ကျမ်း​စာ​မှာ ဂေါ​လျတ်ရဲ့​အရပ်​ကို ‘ခြောက်​တောင်​တစ်​ထွာ​မြင့်​တယ်’ လို့​ပြော​ထား​တယ်။ (၁ ဓမ္မရာ​ဇ​ဝင် ၁၇:၄) အဲ​ဒါ​က ၉ ပေခွဲ​နီး​ပါး​ရှိ​တယ်။ ဒါ​ပေမဲ့ တ​ချို့​က ဂေါ​လျတ် အဲဒီ​လောက်​မမြင့်​ပါ​ဘူး​လို့ ပြော​ကြ​တယ်။ ဒါ​ဆို ဒီ​အချက်​ကို သုံးသပ်​ကြည့်​ပါ– ဒီ​ခေတ်​မှာ မှတ်​တမ်း​အရ အရပ်​အရှည်​ဆုံး​လူ​က ၈ ပေနဲ့ ၁၁ လက်​မကျော် ရှိ​တယ်။ ဂေါ​လျတ်​အနေ​နဲ့ နောက်​ထပ် ၆ လက်​မ ဒါ​မှ​မဟုတ် အဲဒီ​ထက်​ပို​ရှည်​ဖို့​ဆို​တာ မဖြစ်​နိုင်​ပုံ​ပေါက်​နေ​သလား။ ဒါ့​အပြင် ဂေါ​လျတ်​က လူ​ထွား​ကြီး​တွေလို့ လူ​သိ​များ​တဲ့ ရေ​ဖိမ်​အမျိုး​အနွယ်​က​နေ ဆင်း​သက်​လာ​သူ​ဖြစ်​တယ်။ ဘီ​စီ ၁၃ ရာ​စု​က အီဂျစ်​လူမျိုး​တွေရဲ့ မှတ်​တမ်း​တစ်​ခု​မှာ ခါနာန်​ပြည်​က သန်​မာ​ထွား​ကြိုင်း​တဲ့ စစ်​သည်​တွေ​ဟာ အရပ် ၈ ပေကျော်​ရှိ​တယ်​လို့ ဖော်ပြထား​တယ်။ ဒါ​ကြောင့် ဂေါ​လျတ်ရဲ့ အရပ်​က တစ်​မူ​ထူး​ခြား​နေ​ပေမဲ့ တ​ကယ်​ဖြစ်​နိုင်​ပါ​တယ်။

တစ်​ချိန်​တုန်း​က ပညာ​ရှင်​တွေ​ဟာ ဘု​ရင်​ဒါဝိဒ်​ကို ဒဏ္ဍာရီ​ထဲ​က ပု​ဂ္ဂိုလ်​တစ်​ယောက်​အဖြစ် လူ​တွေ​ထင်​အောင် ကြိုး​စား​ခဲ့​ကြ​တယ်။ ဒါ​ပေမဲ့ အဲဒီ​လို​လုပ်​ဖို့​ဆို​တာ မဖြစ်​နိုင်​ဘူး။ ရှေး​ဟောင်း​သု​တေ​သီ​တွေ​ဟာ “ဒါဝိဒ်ရဲ့ အိမ်​တော်” လို့ စာ​တန်း​ပါ​တဲ့ ရှေး​ခေတ်​ကျောက်​စာ​တစ်​ချပ်​ကို တွေ့​ရှိ​ခဲ့​ကြ​တယ်။ ဒါ့​အပြင် ယေရှု​ခ​ရစ်​ကိုယ်​တိုင်​ကလည်း ဒါဝိဒ်​ကို တ​ကယ့်​ပု​ဂ္ဂိုလ်​တစ်​ယောက်​အဖြစ် ဖော်ပြခဲ့​တယ်။ (မဿဲ ၁၂:၃; ၂၂:၄၃-၄၅) ယေရှု​ဟာ မေရှိ​ယ​ဖြစ်​မှန်း အသေး​စိတ်​ကျ​တဲ့ ဆွေ​စဉ်​မျိုး​ဆက်​ဇ​ယား​နှစ်​ခု​မှာ ဖော်ပြထား​တယ်။ အဲဒီ​ဇယား​နှစ်​ခု​စ​လုံး​မှာ ယေရှု​ဟာ ဘု​ရင်​ဒါဝိဒ်ရဲ့​မျိုး​ရိုး​က​နေ ဆင်း​သက်​လာ​တယ်​လို့ ဖော်ပြထား​တယ်။ (မဿဲ ၁:၆-၁၆; လုကာ ၃:၂၃-၃၁) ဒါ​ကြောင့် ဒါဝိဒ်​ဟာ သက်​ရှိ​ထင်​ရှား​ရှိ​ခဲ့​တဲ့ ပု​ဂ္ဂိုလ်​ဆို​တာ ရှင်း​ရှင်း​လင်း​လင်း နား​လည်​နိုင်​တယ်။

