ယေဟောဝါ၏နာမတော်၌ ကျွန်ုပ်တို့ ထာဝစဉ်လျှောက်လှမ်းကြမည်!
ယေဟောဝါ၏နာမတော်၌ ကျွန်ုပ်တို့ ထာဝစဉ်လျှောက်လှမ်းကြမည်!
“ငါတို့မူကား ငါတို့၏ဘုရားသခင် ယေဟောဝါ၏နာမတော်ကိုအမှီပြု၍ ကာလအစဉ် လျှောက်လှမ်းကြမည်။” —မိက္ခာ ၄:၅၊ ကဘ။
၁။ မိက္ခာကျမ်းအခန်းကြီး ၃ မှ ၅ တွင်အဘယ်သတင်းများကို ဖော်ပြထားသနည်း။
ယေဟောဝါသည် မိမိ၏လူမျိုးတော်ကို မိန့်ဆိုစရာရှိ၍ မိက္ခာကို မိမိ၏ပရောဖက်အဖြစ် အသုံးပြုတော်မူသည်။ ဘုရားသခင်သည် အပြစ်ပြုသူများကို အရေးယူရန် ရည်ရွယ်ထား၏။ အယူဖောက်ပြန်မှုအတွက် ဣသရေလလူမျိုးကို ကိုယ်တော် အပြစ်ပေးတော့မည်ဖြစ်သည်။ သို့သော် ဝမ်းသာစရာမှာ ယေဟောဝါ၏နာမတော်၌ လျှောက်လှမ်းသူများကိုကား ကိုယ်တော်ကောင်းချီးပေးတော်မူမည်။ ဤသတင်းများကို မိက္ခာပရောဖက်ပြုချက်ပါရှိသည့် အခန်းကြီး ၃ မှ ၅ တွင်ရှင်းလင်းစွာ ဖော်ပြထားသည်။
၂၊ ၃။ (က) ဣသရေလခေါင်းဆောင်များသည် အဘယ်အရည်အချင်းများကို တင်ပြသင့်သော်လည်း အမှန်တကယ် သူတို့အဘယ်အရာလုပ်ဆောင်နေကြသနည်း။ (ခ) မိက္ခာ ၃:၂၊ ၃ တွင်အသုံးပြုထားသော ပုံဆောင်စကားများကို သင်မည်သို့ရှင်းပြမည်နည်း။
၂ ဘုရားသခင်၏ပရောဖက်က ဤသို့ကြေညာသည်– “အိုယာကုပ်အမျိုးမင်း၊ ဣသရေလအမျိုးသူကြီးတို့ နားထောင်ကြပါလော့။ သင်တို့သည် တရားသဖြင့် စီရင်ခြင်းအမှုကို နားလည်အပ်သည်မဟုတ်လော။” မှန်ပါသည်၊ ၎င်းသည် သူတို့၏တာဝန်ဖြစ်သော်လည်း အမှန်တကယ် သူတို့အဘယ်အရာလုပ်ဆောင်နေကြသနည်း။ မိက္ခာက ဤသို့ဆက်ဆိုသည်– “[ကောင်းမှု]ကိုမုန်း၍ [မကောင်းမှု]ကိုနှစ်သက်လျက် သူတစ်ပါးအရေကိုလည်းကောင်း၊ အရိုး၌ကပ်သောအသားကိုလည်းကောင်း ဆွဲယူလျက်၊ ငါ့လူတို့၏အသားကိုစားလျက်၊ အရေကိုခွာလျက်၊ အရိုးတို့ကိုချိုးလျက် ဟင်းအိုး၌ချက်သောသားတစ်၊ အိုးကင်း၌ပြုတ်သောအမဲသားကိုပြုသကဲ့သို့ အရိုးအသားကိုစဉ်း” ကြ၏။—မိက္ခာ ၃:၁-၃။
၃ ထိုခေါင်းဆောင်များသည် ဆင်းရဲသားများ၊ ခိုကိုးရာမဲ့နေသူများကို ဖိနှိပ်နေကြသည်! ဤတွင် မိက္ခာအသုံးပြုပြောဆိုသော ပုံဆောင်စကားများကို ကြားနာသူတို့သည် အလွယ်တကူသဘောပေါက်ကြသည်။ သိုးတစ်ကောင်ကိုသတ်ပြီး စားဖို့ပြုတ်သည့်အခါ ပထမဦးစွာ အရေခွံဆုတ်ရသည်၊ ထို့နောက် အဆစ်များမှ ခုတ်ထစ်ရသည်။ တစ်ခါတစ်ရံ ခြင်ဆီထုတ်ရန် အရိုးများကို ခုတ်ပိုင်းရ၏။ ၎င်းနောက် မိက္ခာဖော်ပြသည့်အတိုင်း အိုးကင်းကြီးတွင် အသားနှင့်အရိုးတို့ကိုရောပြီး ထည့်ပြုတ်လေ့ရှိသည်။ (ယေဇကျေလ ၂၄:၃-၅၊ ၁၀) ဆိုးညစ်သောခေါင်းဆောင်များ၏ လက်ခုပ်ထဲတွင် မတရားစွာခံနေရသည့် မိက္ခာခေတ်ရှိလူတို့အတွက် လျော်ကန်လှသည့် ပုံဥပမာပင်!
