ကျမ်းစာရှိသမျှကို ဘုရားသခင့် စွမ်းအားတော်ရဲ့ လမ်းညွှန်မှုနဲ့ ရေးထားတယ်ဆိုပြီး သက်သေခံများ ယုံကြည်ကြတယ်။ (၂ တိမောသေ ၃:၁၆) “[ယေဟောဝါသက်သေတွေက] ကျမ်စာထဲမှာ ဘာပါမယ်ဆိုတာကို ကြိုတင်ခန့်မှန်းပြီး လိုက်ရှာတာမျိုး မလုပ်ဘဲ သူတို့ရဲ့ယုံကြည်ချက်တွေနဲ့ အကျင့်အကြံတွေကို သမ္မာကျမ်းစာမှာ တွေ့ရှိတဲ့အရာပေါ် [အခြေပြုထားကြတယ်]” ဆိုပြီး ဘာသာရေးဆိုင်ရာ တွဲဖက်ပါမောက္ခဖြစ်သူ ဂျက်ဆန် ဒီ. ဘီဒန်က ရေးခဲ့တယ်။ သူတို့ရဲ့ ယုံကြည်ချက်တွေကို ကျမ်းစာနဲ့ ကိုက်ညီအောင် လုပ်တယ်။ သူတို့ယုံကြည်ချက်တွေနဲ့ အံဝင်ခွင်ကျဖြစ်အောင် ကျမ်းစာကို အဓိပ္ပာယ်ဖွင့်ဆိုတာမျိုး မလုပ်ကြဘူး။ တစ်ချိန်ထဲမှာ ကျမ်းစာမှာပါတဲ့ အရာအားလုံးကို စာသားအတိုင်း ယူလို့မရဘူးဆိုတာကိုလည်း သူတို့ သဘောပေါက်ထားကြတယ်။ ဥပမာ ဖန်ဆင်းရာနေ့ရက် ခုနစ်ရက်က ပုံဆောင်ချက်ဖြစ်ပြီး တာရှည်တဲ့ အချိန်ကာလတွေကို ညွှန်းဆိုတယ်။—ကမ္ဘာဦး ၁:၃၁။ ၂:၄။.

စစ်မှန်တဲ့ဘုရားသခင်က ယေဟောဝါ (ဒါမှမဟုတ် ရိုမန်ကက်သလစ်တွေရဲ့ ဂျေရုဆလင်ကျမ်းစာ မှာ အသုံးပြုထားပြီး ခေတ်သစ်ပညာရှင်တချို့ နှစ်သက်တဲ့ ယာဝေး) ဆိုတဲ့ ကိုယ်ပိုင်နာမည်တစ်ခုကို သူ့ဘာသာသူ ပေးခဲ့ပြီး အဲဒီနာမည်က မှားယွင်းတဲ့ ဘုရားသခင်တွေနဲ့ ကွဲကွဲပြားပြား ဖြစ်စေတယ်။ * (ယေရမိ ၃၃:၂) ဟီဘရူးပုံစံနဲ့ ရေးထားတဲ့ သန့်ရှင်းမြင့်မြတ်တဲ့ အဲဒီနာမည်ကို ကျမ်းစာရဲ့ မူရင်းစာသားတွေမှာ အကြိမ် ၇,၀၀၀ ခန့်တွေ့ရတယ်။ အဲဒီနာမည်ရဲ့ အရေးပါမှုကို ယေရှုက သူ့ရဲ့စံပြဆုတောင်းချက်မှာ ဒီလိုအလေးပေးခဲ့တယ်- “ကိုယ်တော်၏နာမတော်သည် သန့်ရှင်းမြင့်မြတ်ခြင်း ရှိပါစေ။” (မဿဲ ၆:၉) ဘုရားသခင်ဟာ အကြွင်းမဲ့ ဆည်းကပ်ဝတ်ပြုမှုကို သင့်လျော်စွာဖြင့် တောင်းဆိုထားတယ်။ အဲဒီလိုတောင်းဆိုထားတဲ့အတွက် သက်သေခံတွေရဲ့ ၀တ်ပြုမှုမှာ ရုပ်ပုံကားချပ်တွေကို အသုံးမပြုကြပါ။—၁ ယောဟန် ၅:၂၁။

