“အပြစ်ဟာ လူတစ်ယောက်​ကြောင့် လူ့​လောက​ထဲ ရောက်​လာတယ်။ အပြစ်​ကြောင့် သေခြင်းလည်း ပေါ်ပေါက်​လာတယ်။ . . . သေဆုံး​ကြရတယ်။”—ရောမ ၅:၁၂။

ကနဦး​မိဘ အာဒံနဲ့ ဧဝ​ကို ပြည့်ဝ​စုံလင်​တဲ့ စိတ်၊ ခန္ဓာ​နဲ့ ဘုရားသခင် ဖန်ဆင်း​ခဲ့တယ်။ ဧဒင်ဥယျာဉ်​လို့ ခေါ်​တဲ့ သာယာ​လှပတဲ့ ကမ္ဘာ​မြေ စံအိမ်ကို​လည်း ပေး​ထား​တယ်။ ဥယျာဉ်​ထဲ​က အပင်​တစ်ပင်ရဲ့ အသီး​က​လွဲလို့ ကျန်​တဲ့​အပင်​အားလုံး​ရဲ့ အသီး​တွေ​ကို စား​ခွင့်​ ရှိတယ်။ ဒါပေမဲ့ အာဒံနဲ့ ဧဝ​ဟာ တားမြစ်​ထား​တဲ့ အပင်ရဲ့ အသီး​ကို​မှ ရွေး​ပြီး စား​ခဲ့​ကြတယ်။ အဲဒါဟာ အပြစ် ကျူးလွန်​တာ​ပဲ။ (ကမ္ဘာဦး ၂:၁၅-၁၇။ ၃:၁-၁၉) ဘုရား​ရဲ့​ စကား​ကို နားမထောင်တဲ့​အတွက် သူတို့ကို ဥယျာဉ်​ကနေ နှင်ထုတ်​လိုက်တယ်။ ဘဝဟာ ခက်ခဲ ကြမ်းတမ်း​လာတယ်။ သားသမီးတွေ ရလာတဲ့​အခါ သူတို့​သာမက၊ သားသမီးတွေပါ ဒုက္ခ​ရောက်​ကြရတယ်။ အိုမင်း​ပြီး သေဆုံး​သွား​ကြတယ်။ (ကမ္ဘာဦး ၃:၂၃။ ၅:၅) ကျွန်တော်​တို့​ဟာ အာဒံနဲ့ ဧဝ​ကနေ ဆင်းသက်​လာလို့ ဖျားနာ၊ အိုမင်း၊ သေဆုံး​ကြရတယ်။

“တစ်လောက​လုံး​က​တော့ ဆိုးညစ်​သူရဲ့ ဩဇာ​အောက်မှာ ရှိနေမှန်း ကျွန်တော်​တို့ သိတယ်။”—၁ ယောဟန် ၅:၁၉။

“ဆိုးညစ်သူ” ဟာ စာတန် ဖြစ်တယ်။ ဘုရားသခင်​ကို ပုန်ကန်​သူ၊ မျက်စိ​နဲ့​ မမြင်နိုင်​တဲ့ ဝိညာဉ်​သတ္တဝါ ဖြစ်တယ်။ (ယောဟန် ၈:၄၄။ ဗျာဒိတ် ၁၂:၉) နောက်ပိုင်း​မှာ တခြား ဝိညာဉ်​သတ္တဝါ​တွေ​လည်း စာတန်​နောက် လိုက်ကြတယ်။ သူတို့ကို နတ်ဆိုးတွေလို့ ခေါ်​တယ်။ နတ်ဆိုးတွေက မိမိတို့ရဲ့ တန်ခိုး​ကို သုံးပြီး လူတွေကို လှည့်စားတယ်၊  ဖန်ဆင်း​ရှင်​နဲ့ ဝေး​သွား​အောင် လုပ်ကြတယ်။ လူတွေ​အပေါ် မကောင်းတဲ့​ ဩဇာ လွှမ်းမိုးတယ်။ (ဆာလံ ၁၀၆:၃၅-၃၈။ ၁ တိမောသေ ၄:၁) လူတွေ ဒုက္ခ​ရောက်​ပြီး နာကျင်​ရင် စာတန်​နဲ့ နတ်ဆိုး​တွေ သိပ်​ပျော်​တယ်။