ယေဟောဝါသည် ကျွန်ုပ်တို့ကို တရားမျှတစေလို
၄။ ယေဟောဝါနှင့် ဣသရေလခေါင်းဆောင်များစပ်ကြား အဘယ်ကွဲပြားခြားနားချက်ရှိသနည်း။
၄ ဣသရေလခေါင်းဆောင်များသည် မေတ္တာရှင်သိုးထိန်းယေဟောဝါနှင့် လုံးဝမတူပါ။ သူတို့သည် တရားမျှတမှုကို မကျင့်သုံးသောကြောင့် သိုးအုပ်အား ကာကွယ်ပေးရမည့်တာဝန်ကို မထမ်းဆောင်ခဲ့ကြပေ။ ထိုသို့ပြုမည့်အစား၊ မိက္ခာ ၃:၁၀ တွင်ဖော်ပြသည့်အတိုင်း သူတို့သည် ကိုယ်ကျိုးအတွက် ပုံဆောင်သိုးတို့ကို အမြတ်ထုတ်၍ “လူအသက်ကိုသတ်” နေကြသည်။ ဤအခြေအနေမှ ကျွန်ုပ်တို့ အဘယ်သင်ခန်းစာရနိုင်သနည်း။
၅။ ယေဟောဝါသည် မိမိလူမျိုးကို ဦးဆောင်နေသူများအား မည်သို့ဖြစ်စေလိုသနည်း။
၅ ဘုရားသခင်သည် မိမိ၏လူမျိုးတော်ကို ဦးဆောင်နေသူများအား တရားမျှတစေလိုသည်။ ယနေ့ ယေဟောဝါ၏ကျေးကျွန်များသည် ထိုသို့အမှန်ပင်ပြုလုပ်နေကြ၏။ ထိုသို့ပြုလုပ်ခြင်းသည် ဟေရှာယ ၃၂:၁ နှင့်ကိုက်ညီပြီး ထိုတွင် ဤသို့ဖတ်ရသည်– “ကြည့်ရှုလော့။ တရားသဖြင့် အုပ်စိုးသောရှင်ဘုရင်တစ်ပါး ပေါ်ထွန်းတော်မူလိမ့်မည်။ မင်းသားမှူးမတ်တို့သည် တရားသဖြင့် စီရင်ကြလိမ့်မည်။” သို့သော်လည်း မိက္ခာခေတ်တွင် အဘယ်အရာကို ကျွန်ုပ်တို့တွေ့ရသနည်း။ “[ကောင်းမှု]ကိုမုန်း၍ [မကောင်းမှု]ကိုနှစ်သက်” သူများသည် တရားမျှတမှုကို ဖောက်လွဲဖောက်ပြန်ပြုလုပ်နေကြ၏။
မည်သူ၏ဆုတောင်းချက်များကို ဖြေကြားသနည်း
၆၊ ၇။ မိက္ခာ ၃:၄ တွင်အဘယ်အရေးပါသောအချက် ပေါ်လွင်ထင်ရှားသနည်း။
၆ မိက္ခာနှင့်တစ်ခေတ်တည်းသား ဆိုးညစ်သူများသည် ယေဟောဝါ၏မျက်နှာသာကို မျှော်လင့်နိုင်သလော။ လုံးဝမမျှော်လင့်နိုင်ပါ! မိက္ခာ ၃:၄ တွင်ဤသို့ဖော်ပြ၏– “သင်တို့သည် ထာဝရဘုရား[သခင်]ကို အော်ဟစ်ကြသော်လည်း နားထောင်တော်မမူ။ [မကောင်းမှု]ကိုပြုကြသည်နှင့်အညီ ထိုကာလ၌ မျက်နှာတော်ကို လွှဲတော်မူလိမ့်မည်။” ယင်းသည် အလွန်အရေးပါသောအချက်တစ်ချက်ကို ပေါ်လွင်စေသည်။
၇ ကျွန်ုပ်တို့သည် အပြစ်ပြုနေကြမည်ဆိုလျှင် ကျွန်ုပ်တို့၏ဆုတောင်းချက်များကို ယေဟောဝါ ဖြေကြားပေးလိမ့်မည်မဟုတ်ပေ။ အပြစ်များကို ဝှက်ထားပြီး ဘုရားသခင်ကို သစ္စာရှိပုံဖမ်း၍ ဟန်ဆောင်အမှုထမ်းကာ နှစ်ဘဝစံနေမည်ဆိုလျှင် ဆုတောင်းချက်များ နားညောင်းခံရမည်မဟုတ်ပါ။ ဆာလံ ၂၆:၄ အရ ဒါဝိဒ်ပင် ဤသို့သီဆိုခဲ့သည်– “လျှပ်ပေါ်သောလူတို့နှင့် အတူမထိုင်ပါ။ လျှို့ဝှက်သောလူစုထဲသို့ မဝင်ပါ။” ယေဟောဝါသည် မိမိ၏စကားကို တမင်တကာချိုးဖောက်သူများ၏ ဆုတောင်းချက်များကိုလည်း နားညောင်းလိမ့်မည်မဟုတ်ချေ!