ကျမ်း​စာ​မှာ စစ်​ပွဲ​ကို ဧ​လာ​ချိုင့်​ဝှမ်း​မှာ ဖြစ်​ခဲ့​တယ်​လို့ ဖော်ပြထား​တယ်။ ဒါ​ပေမဲ့ တိ​တိ​ကျ​ကျ​ပြော​ရရင် ဖိလိတ္တိ​လူ​တွေ​ဟာ တောင်​စောင်း​ရဲ့​တစ်​ဖက်​ခြမ်း စော​ခေါ​မြို့​နဲ့ အဇေ​ကာ​မြို့​စပ်​ကြား​မှာ တပ်​ချ​တယ်​လို့ ​ဖော်ပြထား​တယ်။ အစ္စရေး​လူ​တွေ​က​တော့ ချိုင့်​ဝှမ်း​ရဲ့ တ​ခြား​ဖက်​ခြမ်း​မှာ တပ်​ချ​ကြ​တယ်။ ဒါ​ဆို တ​ကယ့်​နေ​ရာ​အမှန်​က ဘယ်​နေ​ရာ​လဲ။

မကြာ​သေး​ခင်​က​မှ အဲဒီ​နေ​ရာ​ကို အလည်​သွား​ခဲ့​တဲ့ လူ​တစ်​ယောက် အခု​လို​ပြော​တယ်– “ဧည့်​လမ်း​ညွှန်​က ဘာ​သာ​တ​ရား​ကို စိတ်​ဝင်​စား​တဲ့​သူ မဟုတ်​ပေမဲ့ ကျွန်​တော်​တို့​ကို ဧ​လာ​ချိုင့်​ဝှမ်း​ဆီ ခေါ်​သွား​တယ်။ ဒါ​နဲ့ တောင်​ထိပ်​ကို သွား​တဲ့​လမ်း​အတိုင်း ကျွန်​တော်​တို့ တက်​သွား​ကြ​တယ်။ သူ​က အဲဒီ​က​နေ ချိုင့်​ဝှမ်း​ကို လှမ်း​ကြည့်​ရင်း ကျွန်​တော်​တို့​ကို ၁ ဓမ္မရာ​ဇ​ဝင် ၁၇:၁-၃ ဖတ်​ခိုင်း​တယ်။ ပြီး​တော့ ချိုင့်​ဝှမ်း​ဘက်​ကို လက်​ညှိုး​ထိုး​ပြီး ‘ခင်​ဗျား​တို့​ရဲ့ ဘယ်​ဘက်​က စော​ခေါ​မြို့​အပျက်​အယွင်း၊ ညာ​ဘက်​က​တော့ အဇေ​ကာ​မြို့​အပျက်​အယွင်း​ပေါ့။ ဖိလိတ္တိ​လူ​တွေ​က ဒီ​မြို့​နှစ်​မြို့​စပ်​ကြား​မှာ တပ်​ချ​ခဲ့​တယ်။ ခင်​ဗျား​တို့ မျက်​နှာ​ချင်း​ဆိုင်​က တောင်​စောင်း​တစ်​နေ​ရာရာ​ပေါ့​ဗျာ။ ကျွန်​တော်​တို့​ရပ်​နေ​တာ​ကျ​တော့ အစ္စရေးတွေ တပ်​ချ​ခဲ့​တဲ့​နေ​ရာ​ပေါ့’ လို့​ပြော​တယ်။ ဒါ​ဆို ရှော​လု​နဲ့​ဒါဝိဒ် ရပ်ခဲ့​တဲ့​နေ​ရာ​ဟာ အခု ကျွန်တော် ရပ်​နေ​တဲ့​နေ​ရာ​ပေါ့​လို့ စဉ်း​စား​မိ​တယ်။ အဲဒီ​နောက် ကျွန်တော်​တို့ ပြန်​ဆင်း​လာ​ပြီး ချိုင့်​ဝှမ်း​ကို ဖြတ်​ကူး​ကြ​တယ်။ အဲဒီ​နေ​ရာ​က အများ​အား​ဖြင့် ခြောက်​သွေ့​ပြီး ကျောက်​တုံး​ပေါ​တယ်။ ကျွန်တော် မြင်​ယောင်​မိ​တာ​က ဒါဝိဒ် ဒီ​နေ​ရာ​မှာ ကျောက်​စ​ရစ်​ငါး​လုံး ကောက်​တယ်၊ ကျောက်​ခဲ​တစ်​လုံး​နဲ့ ဂေါ​လျတ်​ကို သတ်​ပစ်​ခဲ့​တယ်​ဆို​တာ​ပဲ။” အဲဒီ​လူ​လို​ပဲ လူ​အများ​စု​လည်း ကျမ်း​စာ​ရဲ့ အသေး​စိတ်​ကျ​တဲ့ ဖြစ်​ရပ်​မှန်​မှတ်​တမ်း​နဲ့ ပတ်​သက်​ပြီး တ​အံ့​တ​သြဖြစ်​ကြ​တယ်။

ဒီ​သမိုင်း​ဖြစ်​ရပ်​မှန်​နဲ့​ပတ်​သက်​ပြီး သံ​သယ​ဖြစ်​စ​ရာ​အကြောင်း လုံး​ဝ​မရှိ​ပါ​ဘူး။ အကြောင်း​က တ​ကယ့်​ပု​ဂ္ဂိုလ်တွေ၊ တ​ကယ့်​နေ​ရာတွေ ပါ​ဝင်​လို့​ပါ။ အရေး​ကြီး​ဆုံး​က​တော့ ဒီ​အကြောင်း​အရာတွေ​ဟာ သမ္မာ​ကျမ်း​စာ​ထဲ​မှာ ပါ​ဝင်​ပြီး ‘မု​သား​နဲ့​ကင်း​စင်’ တဲ့ ဘု​ရား​သခင်​ဆီ​က​ လာလို့​ပါ​ပဲ။—တိတု ၁:၂; ၂ တိမောသေ ၃:၁၆။