အဝလွန်ခြင်း ဖြေရှင်းနည်းကား အဘယ်နည်း
အဝလွန်ခြင်း ဖြေရှင်းနည်းကား အဘယ်နည်း
နိုးလော့! သည် ကိုယ်အလေးချိန်ပိုလူနာနှင့် အဝလွန်လူနာများအား အထူးပြုလေ့လာကုသပေးခဲ့ကြသည့် အာဟာရဗေဒပညာရှင် ဒိုင်ယန်းနှင့် လက်မှတ်ရသူနာပြု အယ်လင်တို့ကို လူတွေ့မေးမြန်းခဲ့သည်။ ကစီဓာတ် ဖယ်ထုတ်ပေးပြီး အသားဓာတ်တိုးစေသော ဓာတ်စာများသည် ကိုယ်အလေးချိန်ကို လျော့ကျစေနိုင်ကြောင်း သူတို့သဘောတူခဲ့ကြ၏။ သို့သော် ဤအတိုင်းတောက်လျှောက်သွားလျှင် အန္တရာယ်ဖြစ်စေသော ဆင့်ပွားအကျိုးဆက်များရှိလာနိုင်သည်ဟု ၎င်းတို့ကဆိုသည်။ * ကျန်းမာသောကိုယ်အလေးချိန်ကို ထိန်းထားခြင်းဟုခေါ်ဆိုသည့် ဆေးဘက်ဆိုင်ရာဇယားကွက်က ယင်းကို အတည်ပြုသည်။ ယင်းက ဤသို့ဖော်ပြသည်– “ကစီဓာတ်နည်းသော ဓာတ်စာများကို အထူးသဖြင့် ဆေးဘက်ဆိုင်ရာ ကြီးကြပ်မှုမပါဘဲ စားသုံးမည်ဆိုလျှင် အန္တရာယ်ဖြစ်လာနိုင်ပေသည်။” ၎င်းက ဆက်ဆိုသည်– “[ဤဓာတ်စာများ] သည် ကီတုန်းပစ္စည်းများ (အဆီဓာတ်ချေဖျက်မှု၏ ဘေးထွက်ပစ္စည်း) မလိုလားအပ်ဖွယ်အထိ တိုးလာစေအောင် လှုံ့ဆော်ပေးကာ ကိုယ်အလေးချိန် အမြန်ကျစေရန် ရည်ရွယ်သည်။” သင်သည် ကစီဓာတ်နည်းသောဓာတ်စာ စားဖို့ စဉ်းစားနေပြီဆိုလျှင် ဦးဆုံး ဆရာဝန်တစ်ဦးနှင့် အသေအချာ တိုင်ပင်ပါ။
သင့်ပန်းတိုင်မှာ ကိုယ်အလေးချိန်လျှော့ချဖို့ဖြစ်သည်ဆိုလျှင် လက်မှိုင်မချလိုက်ပါနှင့်။ “ကိုယ်အလေးချိန်ထိန်းခြင်းသည် မဖြစ်နိုင်ရာမဟုတ်၊ အငတ်ခံဖို့ သို့မဟုတ် ငြီးငွေ့ဖွယ်ကောင်းသည့် ဓာတ်စာကို အပြန်ပြန်စားနေဖို့လည်း မလိုပါ” ဟု ဒေါက်တာ ဝေါ်လ်တာ စီ. ဝီးလ်လတ်က ဆိုသည်။ “အသိတရားရှိရှိ ကြိုးပမ်းမှုနှင့် ဖန်တီးတီထွင်တတ်မှုတို့ဖြင့် လူအများစုသည် မိမိတို့၏ကိုယ်အလေးချိန်ကို မြိန်ရှက်ပြီး မျှတသောဓာတ်စာ၊ နေ့စဉ်နီးပါး ကိုယ်လက်လှုပ်ရှားကစားမှုတို့ဖြင့် ရေရှည် အောင်မြင်စွာ ထိန်းထားနိုင်ကြသည်။ အသက်ရှည်၊ ကျန်းမာသောဘဝသည် မုချကြိုးစားရကျိုးနပ်ပေသည်။” *—ကျွန်ုပ်တို့ စာလုံးစောင်းထား။
ကိုယ်လက်လှုပ်ရှားခြင်းက မည်မျှအရေးကြီးသနည်း
