သင်ဘယ်လိုသိထားသလဲ

မှန်၊ မှား ဖြည့်ကြည့်ပါ။

မှန် မှား

1. ၁။ ယေဟောဝါသက်သေတွေဟာ ခရစ်ယာန်ဖြစ်တယ်။

2. ၂။ ယေဟောဝါသက်သေတွေဟာ ဖန်ဆင်းခြင်းဝါဒီတွေဖြစ်တယ်။

3. ၃။ ယေဟောဝါသက်သေတွေဟာ ဆေးကုသမှုကို လက်မခံဘူး။

4. ၄။ ယေဟောဝါသက်သေတွေဟာ ကျမ်းစာတစ်အုပ်လုံးကို လက်ခံတယ်။

5. ၅။ ယေဟောဝါသက်သေတွေဟာ သူတို့ရဲ့ ကိုယ်ပိုင်ကျမ်းစာကိုပဲ သုံးကြတယ်။

6. ၆။ ယေဟောဝါသက်သေတွေဟာ သူတို့ ယုံကြည်ချက်နဲ့ ကိုက်ညီအောင် ကျမ်းစာကို ပြုပြင်ထားတယ်။

7. ၇။ ယေဟောဝါသက်သေတွေဟာ အများအကျိုး ဆောင်လုပ်ငန်းမှာ မပါဝင်ကြဘူး။

8. ၈။ ယေဟောဝါသက်သေတွေဟာ တခြားဘာသာဝင်တွေကို အထင်သေးတယ်။

အဖြေတွေကို သိနိုင်ဖို့ ဆက်ဖတ်ကြည့်ပါ။

1.  ၁ မှန်။ ယေဟောဝါသက်သေတွေက ယေရှုရဲ့သွန်သင်ခြင်းနဲ့ စံနမူနာကို အနီးကပ်လိုက်လျှောက်တယ်။ (၁ ပေတရု ၂:၂၁) ဒါပေမဲ့ တခြားခရစ်ယာန်တွေနဲ့ ကွာခြားချက်တွေရှိတယ်။ ဥပမာ၊ ယေရှုက သုံးပါးပေါင်းတစ်ဆူအဝင်မဟုတ်ဘဲ ဘုရားသခင်ရဲ့သားတော်ဖြစ်တယ်လို့ ကျမ်းစာက သွန်သင်တယ်ဆိုပြီး ကျွန်တော်တို့ယုံကြည်တယ်။ (မာကု ၁၂:၂၉) ဝိညာဉ်မသေနိုင်ဘူး၊ ဘုရားသခင်က လူတွေကို ငရဲမှာ ထာဝစဉ်ညှဉ်းဆဲတယ်ဆိုတဲ့ ယုံကြည်ချက်က ကျမ်းစာနဲ့ မကိုက်ညီဘူးလို့ ယုံကြည်တယ်။ ဘာသာရေးမှာ ဦးဆောင်တဲ့သူတွေကို တင်မြှောက်တဲ့ ဂုဏ်ထူးတွေ ရှိရမယ်ဆိုတာလည်း လက်မခံကြဘူး။—ဒေသနာ ၉:၅; ယေဇကျေလ ၁၈:၄; မဿဲ ၂၃:၈-၁၀။

2. ၂ မှား။ ဘုရားသခင်က အရာခပ်သိမ်းကို ဖန်ဆင်းတယ်လို့ ယေဟောဝါသက်သေတွေ ယုံကြည်တယ်။ ဒါပေမဲ့ ဖန်ဆင်းခြင်းဝါဒီတွေ ယုံကြည်သလိုမျိုးတော့ မဟုတ်ဘူး။ ဘာဖြစ်လို့လဲဆိုတော့ သူတို့ယုံကြည်ချက် အတော်များများက ကျမ်းစာနဲ့ မကိုက်ညီဘူး။ ဥပမာ၊ ဖန်ဆင်းခြင်းနေ့ရက် ခြောက်ရက်က နှစ်ဆယ့်လေးနာရီကြာတဲ့ ရက်ဖြစ်တယ်လို့ တချို့ယုံကြည်တယ်။ ဒါပေမဲ့ ကျမ်းစာမှာ “နေ့” လို့ ဖော်ပြတဲ့အခါ ကြာရှည်တဲ့အချိန်ကာလတစ်ခုကို ရည်ညွှန်းနိုင်တယ်။ (ကမ္ဘာဦး ၂:၄; ဆာလံ ၉၀:၄) ကမ္ဘာမြေကြီးသက်တမ်းက ထောင်ဂဏန်းလောက်ပဲရှိသေးတယ်လို့ ဖန်ဆင်းခြင်းဝါဒီတချို့က သွန်သင်တယ်။ ဒါပေမဲ့ ကမ္ဘာနဲ့ စကြဝဠာဟာ ဖန်ဆင်းခြင်းနေ့ရက် ခြောက်ရက်မတိုင်ခင်ကတည်းက ရှိနေပြီလို့ ကျမ်းစာက သွန်သင်တယ်။ ^၁—ကမ္ဘာဦး ၁:၁။

