ထားတယ်။ ကျစ်ဆံမြီးတွေကို ညှပ်ပစ်လိုက်တယ်။ အပြာစာပေတွေ၊ အကြမ်းဖက်ရုပ်ရှင်တွေကို မကြည့်တော့ဘူး။ ဆဲလည်းမဆဲတော့ဘူး။ (ဧဖက် ၅:၃၊ ၄) နောက်ဆုံးမှာ လူဖြူတွေကို မုန်းတဲ့စိတ်ကိုတောင် ကျွန်တော် ဖျောက်နိုင်ခဲ့တယ်။ (တမန်တော် ၁၀:၃၄၊ ၃၅) ကျွန်တော့်ရဲ့ပြောင်းလဲမှုတွေထဲမှာ လူမျိုးရေးဝါဒကို အားပေးတဲ့ တေးဂီတကို စွန့်လိုက်တာ၊ ဘဝပုံစံဟောင်းကို ပြန်ရောက်စေနိုင်တဲ့ သူငယ်ချင်းဟောင်းတွေကို အဆက်ဖြတ်လိုက်တာတွေလည်း ပါတယ်။

အဲဒီလိုပြောင်းလဲပြီးတဲ့နောက် ယေဟောဝါသက်သေတွေရဲ့ နိုင်ငံတော်ခန်းမကို လိုက်ရှာ၊ စည်းဝေးတွေသွားတက်ပြီး သက်သေခံဖြစ်ချင်တယ်လို့ တောင်းဆိုလိုက်တယ်။ ယေဟောဝါသက်သေဖြစ်ဖို့ ဆုံးဖြတ်ပြီး နှစ်ခြင်းခံလိုက်တဲ့အခါ ကျွန်တော့်မိသားစုက မကြိုက်ကြဘူး။ ယေဟောဝါသက်သေမဟုတ်ဘဲ တခြား “ခရစ်ယာန်” ဘာသာတစ်ခုခုကို ရွေးချယ်ဖို့ ကျွန်တော့်ကို အမေက ပြောလာတယ်။ အထင်ကရ အစိုးရအဖွဲ့ဝင်ဖြစ်တဲ့ ဦးလေးတစ်ယောက်က သက်သေခံတွေနဲ့ ကျွန်တော်ပေါင်းသင်းတာကို အမြဲတမ်း အပြစ်တင်တယ်။

လူတွေနဲ့ ယေရှု ဘယ်လိုဆက်ဆံခဲ့သလဲဆိုတာ သင်ယူပြီး ကိုယ်တော်ရဲ့ဆုံးမစကားတွေကို ကျင့်သုံးခဲ့တာကြောင့် ဆန့်ကျင်မှုတွေ၊ ကဲ့ရဲ့ပြောင်လှောင်မှုတွေကို ကျွန်တော် ခံရပ်နိုင်ခဲ့တာ။ သက်သေခံတွေရဲ့ သွန်သင်ချက်တွေကို သမ္မာကျမ်းစာနဲ့ နှိုင်းယှဉ်ကြည့်တဲ့အခါ စစ်မှန်တဲ့ဘာသာကို ကျွန်တော်တွေ့ပြီဆိုတာ ကောင်းကောင်းသိလိုက်တယ်။ ဥပမာ၊ တခြားသူတွေကို ဟောပြောပါဆိုတဲ့ ကျမ်းစာမိန့်မှာချက်ကို သူတို့ လိုက်လျှောက်ကြတယ်။ (မဿဲ ၂၈:၁၉၊ ၂၀; တမန်တော် ၁၅:၁၄) အဲဒီအပြင် နိုင်ငံရေးမှာလည်း သူတို့ မပါကြဘူး။—ဆာလံ ၁၄၆:၃၊ ၄; ယောဟန် ၁၅:၁၇၊ ၁၈။

အကျိုးကျေးဇူးရခဲ့ပုံ- ကျမ်းစာစံနှုန်းတွေနဲ့အညီ နေထိုင်တတ်ဖို့သင်ယူတာက တကယ်လက်တွေ့ကျတယ်။ ဥပမာ၊ ကျွန်တော် ဆေးခြောက်ဖြတ်လိုက်တဲ့အတွက် လတိုင်း ဒေါ်လာရာနဲ့ချီ သက်သာသွားတယ်။ ကတုန်ကယင်မဖြစ်တော့တဲ့အပြင် စိတ်ပိုင်းရော၊ ကာယပိုင်းပါ ကျန်းမာလာတယ်။