ဒေါက်တာ ဝီးလ်လတ်က ဤသို့ဆို၏– “ဆေးလိပ်မသောက်သည့်အပြင် ကိုယ်လက်လှုပ်ရှားကစားခြင်းက ကျန်းမာနေစေရန်နှင့် နာတာရှည်ရောဂါများကို ဟန့်တားနိုင်ရန် သင်လုပ်ဆောင်နိုင်သည့် တစ်ခုတည်းသော အကောင်းဆုံးအရာဖြစ်သည်။” လူတစ်ဦးသည် အကြိမ်မည်မျှကြာကြာ ကိုယ်လက်လှုပ်ရှားကစားသင့်သနည်း။ ကာယလေ့ကျင့်ခန်း၏ အကျိုးကျေးဇူးများကား အဘယ်နည်း။
နေ့စဉ် မိနစ် ၃၀ ခန့်သာ ကိုယ်လက်လှုပ်ရှားကစားမည်ဆိုလျှင် လွန်စွာအကျိုးရှိနိုင်ကြောင်း ကျွမ်းကျင်သူအချို့က အကြံပြုကြ၏။ သို့သော် တစ်ပတ်လျှင် သုံးကြိမ် ကာယလေ့ကျင့်ခန်းပြုလျှင်ပင် နောင်ပေါ်ပေါက်လာမည့် ဆိုးဝါးသောပြဿနာများကို ရှောင်ကြဉ်ရန် အကူအညီပေးနိုင်ကြောင်းလည်း အကြံပြုထားသည်။ ကိုယ်လက်လှုပ်ရှားကစားခြင်းသည် ကယ်လိုရီများကို လောင်ကျွမ်းစေသည်၊ ကိုယ်အလေးချိန်လျှော့ချဖို့ ကြိုးစားနေသူတစ်ဦးအနေဖြင့် မိမိနေ့စဉ် လောင်ကျွမ်းစေသည့် ကယ်လိုရီပမာဏသည် စားသုံးလိုက်သည့် ကယ်လိုရီပမာဏထက် ပို၍များနေပါသလောဟူသည့် အဓိကမေးခွန်းကို မေးသင့်ပါသည်။ ယင်းမေးခွန်းနှင့်ပြောင်းပြန်ဆိုလျှင် သင်သည် ကိုယ်အလေးချိန်တိုးလာမည်မှာမုချ။ ထို့ကြောင့် ကားစီးမည့်အစား လမ်းလျှောက်ပါ၊ စက်ဘီးစီးပါ။ ဓာတ်လှေကားမစီးဘဲ ရိုးရိုးလှေကားဖြင့်တက်ပါ။ ကိုယ်လက်လှုပ်ရှားကစားပါ! ကယ်လိုရီများကို လောင်ကျွမ်းစေပါ!
ဒေါက်တာ ဝီးလ်လတ်က ဤသို့ရှင်းပြ၏– “လူအများအဖို့ လမ်းလျှောက်ခြင်းသည် အခြားသောကာယလှုပ်ရှားမှုများနှင့်စာလျှင် အကောင်းဆုံးရွေးချယ်စရာတစ်ခုဖြစ်၏၊ အကြောင်းမှာ ယင်းသည် မည်သည့်အထူးကိရိယာမျှမလိုဘဲ မည်သည့်အချိန်၊ မည်သည့်နေရာတွင်မဆို ပြုလုပ်နိုင်ပြီး လုံးဝဘေးကင်းသည်ဟုဆိုရမည်။” သူ၏အကြံပေးချက်မှာ အပျင်းပြေလမ်းလျှောက်ခြင်းမျိုးမဟုတ်ဘဲ သုတ်သုတ်လျှောက်ရန် ဖြစ်ပါသည်။ ဖြစ်နိုင်မည်ဆိုလျှင် နေ့စဉ် မိနစ် ၃၀ ကိုယ်လက်လှုပ်ရှားကစားကြဖို့ သူက အကြံပြုသည်။
ခွဲစိတ်ကုသခြင်းသည် အကောင်းဆုံးဖြေရှင်းနည်းလော