ဘုရားသခင်၏ဝိညာဉ်တော်ခံစားရ
၈။ မိက္ခာခေတ်မှ မှားယွင်းသောပရောဖက်များသည် မည်သို့သတိပေးခံခဲ့ရသနည်း။
၈ ဣသရေလလူမျိုးကို ဝိညာဉ်ရေးပိုင်း၌ ခေါင်းဆောင်နေသူများတွင် ဆိုးရွားလှသော အမူအကျင့်များ ပျံ့နှံ့နေ၏! ပရောဖက်အတုအယောင်များသည် ဘုရားသခင်၏လူမျိုးတော်ကို ဝိညာဉ်ရေးအရ လမ်းလွဲစေကြသည်။ အလိုကြီးသော ထိုခေါင်းဆောင်များသည် “ငြိမ်ဝပ်ခြင်း” ရှိ၏ဟု ကြွေးကြော်ကြသော်လည်း အမှန်တကယ်မူ မိမိတို့အား မလုပ်ကျွေးသောသူတို့ကို တိုက်ခိုက်နေကြသည်။ ထို့ကြောင့် ယေဟောဝါက “သင်တို့သည် [အဆင်းအာ]ရုံကိုမမြင်နိုင်မည်အကြောင်း ညအချိန်ရောက်လိမ့်မည်။ အနာဂတ်ကိုမဟောနိုင်မည်အကြောင်း မှောင်မိုက်ဖြစ်လိမ့်မည်။ ပရောဖက်တို့၌ နေဝင်လိမ့်မည်။ နေ့အချိန်၌ပင် မှောင်မိုက်ဖုံးလွှမ်းလိမ့်မည်။ ထိုအခါ ပရောဖက်တို့သည် ရှက်ကြောက်ကြလိမ့်မည်။ အနာဂတ်ကိုဟောသောသူတို့သည် စိတ်ပျက်ကြလိမ့်မည်။ . . . ထိုသူအပေါင်းတို့သည် မိမိတို့နှုတ် [“နှုတ်ခမ်းမွှေး၊” ကဘ] ကိုဖုံးထားကြလိမ့်မည်” ဟုမိန့်တော်မူ၏။—မိက္ခာ ၃:၅-၇။
၉၊ ၁၀။ “နှုတ်ခမ်းမွှေးကို ဖုံးထားခြင်း” အဓိပ္ပာယ်ကား အဘယ်နည်း၊ မိက္ခာသည် အဘယ်ကြောင့် ထိုသို့ပြုလုပ်စရာမလိုသနည်း။
၉ အဘယ်ကြောင့် “နှုတ်ခမ်းမွှေးကို ဖုံးထားကြ” ရသနည်း။ မိက္ခာခေတ်ရှိဆိုးညစ်သူများသည် ရှက်ကြောက်၍ ထိုသို့ပြုကြခြင်းဖြစ်၏။ ဤဆိုးညစ်သူများသည် အရှက်တရားရသင့်၏။ သူတို့ခေါ်သံကို “ဘုရားသခင်ထူးတော်မမူသောကြောင့်” ဖြစ်သည်။ (မိက္ခာ ၃:၇) ယေဟောဝါသည် မောက်မာဆိုးညစ်သူများ၏ ဆုတောင်းချက်များကို ဂရုမစိုက်ပေ။
၁၀ မိက္ခာမူကား “နှုတ်ခမ်းမွှေးကို ဖုံးထား” စရာအကြောင်းမရှိချေ။ သူ့တွင် ရှက်ကြောက်စရာအကြောင်းမရှိပေ။ သူ၏ဆုတောင်းချက်များကို ယေဟောဝါဖြေကြားပေးတော်မူ၏။ မိက္ခာ ၃:၈ တွင်တည်ကြည်သောပရောဖက်က ဤသို့ဆိုထားသည်ကို သတိပြုပါ– “ငါမူကား . . . ထာဝရဘုရား[သခင်]၏ဝိညာဉ်တော်အားဖြင့် အရှိန်တန်ခိုး၊ ဉာဏ်သတ္တိ၊ အစွမ်းသတ္တိနှင့်ပြည့်စုံ၏။” မိက္ခာသည် နှစ်ပေါင်းများစွာ သစ္စာရှိရှိအမှုထမ်းဆောင်ခဲ့သောအချိန်အတွင်း အစဉ်အမြဲပင် “ထာဝရဘုရား[သခင်]၏ဝိညာဉ်တော်အားဖြင့် အရှိန်တန်ခိုး . . . နှင့်ပြည့်စုံ” ခဲ့သည့်အတွက် သူ့အနေနှင့် တကယ့်ကိုကျေးဇူးတင်စရာဖြစ်သည်! ယင်းကြောင့် သူသည် “ယာကုပ်အမျိုးလွန်ကျူးခြင်း၊ ဣသရေလအမျိုးပြစ်မှားခြင်းကို သူတို့အား ဖော်ပြနိုင်” ရန် ခွန်အားရှိခဲ့ခြင်းဖြစ်သည်။
၁၁။ လူတို့သည် ဘုရားသခင်၏သတင်းတရားကို ကြေညာရန် မည်သို့ခွန်အားရရှိသနည်း။
၁၁ မိက္ခာသည် ဘုရားသခင်၏တရားစီရင်ခြင်းသတင်းကို ကြေညာရန် လူ့ခွန်အားထက်မက လိုအပ်နေသည်။ ယေဟောဝါ၏ဝိညာဉ်တော် သို့မဟုတ် တက်ကြွလှုပ်ရှားသောစွမ်းအားသည် မရှိမဖြစ်အရေးပါသည်။ ကျွန်ုပ်တို့ကော အသို့နည်း။ သန့်ရှင်းသောဝိညာဉ်တော်အားဖြင့် ကျွန်ုပ်တို့ကို ယေဟောဝါခွန်အားပေးမှသာလျှင် ကျွန်ုပ်တို့၏ဟောပြောခြင်းတာဝန်ကို ကျေပွန်နိုင်မည်ဖြစ်သည်။ ကျွန်ုပ်တို့သည် တမင်တကာအပြစ်ပြုကျင့်နေကြမည်ဆိုလျှင် ကြိုးစားဟောပြောသော်လည်း အောင်မြင်မည်မဟုတ်ပေ။ သို့ဖြစ်လျှင် ဤလုပ်ငန်းကိုလုပ်ကိုင်နိုင်ဖို့ ခွန်အားပေးပါဟု ဆုတောင်းသည့်အခါ ဘုရားသခင်ဖြေကြားပေးမည်မဟုတ်ချေ။ ကျွန်ုပ်တို့သည် ‘ထာဝရဘုရားသခင်၏ဝိညာဉ်တော်’ မခံစားရလျှင် ကောင်းကင်ခမည်းတော်၏ တရားစီရင်ရာသတင်းတရားကို ကြေညာနိုင်မည်မဟုတ်ပါ။ နားညောင်းခံရသည့် ဆုတောင်းချက်များနှင့် သန့်ရှင်းသောဝိညာဉ်တော်အကူအညီအားဖြင့် ဘုရားသခင်၏စကားတော်ကို မိက္ခာကဲ့သို့ ကျွန်ုပ်တို့ရဲရင့်စွာ ပြောဟောနိုင်ကြသည်။