3. ၃ မှား။ ယေဟောဝါသက်သေတွေက ဆေးကုသမှုကို လက်ခံပါတယ်။ ပထမရာစုက ခရစ်ယာန်ဖြစ်တဲ့ လုကာလိုပဲ ကျွန်တော်တို့ထဲမှာ ဆရာဝန်တွေတောင် ရှိတယ်။ (ကောလောသဲ ၄:၁၄) ဒါပေမဲ့ ကျမ်းစာနဲ့ ဆန့်ကျင်တဲ့ ဆေးကုသမှုကိုတော့ လက်မခံဘူး။ ဥပမာ၊ ကျမ်းစာက သွေးကိုရှောင်ပါလို့ ပြောတဲ့အတွက် သွေးသွင်းတာကို လက်မခံဘူး။ —တမန်တော် ၁၅:၂၀၊ ၂၈၊ ၂၉။

   ကျွန်တော်တို့ကိုယ်တိုင်နဲ့ မိသားစုအတွက် အကောင်းဆုံးဆေးကုသမှုကို ရရှိချင်ပါတယ်။ သက်သေခံလူနာတွေကို ကူညီပေးရင်းနဲ့ ပေါ်ထွက်လာတဲ့ သွေးမဲ့ကုသနည်းတွေကို အခုဆိုရင် တခြားသူတွေအတွက်လည်း အသုံးပြုနေပြီ။ နိုင်ငံများစွာမှာ လူနာတွေဟာ သွေးမသွင်းဖို့ ရွေးချယ်နိုင်ကြတယ်။ ဒါကြောင့် သွေးကနေတစ်ဆင့် ကူးစက်တဲ့ရောဂါတွေ၊ ကိုယ်ခံအားစနစ်ဖောက်ပြန်မှုတွေနဲ့ သွေးမှားသွင်းမိတာတွေကို ရှောင်ရှားနိုင်ကြပါတယ်။

4. ၄ မှန်။ ကျမ်းစာတစ်အုပ်လုံးက ‘ဘုရားသခင့်စွမ်းအားတော် လမ်းညွှန်မှုနဲ့ ရေးထားလို့ အကျိုးရှိတယ်’ လို့ ယေဟောဝါသက်သေတွေ ယုံကြည်တယ်။ (၂ တိမောသေ ၃:၁၆) ကျမ်းစာတစ်အုပ်လုံးလို့ ပြောတဲ့အခါ ဓမ္မဟောင်းကျမ်းရော ဓမ္မသစ်ကျမ်းရောပါတယ်။ ကျွန်တော်တို့ကတော့ ဟေဗြဲကျမ်းစောင်တွေနဲ့ ခရစ်ယာန်ဂရိကျမ်းစောင်တွေလို့ ခေါ်တယ်။ အဲဒီလိုခေါ်ရတဲ့အကြောင်းရင်းက သမ္မာကျမ်းစာရဲ့အပိုင်းတချို့ဟာ ခေတ်ကုန်သွားတယ် ဒါမှမဟုတ် ကျွန်ုပ်တို့နဲ့ မသက်ဆိုင်ဘူးလို့ မယူဆစေချင်လို့ဖြစ်တယ်။

5.  ၅ မှား။ ယေဟောဝါသက်သေတွေက ကျမ်းစာလေ့လာတဲ့အခါ ဘာသာပြန်ကျမ်း အမျိုးမျိုး ကို သုံးကြတယ်။ ကိုယ့်ရဲ့ဘာသာစကားနဲ့ ကမ္ဘာသစ်ဘာသာပြန်ကျမ်း ရှိရင်တော့ အဲဒီကျမ်းကို သုံးတယ်။ အဲဒီကျမ်းမှာ ဘုရားနာမည်ပါတဲ့အပြင် တိကျမှန်ကန်ပြီး ရှင်းလင်းလို့ပဲ။ ဘုရားသခင့်နာမည်ဖြစ်တဲ့ ‘ယေဟောဝါ’ ကိုသုံးတာနဲ့ ပတ်သက်ပြီး စဉ်းစားကြည့်ပါ။ ဘာသာပြန်ကျမ်းတစ်ခုရဲ့ နိဒါန်းမှာ အဲဒီကျမ်း ဖြစ်မြောက်ဖို့ အဘက်ဘက်ကနေ ကူညီပံ့ပိုးပေးခဲ့ကြသူ ၇၉ ဦးရဲ့ နာမည်တွေရေးထားတယ်။ ဒါပေမဲ့ ကျမ်းစာရဲ့ အာဘော်ရှင် ယေဟောဝါကိုတော့ ချန်လှပ်ထားတယ်။ ကမ္ဘာသစ်ဘာသာပြန်ကျမ်း မှာတော့ ဘုရားသခင့်နာမည်ကို မူရင်းမှာပါတဲ့ နေရာတိုင်းမှာ ထည့်ပေးထားတယ်။ ^၂

