ကြင်ဖော်မဲ့မိဘတစ်ဦးဖြစ်ငြား အောင်မြင်ပျော်ရွှင်နိုင်

ကမ္ဘာတစ်ဝန်းတွင် မိစုံဖစုံရှိသောမိသားစုဟူသည် မျိုးသုဉ်းတော့မည့် ရှားပါးတိရစ္ဆာန်ကဲ့သို့ ဖြစ်နေပြီဟုဆိုကြ၏။ အမေရိကန်ပြည်ထောင်စုတစ်ခုတည်းတွင် ကြင်ဖော်မဲ့မိဘ ၁၃ သန်းကျော်ရှိပြီး အများစုမှာ ကြင်ဖော်မဲ့မိခင်များဖြစ်ကြသည်။ ထိုနိုင်ငံရှိ ကလေးအားလုံး၏ ထက်ဝက်ခန့်သည် ဆယ်ကျော်သက်အရွယ်တွင် ကြင်ဖော်မဲ့မိဘနှင့်သာ နေထိုင်ရလိမ့်မည်ဟု သုတေသနပြုချက်က ဖော်ပြသည်။

သင်သည် ကြင်ဖော်မဲ့မိဘတစ်ဦးဖြစ်လျှင် သင့်မိသားစုဘဝအောင်မြင်နိုင်ကြောင်း စိတ်ချပါလေ။ အောက်ပါအကြံပြုချက်များကို စမ်းကြည့်ပါ။

▪ အပျက်သဘောထားများကို ရှောင်ပါ။ “ဆင်းရဲငြိုငြင်သောသူ၏ နေ့ရက်ရှိသမျှသည် ဆိုး၏။ ရွှင်လန်းသောစိတ်နှလုံးမူကား အစဉ်ခံရသောပွဲဖြစ်၏” ဟုကျမ်းစာက ဆိုသည်။ (သု. ၁၅:၁၅) သင့်ဘဝသည် ပွဲခံသကဲ့သို့ ဖြစ်ချင်မှဖြစ်ပေမည်။ သို့သော် ရွှင်လန်းခြင်းဟူသည် လူတစ်ဦး၏အခြေအနေပေါ်တွင် မမူတည်ဘဲ သူ၏စိတ်သဘောနှင့် ပို၍သက်ဆိုင်သည်ဟု ဤကျမ်းချက်ကဖော်ပြသည်။ (သု. ၁၇:၂၂) သင့်ကလေးများ ဘဝပျက်ပြီ၊ သင့်မိသားစု လုံးလုံးပြိုကွဲနေပြီဟု စဉ်းစားခြင်းသည် အကျိုးမရှိချေ။ ထိုသဘောထားများက သင့်ကိုစိတ်ပျက်စေပြီး သင့်မိဘဝတ္တရားများကို ထမ်းဆောင်ရာတွင် အခက်တွေ့စေမည်။—သု. ၂၄:၁၀။

အကြံပြုချက်– သင့်အခြေအနေကို ဖော်ပြရာတွင် အသုံးပြုသော အပျက်သဘောဆောင်သည့် အသုံးအနှုန်းများကို စာရင်းပြုစုပြီး တစ်ခုချင်းစီ၏ဘေးတွင် အပြုသဘောဆောင်သော အသုံးအနှုန်းများကို ရေးချပါ။ ဥပမာ၊ “ငါမတတ်နိုင်တော့ဘူး” အစား “ကြင်ဖော်မဲ့မိဘတစ်ဦးအနေနဲ့ ငါ့တာဝန်ကို ငါကျေပွန်နိုင်ပြီး ငါလိုအပ်တဲ့အကူအညီကို ရနိုင်တယ်” ဟုရေးချပါ။—ဖိလိပ္ပိ ၄:၁၃။