၁၂။ ယေရှု၏ကနဦးတပည့်များသည် အဘယ်ကြောင့် ‘ဘုရားသခင်၏နှုတ်မြွက်တရားတော်ကို ရဲရင့်စွာဟောပြော’ နိုင်ခဲ့ကြသနည်း။
၁၂ တမန်တော် ၄:၂၃-၃၁ ပါမှတ်တမ်းကို သင်မှတ်မိကောင်းမှတ်မိပေမည်။ သင်သည် ပထမရာစုရှိ ယေရှု၏တပည့်တစ်ဦးဖြစ်သည်ဆိုပါစို့။ တစ်ယူသန်နှိပ်စက်ညှဉ်းပန်းသူများသည် ခရစ်တော်၏နောက်လိုက်များ နှုတ်ဆိတ်သွားစေရန် ကြိုးစားနေကြသည်။ သို့သော် အဆိုပါတည်ကြည်သူများက “အိုထာဝရဘုရား[သခင်]၊ ယခုအခါ ထိုသူတို့၏ခြိမ်းခြောက်ခြင်းကို မှတ်တော်မူပါ။ . . . ကိုယ်တော်၏ကျွန်တို့သည် နှုတ်[မြွက်]တရားတော်ကို ရဲရင့်စွာဟောပြောပါမည်အကြောင်း ကယ်မသနားတော်မူပါ” ဟုသူတို့၏ပိုင်သအုပ်စိုးရှင်ထံ အသနားခံဆုတောင်းခဲ့ကြသည်။ ရလဒ်ကားအဘယ်နည်း။ သူတို့တိုးလျှိုးအသနားခံပြီးသည်နှင့် စုဝေးရာအရပ်သည် တုန်လှုပ်၍ ထိုသူအပေါင်းတို့သည် သန့်ရှင်းသောဝိညာဉ်တော်နှင့်ပြည့်သဖြင့် ဘုရားသခင့်စကားတော်ကို ရဲရင့်စွာဟောပြောနိုင်ကြ၏။ သို့ဖြစ်၍ ကျွန်ုပ်တို့၏ခရစ်ယာန်ဓမ္မအမှုကို ထမ်းဆောင်သောအခါ ယေဟောဝါထံ ဆုတောင်းပြီး သန့်ရှင်းသောဝိညာဉ်တော်အကူအညီရဖို့ မျှော်ကိုးပါလေ။
၁၃။ ယေရုရှလင်မြို့နှင့် ရှမာရိမြို့တို့ မည်သို့ဖြစ်သွားမည်နည်း၊ အဘယ်ကြောင့်နည်း။
၁၃ မိက္ခာခေတ်ကို ပြန်သုံးသပ်ကြည့်ပါ။ မိက္ခာ ၃:၉-၁၂ အရ သွေးပြစ်ရှိသောမင်းတို့သည် တံစိုးလက်ဆောင်ရရန် တရားစီရင်ကြ၏၊ ယဇ်ပုရောဟိတ်တို့သည် အခရမှ သွန်သင်ပေးကြ၏၊ ပရောဖက်အတုအယောင်တို့သည် ငွေရဖို့ အနာဂတ်ကို ဟောတတ်ကြ၏။ ထို့ကြောင့် ယုဒပြည်၏မြို့တော် ယေရုရှလင်မြို့သည် “မြေပုံများဖြစ်လိမ့်မည်” ဟုဘုရားသခင်ကြေညာခဲ့ခြင်းသည် အံ့ဩစရာမဟုတ်ချေ။ ဣသရေလပြည်တွင်လည်း မှားယွင်းသောဝတ်ပြုရေးနှင့် အကျင့်ယိုယွင်းမှုတို့ကို အနှံ့အပြားတွေ့ရှိရသောကြောင့် ဘုရားသခင်သည် ရှမာရိမြို့ကို “မြေပုံ” ဖြစ်စေမည်ဟု သတိပေးရန် မိက္ခာကို လှုံ့ဆော်ပေးခဲ့ခြင်းဖြစ်သည်။ (မိက္ခာ ၁:၆) ကြိုဟောထားသည့်အတိုင်း ဘီ.စီ.အီး. ၇၄၀ ပြည့်နှစ်တွင် အာရှုရိစစ်တပ်ဖြင့် ရှမာရိပြည်ဖျက်ဆီးခံရခြင်းကို ထိုပရောဖက် မြင်တွေ့ခဲ့ရသည်။ (၄ ဓမ္မရာဇဝင် ၁၇:၅၊ ၆; ၂၅:၁-၂၁) ယေရုရှလင်မြို့နှင့် ရှမာရိမြို့တို့ဖျက်ဆီးခံရမည်ဟူသော ဤသတင်းစကားများကို ယေဟောဝါပေးသနားသော ခွန်အားဖြင့်သာ မြွက်ဆိုနိုင်မည်ဖြစ်ကြောင်း ထင်ရှား၏။
၁၄။ မိက္ခာ ၃:၁၂ တွင်မှတ်တမ်းတင်ထားသော ပရောဖက်ပြုချက်သည် မည်သို့ပြည့်စုံခဲ့ပြီး ၎င်းက ကျွန်ုပ်တို့နှင့် မည်သို့သက်ဆိုင်စေသင့်သနည်း။