“လူဟာ မျိုးစေ့ကြဲ​တဲ့​အတိုင်း ရိတ်သိမ်း​ရလိမ့်မယ်။” —ဂလာတိ ၆:၇။

ကျွန်တော်​တို့အားလုံး အပြစ်ကို အမွေ​ရထားလို့၊ လောကကို စာတန် လွှမ်းမိုး​နေလို့ နည်း​အမျိုးမျိုးနဲ့ ဒုက္ခ​ရောက်​ကြတယ်။ ဒါပေမဲ့ လူတွေဟာ ကိုယ့်​ဒုက္ခ ကိုယ်​ရှာ​တဲ့​အခါလည်း ရှိတယ်။ ဘယ်လို​နည်းနဲ့လဲ။ မကောင်းတာတွေ လုပ်တဲ့​အခါ၊ ဆုံးဖြတ်ချက် အမှားတွေ ချ​တဲ့​အခါ ဆိုးကျိုး​တွေ ခံစား​ရတယ်။ ဒါပေမဲ့ လူတွေ ကောင်း​တာ​ လုပ်ရင်​တော့ ကောင်းကျိုး ခံစား​ရတယ်။ ဥပမာ၊ ခင်ပွန်း​လည်း​ ဖြစ်၊ ဖခင်​လည်း ဖြစ်သူ​က ရိုးသား​တယ်၊ အလုပ်​ကြိုးစား​တယ်၊ မိသားစုကိုလည်း ချစ်တယ်​ဆိုရင် ကောင်းကျိုးတွေ​ ခံစား​ရပြီး မိသားစု​လည်း ပျော်​မယ်။ ဒါပေမဲ့ လောင်းကစား လုပ်မယ်၊ သောက်ကြူး​မယ်၊ ပျင်း​တယ် ဆိုရင်တော့ ကိုယ်တိုင်​ရော မိသားစု​ပါ ဆင်းရဲ​မယ်။ ဒါ​ကြောင့် ဖန်ဆင်း​ရှင်​ရဲ့ စကား​ကို နားထောင်တာက ပညာ​ရှိတယ်။ ဘုရား​က ကျွန်တော်​တို့ကို ကောင်းကျိုး ခံစား​စေချင်တယ်၊ “ငြိမ်သက်​အေးချမ်း” စေချင်တယ်။—ဆာလံ ၁၁၉:၁၆၅။

“နောက်ဆုံး​ကာလ [မှာ] . . . လူတွေဟာ ကိုယ့်ကိုယ်ကိုယ်ပဲ ချစ်တဲ့​သူ၊ ငွေ​ကို​တပ်မက်သူ၊ . . . မိဘ​စကား နားမထောင်​သူ၊ . . . မချုပ်တည်း​နိုင်​သူ၊ ကြမ်းကြုတ်သူ၊ ကောင်းမြတ်​ရာ​ကို မုန်းတီး​သူ” ဖြစ်​ကြလိမ့်မယ်။—၂ တိမောသေ ၃:၁-၅။

အခုခေတ် လူများစွာဟာ ကျမ်းစာ​မှာ ကြို​ဟောထားတဲ့​အတိုင်း ပြုမူ​ကျင့်ကြံ​နေကြ​တယ်။ သူတို့ရဲ့ အကျင့်အကြံ​တွေ​က “နောက်ဆုံး​ကာလ” မှာ အသက်ရှင်နေ​ရတယ်ဆိုတဲ့ အထောက်အထား​တွေ​ပဲ။ ကျွန်တော်​တို့​ခေတ်​မှာ စစ်ပွဲ​တွေ ဖြစ်​မယ်၊ အစာ ခေါင်းပါး​မယ်၊ ငလျင်​ကြီး​တွေ လှုပ်​မယ်၊ ကပ်ရောဂါ​တွေ ဖြစ်​မယ်လို့လည်း ကျမ်းစာ​မှာ ကြိုပြော​ထား​တယ်။ (မဿဲ ၂၄:၃၊ ၇၊ ၈။ လုကာ ၂၁:၁၀၊ ၁၁) အဲဒါတွေကြောင့်​လည်း လူတွေ ဆင်းရဲ​ဒုက္ခရောက်ကြတယ်၊ သေကြ​ရတယ်။