လျှို့ဝှက်ဆန်းကြယ်တဲ့အတတ် နောက်ကွယ်မှာ အမှန်တကယ် ဘယ်သူရှိသလဲ

ကျွန်တော်တို့ရဲ့ဖန်ဆင်းရှင်နဲ့ပတ်သက်ပြီး ကျမ်းစာက ခုလိုဆိုတယ်– “ဘုရားသခင်သည် အလင်းဖြစ်တော်မူ၏။ ကိုယ်တော်ထံ၌ မှောင်မိုက် လုံးဝမရှိ။” (၁ ယောဟန် ၁:၅) ဘုရားသခင်ဟာ ကောင်းတဲ့အရာအားလုံးရဲ့ရင်းမြစ်ဖြစ်ပြီး မကောင်းတာလုံးဝမလုပ်ဘူးလို့ ဆိုလိုနေခြင်းဖြစ်တယ်။ ဒါဆိုရင် ဆန်းကြယ်တဲ့အတတ်ရဲ့ နောက်ကွယ်ကစွမ်းအားဟာ စစ်မှန်တဲ့ဘုရားသခင်ဖြစ်နိုင်မလား။ ဒါမှမဟုတ် ဆိုးညစ်ယုတ်မာတဲ့အင်အားစု ပါဝင်ပတ်သက်နေမလား။

လျှို့ဝှက်ဆန်းကြယ်တဲ့ပညာရပ်တွေထဲမှာ နက္ခတ်ဗေဒင်၊ ကိန်းဂဏန်းဗေဒင်၊ လက္ခဏာဗေဒင်နဲ့ မှော်အတတ်အပြင် လူသေတွေနဲ့ဆက်သွယ်တယ်လို့ပြောတာတွေ၊ ပြုစားတာတွေပါဝင်တဲ့ ဂမ္ဘီရပညာနဲ့ နတ်ဝိဇ္ဇာအတတ်တွေ ထိပ်ဆုံးကပါဝင်တယ်။ ဒီပညာရပ်အများစုက ရှေးခေတ်ဗာဗုလုန်ကစတင်ခဲ့တဲ့အတွက် ရှည်လျားတဲ့သမိုင်းကြောင်းရှိတယ်၊ ဗာဗုလုန်မြို့ရဲ့အပျက်အယွင်းတွေက အီရတ်နိုင်ငံမှာရှိတယ်။ (ဟေရှာယ ၄၇:၁၊ ၁၂၊ ၁၃) လျှို့ဝှက်ဆန်းကြယ်တဲ့အတတ်ပညာဟာ ဗာဗုလုန်ကနေစပြီး ရှေးခေတ်ကမ္ဘာအနှံ့ပျံ့နှံ့ခဲ့တဲ့အပြင် ယဉ်ကျေးမှုတော်တော်များများနဲ့ လူ့အဖွဲ့အစည်းတွေမှာ နက်ရှိုင်းစွာအမြစ်တွယ်သွားတယ်။

ရှေးခေတ်မက်ဆီဒိုးနီးယားနိုင်ငံ၊ ဖိလိပ္ပိမြို့မှာဖြစ်ပျက်ခဲ့ရာကို သုံးသပ်ကြည့်ပါ။ အဲဒီမှာ တမန်တော်ပေါလုနဲ့ ဆရာဝန်လုကာပါဝင်တဲ့ ခရစ်ယာန်ဓမ္မအမှုဆောင်အုပ်စုငယ်က လျှို့ဝှက်ဆန်းကြယ်တဲ့စွမ်းအားပိုင်ဆိုင်ထားတဲ့ မိန်းကလေးတစ်ဦးနဲ့တွေ့ခဲ့တယ်။  သူ့စွမ်းအားနောက်ကွယ်ကရင်းမြစ်အကြောင်း ကျမ်းရေးသူလုကာ ဘာဖော်ပြခဲ့သလဲဆိုတာ သတိပြုကြည့်ပါ– “ဗေဒင်ဟောနိုင်သောနတ်ဝင်သည် အစေခံမလေးသည် ငါတို့ကို ဆီးကြိုလေ၏။ သူသည် ရှေ့ဖြစ်ဟော၍ မိမိသခင်တို့အတွက် စီးပွားများစွာ ဖြစ်စေတတ်၏။”—တမန်တော် ၁၆:၁၆-၁၈။