ငယ်ငယ်လေးကတည်းက တောင့်တခဲ့တဲ့ လမ်းညွှန်ချက်နဲ့ ရည်ရွယ်ချက်ရှိတဲ့ဘဝကို ကျွန်တော် အခု ပိုင်ဆိုင်နေပြီ။ ဘုရားသခင်ကို ချဉ်းကပ်နိုင်ပြီလို့လည်း ကျွန်တော် အခု ခံစားနေရပြီ။ ဒါထက်အရေးကြီးတာ တခြား မရှိတော့ဘူး။—ယာကုပ် ၄:၈။

“ဒေါသကို ကျွန်တော် ထိန်းချုပ်တတ်ပြီ။”—မာတီနို ပဲဒရက်တီ

အသက်- ၄၃

နိုင်ငံ- ဩစတြေးလျ

ဘ၀နောက်ခံ- မူးယစ်ဆေးရောင်းဝယ်သူ

အတိတ်- ကျွန်တော့်မိသားစုက ကျွန်တော်ငယ်ငယ်ကတည်းက တစ်နေရာပြီး တစ်နေရာ ပြောင်းရွှေ့နေထိုင်ခဲ့ကြတယ်။ ဒါကြောင့် မြို့ကြီးမြို့ငယ်တွေမှာ ကျွန်တော် နေထိုင်ခဲ့တဲ့အပြင် ဝေးခေါင်တဲ့နေရာမှာရှိတဲ့ အဘော်ရီဂျင်နီစခန်းမှာလည်း ခဏနေခဲ့ဖူးတယ်။ အဲဒီတုန်းက တစ်ဝမ်းကွဲတွေ၊ ဦးလေးတွေနဲ့ ငါးဖမ်းထွက်တာ၊ အမဲလိုက်တာ၊ အဘော်ရီဂျင်နီတွေသုံးတဲ့ ကိရိယာတွေနဲ့ တခြားပစ္စည်းတွေ ထွင်းထုတာကို ကျွန်တော် ကောင်းကောင်းမှတ်မိသေးတယ်။

 အဖေက လက်ဝှေ့သမားဆိုတော့ လက်ဝှေ့ထိုးတတ်ဖို့ ကျွန်တော့်ကို ငယ်ငယ်လေးကတည်းက သင်ပေးတယ်။ ကျွန်တော် ခဏခဏ ရန်ဖြစ်တတ်တယ်။ ဆယ်ကျော်သက်အရွယ်ရောက်တော့ အရက်ဆိုင်တွေမှာ အရက်သောက်ပြီး အချိန်ဖြုန်းနေတတ်တယ်။ ကျွန်တော်နဲ့ သူငယ်ချင်းတွေက သူများကို ရန်ရှာတယ်။ ပြီးတော့ ဓား၊ ဘေ့စ်ဘောရိုက်တံတွေကိုင်ပြီး အယောက် ၂၀ ဒါမှမဟုတ် ဒီထက်များတဲ့လူတွေနဲ့ ချကြတယ်။

ဆိပ်ခံတံတားက အလုပ်သမားတွေ ခိုးလာတဲ့ ပစ္စည်းတွေနဲ့ မူးယစ်ဆေးတွေကိုရောင်းပြီး ကျွန်တော် ငွေရှာတယ်။ ပြောင်းချောသေနတ်၊ ပစ္စတိုသေနတ်နဲ့ လူတွေကို ခြိမ်းခြောက်ပြီး မူးယစ်ဆေးရောင်းဝယ်သူတွေအတွက် ငွေလိုက်ကောက်ပေးတယ်။ ကျွန်တော်က လူသတ်သမားဖြစ်ချင်တာကိုး။ ဒါကြောင့် ကျွန်တော့်ရဲ့ဆောင်ပုဒ်က သတ်မလား၊ အသတ်ခံမလားတဲ့။