ယေရှုဟာ ကယ်တင်ရှင်၊ “ဘုရားသခင့် သားတော်” နဲ့ “ဖန်ဆင်းရာအပေါင်းတို့တွင် သားဦး” ဖြစ်တယ်။ (ယောဟန် ၁:၃၄။ ကောလောသဲ ၁:၁၅။ တမန်တော် ၅:၃၁) ယေရှုဟာ ဖန်ဆင်းခံထားရသူတစ်ဦး ဖြစ်တဲ့အတွက် ဘုရားသခင်နဲ့ ယေရှုက ပုဂ္ဂိုလ်တစ်ဦးတည်း မဟုတ်ပါ။ “ခမည်းတော်သည် ငါ့ထက် သာ၍ကြီးမြတ်တော်မူ၏” လို့ ယေရှု ပြောခဲ့တယ်။ (ယောဟန် ၁၄:၂၈) ယေရှုဟာ မြေကြီးပေါ်မလာခင် ကောင်းကင်မှာနေခဲ့ပြီး ပူဇော်ရာယဇ်အဖြစ် သေဆုံးပြီးနောက် ရှင်ပြန်ထမြောက်ကာ ကောင်းကင်ပေါ် ပြန်တက်သွားခဲ့တယ်။ “ငါ့ကိုအမှီမပြုဘဲ အဘယ်သူမျှ ခမည်းတော်ထံသို့ မရောက်ရ။”—ယောဟန် ၁၄:၆။

ဒီနိုင်ငံတော်ဟာ ကောင်းကင်အုပ်ချုပ်ရေးဖြစ်ပြီး ဘုရင်အဖြစ် ယေရှုခရစ်နဲ့ “မြေကြီးပေါ်မှ ဝယ်ယူထားသော” ၁၄၄,၀၀၀ တို့က ပူးတွဲအုပ်ချုပ်ကြမှာ ဖြစ်တယ်။ (ဗျာ. ၅:၉၊ ၁၀။ ၁၄:၁၊ ၃၊ ၄။ ဒံယေလ ၂:၄၄။ ၇:၁၃၊ ၁၄) သူတို့က ဆိုးသွမ်းမှုအားလုံးကို ဖယ်ရှားမှာဖြစ်ပြီး ဘုရားသခင်ကို ကြောက်ရွံ့တဲ့ လူသန်းပေါင်းများစွာ နေထိုင်မယ့် ကမ္ဘာမြေကြီးကို အုပ်ချုပ်ကြမယ်။—သု. ၂:၂၁၊ ၂၂။

“မြေကြီးမူကား အစဉ်အမြဲတည်၏” ဆိုပြီး ဒေသနာ ၁:၄ မှာ ဖော်ပြထားတယ်။ ဆိုးသွမ်းတဲ့သူတွေကို ဖယ်ရှားပြီးတဲ့နောက် ဖြောင့်မတ်တဲ့လူသားတွေက ကမ္ဘာမြေကြီးကို ပရဒိသုဖြစ်လာအောင် ပြုလုပ်မှာဖြစ်ပြီး အဲဒီမှာ ထာဝစဉ် နေထိုင်ကြပါလိမ့်မယ်။ (ဆာလံ ၃၇:၁၀၊ ၁၁၊ ၂၉) ဒီလိုနည်းနဲ့ ‘အလိုတော်သည် မြေကြီးပေါ်၌လည်း ပြည့်စုံပါစေ’ ဆိုတဲ့ ယေရှုရဲ့ဆုတောင်းချက်လည်း ပြည့်စုံလာပါလိမ့်မယ်။—မဿဲ ၆:၁၀။