6. ၆ မှား။ ယေဟောဝါသက်သေတွေက သူတို့ရဲ့ ယုံကြည်ချက်ဟာ ကျမ်းစာနဲ့မကိုက်ညီဘူး ဆိုတာ သိတဲ့အခါ ကျမ်းစာနဲ့အညီ ပြောင်းလဲကြတယ်။ ၁၉၅၀ ပြည့်နှစ်မှာ ကမ္ဘာသစ် ဘာသာပြန်ကျမ်းကို ထုတ်ဝေတယ်၊ အဲဒီမတိုင်ခင် ရရှိနိုင်တဲ့ ဘာသာပြန်ကျမ်းတွေကို အသုံးပြုခဲ့တယ်။ သူတို့ယုံကြည်ချက်ကလည်း အဲဒီကျမ်းတွေအပေါ် အခြေပြုတယ်။

7. ၇ မှား။ ယေဟောဝါသက်သေတွေရဲ့ လုပ်ဆောင်မှုက တခြားသူတွေကို အကျိုးပြုတယ်။ မူးယစ်ဆေးသုံးတာ၊ အရက်အလွန်အကျွံသောက်တာ စတဲ့ အကျင့်ဆိုးတွေကို ကျော်လွှားနိုင်အောင် လူတွေကို ကူညီပေးတယ်။ စာရေးတတ်၊ ဖတ်တတ်လာအောင်လည်း ကူညီပေးတယ်။ သဘာဝဘေးကျရောက်တဲ့အခါ သက်သေခံတွေကိုရော တခြားသူတွေကိုပါ ကူညီပေးတယ်။ အဲဒီအချိန်မှာ လူတွေ တကယ်လိုအပ်နေတဲ့ စိတ်ပိုင်းဆိုင်ရာနဲ့ ဝတ်ပြုရေးဆိုင်ရာ အကူအညီတွေလည်း ပေးတယ်။ ^၃

8. ၈ မှား။ “ခပ်သိမ်းသောသူတို့ကို ရိုသေ” ပါဆိုတဲ့ ကျမ်းစာအကြံပေးချက်ကို ယေဟောဝါသက်သေတွေ လိုက်နာကြတဲ့အတွက် ဘယ်ဘာသာဝင်ကိုမဆို လေးစားမှုပြတယ်။ (၁ ပေတရု ၂:၁၇၊ သမ္မာကျမ်း) ဥပမာ၊ နိုင်ငံတချို့မှာ ယေဟောဝါသက်သေ အများကြီးရှိပေမဲ့ တခြားဘာသာဝင်တွေကို ဖိနှိပ်ချုပ်ချယ်ဖို့ အစိုးရအာဏာပိုင်တွေကို ဖိအားမပေးကြဘူး။ ကျွန်တော်တို့ရဲ့ စံနှုန်း၊ ဘာသာရေးခံယူချက်တွေနဲ့ ကိုက်ညီတဲ့ ဥပဒေတွေ ချမှတ်ပေးဖို့ လှုပ်ရှားမှုတွေလည်း မလုပ်ကြဘူး။ တခြားသူတွေ ကျွန်တော်တို့ကို ဆက်ဆံစေချင်တဲ့အတိုင်း တခြားသူတွေကို ဆက်ဆံကြတယ်။—မဿဲ ၇:၁၂။

ဒီဆောင်းပါးမှာ ကျွန်တော်တို့ရဲ့ တရားဝင်ဝက်ဘ်ဆိုက် jw.org/mya ကနေ ကောက်နုတ်ထားတဲ့ အချက်အလက်တွေပါတယ်။ ပိုသိချင်ရင် ကျွန်ုပ်တို့ အကြောင်း > မေးတတ်တဲ့ မေးခွန်းများ မှာကြည့်ပါ။