▪ ဘတ်ဂျက်ဆွဲပါ။ ကြင်ဖော်မဲ့မိဘများ၊ အထူးသဖြင့် ကြင်ဖော်မဲ့မိခင်များအတွက် ငွေကြေးပြဿနာသည် အခက်ခဲဆုံးဖြစ် သည်။ သို့တိုင် တစ်ခါတစ်ရံ၊ ဘတ်ဂျက်ကောင်းစွာဆွဲခြင်းက ငွေကြောင့်ခံစားရသည့် စိတ်ဖိစီးမှုကို လျော့ပါးစေနိုင်သည်။ “စဉ်းစားဉာဏ်ရှိသူတို့သည် မိမိတို့ကြုံတွေ့ရမည့်ဒုက္ခကို ကြိုတင်တွေ့မြင်၍ ရှောင်ရှားတတ်ကြ၏” ဟုကျမ်းစာက ဆိုသည်။ (သု. ၂၂:၃၊ ခမ) ငွေကြေးဆိုင်ရာ “ဒုက္ခ” ကို ရှောင်ရှားနိုင်ရန် ကြိုတင်စဉ်းစားဖို့လိုသည်။

အကြံပြုချက်– စာရွက်ပေါ်တွင် ဘတ်ဂျက်ဆွဲပါ။ တစ်လလျှင် ငွေမည်မျှသုံးသည်၊ ဘာအတွက်သုံးသည်၊ မည်သို့သုံးသည်တို့ကို မှတ်တမ်းထားပါ။ အမြဲ အကြွေးယူတတ်သလော။ မိဘမစုံ၍ဟုဆိုကာ သင့်ကလေးများကို ပစ္စည်းများ ဝယ်ပေးလေ့ရှိသလော။ သင့်ကလေးများ သိတတ်သည့်အရွယ်ရောက်ပြီဆိုလျှင် ငွေကို မည်သို့ချွေတာနိုင်ကြောင်း အကြံထုတ်စေပါ။ ထိုသို့ပြုခြင်းက သူတို့ကို လေ့ကျင့်ပေးရာရောက်သည့်အပြင် သူတို့တွင်လည်း လက်တွေ့ကျအကြံဉာဏ်များ ရှိပေမည်။

▪ သင့်အိမ်ထောင်ဖက်ဟောင်းနှင့် ပြေပြေလည်လည် ဆက်ဆံပါ။ သင်သည် ကလေးများကို ပူးတွဲအုပ်ထိန်းခွင့်ရလျှင် သင့်အိမ်ထောင်ဖက်ဟောင်းကို အပုပ်ချခြင်း၊ ကလေးများအား သူ့အကြောင်း ထောက်လှမ်းစေခြင်းတို့သည် မကောင်းသောကြောင့် ယင်းသို့မပြုလုပ်မိရန် သတိထားပါ။ * ဆုံးမသွန်သင်ခြင်း သို့မဟုတ် သင့်ကလေး၏ကောင်းကျိုးကိုဖြစ်စေသော ကိစ္စများနှင့်ပတ်သက်၍ သင့်အိမ်ထောင်ဖက်ဟောင်းနှင့် ပြေပြေလည်လည်ပူးပေါင်းလုပ်ဆောင်ခြင်းက သာ၍ကောင်းပါသည်။ “သင်တို့သည် တတ်နိုင်သမျှအတိုင်း လူအားလုံးနှင့် သင့်မြတ်စွာနေကြလော့” ဟုကျမ်းစာဆိုရာတွင် သင့်အိမ်ထောင်ဖက်ဟောင်းလည်း ပါဝင်သည်။—ရောမ ၁၂:၁၈။

အကြံပြုချက်– နောင်တွင် သဘောထားကွဲလွဲမှုပေါ်ပေါက်လျှင် သင့်အိမ်ထောင်ဖက်ကို သင့်အလုပ်ဖော်တစ်ဦးအဖြစ် ဆက်ဆံပါ။ သင်သည် အလုပ်ခွင်တွင် လူတိုင်းနှင့်၊ သင်သဘောမကျနိုင်သူများနှင့်ပင် သင့်မြတ်ရန် ကြိုးစားပေမည်။ သင့်အိမ်ထောင်ဖက်ဟောင်းကိုလည်း ထိုသို့ဆက်ဆံပါ။ သင်တို့နှစ်ဦးသည် အမြဲ သဘောထားတိုက်ဆိုင်မှတိုက်ဆိုင်မည်ဖြစ်သော်လည်း အသေးအမွှားကိစ္စကို ပုံကြီးမချဲ့ပါနှင့်။—လုကာ ၁၂:၅၈။