မှန်ပါတယ်၊ မိန်းကလေးရဲ့စွမ်းအားတွေက စစ်မှန်တဲ့ဘုရားသခင် ယေဟောဝါဆီကလာတာမဟုတ်ဘဲ ကောင်းကင်တမန်ဆိုးဆီက လာတာဖြစ်တယ်။ ဒါကြောင့် ပေါလုနဲ့အပေါင်းအဖော်တွေက သူ့စကားနားမထောင်ခဲ့ကြဘူး။ သင်အခု ဒီလိုမေးကောင်းမေးမယ်– “ကောင်းကင်တမန်ဆိုးတွေက ဘယ်သူတွေလဲ။ သူတို့ ဘယ်လိုလုပ် ဖြစ်ပေါ်လာသလဲ။” အခုလည်း ကျမ်းစာအဖြေကို ကြည့်ကြရအောင်။

ကောင်းကင်တမန်ဆိုးတွေက ဘယ်သူတွေလဲ

ယေဟောဝါက လူသားတွေကိုမဖန်ဆင်းခင် ကြာမြင့်စွာကတည်းက မရေတွက်နိုင်အောင်များပြားတဲ့ အသိဉာဏ်ရှိ ကောင်းကင်တမန်တွေကို ကောင်းကင်မှာ ဖန်ဆင်းခဲ့တယ်။ (ယောဘ ၃၈:၄၊ ၇) လူသားတွေလိုပဲ သူတို့မှာ လွတ်လပ်စွာရွေးချယ်ခွင့်ရှိပြီး အားလုံးဟာ အချိန်အတော်ကြာ ဘုရားသခင်အပေါ်သစ္စာရှိခဲ့တယ်။ ဒါပေမဲ့ ဒီပျော်စရာကောင်းတဲ့အခြေအနေဟာ ရုတ်တရက်အဆုံးသတ်သွားတယ်။ ဘယ်လိုနည်းနဲ့လဲ။

လူသားတွေကို ဘုရားသခင်ဖန်ဆင်းပြီးတဲ့နောက် ဝိညာဉ်သတ္တဝါတစ်ဦးက သူ မရထိုက်တဲ့အရာကို အငမ်းမရလိုချင်ခဲ့တယ်၊ အဲဒါက ဝတ်ပြုကိုးကွယ်ခံလိုခြင်းပဲ။ ကျွမ်းကျင်သူတစ်ဦးက ရုပ်သေးရုပ် စကားပြောသယောင်ဖန်တီးသလို ဒီဆိုးညစ်တဲ့ကောင်းကင်တမန်က မြွေစကားပြောသယောင်ဖန်တီးပြီး ပထမဆုံးမိန်းမဧဝကို သူ့ဖန်ဆင်းရှင်စကားနားမထောင်အောင် ဖြားယောင်းခဲ့တယ်။ (ကမ္ဘာဦး ၃:၁-၆) ဒီပုန်ကန်တဲ့ကောင်းကင်တမန်ကို ကျမ်းစာက “စာတန်ခေါ် မူလမြွေ” လို့ခေါ်ဆိုထားတယ်။ (ဗျာ. ၁၂:၉) ယေရှုက သူ့ကို “အမှန်တရား၌ မတည်မနေ” တဲ့ “လူ့အသက်ကို သတ်သောသူ” လို့ဖော်ပြပြီး ဒီလိုထပ်ပြောတယ်– ‘သူသည် မုသာစကားကိုပြောသောအခါ မိမိ၏စိတ်ရင်းအတိုင်းပြောတတ်၏။ အကြောင်းမူကား သူသည် မုသာကောင်ဖြစ်၏။ မုသာ၏အဖလည်းဖြစ်၏။’—ယောဟန် ၈:၄၄။