ဘုရားသခင်ဟာ မုသားနဲ့ ကင်းစင်တယ်။ (တိတု ၁:၂) ဒါကြောင့် လက်ရှိလောကရဲ့ အဆုံးနဲ့ပတ်သက်တဲ့ ကျမ်းစာပရောဖက်ပြုချက်တွေ အပါအဝင် ကိုယ်တော်ကြိုပြောသမျှ အမြဲပြည့်စုံလာတယ်။ (ဟေရှာယ ၅၅:၁၁။ မဿဲ ၂၄:၃-၁၄) ရောက်လာမယ့် ဖျက်ဆီးခြင်းဘေးမှာ ဘယ်သူတွေ လွတ်မြောက်ကြမလဲ။ “ဘုရားသခင်၏ အလိုတော်ကို ဆောင်ရွက်သောသူမူကား အစဉ်အမြဲ တည်၏” လို့ ၁ ယောဟန် ၂:၁၇ ကပြောတယ်။

“ကဲသာ၏ဥစ္စာကို ကဲသာအား ပေးကြလော့။ ဘုရားသခင်၏ဥစ္စာကိုကား ဘုရားသခင်အား ပေးကြလော့” ဆိုပြီး ယေရှု ပြောခဲ့တယ်။ (မာကု ၁၂:၁၇) ဒီအတွက် ယေဟောဝါသက်သေတွေဟာ ဘုရားသခင့်ပညတ်များနဲ့ မဆန့်ကျင်သရွေ့ သူတို့နိုင်ငံမှာရှိတဲ့ ဥပဒေတွေကို လိုက်နာကြတယ်။—တမန်တော် ၅:၂၉။ ရောမ ၁၃:၁-၃။

“နိုင်ငံတော်နှင့်ဆိုင်သော ဤသတင်းကောင်း” ကို လက်ရှိအစီအစဉ်စနစ် အဆုံးမတိုင်မီ ကမ္ဘာတစ်ခွင် ဟောပြောရမယ်လို့ ယေရှု ကြိုဟောထားတယ်။ (မဿဲ ၂၄:၁၄) ယေဟောဝါသက်သေတွေက ဒီအသက်ကယ်လုပ်ငန်းမှာ ပါဝင်ရတာကို ဂုဏ်ယူကြပါတယ်။ မှန်ပါတယ်၊ နားထောင်မယ် နားမထောင်ဘူးဆိုတာက လူတွေရဲ့ ကိုယ်ပိုင်ရွေးချယ်မှု ဖြစ်တယ်။ “ဆန္ဒရှိသူတိုင်း အသက်ရေကို အခမဲ့ယူပါစေ” ဆိုပြီး ကျမ်းစာက ပြောတယ်။—ဗျာ. ၂၂:၁၇။

ကျမ်းစာကို အသေအချာ လေ့လာပြီး ဘုရားသခင်ရဲ့ သက်သေတစ်ဦးအနေနဲ့ ကိုယ်တော့်အမှုတော် ထမ်းဆောင်လိုသူတွေကိုသာ ယေဟောဝါသက်သေများက နှစ်ခြင်းပေးကြတယ်။ (ဟေဗြဲ ၁၂:၁) ရေထဲနှစ်မြှုပ်ခြင်းက ဘုရားသခင်ထံ ကိုယ့်ကိုကိုယ် ဆက်ကပ်အပ်နှံထားတယ်ဆိုတဲ့ အထိမ်းအမှတ် ဖြစ်တယ်။—မဿဲ ၃:၁၃၊ ၁၆။ ၂၈:၁၉။

“သင်တို့အပေါင်းသည် ညီအစ်ကိုများ ဖြစ်ကြ၏” လို့ ယေရှုက သူ့နောက်လိုက်တွေကို ပြောခဲ့တယ်။ (မဿဲ ၂၃:၈) ကျမ်းစာကို ရေးသားသူတွေ အပါအဝင် အစောပိုင်းခရစ်ယာန်တွေမှာ ဓမ္မဆရာအတန်းအစားဆိုပြီး မရှိခဲ့ပါဘူး။ ဒါဟာ ယေဟောဝါသက်သေတွေ လိုက်လျှောက်နေတဲ့ ကျမ်းစာဆိုင်ရာ ပုံစံတစ်ခု ဖြစ်ပါတယ်။