▪ ပုံသက်သေကောင်းပြပါ။ သင့်ကိုယ်သင် ဤသို့မေးပါ– ‘ငါ့ကလေးတွေကို ဘယ်လိုကျင့်ဝတ်စံနှုန်းနဲ့သဘောထားတွေ မွေးမြူစေချင်သလဲ။ ငါကိုယ်တိုင်ကော အဲဒီကျင့်ဝတ်စံနှုန်းနဲ့သဘောထားတွေ တင်ပြနေသလား။’ ဥပမာ၊ သင်သည် ကြင်ဖော်မဲ့မိဘတစ်ဦးဖြစ်သည့်တိုင် ပျော်ပျော်နေတတ်သလော။ သင့်ဘဝအခြေအနေကြောင့် စိတ်ပျက်မှိုင်တွေနေသလော။ သင့်အိမ်ထောင်ဖက်ဟောင်း၏လုပ်ရပ်ကို နာကြည်းခံပြင်းနေသလော။ သို့မဟုတ် သင်မဖြေရှင်းနိုင်သော မတရားမှုများကြား အလိုက်အထိုက် နေတတ်သလော။ (သု. ၁၅:၁၈) ယင်းတို့ကို အောင်မြင်စွာရင်ဆိုင်နိုင်ရန် မလွယ်ကူသည်မှာ မှန်ပါသည်။ သို့တိုင် သင့်ကလေးများသည် ဘဝအပေါ် သင်ထားရှိသည့်သဘောထားမျိုးကို တုပနိုင်ဖွယ်ရှိသည်။

အကြံပြုချက်– သင့်ကလေးများ ကြီးပြင်းလာသည့်အခါ သူတို့တစ်ဦးစီတွင်ရှိစေလိုသည့် အရည်အသွေးသုံးခုကို စာရွက်ပေါ်တွင် ရေးချပါ။ * အရည်အသွေးတစ်ခုစီ၏ဘေးတွင် ယင်းကို သင့်ကလေးမွေးမြူနိုင်ရန် ယခု သင် အဘယ်ပုံသက်သေပြနိုင်သည်ကို ရေးချပါ။

▪ သင့်ကိုယ်သင် ဂရုစိုက်ပါ။ ဗျာများသည့်ဘဝက သင့်ကာယပိုင်းနှင့်စိတ်ပိုင်း ကျန်းမာရေးကို အလွယ်တကူထိခိုက်စေနိုင်သည်။ ထိုသို့အဖြစ်မခံပါနှင့်။ ‘ဘုရားသခင်ကို မှီခိုခြင်း’ သည် မရှိမဖြစ်လိုအပ်သောအရာဖြစ်၏။ (မဿဲ ၅:၃) ဆီမရှိသောကားသည် ခရီးမရောက်နိုင်သကဲ့သို့ သင်လည်း အချိန်ယူ၍ ‘အားမဖြည့်’ ပါက ဘဝခရီးဆက်နိုင်မည်မဟုတ်ပါ။

“ရယ်ရသောအချိန်” နှင့် “ကခုန်ရသောအချိန်” လည်းရှိ၏။ (ဒေ. ၃:၄) အနားယူအပန်းဖြေခြင်းသည် အချိန်ဖြုန်းနေခြင်းမဟုတ်ပါ။ ယင်းက ကြင်ဖော်မဲ့မိဘတစ်ဦးအနေနှင့် ရှေ့ဆက်နိုင်ရန် သင့်ကို အားသစ်လောင်းပေးသည်။

အကြံပြုချက်– အခြားကြင်ဖော်မဲ့မိဘများ မည်သို့နေထိုင်ကြကြောင်း သိရှိရန် သူတို့နှင့် ပြောဆိုဆွေးနွေးကြည့်ပါ။ “သာ၍အရေးကြီးသောအရာများကို သေချာစွာ သိစေရန်” ကြိုးစားနေစဉ် သင်ကြိုက်နှစ်သက်ရာတစ်ခုခုကို လုပ်ဆောင်ဖို့ ပတ်စဉ် အချိန်အနည်းငယ်ယူနိုင်သလော။ (ဖိလိပ္ပိ ၁:၁၀) သင်လုပ်ဆောင်လိုသည့်အရာ၊ လုပ်ဆောင်ရန် စီစဉ်ထားချိန်တို့ကို ရေးချပါ။

[အောက်ခြေမှတ်ချက်များ]