စစ်မှန်တဲ့ဘုရားသခင်ရဲ့ တခြားကောင်းကင်တမန်တွေလည်း နောက်ပိုင်း စာတန်နဲ့ပူးပေါင်းပြီး ပုန်ကန်ကြတယ်။ (ကမ္ဘာဦး ၆:၁၊ ၂) သူတို့ကိုနောက်ပိုင်းမှာ “ပြစ်မှားသောကောင်းကင်တမန်များ၊” “မိမိတို့၏မူလအခွင့်အရာကို မစောင့်ရုံမက မိမိတို့နေသင့်ရာအရပ် (ဒါမှမဟုတ် သူတို့နေရမယ့်နေရာဖြစ်တဲ့ ကောင်းကင်) ကို စွန့်ခွာသည့် ကောင်းကင်တမန်များ” ဆိုပြီးခေါ်ဆိုတယ်။ (၂ ပေတရု ၂:၄; ယုဒ ၆) နောက်ပိုင်းမှာ သူတို့ဟာ ကောင်းကင်တမန်ဆိုးတွေဆိုတဲ့နာမည်ရလာတယ်။ (ယာကုပ် ၂:၁၉) ဒီအပြင် ကျမ်းစာခေတ်က အစ္စရေးလူတွေကိုလုပ်ခဲ့သလို လူများနိုင်သမျှများများကို စစ်မှန်တဲ့ဝတ်ပြုရေးကနေ ဝေးသွားအောင်လုပ်ဖို့ သူတို့ဆုံးဖြတ်ထားကြတယ်။ (တရားဟောရာ ၃၂:၁၆၊ ၁၇) ရှေးခေတ်ကလိုပဲ ယနေ့အချိန်မှာလည်း စာတန်နဲ့သူ့နောက်လိုက်တွေဟာ ဘာသာရေးလိမ်လည်မှုကို ပါးနပ်စွာအသုံးပြုနေတယ်။—၂ ကောရိန္သု ၁၁:၁၄၊ ၁၅။

သင့်ကိုယ်သင် ကာကွယ်ပါ

ကောင်းကင်တမန်ဆိုးတွေဟာ လူတွေထက်တန်ခိုးကြီးပေမဲ့ သူတို့ကို ဘုရားသခင့်အကူအညီနဲ့ “ဆန့်ကျင်” ပြီးအနိုင်ယူနိုင်တယ်။ (၁ ပေတရု ၅:၉) ဒါပေမဲ့ အကူအညီရရှိနိုင်ဖို့ ဘုရားသခင့်တောင်းဆိုရာတွေကိုသင်ယူပြီး ကျင့်သုံးဖို့လိုတယ်။ တမန်တော်ပေါလုက သူ့ခေတ်ကခရစ်ယာန်တွေနဲ့ပတ်သက်ပြီး ခုလိုရေးခဲ့တယ်– “သင်တို့အတွက် မပြတ်ဆုတောင်းပေးပါ၏။ သင်တို့တွင် ဘုရားသခင်ထံမှရသော သိနားလည်မှု၊ ဉာဏ်ပညာအမျိုးမျိုးရှိ၍ ဘုရားသခင့် အလိုတော်နှင့်ဆိုင်သည့် တိကျမှန်ကန်သော အသိပညာ ပြည့်ဝစေရန် တောင်းလျှောက်ပေးပါ၏။ သို့ဖြင့် သင်တို့သည် ယေဟောဝါဘုရားသခင်၏ နှစ်သက်လက်ခံမှုကို အပြည့်အဝရရှိလျက် ကိုယ်တော်နှင့် ထိုက်တန်စွာ လျှောက်လှမ်းကြလိမ့်မည်။”—ကောလောသဲ ၁:၉၊ ၁၀။