ကိုယ်အလေးချိန်လျှော့ချဖို့နှင့် နောင်တွင် ကိုယ်အလေးချိန်တိုးလာမည်ကို ကြိုတင်ကာကွယ်ရန် ကြိုးပမ်းရာတွင် အလွန်အမင်း အဝလွန်နေသူတချို့သည် ခွဲစိတ်ကုသနည်းအမျိုးမျိုးကို ထောက်ခံသည့် အဝလွန်ရောဂါကုသမှုဆိုင်ရာအထူးကုများ၏ အကြံဉာဏ်ကို လိုက်နာခဲ့ကြလေပြီ။ မည်သို့သောသူမျိုးကို ခွဲစိတ်ကုသပေးနိုင်သနည်း။ ကျန်းမာစေသော ကိုယ်အလေးချိန်ဆိုင်ရာ မေရိုဆေးခန်းစာအုပ်ကို ပြုစုသူများက ဤသို့အကြံပြုကြ၏– “သင်သည် ဆိုးဆိုးဝါးဝါး အဝလွန်နေကြောင်း ဖော်ပြပေးသည့် သင်၏ကိုယ်ထုအညွှန်းသည် ၄၀ အထက်ဆိုလျှင် သင့်ဆရာဝန်က ခွဲစိတ်ကုသရန် စဉ်းစားပေမည်။” (စာမျက်နှာ ၅ မှ ဇယားကွက်ကိုရှု။) မေရိုဆေးခန်း ကျန်းမာရေးစာစဉ်က ဤသို့အကြံပြု၏– “အဝလွန်ရောဂါအတွက် ခွဲစိတ်ကုသမှုကို ယေဘုယျအားဖြင့် အဝလွန်ခြင်းက ဆိုးဝါးသော ဆေးဝါးကုသမှုဆိုင်ရာအန္တရာယ်ဖြစ်စေသည့် ကိုယ်ထုအညွှန်း ၄၀ အထက်ရှိ အသက် ၁၈ နှစ် နှင့် ၆၅ နှစ်အကြားရှိသူတို့အတွက်သာ ထောက်ခံပါသည်။”—ကျွန်ုပ်တို့ စာလုံးစောင်းထား။
ထိုခွဲစိတ်ကုသမှုဆိုင်ရာ လုပ်ထုံးလုပ်နည်းအချို့ကား အဘယ်အရာများနည်း။ အူသိမ်လမ်းလွှဲခွဲစိတ်ကုသနည်း၊ အစာအိမ်အကန့်ခွဲနည်း၊ အစာအိမ်ကျဉ်းပစ်နည်းနှင့် အစာအိမ်လမ်းလွှဲနည်းတို့ ဖြစ်သည်။ နောက်ဆုံးနည်းတွင် အစာအိမ်၏ ထိပ်ပိုင်းတစ်ခုလုံးကို တွဲချုပ်လိုက်ကာ အောင်စတစ်ဝက်လောက်သာ အစာသိုနိုင်သည့် အိတ်စလုပ်လေးအဖြစ် ပြုပြင်လိုက်ခြင်းဖြစ်သည်။ ထို့နောက် အူသိမ်ကို ဖြတ်ကာ ယင်းအိတ်စလုပ်လေးနှင့် တွဲဆက်ပေးလိုက်သည်။ ဤသို့ဖြင့် အစာအိမ်၏ အပိုင်းအများစုကို လမ်းလွှဲလိုက်သည့်အပြင် အူသိမ်ဦးပိုင်းကိုပါ လမ်းလွှဲပစ်လိုက်သည်။
ယခု ပိုနေသော ကိုယ်အလေးချိန် လျော့ကျသွားသူတို့ကော အသို့နည်း။ ကြိုးစားရကျိုးနပ်ခဲ့ကြသလော။
[အောက်ခြေမှတ်ချက်]
^ အပိုဒ်၊ 2 ၎င်းတို့တွင် သွေးထဲ သံဓာတ်ပါဝင်မှုနှုန်း လွန်ကဲနေခြင်း၊ ကျောက်ကပ်ပြဿနာများနှင့် ဝမ်းချုပ်ခြင်းတို့ ပါဝင်ပေသည်။
^ အပိုဒ်၊ 3 မိမိတို့၏အသက်တာကို ဘုရားသခင်၏မြင့်မြတ်သောလုပ်ငန်းတော်တွင် လက်ခံဖွယ်နည်းတစ်နည်းဖြင့် အသုံးပြုလိုကြသည့် ဆက်ကပ်အပ်နှံပြီးသော ခရစ်ယာန်များသည် ကိုယ်အလေးချိန်လျှော့ချပြီး ကျန်းမာရေးဂရုစိုက်ရန်အကြောင်းရင်း အခြားသူများထက် ပိုရှိ၏။ သူတို့သည် အချိန်မတန်မီ သေဆုံးမသွားဘဲ အသုံးဝင်သောအသက်တာကို ဘုရားသခင့်လုပ်ငန်းတော်တွင် နှစ်ပေါင်းများစွာ ပိုမိုအသုံးပြုနိုင်ကြပါသည်။—ရောမ ၁၂:၁။