၁၄ ယုဒနိုင်ငံသည် ယေဟောဝါ၏တရားစီရင်မှုမှ အမှန်ပင် လွတ်မြောက်နိုင်မည်မဟုတ်ချေ။ မိက္ခာ ၃:၁၂ တွင်မှတ်တမ်းတင်ထားသည့် ပရောဖက်ပြုချက်ပြည့်စုံချက်အနေနှင့် ဇိအုန်တောင်သည် “လယ်ကဲ့သို့ထွန်ခြင်းကို” ခံရလိမ့်မည်။ ကျွန်ုပ်တို့၏ ၂၁ ရာစုအမြင်မှကြည့်လျှင် ယင်းအရာများသည် ဘီ.စီ.အီး. ၆၀၇ ခုနှစ်တွင် ယုဒပြည်နှင့်ယေရုရှလင်မြို့ကို ဗာဗုလုန်လူမျိုး ဖျက်ဆီးခဲ့စဉ်က ဖြစ်ပျက်ခဲ့ကြောင်းကို ကျွန်ုပ်တို့သိထားကြသည်။ ထိုအမှုသည် မိက္ခာပရောဖက်ပြုပြီးနောက် နှစ်ပေါင်းများစွာကြာပြီးမှ ဖြစ်ပျက်ခဲ့၏၊ သို့သော် ထိုသို့ဖြစ်ပျက်လိမ့်မည်ကို သူယုံကြည်စိတ်ချခဲ့၏။ ဤဆိုးညစ်သောလက်ရှိအစီအစဉ်စနစ်သည်လည်း ကြိုဟောထားသော ‘ယေဟောဝါ၏နေ့ကြီး” တွင်အဆုံးတိုင်လိမ့်မည်ကို ကျွန်ုပ်တို့လည်း အလားတူပင် ယုံကြည်စိတ်ချသင့်သည်။—၂ ပေတရု ၃:၁၁၊ ၁၂။
ယေဟောဝါသည် ကိစ္စရပ်များကို တည့်မတ်ပေး
၁၅။ မိက္ခာ ၄:၁-၄ တွင်မှတ်တမ်းတင်ထားသော ပရောဖက်ပြုချက်ကို သင့်စကားဖြင့် မည်သို့ဖော်ပြမည်နည်း။
၁၅ နောက်ကြောင်းပြန်ကြည့်လိုက်သောအခါ မိက္ခာသည် စိတ်လှုပ်ရှားဖွယ် မျှော်လင့်ချက်ပေးသည့် နောက်ထပ်သတင်းတစ်ခုကို ဟောခဲ့ကြောင်းတွေ့ရှိရသည်။ မိက္ခာ ၄:၁-၄ ပါစကားများသည် တကယ့်ကိုအားရှိစရာပါတကား! မိက္ခာပြောခဲ့သည့်စကားတွင် ဤအကြောင်းပါသည်– “နောက်ဆုံးသောကာလ၌ ထာဝရဘုရား[သခင်]၏အိမ်တော်တည်သောတောင်သည် တောင်ကြီးတောင်ငယ်တို့၏ထိပ်ပေါ်မှာ ချီးမြှောက်၍ တည်လိမ့်မည်။ ခပ်သိမ်းသောလူစုတို့သည် ထိုတောင်သို့ စည်းဝေးကြလိမ့်မည်။ . . . ထာဝရဘုရား[သခင်]သည် များပြားသောလူတို့တွင် တရားစီရင်၍ ဝေးစွာနေလျက် အားကြီးသောလူမျိုးတို့ကို ဆုံးမတော်မူသဖြင့် သူတို့ဓားလက်နက်များကို ထွန်သွားဖြစ်စေခြင်းငှာလည်းကောင်း၊ လှံများကို တံစဉ်ဖြစ်စေခြင်းငှာလည်းကောင်း ထုလုပ်ကြလိမ့်မည်။ တစ်ပြည်ကိုတစ်ပြည်စစ်မတိုက်၊ စစ်အတတ်ကိုလည်း နောက်တစ်ဖန်မသင်ရကြ။ လူအပေါင်းတို့သည် ကိုယ်ပိုင်သော စပျစ်ပင်၊ ကိုယ်ပိုင်သော သင်္ဘောသဖန်းပင်အောက်မှာ ထိုင်ကြလိမ့်မည်။ ကြောက်စေသောသူ တစ်ယောက်မျှမရှိရ။ ကောင်းကင်ဗိုလ်ခြေအရှင် ထာဝရဘုရား[သခင်]၏ နှုတ်တော်ထွက်အမိန့်တော်ရှိ၏။”
၁၆၊ ၁၇။ မိက္ခာ ၄:၁-၄ သည် ယနေ့ မည်သို့ပြည့်စုံနေသနည်း။
၁၆ ဤတွင်ဖော်ပြထားသော “များပြားသောလူတို့” နှင့် “အားကြီးသောလူမျိုးတို့” ကားမည်သူများနည်း။ သူတို့သည် ဤလောကရှိလူမျိုးများနှင့် အစိုးရများမဟုတ်ချေ။ ၎င်းအစား၊ ဤပရောဖက်ပြုချက်သည် ယေဟောဝါ၏စစ်မှန်သောဝတ်ပြုရေးတောင်တွင် မြင့်မြတ်သောလုပ်ငန်းတော်ကို စည်းလုံးစွာထမ်းဆောင်ကြသည့် လူအမျိုးအနွယ်ခပ်သိမ်းမှ လူများကိုဆိုလို၏။
၁၇ မိက္ခာ၏ပရောဖက်ပြုချက်အတိုင်း မကြာမီ ကမ္ဘာတစ်ဝန်းတွင် ယေဟောဝါကို စင်ကြယ်စွာ အပြည့်အဝသဘောဖြင့် ဝတ်ပြုကြတော့မည်။ ယနေ့ “ထာဝရအသက်ကို တလိုတလားရှိ” သူများအား ယေဟောဝါ၏နည်းလမ်းတော်များကို သွန်သင်ပေးလျက်ရှိ၏။ (တမန်တော် ၁၃:၄၈၊ ကဘ) ဘုရားသခင်၏နိုင်ငံတော်ဘက် ရပ်တည်သော ယုံကြည်သူများအတွက် ယေဟောဝါသည် ဝိညာဉ်ရေးအရ တရားစီရင်ကာ ကိစ္စရပ်များကို တည့်မတ်ပေးနေ၏။ သူတို့သည် “လူအုပ်ကြီး” တွင်ပါဝင်သူများအနေနှင့် ‘ကြီးစွာသောဆင်းရဲခြင်း’ ကိုကပ်ကျော်ကြလိမ့်မည်။ (ဗျာ. ၇:၉၊ ၁၄) သူတို့သည် ဓားလက်နက်များကို ထွန်သွားအဖြစ် ထုလုပ်ခဲ့ကြသည့်အတွက် ယခုပင် ယေဟောဝါသက်သေ အချင်းချင်းနှင့်လည်းကောင်း၊ တခြားသူများနှင့်လည်းကောင်း အေးချမ်းငြိမ်သက်စွာ နေထိုင်ကြသည်။ ထိုသူတို့တွင်ပါဝင်ရခြင်းသည် အားရနှစ်သက်စရာပါတကား!