ကျမ်းစာက ကျွန်တော့်ဘဝကို ပြောင်းလဲစေခဲ့ပုံ- ကျွန်တော်အရွယ်ရောက်လာတော့ ယေဟောဝါသက်သေတွေရဲ့အကြောင်းကို ကြားသိခဲ့ရတယ်။ ကျွန်တော့်အသက် ၂၀ ကျော်ကျော်လေးမှာ သက်သေခံတစ်ယောက်ယောက် နေတဲ့နေရာများ အမေသိမလားဆိုပြီး ကျွန်တော်မေးဖူးတာ မှတ်မိသေးတယ်။ နောက်နှစ်ရက်အကြာမှာ သက်သေခံတစ်ယောက်ဖြစ်တဲ့ ဒီခ်ဆန်က အိမ်တံခါးလာခေါက်တယ်။ ခဏတစ်ဖြုတ် စကားပြောပြီးတဲ့နောက် ယေဟောဝါသက်သေတွေရဲ့ အစည်းအဝေးကိုလာတက်ဖို့ ကျွန်တော့်ကို သူဖိတ်ခေါ်တယ်။ ဒါနဲ့ အစည်းအဝေးကို ကျွန်တော်သွားတက်ခဲ့တယ်။ အခုဆိုရင် အစည်းအဝေးတွေတက်တာ အနှစ် ၂၀ ကျော်ရှိနေပြီလေ။ သက်သေခံတွေက ကျွန်တော်မေးတဲ့မေးခွန်းတိုင်းကို ကျမ်းစာနဲ့ ဖြေဆိုနိုင်ခဲ့ကြတယ်။

ယေဟောဝါဘုရားသခင်က လူတစ်ဦးစီကို စိတ်ဝင်စားတဲ့အပြင် ဆိုးသွမ်းတဲ့သူတွေကိုတောင် စိတ်ဝင်စားတယ်ဆိုတာ သိခဲ့ရလို့ ကျွန်တော် ဝမ်းသာမိတယ်။ (၂ ပေတရု ၃:၉) ကျွန်တော့်ကို ဘယ်သူမှဂရုမစိုက်ချင်နေ၊ မေတ္တာရှင်ခမည်းတော်ဖြစ်တဲ့ ဘုရားသခင်က ဂရုစိုက်စောင့်ရှောက်မယ်ဆိုတာ သိလိုက်ရတယ်လေ။ ကျွန်တော့်ရဲ့ဘဝလမ်းစဉ်ကို ပြောင်းလဲမယ်ဆိုရင် ကျွန်တော့်ရဲ့အပြစ်တွေကို ဘုရားသခင် ခွင့်လွှတ်မယ်ဆိုတာ သိရတဲ့အတွက်လည်း စိတ်သက်သာရာရခဲ့တာပေါ့။ ဧဖက် ၄:၂၂-၂၄ မှာပါတဲ့ ကျမ်းစကားတွေက ကျွန်တော့်အတွက် အများကြီးအကျိုးရှိတယ်။ “ပင်ကိုစရိုက်ဟောင်းကို ချွတ်ပယ်” ပြီး “ဘုရားသခင်၏အလိုတော်အတိုင်း ဖန်ဆင်းခံရသော စရိုက်သစ်ကို ဝတ်ဆင်” ဖို့ အဲဒီကျမ်းပိုဒ်မှာ အားပေးထားတယ်။