ဒီ “တိကျမှန်ကန်သောအသိပညာ” ရတဲ့သူတွေထဲမှာ မှော်အတတ်လိုက်စားခဲ့တဲ့ ဧဖက်မြို့ကလူအတော်များများလည်းပါတယ်။ အမှန်တရားကိုသိရှိခြင်းက သူတို့အပေါ် ဘယ်လိုအကျိုးသက်ရောက်မှုရှိခဲ့သလဲဆိုတာ သတိပြုကြည့်ပါ။ ကျမ်းစာက ဒီလိုဖော်ပြတယ်– “မှော်အတတ်လိုက်စားသူ အများတို့သည်လည်း မိမိ တို့စာစောင်များကို ယူလာပြီးလျှင် လူအားလုံးရှေ့တွင် မီးရှို့လိုက်ကြ၏။” စကားမစပ်၊ ဒီစာအုပ်တွေရဲ့တန်ဖိုးက “ငွေအသပြာငါးသောင်း” ရှိတယ်၊ နည်းတဲ့ပမာဏမဟုတ်ဘူး။ (တမန်တော် ၁၉:၁၇-၁၉) ဒီအားရှိစေတဲ့နမူနာဟာ ကျွန်တော်တို့အကျိုးအတွက် ရေးသားထားတာဖြစ်တယ်။—၂ တိမောသေ ၃:၁၆။

ကာကွယ်ပေးတဲ့မူများ

ကောင်းကင်တမန်ဆိုးတွေရန်ကနေ ကိုယ့်ကိုယ်ကိုယ်ကာကွယ်ဖို့ ကျွန်တော်တို့ နောက်ထပ်လုပ်နိုင်ရာတွေရှိသေးတယ်။ ဒီကျမ်းစာလမ်းညွှန်ချက်တွေကို သုံးသပ်ကြည့်ပါ။

“ဘုရားသခင်ထံမှလာသည်ဟု ထင်ရသော သတင်းစကားတိုင်းကို မယုံကြနှင့်။ ဘုရားသခင်၏သတင်းစကား ဟုတ်မဟုတ်သိမြင်ခြင်းငှာ စစ်ဆေးကြလော့။” (၁ ယောဟန် ၄:၁) နက္ခတ်ဗေဒင်ဆရာ၊ အကြားအမြင်ရသူ၊ နတ်ကတော်နဲ့ ပယောဂဆရာတွေရဲ့ ဖော်ပြချက်တချို့ဟာ မှန်ကောင်းမှန်ပါလိမ့်မယ်။ ဥပမာ၊ ဖိလိပ္ပိမြို့က နတ်ဝင်သည်မိန်းကလေးက ပေါလုနဲ့ သူ့အပေါင်းအပါတွေအကြောင်း ဒီလိုမှန်ကန်စွာပြောခဲ့တယ်– “ဤသူတို့ကား ကယ်တင်ခြင်းလမ်းကို သင်တို့အား ဟောပြောသော အမြင့်ဆုံးဘုရားသခင်၏ ကျွန်များ ဖြစ်ကြသည်။” (တမန်တော် ၁၆:၁၇) ဒါပေမဲ့ ပေါလုနဲ့အပေါင်းအပါတွေက သူ့ကို အပေါင်းအသင်းဝင်အဖြစ် လက်မခံခဲ့ကြဘူး။ အဲဒီအစား သူ့ထဲက ကောင်းကင်တမန်ဆိုးထွက်သွားဖို့ ပေါလုအမိန့်ပေးခဲ့တယ်။ ဒါကြောင့် ဘာသာတရားတွေကဖော်ပြရာတွေကို ကျမ်းစာပြောရာနဲ့နှိုင်းယှဉ်စစ်ဆေးပါ။—တမန်တော် ၁၇:၁၁။

