စိတ်ဖိစီးမှု​ဆိုတာ ရင်ဆိုင်​ရတဲ့ အခြေအနေ​တစ်ခုအတွက် ခန္ဓာကိုယ်ရဲ့ တုံ့ပြန်မှု​ဖြစ်တယ်။ ဦးနှောက်​က ဟော်မုန်းတွေ ထုတ်လွှတ်​ပေးတယ်။ ဒါကြောင့် နှလုံးခုန်​နှုန်း မြန်လာတယ်။ သွေးတိုး တက်လာတယ်။ အသက်ရှူ မြန်လာတယ်။ ကြွက်သားတွေ တင်းလာတယ်။ ကိုယ်သတိမထား​မိ​လိုက်​ခင်မှာ​ပဲ ခန္ဓာကိုယ်က တုံ့ပြန်​ဖို့ အသင့်​ဖြစ်နေပြီ။ စိတ်ဖိစီးမှု ပြေသွား​တဲ့အခါ​မှ ခန္ဓာကိုယ်က “အသင့်​အနေအထား” ကနေ ပုံမှန်​ပြန်​ဖြစ်သွားတယ်။

စိတ်ဖိစီးမှု​ဆိုတာ အခက်အခဲ ဒါမှမဟုတ် အန္တရာယ်​ရှိတဲ့ အခြေအနေကို ရင်ဆိုင်​ဖြေရှင်းဖို့ အသင့်​ဖြစ်စေတဲ့ သဘာဝ တုံ့ပြန်မှု​ဖြစ်တယ်။ တုံ့ပြန်မှု​ဟာ ဦးနှောက်​ကနေ အစ​ပြုတယ်။ ကောင်းတဲ့ စိတ်ဖိစီးမှု​ကြောင့် ချက်ချင်း တုံ့ပြန်​ဆောင်ရွက်​နိုင်တယ်။ စာမေးပွဲ​ဖြေချိန်၊ အလုပ်​အင်တာဗျူး ဒါမှမဟုတ် အားကစား​ပြိုင်ပွဲဝင်​ချိန်​တွေ​မှာ စိတ်ဖိစီးမှု အသင့်အတင့်​ရှိတာ​က ကိုယ့်ရဲ့​ပန်းတိုင်​ရောက်​ဖို့၊ ပို​ကောင်း​အောင်လုပ်ဖို့ ကူညီ​ပေး​နိုင်တယ်။

ဒါပေမဲ့ ရေရှည်၊ အပြင်းအထန် စိတ်ဖိစီး​နေတာ​ကတော့ အန္တရာယ်​ရှိတယ်။ ခန္ဓာကိုယ်က ခဏခဏ ဒါမှမဟုတ် အမြဲ “အသင့်​အနေအထား” ဖြစ်နေရင် ကာယပိုင်း၊ စိတ်ပိုင်း ထိခိုက်လာ​နိုင်တယ်။ တခြား​သူတွေကို ပြုမူ​ဆက်ဆံပုံ အပါအဝင် သင့်​အ​ပြု​အမူ ပြောင်းလာ​နိုင်တယ်။ ရေရှည်​စိတ်ဖိစီး​နေတာ​က ဆေးဝါး​အလွဲသုံး​တာ၊ မှားယွင်းတဲ့​နည်းနဲ့ ဖြေရှင်းဖို့ ကြိုးစားတာ​တွေ ဖြစ်စေ​နိုင်တယ်။ စိတ်ဓာတ်ကျ​တာ၊ စိတ်ပန်းလူပန်း​ဖြစ်တာ၊ ကိုယ့်ကိုယ်ကိုယ် အဆုံးစီရင်​ဖို့ စဉ်းစား​တာ​တွေ​တောင် ဖြစ်စေ​နိုင်တယ်။

စိတ်ဖိစီးမှု​က လူတိုင်း​အပေါ် တစ်​ပုံစံ​တည်း သက်ရောက်မှု​ရှိတာ မဟုတ်ပေမဲ့ ရောဂါ​အမျိုးမျိုး ဖြစ်စေ​နိုင်တယ်။ ခန္ဓာကိုယ် အစိတ်အပိုင်း အားလုံးနီးပါး​ကို ထိခိုက်​စေနိုင်တယ်။