ယေဟောဝါ၏နာမတော်၌ လျှောက်လှမ်းရန် သန္နိဋ္ဌာန်ချထား
၁၈။ ‘ကိုယ်ပိုင်စပျစ်ပင်နှင့် သင်္ဘောသဖန်းပင်အောက်တွင် ထိုင်နေခြင်း’ သည်အဘယ်အရာကို ပုံဆောင်သနည်း။
၁၈ ကြောက်စိတ်သည် မှုန်မှိုင်းအုံ့ဆိုင်းနေသော တိမ်တိုက်ကြီးသဖွယ် ဤကမ္ဘာကိုဖုံးလွှမ်းနေသည့် ကျွန်ုပ်တို့ခေတ်တွင် ယေဟောဝါ၏နည်းလမ်းတော်များကို လူများစွာသင်ယူနေကြသောကြောင့် ပီတိဖြစ်မိကြသည်။ ဘုရားသခင်ကိုချစ်မြတ်နိုးသူအားလုံး စစ်အတတ်ကို မသင်တော့ဘဲ ကိုယ့်စပျစ်ပင်၊ ကိုယ့်သင်္ဘောသဖန်းပင်အောက်တွင် ထိုင်နိုင်မည့် လက်တစ်ကမ်းသာလိုတော့သည့်အချိန်ကို ကျွန်ုပ်တို့တမ်းတနေကြသည်။ သင်္ဘောသဖန်းပင်များကို စပျစ်ဥယျာဉ်များတွင် စိုက်ပျိုးလေ့ရှိ၏။ (လုကာ ၁၃:၆) ကိုယ်ပိုင်စပျစ်ပင်၊ သင်္ဘောသဖန်းပင်အောက် ထိုင်နေခြင်းသည် ငြိမ်သက်မှု၊ သာယာဝပြောမှုနှင့် လုံခြုံမှုရှိခြင်းတို့ကို ပုံဆောင်သည်။ ယခုပင်လျှင် ယေဟောဝါနှင့် ကျွန်ုပ်တို့၏ဆက်ဆံရေးက စိတ်ငြိမ်သက်မှုနှင့် ဝိညာဉ်ရေးလုံခြုံမှုရှိစေ၏။ ယင်းသို့သောအခြေအနေများသည် ဘုရားသခင့်နိုင်ငံတော်အုပ်ချုပ်မှုအောက် တည်ရှိသည့်အခါ ကျွန်ုပ်တို့သည် မကြောက်တော့ဘဲ လုံးဝလုံခြုံနေပေလိမ့်မည်။
၁၉။ ယေဟောဝါ၏နာမတော်၌ လျှောက်လှမ်းခြင်းဟူသည် အဘယ်အဓိပ္ပာယ်ရှိသနည်း။
၁၉ ဘုရားသခင်၏မျက်နှာသာနှင့် ကောင်းချီးတို့ကိုခံစားရရန် ကျွန်ုပ်တို့သည် ယေဟောဝါ၏နာမတော်၌ လျှောက်လှမ်းကြရမည်။ ယင်းကို မိက္ခာ ၄:၅ [သမ္မာ] တွင် ပရောဖက်က ဤသို့ထိရောက်စွာဖော်ပြထားသည်– “လူမျိုးအပေါင်းတို့သည် ကိုယ်ဆိုင်သောဘုရား[သခင်]၏နာမကို အမှီပြုလျက် လိုက်လျှောက်ကြ၏။ ငါတို့မူကား ကိုယ်ဆိုင်သောဘုရားသခင် ထာဝရဘုရား[သခင်]၏နာမတော်ကို အမှီပြုလျက် ကာလအစဉ်အမြဲ လိုက်လျှောက်ကြမည်။” ယေဟောဝါ၏နာမတော်၌ လျှောက်လှမ်းခြင်းက ကိုယ်တော်သည် ကျွန်ုပ်တို့၏ဘုရားသခင်ဖြစ်သည်ဟု ပြောဆိုရုံမျှကိုသာ မဆိုလိုချေ။ ခရစ်ယာန်အစည်းအဝေးများကို တက်ရောက်ပြီး ဘုရားသခင့်နိုင်ငံတော်သတင်း ဟောပြောခြင်းလုပ်ငန်းတွင် ပါဝင်ခြင်းတို့သည် အရေးကြီးသည်မှန်သော်လည်း ဤလုပ်ဆောင်မှုများထက်မက လိုအပ်သည်။ ယေဟောဝါ၏နာမတော်၌ ကျွန်ုပ်တို့လျှောက်လှမ်းနေလျှင် ကိုယ်တော့်ထံ ဆက်ကပ်အပ်နှံပြီး ကိုယ်တော်၏အမှုတော်ကို စိုးလ်အကြွင်းမဲ့ တည်ကြည်စွာ ထမ်းဆောင်ရန် ကြိုးစားနေပေမည်။ (မဿဲ ၂၂:၃၇) ထို့ပြင် ကိုယ်တော့်အား ဝတ်ပြုကိုးကွယ်သူများအနေနှင့် ကျွန်ုပ်တို့၏ဘုရားသခင် ယေဟောဝါ၏နာမတော်၌ ထာဝစဉ်လျှောက်လှမ်းရန် ကျွန်ုပ်တို့ သန္နိဋ္ဌာန်ချထားကြသည်။
၂၀။ မိက္ခာ ၄:၆-၁၃ တွင်အဘယ်အကြောင်းကို ကြိုဟောခဲ့သနည်း။