[စာမျက်နှာ ၇ ပါ လေးထောင့်ကွက်/ရုပ်ပုံများ]
အကြံပြုထားသည့် ကျန်းမာရေးနှင့် ညီညွတ်သော စားသောက်ပုံပိရမစ်
အချိုများ ပျစ်ခဲသော သို့မဟုတ် တာရှည် ခံရန် စီမံပြုပြင်ထားသည့်
အချိုများ (အတတ်နိုင်ဆုံးရှောင်; တစ်နေ့လျှင် ကယ်လိုရီ ၇၅ အထိ ကန့်သတ်ပါ)
အဆီ သံလွင်ဆီ၊ အခွံမာသီးများ၊ မုန်ညင်းဆီ၊ ထောပတ်သီးများ (နေ့စဉ် ၃
ပွဲမှ ၅ ပွဲအထိ; တစ်ပွဲလျှင် ဆီ လက်ဖက်ရည်ဇွန်း ၁ ဇွန်းစာ သို့မဟုတ် အခွံမာသီး စားပွဲဇွန်း ၂
ဇွန်းစာဖြစ်သည်)
အသားဓာတ်နှင့် နို့ထွက်ပစ္စည်း ပဲအမျိုးမျိုး၊ ငါး၊ အဆီနည်းသောအသား၊
ဥအမျိုးမျိုး၊ အဆီနည်းသော နို့ထွက်ပစ္စည်း၊ ဒိန်ခဲ (နေ့စဉ် ၃ ပွဲမှ ၇ ပွဲအထိ; တစ်ပွဲလျှင်
ချက်ပြုတ်ပြီးသောအသား သို့မဟုတ် ငါး ၃ အောင်စဖြစ်သည်)
ကစီဓာတ် အထူးသဖြင့် ဂျုံနှင့်လုပ်ထားသော— ဂျုံမုန့်ညက်၊ ပေါင်မုန့်၊ ဆန်၊
ကောက်နှံများ (နေ့စဉ် ၄ ပွဲမှ ၈ ပွဲအထိ; တစ်ပွဲလျှင် ပေါင်မုန့်တစ်ချပ်ဖြစ်သည်)
သစ်သီးများနှင့် ဟင်းသီးဟင်းရွက်များ အသီးအနှံအမျိုးမျိုးအနက် တစ်မျိုးစီ (နေ့စဉ် ပွဲ
အကန့်အသတ် မရှိ; တစ်မျိုးလျှင် အနည်းဆုံး ၃ ပွဲ)
နိုးလော့!သည် မည်သည့်ဓာတ်စာ၊ မည်သည့် ကိုယ်အလေးချိန်ထိန်းချုပ်နည်းကိုမျှ အားပေးထောက်ခံခြင်း မပြုပါ။ ရရှိနိုင်သည့် ရွေးချယ်ရာတချို့ကို စာဖတ်သူများအား အသိပညာပေးခြင်းသာဖြစ်သည်။ လူတစ်ဦးစီသည် ကိုယ်လက်လှုပ်ရှားမှုတစ်မျိုးမျိုး သို့မဟုတ် ဓာတ်စာ တစ်မျိုးမျိုးကို မရွေးချယ်မီ မိမိတို့၏ သမားတော်နှင့် တိုင်ပင်သင့်၏။
[Credit Line]
မေရိုဆေးခန်းအကြံပြုချက်များကို မှီငြမ်းပါသည်
[စာမျက်နှာ ၈၊ ၉ ပါ လေးထောင့်ကွက်/ရုပ်ပုံ]
ကိုယ်အလေးချိန်လျှော့ချရန် လူတချို့ စမ်းသပ်ခဲ့သည့် အကြံပြုချက်များ–
၁ သင်စားသောက်သည့်အရာတွင် ပါရှိသည့် ကယ်လိုရီများကို သတိပြုပါ။ မှတ်ချက်– သောက်ဖွယ်ရာများ အထူးသဖြင့် အချိုပြင်းသော သစ်သီးရည်များသည် အဓိကကျသည့် ကယ်လိုရီရင်းမြစ်တစ်ခု ဖြစ်နိုင်သည်။ အရက်ယမကာများသည်လည်း ကယ်လိုရီပါဝင်မှု မြင့်မားကြ၏။ ကျယ်ကျယ်ပြန့်ပြန့် ကြော်ငြာထားသည့် အချိုရည်များကို သတိထားပါလေ။ တံဆိပ်စာတန်းတွင် ကယ်လိုရီပါဝင်မှုကို စစ်ဆေးပါ။ သင်ထိတ်လန့်သွားနိုင်ပါသည်။