‘သို့ဖြစ်၍ ဘုရားသခင်ကို လက်အောက်ခံကြလော့။ စာတန်ကိုမူ ခုခံတွန်းလှန်ကြလော့။ သို့ပြုလျှင် သူသည် သင်တို့ထံမှ ထွက်သွားလိမ့်မည်။’ (ယာကုပ် ၄:၇) ကောင်းကင်တမန်ဆိုးတွေက ဘုရားသခင့်ရန်သူတွေဖြစ်ပြီး သင့်ရန်သူလည်းဖြစ်တယ်။ သူတို့ရဲ့ဆန်းကြယ်တဲ့နည်းတွေကို သိလိုစိတ်တောင် မရှိပါနဲ့။ အဲဒီအစား ဝန်ထုပ်ဝန်ပိုးမဖြစ်စေတဲ့ ဘုရားသခင့်မေတ္တာပါတောင်းဆိုချက်တွေကို ဂရုပြုလိုက်နာခြင်းဖြင့် ကိုယ်တော့်လက်အောက်ခံပါ။ (၁ ယောဟန် ၅:၃) ဥပမာ၊ ရှေးခေတ်အစ္စရေးလူတွေကို ဘုရားသခင် ဒီလိုပြောတယ်– ‘သင်တို့တွင် ဖြစ်လတ္တံ့သောအမှုကို ကိုယ်ဉာဏ်နှင့်ဟောပြောသောသူ၊ ကာလဗေဒင်ကိုကြည့်သောသူ၊ မကောင်းသောအတတ်ကိုပြုစုသောသူ၊ ပြုစားတတ်သောသူ၊ နတ်ဆိုးနှင့်ပေါင်းသောသူ၊ ဝိဇ္ဇာအတတ်ကိုပြုစုသောသူ၊ လူသေကိုမေးမြန်းသောသူ တစ်စုံတစ်ယောက်မျှမရှိရ။ ထိုသို့ပြုတတ်သောသူအပေါင်းတို့ကို ယေဟောဝါစက်ဆုပ်ရွံရှာတော်မူ၏။’ (တရားဟောရာ ၁၈:၁၀-၁၂) ဘုရားသခင့်ရှုမြင်ပုံ မပြောင်းလဲပါ။—ဂလာတိ ၅:၁၉၊ ၂၀။

“[ယေဟောဝါရဲ့ကျေးကျွန်တွေကို] ထူးဆန်းသောအတတ်အားဖြင့် မနိုင်ရာ။” (တောလည်ရာ ၂၃:၂၃) ဘုရားသခင့်စိတ်တော်နဲ့တွေ့လိုသူအားလုံး ကောင်းကင်တမန်ဆိုးတွေကို ကြောက်စရာမလိုပါ။ တကယ်တော့၊ နောက်ဆုံးမှာ ဘုရားသခင်ရဲ့မဟာတန်ခိုးတော်နဲ့ ဖျက်ဆီးခံရမယ်ဆိုတာသိထားလို့ ကောင်းကင်တမန်ဆိုးတွေဟာ ဘုရားသခင်ရှေ့ “ကြောက်ရွံ့တုန်လှုပ်” နေကြတယ်။ (ယာကုပ် ၂:၁၉) ဘုရားသခင်ဟာ ‘ပြည့်ဝစုံလင်သောနှလုံးရှိသူတို့ဘက်၌ ခိုင်ခံ့စွာနေ’ ပြီး ‘ဖြောင့်မတ်သောသူကို အစဉ်အမြဲလှုပ်ရှားစေမှာမဟုတ်ဘူး။’—၂ ရာဇဝင်ချုပ် ၁၆:၉; ဆာလံ ၅၅:၂၂။