၂၀ ယခု မိက္ခာ ၄:၆-၁၃ ပါပရောဖက်ပြုချက်စကားများကို ကျေးဇူးပြု၍ ဆင်ခြင်သုံးသပ်ကြည့်ပါ။ “ဇိအုန်သတို့သမီး” သည် “ဗာဗုလုန်မြို့တိုင်အောင်” ပြည်နှင်ဒဏ်ခံရမည်။ ဘီ.စီ.အီး. သတ္တမရာစုနှစ်တွင် ယေရုရှလင်မြို့သားများအပေါ် ထိုအတိုင်းပင် အတိအကျဖြစ်ပျက်ခဲ့၏။ ထို့ပြင် အကြွင်းအကျန်သည် ယုဒနိုင်ငံသို့ပြန်လာရန်ဖြစ်ပြီး ဇိအုန်မြို့ကို ပြန်တည်ထောင်သည့်အခါ သူ၏ရန်သူများကို ယေဟောဝါချေမှုန်းပစ်မည်ဟု မိက္ခာပရောဖက်ပြုချက်က ဖော်ပြသည်။
၂၁၊ ၂၂။ မိက္ခာ ၅:၂ သည်မည်သို့ပြည့်စုံခဲ့သနည်း။
၂၁ အခြားထူးခြားသော အဖြစ်အပျက်များကို မိက္ခာကျမ်းအခန်းကြီး ၅ တွင်ကြိုဟောထား၏။ ဥပမာ၊ မိက္ခာ ၅:၂-၄ တွင်ပြောဆိုထားရာကို သတိပြုပါ။ ဘုရားသခင်ခန့်အပ်ထားသော “ရှေးကပ်ကမ္ဘာမှစ၍ ပေါ်ထွန်းသော” ရှင်ဘုရင်တစ်ပါးသည် ဗက်လင်မြို့မှ ပေါ်ထွက်လာမည်ဟု မိက္ခာ ပရောဖက်ပြုခဲ့သည်။ ကိုယ်တော်သည် သိုးထိန်းတစ်ပါးအဖြစ် ‘ထာဝရဘုရားသခင်၏အစွမ်းသတ္တိ’ ဖြင့်အုပ်ချုပ်လိမ့်မည်။ ထို့ပြင် ဤအုပ်စိုးရှင်သည် ဣသရေလလူမျိုးကိုသာမဟုတ်ဘဲ “မြေကြီးစွန်းတိုင်အောင်” အုပ်ချုပ်လိမ့်မည်။ ကိုယ်တော်မည်သူမည်ဝါဖြစ်ကြောင်းကို လောကသားအများစုက နားမလည်နိုင်ကြသော်လည်း ကျွန်ုပ်တို့အတွက် နက်နဲရာမဟုတ်ချေ။
၂၂ ဗက်လင်မြို့တွင် မွေးဖွားခဲ့သူမှန်သမျှတွင် အရေးပါဆုံး ပုဂ္ဂိုလ်ကား အဘယ်သူနည်း။ “မြေကြီးစွန်းတိုင်အောင် အစိုးရ” မည့်သူကား အဘယ်သူနည်း။ မေရှိယ၊ ယေရှုခရစ်မှလွဲ၍ မရှိတော့ပြီ! ဟေရုဒ်မင်းကြီးသည် ယဇ်ပုရောဟိတ်အကြီးများနှင့် ကျမ်းပြုဆရာများကို မေရှိယမွေးဖွားမည့်နေရာကို မေးသောအခါ သူတို့က “ယုဒပြည် ဗက်လင်မြို့” ဟုဖြေကြားခဲ့သည်။ မိက္ခာ ၅:၂ ပါစကားများကို သူတို့ကိုးကားနေခြင်းပင်ဖြစ်သည်။ (မဿဲ ၂:၃-၆) ယောဟန် ၇:၄၂ ကဖော်ပြသည့်အတိုင်း ယင်းကိုသိထားကြသော သာမန်လူတန်းစားအချို့လည်း ဤသို့ဆိုသည်– “ခရစ်တော်သည် ဒါဝိဒ်အမျိုး၊ ဒါဝိဒ်နေရာဌာန၊ ဗက်လင်ရွာသားဖြစ်ရမည်ဟု ကျမ်းစာလာသည်မဟုတ်လောဟုဆိုကြ၏။”
လူသားများအတွက် စစ်မှန်သောလန်းဆန်းမှု
၂၃။ မိက္ခာ ၅:၇ ပြည့်စုံချက်အနေနှင့် ယခု အဘယ်အရာဖြစ်ပျက်နေသနည်း။
၂၃ တဒင်္ဂသာအောင်ပွဲခံမည့် အာရှုရိကျူးကျော်ဝင်ရောက်မှုနှင့် နာခံမှုမရှိသောလူမျိုးကို ဘုရားသခင်လက်စားချေမည်အကြောင်း မိက္ခာ ၅:၅-၁၅ တွင်ဖော်ပြထားသည်။ မိက္ခာ ၅:၇ တွင်နောင်တရဂျူးအကြွင်းအကျန်သည် သူတို့နိုင်ငံကို ပြန်လည်ထူထောင်လိမ့်မည်ဟု ကတိပြု၏၊ ယင်းသည် ကျွန်ုပ်တို့ခေတ်နှင့်လည်း သက်ဆိုင်၏။ မိက္ခာက ဤသို့ဆို၏– ‘ကျန်ကြွင်းသောယာကုပ်အမျိုးသားတို့သည် တစ်ပါးအမျိုးသားအများတို့တွင်နေ၍ ထာဝရဘုရားသခင်ပေးတော်မူသော နှင်းကဲ့သို့လည်းကောင်း၊ [“ဖောသီသော၊” ကဘ] မိုးရေကဲ့သို့လည်းကောင်း ဖြစ်ကြလိမ့်မည်။’ ဤကောင်းမြတ်လှသော