၂ သွေးဆောင်မှုကိုရှောင်ပါ။ အာလူးကျော်၊ ချောကလက် သို့မဟုတ် ကွတ်ကီးများ အရန်သင့်ရှိနေလျှင် ၎င်းတို့ကို မလွှဲဧကန် သင်စားသုံးပေမည်! ပန်းသီး၊ မုန်လာဥနီ၊ ဂျုံနှင့်လုပ်သော ဝေဖာများစသည့် ကယ်လိုရီပါဝင်မှုနည်းသော အဆာပြေစားစရာများဖြင့် အစားထိုးလိုက်ပါ။
၃ ထမင်းမစားမီ သရေစာ သို့မဟုတ် နှုတ်မြိန်စာတစ်ခုခုစားပါ။ ယင်းက သင်၏အစာစားချင်စိတ်ကို လျော့ပါးစေမည်ဖြစ်ပြီး အစားလျှော့စားစေမည်။
၄ သင့်ရှေ့၌ထားသမျှကို မစားပါနှင့်။ ရွေးချယ်ပြီးစားသုံးပါ။ ကယ်လိုရီများများတက်စေမည်ဟု သင်သိရှိထားရာကို ပယ်လိုက်ပါ။
၅ ဖြည်းဖြည်းစားပါ။ အဘယ်ကြောင့် အလျင်စလိုစားရ မှာနည်း။ သင်စားသုံးနေသည့် အစားအသောက်၏ အရောင်များ၊ အနံ့ အရသာများ၊ အပြန်အလှန်အကျိုးသက်ရောက်မှုတို့ကို သတိပြုမှတ်သားရင်း စားသုံးသွားပါ။ “ငါဝပြီ။ ထပ်စားဖို့မလိုတော့ဘူး” ဟူသော ခန္ဓာကိုယ် အချက်ပြမှုများကို လိုက်နာပါ။
၆ ဗိုက်ဝပြီဟု သင်မခံစားရမီ အစားရပ်လိုက်ပါ။
၇ နိုင်ငံတချို့တွင် စားသောက် ဆိုင်များသည် လွန်လွန်ကဲကဲ တည်ခင်းဧည့်ခံရာတွင် အလွန် နာမည်ကြီး၏။ သင် မှာထားသည့် အဓိကဟင်းပွဲ၏ တစ်ဝက်ကိုသာ စားသုံးပါ သို့မဟုတ် တစ်ဦးဦးနှင့် အတူ ဝေမျှစားသုံးပါ။
၈ အစာစားခြင်းကို အပြီးသတ်ဖို့ အချိုပွဲမလိုပါ။ သစ်သီး သို့မဟုတ် ကယ်လိုရီ ပါဝင်မှုနည်းသည့် အခြားအရာတစ်ခုခုဖြင့် အစာစားခြင်းကို အပြီးသတ်လိုက်ခြင်းက သာ၍ကောင်းပေသည်။
၉ အစားအသောက်ထုတ်လုပ်သူများသည် သင့်အား ပိုမိုစားသုံးစေလိုကြသည်။ အမြတ်ရဖို့သည် သူတို့အတွက် ပဓာနဖြစ်၏။ သူတို့သည် သင်၏အားနည်းချက်များကို အမြတ်ထုတ်ဖို့ ကြိုးစားကြမည်။ သူတို့၏ ပညာသားပါပါ ကြော်ငြာမှုနှင့် ချစ်စဖွယ်ရုပ်ပုံများက သင့်ကို မလှည့်ဖြားစေပါနှင့်။ သင် ဘူး ခံလိုက်နိုင်သည်!
[Credit Line]
ဒေါက်တာ ဝေါ်လ်တာ စီ. ဝီးလ်လတ် ရေးသားသည့် စားပါ၊ သောက်ပါ၊ ကျန်းမာစေပါ စာအုပ်နှင့်အညီ ပြောင်းလဲပြုပြင်ထားသည့် စာရင်းဖြစ်ပါသည်
[စာမျက်နှာ ၈၊ ၉ ပါ ရုပ်ပုံများ]
ကိုယ်လက်လှုပ်ရှား ကစားခြင်း!