“အသက်ရှင်သောသူသည် မိမိသေရမည်ကိုသိ၏။ သေသောသူမူကား အဘယ်အရာကိုမျှမသိ။” (ဒေ. ၉:၅) သေလွန်သူတွေဟာ အသက်မရှိ၊ မလှုပ်ရှားနိုင်တဲ့သူများသာဖြစ်တယ်လို့ ကျမ်းစာကသွန်သင်တယ်။ ဘယ်သူ့ကိုမှ ဒုက္ခမပေးနိုင်တော့လို့ သူတို့ကိုကြောက်စရာမလိုဘူး။ (ဟေရှာယ ၂၆:၁၄) ကောင်းကင်တမန်ဆိုးတွေက လူတွေကိုလှည့်စားဖို့ လူသေတွေရဲ့ ဝိညာဉ်အဖြစ် ဟန်ဆောင်ကြတယ်၊ ဒီအချက်က ကြင်နာတတ်တဲ့လူတစ်ဦးသေဆုံးသွားတဲ့အခါ သူရဲ့ဝိညာဉ်လို့ဆိုရာက လူတွေသိထားတဲ့ အသက်ရှင်စဉ်ကစရိုက်နဲ့ ဘာကြောင့်မတူတော့တာလည်းဆိုတာကို နားလည်စေနိုင်တယ်။

‘‘ယေဟောဝါဘုရားသခင်၏စားပွဲ’ နှင့် ကောင်းကင်တမန်ဆိုးတို့၏စားပွဲ နှစ်မျိုးလုံးတွင် သင်တို့ မသုံးဆောင်နိုင်ကြ။’ (၁ ကောရိန္သု ၁၀:၂၁၊ ၂၂) လျှို့ဝှက်ဆန်းကြယ်ပညာရပ်တွေကို အခြေခံထားတဲ့ (သို့) ဒါတွေကို ယုံကြည်ဖို့၊ လိုက်စားဖို့ အားပေးတဲ့ စာအုပ်၊ ရုပ်ရှင်နဲ့ ကွန်ပျူတာဂိမ်းတွေကို ယေဟောဝါကိုအမှန်ချစ်မြတ်နိုးသူတွေ ဝေးဝေးရှောင်ကြပါလိမ့်မယ်။ * ‘အဓမ္မအမှုကို မျက်မှောက်မပြုပါ’ လို့ ဆာလံ ၁၀၁:၃ ကဆိုတယ်။ ဒါ့အပြင် ဒီလိုဖျော်ဖြေမှုတွေက ‘ယေဟောဝါဘုရားကိုချစ်သောသူတို့’ ငြင်းပယ်ရမယ့် အကြမ်းဖက်မှုနဲ့ အကျင့်ယိုယွင်းမှုတွေကို ဂုဏ်တင်လေ့ရှိတယ်။—ဆာလံ ၉၇:၁၀။

ကောင်းကင်တမန်ဆိုးတွေဟာ သူတို့ရဲ့ပင်ကိုစရိုက်ကို လူတွေမသိအောင်ဖုံးကွယ်ဖို့ အမြဲကြိုးစားနေတယ်။ ဒါပေမဲ့ သူတို့ အပြည့်အဝ မအောင်မြင်ကြပါ။ ယေဟောဝါက သမ္မာကျမ်းစာအားဖြင့် သူတို့ရဲ့ ဇာတိရုပ်အစစ်ဖြစ်တဲ့ မလိုတမာစိတ်ဖြင့်လိမ်ညာသူ၊ လူသားတွေရဲ့ ရက်စက်တဲ့ရန်သူဆိုတာကို ဖော်ထုတ်ပြတယ်။ ကျွန်တော်တို့ရဲ့ ဖန်ဆင်းရှင် ယေဟောဝါဘုရားသခင်နဲ့ ဘယ်လောက်ကွာခြားလိုက်သလဲ။ ကိုယ်တော်ဟာ ကျွန်တော်တို့ကို ချစ်ကြောင်း၊ အမြဲအမှန်တရားကိုပြောကြောင်းနဲ့ ကျွန်တော်တို့ကိုထာဝစဉ်ပျော်ရွှင်စေချင်ကြောင်း နောက်ဆောင်းပါးမှာတွေ့ရပါလိမ့်မယ်။—ယောဟန် ၃:၁၆; ၁၇:၁၇။

[အောက်ခြေမှတ်ချက်]