ကျွန်တော့်ရဲ့ဘဝပုံစံကို ပြောင်းလဲဖို့ အချိန်အတော်ယူခဲ့ရတယ်။ တစ်ပတ်လုံး ကျွန်တော် မူးယစ်ဆေးမသုံးဘူး။ ဒါပေမဲ့ စနေ၊ တနင်္ဂနွေမှာ အပေါင်းအသင်းတွေနဲ့ပြန်ဆုံတဲ့အခါ မူးယစ်ဆေး ပြန်သုံးမိတော့တာပဲ။ ကျွန်တော့်ရဲ့ဘဝကို စင်ကြယ်စေချင်တယ်ဆိုရင် အပေါင်းအသင်းဟောင်းတွေနဲ့ဝေးရာမှာ နေမှဖြစ်မယ်ဆိုတာ ကျွန်တော် သဘောပေါက်သွားပြီ။ ဒါကြောင့် တခြားပြည်နယ်ကို ပြောင်းဖို့ ကျွန်တော် ဆုံးဖြတ်လိုက်တယ်။ အပေါင်းအသင်းတချို့က ကျွန်တော်နဲ့လိုက်မယ်ပြောတော့ လက်ခံလိုက်တယ်။ လမ်းခရီးမှာ သူတို့တွေ ဆေးခြောက်ရှူတယ်၊ ကျွန်တော့်ကိုလည်း ပေးတယ်။ ဒါတွေ မလုပ်တော့ဘူးလို့ သူတို့ကို ပြောပြပြီး နယ်စပ်နားအရောက်မှာ သူတို့နဲ့ လမ်းခွဲလိုက်တယ်။ လမ်းခွဲပြီး မကြာခင်မှာပဲ ဘဏ်တစ်ခုကို သူတို့ ဓားပြသွားတိုက်ကြတယ်။ အဲဒါကို နောက်ပိုင်းကျမှ ကျွန်တော်သိလိုက်ရတာ။

အကျိုးကျေးဇူးရခဲ့ပုံ- အပေါင်းအသင်းဟောင်းတွေနဲ့ အဆက်အသွယ်ဖြတ်လိုက်မှပဲ ကျွန်တော့်ဘဝကို ပြုပြင်ပြောင်းလဲဖို့ အရမ်းလွယ်သွားတော့တယ်။ ၁၉၈၉ ခုနှစ်မှာ ကျွန်တော် နှစ်ခြင်းခံပြီး သက်သေခံတစ်ယောက်ဖြစ်လာတယ်။ ကျွန်တော် နှစ်ခြင်းခံပြီးတဲ့နောက် ညီမလေး၊ အမေ၊ အဖေတို့လည်း ယေဟောဝါဘုရားသခင်ကို ဝတ်ပြုကိုးကွယ်လာကြတယ်။

အခုဆိုရင် ကျွန်တော့်အိမ်ထောင်သက် ၁၇ နှစ်ရှိပြီး ချစ်စရာကလေး သုံးယောက်လည်း ရနေပါပြီ။ ဒေါသထွက်အောင် ဆွပေးရင်တောင် ကျွန်တော့်ဒေါသကို ထိန်းချုပ်တတ်လာတယ်။ လူမျိုးတွေ၊ လူမျိုးနွယ်တွေ၊ ဘာသာစကားမတူတဲ့ လူတွေအားလုံးကိုလည်း ကျွန်တော် ချစ်တတ်လာပါပြီ။ (ဗျာ. ၇:၉) “သင်တို့သည် ငါ၏တရား၌ တည်နေလျှင် ငါ့တပည့် အမှန်ဖြစ်ကြ၏။ အမှန်တရားကို သင်တို့ သိကြလိမ့်မည်။ ထိုအမှန်တရားသည်လည်း သင်တို့ကို လွှတ်လိမ့်မည်” လို့ဆိုတဲ့ ယေရှုရဲ့စကားတွေက ကျွန်တော့်အဖြစ်အပျက်မှာ မှန်ကန်ပါတယ်။—ယောဟန် ၈:၃၁၊ ၃၂။

[အောက်ခြေမှတ်ချက်]

[စာမျက်နှာ ၁၉ ပါ အကျဉ်းဖော်ပြချက်]

ကျွန်တော့်ရဲ့ပြောင်းလဲမှုတွေထဲမှာ လူမျိုးရေးဝါဒကို အားပေးတဲ့ တေးဂီတကို စွန့်လွှတ်လိုက်တာလည်း ပါတယ်

[စာမျက်နှာ ၂၀ ပါ အကျဉ်းဖော်ပြချက်]

ကျွန်တော်နဲ့ သူငယ်ချင်းတွေက သူများကို ရန်ရှာတယ်။ ပြီးတော့ ဓား၊ ဘေ့စ်ဘောရိုက်တံတွေကိုင်ပြီး အယောက် ၂၀ ဒါမှမဟုတ် ဒီထက်များတဲ့လူတွေနဲ့ ချကြတယ်