ပုံဆောင်စကားကိုအသုံးပြု၍ ဝိညာဉ်ရေးယာကုပ် သို့မဟုတ် ဣသရေလအကြွင်းအကျန်သည် လူတို့အတွက် ဘုရားသခင့်ထံမှ ကောင်းချီးဖြစ်မည်ဟု ကြိုဟောခဲ့သည်။ မြေကြီးမျှော်လင့်ချက်ရှိကြသော ယေရှု၏ “အခြားသိုးတို့” သည် အခြားသူများကို ဝိညာဉ်ရေးအရ လန်းဆန်းမှုဖြစ်စေရန် မျက်မှောက်ခေတ် “ဘုရားသခင်၏ဣသရေလ” အကြွင်းအကျန်နှင့် ပခုံးချင်းယှဉ်၍ အမှုထမ်းဆောင်ရခြင်းကို အားရနှစ်သက်ကြ၏။ (ယောဟန် ၁၀:၁၆; ဂလာတိ ၆:၁၆; ဇေဖနိ ၃:၉) ယင်းနှင့်စပ်လျဉ်း၍ ဆင်ခြင်သုံးသပ်ရန် အရေးကြီးသောအချက်တစ်ချက်ရှိ၏။ ဘုရားသခင့်နိုင်ငံတော်ကြွေးကြော်သူများအနေနှင့် ကျွန်ုပ်တို့အားလုံးသည် အခြားသူတို့အား စစ်မှန်သောလန်းဆန်းမှုပေးခွင့်ရရှိခြင်းကို မြတ်နိုးသင့်သည်။
၂၄။ မိက္ခာကျမ်းအခန်းကြီး ၃ မှ ၅ တွင်ပါသည့် အဘယ်အချက်များက သင့်အား စွဲမှတ်စရာဖြစ်စေခဲ့သနည်း။
၂၄ မိက္ခာကျမ်းအခန်းကြီး ၃ မှ ၅ တွင်ပါသည့် ပရောဖက်ပြုချက်မှ သင်အဘယ်အရာသိရှိခဲ့ရသနည်း။ ဤအချက်များကို သိရှိခဲ့ရပေမည်– (၁) ဘုရားသခင်သည် မိမိ၏လူမျိုးတော်ကို ဦးဆောင်နေသူများအား တရားမျှတစေလိုသည်။ (၂) ကျွန်ုပ်တို့သည် တမင်တကာအပြစ်ပြုနေလျှင် ကျွန်ုပ်တို့၏ဆုတောင်းချက်များကို ယေဟောဝါနားညောင်းတော်မူမည်မဟုတ်ပေ။ (၃) ဘုရားသခင်၏သန့်ရှင်းသောဝိညာဉ်တော်အားဖြင့် ကျွန်ုပ်တို့ကို ကိုယ်တော်ခွန်အားပေးမှသာ ကျွန်ုပ်တို့၏ဟောပြောခြင်းလုပ်ငန်း ပြီးမြောက်အောင်မြင်လိမ့်မည်။ (၄) ဘုရားသခင်၏မျက်နှာသာရရန် ယေဟောဝါ၏နာမတော်၌ လျှောက်လှမ်းရမည်။ (၅) ဘုရားသခင့်နိုင်ငံတော်ကြွေးကြော်သူများအနေနှင့် ကျွန်ုပ်တို့သည် လူတို့ကို စစ်မှန်သောလန်းဆန်းမှုပေးခွင့်ရရှိခြင်းကို မြတ်နိုးသင့်သည်။ သင်စွဲမှတ်ထားသော အခြားအချက်များလည်း ရှိပေမည်။ ဤပရောဖက်ပြုချက်ဆိုင်ရာ ကျမ်းစာစောင်မှ နောက်ထပ်အဘယ်အရာကို သင်သိရှိနိုင်သေးသနည်း။ နောက်ဆောင်းပါးက ယုံကြည်ခြင်းခိုင်ခံ့စေသည့် မိက္ခာပရောဖက်ပြုချက်၏ နောက်ဆုံးအခန်းကြီးနှစ်ခန်းမှ လက်တွေ့ကျသင်ခန်းစာများ ရရှိစေပါလိမ့်မည်။
သင်မည်သို့ဖြေဆိုမည်နည်း
• မိမိ၏လူမျိုးတော်ကို ဦးဆောင်နေကြသူများထံမှ ဘုရားသခင် အဘယ်အရာမျှော်လင့်သနည်း။
• ယေဟောဝါ၏အမှုတော်ထမ်းဆောင်ခြင်းနှင့်စပ်လျဉ်း၍ ဆုတောင်းခြင်းနှင့် သန့်ရှင်းသောဝိညာဉ်တော်တို့သည် အဘယ်ကြောင့်အရေးကြီးသနည်း။
• လူတို့သည် မည်သို့ ‘ယေဟောဝါ၏နာမတော်၌ လျှောက်လှမ်း’ ကြသနည်း။
[လေ့လာရန်မေးခွန်းများ]
[စာမျက်နှာ ၁၅ ပါ ရုပ်ပုံ]
အိုးကင်းနှင့်ပတ်သက်သည့် မိက္ခာ၏ပုံဥပမာကို သင်ရှင်းပြနိုင်သလော
[စာမျက်နှာ ၁၆ ပါ ရုပ်ပုံ]
မိက္ခာနည်းတူ ကျွန်ုပ်တို့သည် မိမိတို့၏ခရစ်ယာန်ဓမ္မအမှုကို ရဲရင့်စွာလုပ်ဆောင်နေကြ